ဝၼ်းတီႈ 17/04/2026 ႁွင်ႈၵၢၼ်ၾၢႆႇပႂ်ႉတူၺ်းၾူၼ်လူမ်းၾိင်ႈၾႃႉမိူင်းထႆးပိုၼ်ၽၢဝ်ႇ ၾူၼ်လူင်လူမ်းလႅင်ႉမၢၵ်ႇႁဵပ်းတေတူၵ်းၼႂ်းဝၼ်းတီႈ 17 ထိုင် 20 လိူၼ်ထူၼ်ႈ 4 ၼႆႉလႄႈ ႁႂ်ႈၵူၼ်းမိူင်းၸိူဝ်းၽုၵ်ႇသွမ်ႈမၢၵ်ႇၶဝ်ႈတဝ်ႈၼမ်ႉ ႁႂ်ႈလုမ်းလႃးတႃႇႁႄႉၵင်ႈလွင်ႈလုသုမ်းလႄႈလွင်ႈလွတ်ႈၽေး။

ဢိင်ၼိူဝ်ႁႅင်းလူမ်းမႆႈ တၢင်းမိူင်းၶႄႇသုင် ႁဵတ်းႁႂ်ႈလူမ်းၼႂ်းၼမ်ႉပၢင်ႇလၢႆႇၶႄႇၸၢၼ်း သုတ်ႉၶၢႆႉယၢႆႉတူဝ်လူင်းမႃးတၢင်းမိူင်းတႆး မိူင်းထႆး ။ ၵွပ်ႈၼႆ ၼႂ်းၶၢဝ်းတၢင်း 3 ဝၼ်းၼႆႉ ၼႂ်းပိုၼ်ႉတီႈၸဵင်ႇႁွင်ႇဝၼ်းဢွၵ်ႇ လႄႈ တွၼ်ႈဝၼ်းဢွၵ်ႇမိူင်းထႆး ၾူၼ်ၸၢင်ႈတူၵ်းႁႅင်း (မၢႆပဵၼ်ပိုၼ်ႉတီႈမီးၽေး /သီလႅင်) ပဵၼ်ၸႄႈတွၼ်ႈ ယသူဝ်ထွၼ်ႊ၊ ဢမ်ႊၼၢတ်ႉၵျရိူၼ်ႊ၊ သုရိၼ်ႊ၊ သီသၵဵတ်ႇ၊ ဢုပူၼ်ႊရၢတ်ႉၶျထႃႊၼီႊ၊ သႃႇၵႅဝ်ႉ၊ၶျၶျိူင်ႊသဝ်ႊ၊ ၶျူၼ်ႊပုရီႊ၊ ရယွင်း ၸၼ်ထပူးရီ လႄႈ တရၢတ်ႇ။

ဢၼ်ပဵၼ်တွၼ်ႈၼိူဝ် မိူၼ်ၼင်ႇ မႄႈႁွင်ႈသွၼ် ၊ ၵဵင်းမႂ်ႇ ၊ ၵဵင်းႁၢႆး ၊ တၢၵ်ႇ ၊ ဢိၵ်ႇတွၼ်ႈဝၼ်းဢွၵ်ႇၼိူဝ် တွၼ်ႈၵၢင် မိူင်းထႆးမိူၼ်ၼင်ႇ မုၵ်းတႃႁၢၼ်၊ မႁႃသႃရၶၢမ်ႊ၊ ရွႆႉဢဵတ်ႇ၊ ၼၶွၼ်ႊရၢတ်ႉၶျသီမႃႊ၊ ပုရီႊရမ်ႊ ၊ ၼၶွၼ်ႊၼႃးယူၵ်ႉ၊ ပရႃႊၵျိၼ်ႊပုရီႊ၊ လူပ်းပူႊရီႊ၊ သရႃႇပူႊရီႊလႄႈ ၵုင်းထဵပ်ႈၸိူဝ်းၼႆႉတႄႉ ၾူၼ်ၸၢင်ႈတူၵ်းလူမ်းလႅင်ႉၶၢဝ်းမႆႈၸၢင်ႈပဝ်ႇယူႇ ၵူၺ်းၵႃႈဢမ်ႇထိုင်တီႈမီးၽေး။ မၢႆဝႆႉပဵၼ်ပိုၼ်ႉတီႈ သီလိူင်ၵူၺ်း။

ဝႃႈၼၼ်သေတႃႉၵေႃႈ ၾၢင်ႉထိုင်ၵူၼ်းႁဵတ်းၵၢၼ်ၽုၵ်ႇသွမ်ႈ ႁႂ်ႈၵမ်ႉတူၼ်ႈမႆႉတူၼ်ႈမၢၵ်ႇၸဝ်ႈၵဝ်ႇႁႂ်ႈၵႅၼ်ႇၶႅင်မီးႁႅင်းၶၢမ်ႇလူမ်းလႅင်ႉလႆႈ၊ ၵူၼ်းယူႇၸွမ်းတူၼ်းႁၢဝ်းသၼ်လွႆလႄႈ ၵူၼ်းၸိူဝ်းယူႇသဝ်းဝႆႉႁိမ်းႁိူၼ်းႁၢမ်း၊ တိုၵ်းတီႈယူႇၵဝ်ႇ ဢိၵ်ႇၵူၼ်းယူႇတႂ်ႈတူၼ်ႈမႆႉယႂ်ႇ ႁိမ်းပၢႆႉသၢႆႊပူၵ်ႉယႂ်ႇၸိူဝ်းၼႆႉ ႁႂ်ႈလႆႈထွမ်ႇၶၢဝ်ႇငၢဝ်း ၊ တူၺ်းၼႃႈၾႃႉတႃၾူၼ်သေ ႁၢင်ႈႁႅၼ်းတူဝ်ႈတၼ်းတႃႇလွတ်ႈၽေးသေၵမ်းဝႃႈၼႆ။

ၼႂ်းမိူင်းထႆးတွၼ်ႈၼိူဝ်လႄႈတွၼ်ႈဝၼ်းဢွၵ်ႇၼိူဝ် ၼႆႉ ႁႅင်းၵၢၼ်ယၢၼ်မိူင်း ၵူၼ်းမိူင်းတႆးဢွၼ်ၵၼ်ၶဝ်ႈႁဵတ်းၵၢၼ်ၼမ်။ မိူၼ်ၼင်ႇၵၢၼ်ၽုၵ်ႇသွမ်ႈၵၢၼ်ၵေႃႇသၢင်ႈ ၵၢၼ်လဵင်ႉလူတူဝ်သတ်း ၸိူဝ်းၼႆႉၼမ်။