တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ဝၢႆးသၢင်းၵျၢၼ်ႇၼႆႉမႃး ပလိၵ်ႈသိုၵ်းမၢၼ်ႈ တႄႇၵူတ်ႇထတ်း ဝတ်းဝႂ်လၢႆႊသိၼ်ႊ ရူတ်ႉၵႃးၶိုၼ်းႁၢဝ်ႈႁႅင်း ဝႃႈၼႆ ။
မိူဝ်ႈဝႃး ဝၼ်းတီႈ 20/4/2026 ၼႆႉ ပလိၵ်ႈသိုၵ်းမၢၼ်ႈ ပႂ်ႉၵူတ်ႇထတ်းရူတ်ႉၵႃး ၸိူဝ်းဢၼ်တေလႆႈႁေႃႈ ဝၼ်းၵိၵ်ႈ/ဝၼ်းၵူႈ လႄႈ ရူတ်ႉၵႃးၸိူဝ်းဢမ်ႇမီးဝတ်းဝႂ်လၢႆႊသိၼ်ႊ တီႈ ၼႂ်းပွၵ်ႉၼႂ်းယွမ်ႇ ဢိၵ်ႇၼိူဝ်သဵၼ်ႈတၢင်း ၵၢင်ဝဵင်းတူၼ်ႈတီး ။
ၼႂ်းဝၼ်းလဵဝ်ၵူၺ်း တီႉၺွပ်းၵႂႃႇ ရူတ်ႉၵႃးဢမ်ႇမီးဝတ်းဝႂ်လႄႈ ရူတ်ႉၵႃးၸိူဝ်း ဢမ်ႇႁေႃႈ ၸွမ်းဝၼ်းၵိၵ်ႈ/ဝၼ်းၵူႈ။ တီႉလႆႈ ဢမ်ႇယွမ်း 30 လမ်းၼႆယဝ်ႉ ။
ရူတ်ႉၵႃးဢၼ်ထုၵ်ႇပလိၵ်ႈသိုၵ်းမၢၼ်ႈၸိူဝ်းၼၼ်ႉ မၢင်ၸိူဝ်းပလိၵ်ႈသိုၵ်းမၢၼ်ႈဢဝ်လိူင်ႈ ၊ ယွၼ်းငိုၼ်းၸဝ်ႈၶွင်ယဝ်ႉ ပွႆႇပၼ်ၶိုၼ်းသေတႃႉ မၢင်ၸိူဝ်းၺႃးပလိၵ်ႈ သိုၵ်းမၢၼ်ႈ ယိုတ်းဢဝ်ပႅတ်ႈတႄႉ လႄႈ ႁဵတ်းႁႂ်ႈၸဝ်ႈရူတ်ႉၵႃးယၢပ်ႇၽိုတ်ႇၵိၼ်းၸႂ် ။
ၼၢင်းယိင်းၼုမ်ႇ ၵူၼ်းမိူင်းဝဵင်းတူၼ်ႈတီးလၢတ်ႈၽူႈတွႆႇႁွၵ်ႈဝႃႈ -“ ပလိၵ်ႈသိုၵ်းမၢၼ်ႈတီႉၺွပ်းမိူဝ်ႈဝႃးၼႆႉ ပႃးၵႂႃႇမွၵ်ႈ 30 လမ်းၼႆႉ ၊ ပေႃးပဵၼ် ရူတ်ႉၵႃးဢမ်ႇႁေႃႈ မႅၼ်ႈဝၼ်းၵိၵ်ႈဝၼ်းၵူႈၼၼ်ႉ လႆႈပၼ် 3 သႅၼ်ပျႃးသေ ၶိုၼ်းဢဝ်လႆႈ ၊ ပေႃးဢမ်ႇမီးဝတ်းဝႂ်လၢႆႊသိၼ်ႊတႄႉ ဢဝ်ၶိုၼ်းဢမ်ႇလႆႈ”- ဝႃႈၼႆ ။
လိူဝ်ၼၼ်ႉ ယၢမ်းလဵဝ် တီႈဝဵင်းတူၼ်ႈတီးၼႆႉ ပလိၵ်ႈသိုၵ်းမၢၼ်ႈႁႅတ်ႉႁၢမ်ႈဝႆႉ လွင်ႈသိုဝ်ႉၼမ်ႉမၼ်းၸိူဝ်ႉၾႆး( ၼမ်ႉမၼ်းၸၢၵ်ႈ) ၼိုင်ႈဝူင်ႈ 2 ပွၵ်ႈ ။ ၽွင်းၵႂႃႇသိုဝ်ႉၼမ်ႉမၼ်းတီႈပၢမ်ႉၼမ်ႉမၼ်းၼၼ်ႉ ပလိၵ်ႈသိုၵ်းမၢၼ်ႈပႂ်ႉ ၵူတ်ႇထတ်းရူတ်ႉၵႃးဝၼ်းၵိၵ်ႈ/ဝၼ်းၵူႈပႃး- ၵူၼ်းပိုၼ်ႉတီႈလၢတ်ႈ ။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၽွင်းသၢင်းၵျၢၼ်ႇၼႆႉ ဢမ်ႇဝႃႈ ဝၼ်းၵိၵ်ႈ/ ဝၼ်းၵူႈ ၵႂႃႇသႂ်ႇၼမ်ႉမၼ်းလႆႈယူႇၶႃႈ ၊ ဝၢႆးသၢင်းၵျၢၼ်ႇၼႆႉပလိၵ်ႈသိုၵ်းမၢၼ်ႈၵူတ်ႇထတ်းၶိုၼ်းႁၢဝ်ႈႁႅင်း ၊ ယွၼ်ႉၶဝ်ၵူတ်ႇထတ်းၸိူင်ႉၼႆၵေႃႈ ပေႃးမီးတၢင်းလူဝ်ႇႁိပ်ႈၼႅတ်ႈသင်ၵေႃႈ ဢမ်ႇၸၢင်းၵႂႃႇလွတ်ႈလႅဝ်းယၢပ်ႇဝႆႉဢေႃႈ ၊ ယဝ်ႉၵေႃႈ ရူတ်ႉၵႃးၼိုင်ႈလမ်း လႆႈၵႂႃႇသႂ်ႇၼမ်ႉမၼ်း ၼိုင်ႈဝူင်ႈ 2 ပွၵ်ႈၵူၺ်းဢေႃႈ ”- ဝႃႈၼႆ ။
ယၢမ်းလဵဝ် တီႈဝဵင်းတူၼ်ႈတီး ၶၼ်ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ ) ဢၼ်ၶၢႆတီႉပၢမ်ႉၼမ်ႉမၼ်း ၼိုင်ႈလီႇတႃႇ 4,910 ပျႃးထိုင် 7,930 ပျႃး ။ ပၢမ်ႉၼမ်ႉမၼ်းဢၼ်ၶၢႆတၢင်းၼွၵ်ႈမၼ်း ၶိုၼ်ႈထိုင် 15,000 ပျႃး ၼႆယဝ်ႉ ။
တွၼ်ႈတႃႇၼမ်ႉမၼ်းၸိူဝ်ႉၾႆးဢမ်ႇၶၢတ်ႇၼၼ်ႉ ၼႂ်းဝၼ်းတီႈ 3 လိူၼ်ထူၼ်ႈသၢမ် သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇမႃးတွၼ်ႈတႃႇ ႁႂ်ႈၵူၼ်းမိူင်း ယွမ်းၸႂ်ႉၼမ်ႉမၼ်းၸိူဝ်ႉၾႆး ၸိူဝ်းမီးဝႆႉရူတ်ႉၵႃး (သုၼ်ႇတူဝ်)ၼၼ်ႉ တေဢမ်ႇလႆႈၸႂ်ႉတိုဝ်းဢွၵ်ႇတၢင်းၼွၵ်ႈၵူႈဝၼ်း ။ ရူတ်ႉၵႃးၸိူဝ်းပဵၼ် မၢႆၵူႈလႄႈ မၢႆၵိၵ်ႈ တေလႆႈပၼ်ႇပုတ်ႈၵၼ်ဢွၵ်ႇႁိူၼ်း ။ သင်ၽူႈမီးပုၼ်ႈၽွၼ်းၶဝ် ၵူတ်ႇထတ်းႁၼ် တေထုၵ်ႇတီႉၺွပ်းဢဝ်လိူင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ