ပိဝ်ႇသေႃးထီး ၸုမ်းၶွၼ်ႉတဝ်ႉသိုၵ်းမၢၼ်ႈ ဢၼ်ၼႄၼႃႈတိူဝ်ႈဝႃႈ ဢဝ်ႁူမ်ႇလူမ်ႈ ဝၢၼ်ႈ ၺွင်ႇဝုၼ်း (အရှေ့ညောင်ဝန်း) ၼႂ်းဢိူင်ႇသလႄးဢူး ၸႄႈဝဵင်းယွင်ႁူၺ်ႈၼၼ်ႉ လၼ်ႇၵွင်ႈလႄႈ မၢၵ်ႇၵွင်ႈတိူဝ်ႉၺႃး ၼၢင်းယိင်းဢွၼ်ႇၵူၼ်းဢမ်ႇၶႅင်ႁႅင်းၵေႃႉၼိုင်ႈ လႆႈႁၢမ်သူင်ႇႁူင်းယႃ ယင်းပႆႇၸၢင်ႈပွၵ်ႈႁိူၼ်းၶိုၼ်း ။
ၼႂ်းၵၢင်လိူၼ်ဢေႊပရိူဝ်ႊလ် ဝၼ်းတီႈ 16 ယၢမ်းၵၢင်ၶမ်ႈ 10 မူင်း လုၵ်ႈၸုမ်းပိဝ်ႇသေႃးထီး ၵေႃႉၼိုင်ႈ ၸိုဝ်ႈႁွင်ႉ ဢႄႇပျႃး ဢႃယု 50 ပၢႆ မၼ်းၸၢႆးၵႂႃႇလႄႇ ႁိူၼ်းလုင်းၸေႃႇမိၼ်း ၼႂ်းဝၢၼ်ႈ ၺွင်ႇဝုၼ်း ၊ လူၺ်ႈတၢင်းမဝ်မၢင်မၼ်းသေ ဢဝ်ၵွင်ႈလၼ်ႇယိုဝ်းၺႃး လုၵ်ႈယိင်း လုင်းၸေႃႇမိၼ်း ၼၼ်ႉ ဝႃႈၼႆ ။
ၵူၼ်းၸၢႆးပိုၼ်ႉတီႈၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ -“တင်ႈၸႂ်ယိုဝ်းတႄႉဢမ်ႇၸႂ်ႈ ၊ ၽွင်းၵႂႃႇလႄႇ တီႈႁိူၼ်းလုင်းၸေႃႇမိၼ်းၼၼ်ႉ မၼ်းဢဝ်ၵွင်ႈမၼ်းဢွၵ်ႇၵပ်း။ မၢၵ်ႇၵွင်ႈလၼ်ဢွၵ်ႇသေ ၵႂႃႇတိူဝ်ႉၺႃးလုၵ်ႈယိင်း ၸဝ်ႈႁိူၼ်း ဢၼ်ပဵၼ် ၵူၼ်းဢမ်ႇၶႅင်ႁႅင်း(ပူဝ်ႇလီႇယူဝ်ႇ) ၼၼ်ႉမၢတ်ႇၸဵပ်းလႄႈ လႆႈႁၢမ်သူင်ႇႁူင်းယႃ ၊ ထိုင်မိူဝ်ႈၼႆႉတင်း ပႆႇလႆႈလူင်းႁူင်းယႃ ၊ ဢႄႇပျႃးၼၼ်ႉတႄႉ ၽိူဝ်ႇဝႃႈယိုဝ်းၺႃးယဝ်ႉၵေႃႈ လႅၼ်ႈပၢႆႈယဝ်ႉ”- ဝႃႈၼႆ။
ၼၢင်းယိင်း ၽူႈဢမ်ႇၶႅင်ႁႅင်း ဢၼ်ၺႃးမၢၵ်ႇၵွင်ႈတိူဝ်ႉသႂ်ႇၼၼ်ႉတႄႉ ဢႃယု မီးမွၵ်ႈ 25 ပီ ၊ မၢၵ်ႇၵွင်ႈတိူဝ်ႉတီႈၶႃ ၾၢႆႇသၢႆႉ ယၢမ်းလဵဝ် ယူတ်းယႃ တူဝ်ဝႆႉတီႈႁူင်းယႃ ၸဝ်ႈၸၢမ်ႇထုၼ်း ဝဵင်းတူၼ်ႈတီး ။
ပလိၵ်ႈသိုၵ်းမၢၼ်ႈ ယူႇဝၢၼ်ႈၼမ်ႉပၼ်ႇ လိုပ်ႈလမ်း တီႉၺွပ်း ဢႄႇပျႃး လႆႈသေ ဢဝ်ၵႂႃႇၵုမ်းၶင်ဝႆႉတီႈႁူင်းပလိၵ်ႈ ၼမ်ႉပၼ်ႇ ။ ၼႂ်းဝၼ်းတီႈ 20/4/2026 ၵၢင်ႉၵႄႇၵႂႃႇထုတ်ႇတူဝ်မၼ်းၸၢႆးဢွၵ်ႇမႃးၶိုၼ်းယဝ်ႉၼႆ- ၵူၼ်းပိုၼ်ႉတီႈလၢတ်ႈ ၼင်ႇၼႆ။
ၵူၼ်းၸၢႆးၼုမ်ႇၵေႃႉၼိုင်ႈယူႇၼႂ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၵေႃႉၺႃးယိုဝ်းတႄႉ ပႆႇလႆႈလူင်းႁူင်းယႃ ၊ ၵေႃႉယိုဝ်းၺႃးတႄႉ သမ်ႉပေႃးလွတ်ႈဢွၵ်ႇမႃးၶိုၼ်းယဝ်ႉ။ ပေႃးပဵၼ် ၸိူင်ႉၼႆၼႆ ပိဝ်ႇသေႃးထီး ဢၼ်ဝႃႈတေၵႅတ်ႇၶႄလွင်ႈႁူမ်ႇလူမ်ႈပၼ်ၵူၼ်းဝၢၼ်ႈၼၼ်ႉ – ၵူၼ်းဝၢၼ်ႈတေႁဵတ်းႁိုဝ်ယုမ်ႇၸႂ်လႆႈ ”- ဝႃႈၼႆ ။
ယၢမ်းလဵဝ် တီႈၼႂ်းၸႄႈဝဵင်းယွင်ႇႁူၺ်ႈၼႆႉ ပိဝ်ႇသေႃးထီးလႄႈ ပျီႇတူႉၸိတ်ႉပဢူဝ်းPNO ႁူမ်ႈၵၼ်ဢဝ်ႁူမ်ႇလူမ်ႈဝႆႉၸွမ်းဝၢၼ်ႈ လႄႈ ၸွမ်းၵဵတ်ႉလၢၼ်ႇသေ ၵူတ်ႇထတ်းၵူၼ်းၶဝ်ႈဢွၵ်ႇႁၢဝ်ႈႁႅင်း ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇၸၢင်ႈၵႂႃႇမႃး ထၢင်ႇႁၢင်ႈလွတ်ႈလႅဝ်း – ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ