ၸၢႆးၵူၼ်းဝၢၼ်ႈမျၢႆႇ ဝဵင်းဝၢၼ်ႈငႂ်ႈ (ယႂႃႇငၢၼ်ႇ) ၵေႃႉၼိုင်ႈ ထုၵ်ႇၼႄးဝႃႈ ပဵၼ်ၽူႈၸွပ်ႇပၼ်သိုၵ်းမၢၼ်ႈၼႆသေ ၺႃးၶႃႈႁႅမ်တၢႆ – ၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ၽႂ်ၵေႃႈဢမ်ႇႁတ်းႁဵတ်းၵၢင်ႉၵႄႇလႄႈၽူႈဢွၼ်ၼမ်း ၼႂ်းတူင်ႇတၢင်ႇပိုၼ်ႉတီႈ။
မိူဝ်ႈဝၼ်းတီႈ 26/11/2025 ယၢမ်းႁူဝ်ၶမ်ႈၼၼ်ႉ မီးၸုမ်းဢမ်ႇႁူႉၾၢႆႇၸုမ်းၼိုင်ႈၶဝ်ႈမႃးၼႂ်းႁိူၼ်းလင်ၼိုင်ႈသေ ဢဝ်မိတ်ႈပၢတ်ႇၶေႃးၸဝ်ႈႁိူၼ်းၵႂႃႇၼႆ – ၼၢင်းယိင်း ၵေႃႉယူႇၼႂ်းၸႄႈဝဵင်းဝၢၼ်ႈငႂ်ႈ ႁူႉႁၼ်ၸွမ်းပိူင်ပဵၼ်လွင်ႈၼႆႉ လၢတ်ႈၼႄတီႈၽူႈတွႆႇႁွၵ်ႈ ၼင်ႇၼႆ။
“ၵူၼ်းၸုမ်းၼၼ်ႉ ၸႂ်ႉမေးၸဝ်ႈႁိူၼ်းၼၼ်ႉ မၼ်းၶုပ်ႉၶဝ်ႇဝႆႉသေ ဢဝ်မိတ်ႈပၢတ်ႇ ၶေႃးၽူဝ်မၼ်းတေႃႇၼႃႈတေႃႇတႃႇမေးမၼ်းၵႂႃႇ ၊ မေးၼၢင်းမၼ်းတႄႉၶဝ်ဢမ်ႇႁႅမ် ၊ ၶဝ်ၼႄးဝႃႈ ၽူဝ်မၼ်းၼၼ်ႉ ပဵၼ်ၵူၼ်းၸွပ်ႇ ၶၢဝ်ႇပၼ်သိုၵ်းမၢၼ်ႈ ( ဒလန် ) ၼႆ။ မေးၼၢင်းမၼ်းတႄႉ ႁၼ်ၽူဝ်မၼ်းတၢႆၵႂႃႇတေႃႇၼႃႈတေႃႇတႃလႄႈပဵၼ်ဢၼ်တူၵ်းၸႂ်ယုပ်းၽၢၼ်ႈဝႆႉ”။
လႆႈႁူႉဝႃႈ ၵူၼ်းၸၢႆးဢၼ်ထုၵ်ႇၶႃႈႁႅမ်ၵႂႃႇၼၼ်ႉ ဢႃယု မီးၸမ် 30 ပီ ပဵၼ်ၵူၼ်းႁဵတ်းၵၢၼ်ၽုၵ်ႇသွမ်ႈ ႁႃၸဝ်ႉၵိၼ်ၶမ်ႈသေ ႁဵတ်းၵၢၼ်ႁႃလဵင်ႉၼႃႈႁိူၼ်းၵေႃႉၼိုင်ႈ ။ ၵူၺ်းၵႃႈယူႇတီႈၽူႈတွႆႇႁွၵ်ႈတႄႉ ဢမ်ႇလႆႈၵပ်းသိုပ်ႇၸူးၵေႃႉပဵၼ်မေးၼၢင်းမၼ်းၵမ်းသိုဝ်ႈလႄႈ ဢမ်ႇၸၢင်ႈလႆႈၶေႃႈယိုၼ်ယၼ်ဝႃႈ ယွၼ်ႉသင်လႄႈၺႃးၶႃႈတၢႆတႄႉတႄႉ၊ ၸုမ်းမႃးၶႃႈႁႅမ်ပဵၼ်ၽႂ်ၼႆၸိူဝ်းၼႆႉ။
တႄႇပီ 2024 မႃး သိုၵ်းမၢၼ်ႈထႅမ်ႁႅင်းသိုၵ်းၶဝ်ႈ ၼႂ်းဝဵင်း ၼႂ်းဝၢၼ်ႈ ၵမ်းလႂ်ၵေႃႈ ပူႇၵႄႇလႄႈ ၵူၼ်းမိူင်းၺႃးၶႃႈႁႅမ်ၵမ်းၼၼ်ႉ။ ၵၢင်ႉၵႄႇ၊ ၵွၼ်းဢိူင်ႇ ၼႂ်းပိုၼ်ႉတီႈၸႄႈဝဵင်းဝၢၼ်ႈငႂ်ႈ ၵမ်းၵမ်းၺႃးၶႃႈႁႅမ်တၢႆ ။
ၸွမ်းၼင်ႇသဵၼ်ႈမၢႆ ၸုမ်းၶၢဝ်ႇၽူႈတွႆႇႁွၵ်ႈ ၵဵပ်းဝႆႉၼၼ်ႉ တႄႇ ပီ 2024 ၼႆႉမႃး ၵူၼ်းပိုၼ်ႉတီႈလႄႈ ပူႇၵၢင်ႉပူႇၵႄႇ ၺႃးမၢပ်ႇၼႄးဝႃႈ ပဵၼ်ၵူၼ်းႁဵတ်းၵၢၼ်ဢဝ်ၶၢဝ်ႇပၼ်သိုၵ်းမၢၼ်ႈ ၼႆသေ ၺႃးႁႅမ်တၢႆၵႂႃႇ မီး 13 ၵေႃႉ။ ဢမ်ႇႁူႉဝႃႈပဵၼ်ၽႂ် ၸုမ်းလႂ်လူင်းမိုဝ်းၶႃႈႁႅမ်တၢႆ ၼႆယဝ်ႉ ။
ယွၼ်ႉၵူၼ်းမိူင်း တင်း ၵၢင်ႉၵႄႇ ၵႆႉထုၵ်ႇၶႃႈႁႅမ်လႄႈ ၵူၼ်းမိူင်းဢမ်ႇႁတ်း ၵႂႃႇမႃးလွတ်ႈလႅဝ်း။ ဢမ်ႇႁတ်းႁဵတ်းၵၢင်ႉၵႄႇဝၢၼ်ႈ ၊ ဢမ်ႇႁတ်းဢွၼ်ၼမ်းႁဵတ်းလွင်ႈတူင်ႉၼိုင်ၼႂ်းဝၢၼ်ႈၼႂ်းသူၼ် သင်သေလွင်ႈသေမဵဝ်း။ လိူဝ်ၼၼ်ႉ သိုၵ်းမၢၼ်ႈၵူတ်ႇထတ်းၵူၼ်းၶဝ်ႈဢွၵ်ႇဝၢၼ်ႈႁၢဝ်ႈႁႅင်း သင်ၶႂ်ႈၵႂႃႇမႃးတၢင်ႇဝၢၼ်ႈၼႆၸိုင် လႆႈၼႄမၢႆၾၢင်၊ လႆႈလူင်းလၢႆးမိုဝ်းယဝ်ႉၸင်ႇလႆႈၵႂႃႇ – လႆႈႁူႉၼင်ႇၼႆ။
ၵူၼ်းၸၢႆး ၵေႃႉယူႇၼႂ်းပိုၼ်ႉတီႈၸႄႈဝဵင်းဝၢၼ်ႈငႂ်ႈ လၢတ်ႈတီႈၽူႈတွႆႇႁွၵ်ႈဝႃႈ –“သိုၵ်းမၢၼ်ႈၵေႃႈလႆႈၵူဝ် ၊ pdf ၶဝ်ၵေႃႈလႆႈၵူဝ် ၊ ဢမ်ႇႁတ်းၵႂႃႇၵပ်းၵၢႆႇၸွမ်းၸုမ်းလႂ် ၊ ပဵၼ်သင်မႃးၵေႃႈ ၵူၼ်းပိုၼ်ႉတီႈၵူၺ်း ႁူပ်ႉတၢင်းယၢပ်ႇ၊ တေၼႄးဝႃႈ pdf ၶဝ်ၶႃႈႁႅမ်ၵႂႃႇၼႆၵေႃႈ ဢမ်ႇလႆႈ ၊ ၸုမ်းယိပ်းၵွင်ႈၵၢင်ႇမီးၼမ်။ မၢင်ၽဝ်ႇ ၸုမ်းပိဝ်ႇသေႃးထီး ၶႃႈႁႅမ်သေ ၼႄးႁႂ်ႈထၢင်ႇၽိတ်းၵေႃႈၸၢင်ႈပဵၼ်လႆႈ”- ဝႃႈၼႆ ။
မိူဝ်ႈပူၼ်ႉမႃးၼႂ်းဝၼ်းတီႈ 28/10/2025 ၼၼ်ႉၵေႃႈ ၸုမ်းယိပ်းၵွင်ႈၵၢင်ႇ ဢမ်ႇႁူႉၸိုဝ်ႈၸုမ်းၼိုင်ႈ ၶဝ်ႈၼႂ်းဝၢၼ်ႈၵျွၵ်ႉပီႉသပ်ႉ ( ကျောက်ပိဇပ် ) သေယိုဝ်းသႂ်ႇပူႇၵႄႇ ၸိုဝ်ႈႁွင်ႉလုင်းတိၼ်ႉဝေႇ ( ဦးတင့်ဝေ) ဢႃယု 40 ပီ လႄႈ ၺီႇထုတ်ႉ (ညီထွဋ် ) ဢႃယု 30 ပီ တၢႆထင်တီႈ။
ၼႂ်းဝၼ်းတီႈ 5/10/2025 ၽူႈၵွၼ်းဝၢၼ်ႈၵွင်းတပ်ႉ (တပ်ကုန်းကျေးရွာ) ဢူးပႃႉမူၺ်း ဢႃယု- 45 ပီလႄႈ ၽူႈၶဝ်ႈၸုမ်း ၾၢႆႇႁူမ်ႇလူမ်ႈၼႂ်းပိုၼ်ႉတီႈ ဢူးမဵဝ်းၵျေႃႇ ဢႃယု (39) ပီ ၺႃးၸုမ်းဢမ်ႇႁူႉၾၢႆႇ ဢဝ်မိတ်ႈတႅင်းတၢႆ တီႈပွၵ်ႉမဵဝ်ႉၵူင်း ၼႂ်းဝဵင်းယႂႃႇငၢၼ်ႇဝႃႈၼႆ ။
တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ