ၽွင်းလူင်ၾၢႆႇၼွၵ်ႈမိူင်း ၽူႈႁၢပ်ႇၵၢၼ်လူင်ပွင်ၸိုင်ႈ မိူင်းထႆး လႄႈ မိူင်းၶႄႇ ဢွၵ်ႇၶၢဝ်းတၢင်းၵႂႃႇတီႈဝဵင်းလူင် ၼေႇပျီႇတေႃႇ ပိူဝ်ႈတႃႇႁူပ်ႉထူပ်းဢုပ်ႇဢူဝ်းၸွမ်း ၸွမ်ၸိုင်ႈယိုတ်းမိူင်း မိၼ်းဢွင်ႇလၢႆႇ ပဵၼ်တၢင်းၵၢၼ် ၼႆယဝ်ႉ။

မိူဝ်ႈဝၼ်းတီႈ 21/4/2026 ၽွင်းလူင်ၾၢႆႇၼွၵ်ႈမိူင်း မိူင်းထႆး သီႇႁသၵ်ႇ ၽူင်းၵဵတ်ႇၵႅဝ်ႉ Sihasak Phuangketkeow လုၵ်ႉမိူင်းထႆး ဢွၵ်ႇၶၢဝ်းတၢင်းၵႂႃႇတီႈ ဝဵင်းလူင် ၼေႇပျီႇတေႃႇ တႃႇႁူပ်ႉထူပ်းဢုပ်ႇဢူဝ်းၸွမ်း မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ပဵၼ်တၢင်းၵၢၼ် ႁိုင်ၶၢဝ်းတၢင်းသွင် ဝၼ်း ။

ႁွင်ႈၵၢၼ်သိုဝ်ႇၶၢဝ်ႇလူင်ပွင်ပွင်ၸိုင်ႈသိုၵ်း မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်း ၵၢၼ်ဝႆႉဝႃႈ – ၵႅမ်ၽွင်းလူင်ၼွၵ်ႈမိူင်း မိူင်းမၢၼ်ႈ ဢူးၵူဝ်ႇၵူဝ်ႇၵျေႃႇ ၵေႃႉ ႁပ်ႉတွၼ်ႈ ။ ၵွၼ်ႇတေလႆႈႁူပ်ႉ မိၼ်းဢွင်ႇလၢႆႇၼၼ်ႉ လႆႈၸတ်းႁဵတ်းပၢင်ဢုပ်ႇဢူဝ်းၵၼ်ၵမ်းၼိုင်ႈ လႄႈ ႁပ်ႉမွၵ်ႇလၢတ်ႈပႃး ႁႂ်ႈႁူပ်ႉထူပ်းၸွမ်း ၽူႈၼမ်းၸၼ်ႉသုင် ၼႂ်းႁွင်ႈ ၵၢၼ်လူင်ပွင်ၸိုင်ႈသိုၵ်းမၢၼ်ႈပႃးထႅင်ႈ ၼႆယဝ်ႉ။

ၾၢႆႇႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းထႆးတႄႉ ပိုၼ်ၽၢဝ်ႇဢွၵ်ႇဝႆႉပဵၼ်တၢင်းၵၢၼ်ဝႃႈ – ၵၢၼ်တီႈပွႆႇပၼ် ၶိုၼ်း ၸွမ်ၸိုင်ႈၵဝ်ႇဢူးဝိၼ်းမျိၼ်ႉ ဢွၵ်ႇၶွၵ်ႈၵုမ်းၶင်မႃးၼႆႉ ပဵၼ် လွင်ႈမုင်ႈမွင်း တႃႇႁဵတ်းႁႂ်ႈ ၸိုင်ႈမိူင်းဢႃႊသီႊယၼ်ႊ ႁပ်ႉႁၼ်လီမႃးၶိုၼ်းလွင်ႈၼိုင်ႈယူႇ ၼႆယဝ်ႉ။

ဝၢႆးလင် ၸွမ်ၸိၵ်းသိုၵ်းမၢၼ်ႈယိုတ်းမိူင်း မိၼ်းဢွင်ႇလၢႆႇ လႆႈၶိုၼ်ႈႁပ်ႉၸၼ်ႉၸွမ်ၸိုင်ႈပဵၼ်တၢင်းၵၢၼ်ယဝ်ႉ ယူႇတီႈမိူင်းယူႇႁိမ်းၵိၼ်ၸမ်ၵၼ်သေ မိူင်းထႆး သူင်ႇတူဝ်တႅၼ်းၽွင်းလူင်ၼွၵ်ႈမိူင်းမိူဝ်းႁူပ်ႉ။

လူင်ပွင်ၸိုင်ႈမိူင်းၶႄႇၵေႃႈ ပေႃးထိုင်မႃးဝၼ်းတီႈ 22-26/4/2026 ၶၢဝ်းတၢင်းသၢမ်ဝၼ်းၼႆႉ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ဝမ်ႊယိ တေဢွၵ်ႇၶၢဝ်းတၢင်းႁွတ်ႈထိုင်မိူင်းမၢၼ်ႈ – မိူင်းထႆး လႄႈ မိူင်းၵမ်ႊပူႊၶျႃႊ ယူႇၼႆ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

ၾၢႆႇမိူင်းထႆးတႄႉ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ ဝၼ်းတီႈ 23-25/4/2026 ၼႆႉ ၽွင်းလူင်ၼွၵ်ႈမိူင်း မိူင်းၶႄႇ တေမႃးႁူပ်ႉတင်း ၽွင်းလူင်ၼွၵ်ႈမိူင်း မိူင်းထႆး ဝႃႈၼႆ။

ၽွင်းလူင်ၾၢႆႇၼွၵ်ႈမိူင်း မိူင်းၶႄႇၼႆႉ တေႁူပ်ႉထူပ်းၸွမ်း ၸုမ်းလူင်ပွင်ၸိုင်ႈ မိူင်းမၢၼ်ႈ မိူင်းထႆး ၵူၺ်းဢမ်ႇၵႃး တေဢွၵ်ႇၶၢဝ်းတၢင်းၵႂႃႇႁူပ်ႉပႃး လူင်ပွင်ၸိုင်ႈ မိူင်းၵမ်ႊပူႊၶျႃႊထႅင်ႈ။ တီႈၵၢၼ်ႁူပ်ႉထူပ်း တူဝ်တႅၼ်းလူင် ပွင်ၸိုင်ႈ မိူင်းၵမ်ႊပူႊၶျႃႊၼၼ်ႉ တေဢုပ်ႇဢူဝ်းၵၼ်ၵႂႃႇ လွင်ႈတႃႇၸတ်း ပၢင်ၵုမ်ႇဢုပ်ႇဢူဝ်း မႁႃႇပိဝ်ႇႁႃႇ “2+2” ပွၵ်ႈဢွၼ်တၢင်းသုတ်းၼႆ ၽူႈၶၢၼ်ပၢၵ်ႇ ႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းၶႄႇ Guo Jiakun လၢတ်ႈပိုၼ်ၽၢဝ်ႇဝႆႉၼင်ႇၼႆ။

ၵဵဝ်ႇလူၺ်ႈ ၽွင်းလူင်ၾၢႆႇၼွၵ်ႈမိူင်း တေမႃးမိူင်းမၢၼ်ႈ တီႈဝဵင်းလူင်ၼေႇပျီႇတေႃႇၼၼ်ႉတႄႉ ၾၢႆႇလူင်ပွင်ၸိုင်ႈ သိုၵ်း မိၼ်းဢွင်ႇလၢႆႇ ၸွမ်ၸိုင်ႈယိုတ်းမိူင်း ပႆႇပိုၼ်ၽၢဝ်ႇသင်ဢွၵ်ႇဝႆႉ။

ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ဝမ်ႊယိၼႆႉ မိူဝ်ႈသိုၵ်းမၢၼ်ႈယိုတ်းမိူင်း သုမ်းသိုၵ်း လႆႈၸုၼ်ႉပွႆႇဝဵင်းယႂ်ႇ ဝဵင်းလူင်ပၼ်ၸုမ်းသိုၵ်းၸၢဝ်းၶိူဝ်း ဢူၺ်းလီသၢမ်ၸုမ်းယူႇ ၽွင်းပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းသွင်ၼၼ်ႉ ၼႅတ်ႈလုၵ်ႉ တၢင်း လႅၼ်လိၼ် မိူင်းၶႄႇ-မိူင်းမၢၼ်ႈသေ ၶီႇၵႃး ဢွၵ်ႇၶၢဝ်းတၢင်းမႃးထိုင် ၼႂ်းဝဵင်းလူင်လႃႈသဵဝ်ႈ မိူင်းမၢၼ်ႈ ဢွၼ်တၢင်းသုတ်း ပၢၼ်သိုၵ်းမၢၼ်ႈယိုတ်းမိူင်းၼၼ်ႉ။

ဝၢႆးလင်ၼၼ်ႉ သိုပ်ႇၸတ်းပၼ် ႁႂ်ႈသိုၵ်းမၢၼ်ႈယိုတ်းမိူင်း တင်း ၸုမ်းသိုၵ်းၸၢဝ်းၶိူဝ်း ဢူၺ်းလီသၢမ်ၸုမ်း ၵႂႃႇႁူပ်ႉဢုပ်ႇၵၼ်တီႈၼႂ်းမိူင်းၶႄႇ လၢႆပွၵ်ႈလၢႆၵမ်းသေ ထိုင်တီႈ ၸုမ်း သိုၵ်းၵဝ်ႈၵၢင်ႉ MNDAA ပေႃးလႆႈထွႆႁႅင်းသိုၵ်းၼႂ်းဝဵင်းလႃႈသဵဝ်ႈ ဢွၵ်ႇပၼ်ၶိုၼ်းသိုၵ်းမၢၼ်ႈသေ ပၼ်သိုၵ်းမၢၼ်ႈမႃးၵုမ်းၵမ်ပၼ်ႇၵၢၼ် ၽွင်းငမ်း ၶိုၼ်းၵႂႃႇ ႁၢၼ်ႉတေႃႇထိုင်ဝၼ်း မိူဝ်ႈၼႆႉ။

လိူဝ်ၼၼ်ႉ ယင်းၸတ်းပၼ်ႁႂ်ႈၸုမ်းသိုၵ်းတဢၢင်း TNLA လႄႈ သိုၵ်းမၢၼ်ႈယိုတ်းမိူင်း ၵိုတ်းတိုၵ်းၵၼ်လႆႈ ၵူၺ်းဢမ်ႇၵႃး သိုၵ်းမၢၼ်ႈၶဝ်ႈယိုတ်းဢဝ်ၶိုၼ်းလႆႈ ဝဵင်းၼွင်ၶဵဝ် လႄႈ ၵျွၵ်ႉမႄး တင်း သီႇပေႃႉ ၸွမ်းၼႃႈတီႈ သိုၵ်းတဢၢင်းၵုမ်းၵမ်ဝႆႉၼၼ်ႉထႅင်ႈ။