ဝၼ်းတီႈ 23/04/2026 ၼႆႉ ဢမေႊရိၵၼ်ႊပိုၼ်ၽၢဝ်ႇဢွၵ်ႇမႃးဝႃႈ – တႃႇတေယိုတ်းသိမ်းလႆႈ ၵၢၼ်လႅၼ်ၵိၼ်ငိုၼ်းတင်းဢွၼ်ႊလၢႆႊ ၵျႃႊၽျႅၼ်ႉၼၼ်ႉ ၽႂ်ပၼ်လႆႈငိူၼ်ႈၶၢဝ်ႇ ငဝ်ႈငုၼ်းလႅၼ်ငိုၼ်းတင်းဢွၼ်ႊလၢႆႊ Tai Chang ဢၼ်မီးဝႆႉ ၼႂ်းမိူင်းယၢင်းၽိူၵ်ႇ (ၼႂ်းၼႃႈလိၼ်သိုၵ်းယၢင်း DKBA ၵုမ်းၵမ်)လႆႈၸိုင် တေပၼ်ငိုၼ်းသူး ၻေႃႊလႃႊ 10 လၢၼ်ႉ ဝႃႈၼႆ။
ႁွင်ႈၵၢၼ်ၽွင်းလူင် ၽၼ်ႇတႃႇငိုၼ်းတွင်း ဢမေႊရိၵၼ်ႊ လၢတ်ႈဝႆႉဝႃႈ – ၸုမ်းႁဵတ်းၵၢၼ်ႁၢႆႉ ရႃႇၸဝၢတ်ႈ (TCOs) ဢၼ်ပၵ်းငဝ်ႈဝႆႉတီႈ ဢေႊသျႃႊ ၸဵင်ႇၸၢၼ်းဝၼ်းဢွၵ်ႇၼၼ်ႉ လုၵ်ႉတီႈဢွၼ်ႊလၢႆႊသေ လႅၼ်ၵိၼ်ငိုၼ်းၵူၼ်းတင်းလုမ်ႈၾႃႉဝႆႉ၊ ပိူင်လူင် ၵူၼ်းမိူင်းဢမေႊရိၵၼ်ႊ တူၵ်းပဵၼ်ယိူဝ်ႇ ပဝ်ႉမၢႆၶဝ်ဝႆႉ။ ၼႂ်းပီ 2025 ပူၼ်ႉမႃးၼႆႉ ယွၼ်ႉၸုမ်းလွၵ်ႇလႅၼ်ၵိၼ်ငိုၼ်း တင်းဢွၼ်ႊလၢႆႊသေ ၵူၼ်းမိူင်းဢမေႊရိၵၼ်ႊ သုမ်းၸွမ်းငိုၼ်း မွၵ်ႈ ၻေႃႊလႃႊ 7.2 ပီႊလီႊယႅၼ်ႊ (တေႃႇလႃႇ 7000 လၢၼ်ႉပၢႆ) ဝႃႈၼႆ။
ၸုမ်းလႅၼ်ၵိၼ်ငိုၼ်းတင်းဢွၼ်ႊလၢႆႊ Tai Chang ၼႆႉ ပၵ်းငဝ်ႈဝႆႉတီႈ ၼႂ်းမိူင်းယၢင်းၽိူၵ်ႇ လႅၼ်လိၼ် ထႆး-မၢၼ်ႈ၊ ပိူင်ယႂ်ႇမၼ်း တေၸႂ်ႉလၢႆးလူင်းတိုၼ်းလၢႆး ၶရိပ်ႊတူဝ် ၶႃႊရဵၼ်ႊသီႊ (Cryptocurrency) သေ ၸတ်းၵၢၼ်တႅတ်ႈတေႃးဝႆႉ။
ၼႂ်းၶေႃႈပိုၼ်ၽၢဝ်ႇဢမေႊရိၵၼ်ႊတႄႉ ပႃးဝႆႉဝႃႈ – ဢွင်ႈတီႈၸုမ်းလႅၼ်ငိုၼ်းတင်းဢွၼ်ႊလၢႆႊ Tai Chang (ၵျႃႊၽျႅၼ်ႉ) ၼႂ်းမိူင်းယၢင်းၽိူၵ်ႇၼၼ်ႉ ပၵ်းဝႆႉ 3 တီႈ။ ပၼ်ၸိုဝ်ႈဝႆႉဝႃႈ ၵျွၵ်ႉၶတ်ႉ (ကျောက်ခတ်) ၶႃႊသီႊၼူဝ်ႊ(ဢမ်ႇၼၼ်) ပၢင်သဝ်း ၵူဝ်ႇၸၢႆး၊ ထႅင်ႈဢၼ်ၼိုင်ႈသမ်ႉ ပၼ်ၸိုဝ်ႈဝႆႉဝႃႈ ထၢႆႉ (ဢမ်ႇၼၼ်) ပၢင်သဝ်း ၶျိၼ်ႇသူင်း (ချင်ဆုန်း)။
သင်ၽႂ်မီးၶေႃႈမုလ်း ၵဵဝ်ႇၵပ်းၸုမ်းလႅၼ်ငိုၼ်းတင်းဢွၼ်ႊလၢႆႊ Tai Chang ၵေႃႈ ႁႂ်ႈၵပ်းသိုပ်ႇတီႈလုမ်းၽွင်းတၢင်ဢမေႊရိၵၼ်ႊ ဢမ်ႇၼၼ် မၢႆဢီးမေးလ် [email protected] ဝႃႈၼႆဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ