ၼ်းတီႈ 17/04/2026 ဝၼ်းပီမႂ်ႇမႁႃသၢင်းၵျၢၼ်ႇမိူဝ်ႈၼႆႉ သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇပွႆႇပၼ်ၵူၼ်းတူၵ်းၶွၵ်ႈ 4000 ပၢႆ ၼႂ်းၼၼ်ႉပႃးတင်းၽူႈၼမ်းၸိၵ်းၸွမ်ၼႂ်း NLD လၢႆလၢႆၵေႃႉ ၵူၺ်းၵႃႈ ၼၢင်းဢွင်ႇသၢၼ်းၸူႉၵျီႇ တႄႉထုၵ်ႇလူတ်းယွၼ်ႇပၼ်တူတ်ႈၶွၵ်ႈ 6 ပုၼ်ႈ 1 ပုၼ်ႈၵူၺ်းသေ သိုပ်ႇၵုမ်းၶင်တူဝ်ၵိုၵ်းႁိူၼ်း တီႈဝဵင်းလူင်တႃႈၵုင်ႈ ဝႃႈၼႆ။

ၼၢင်းဢွင်ႇသၢၼ်းၸူႉၵျီႇ (ယၢမ်းလဵဝ် ဢႃယု 81 ပီ) ၼႆႉ သိုၵ်းမၢၼ်ႈတီႉၺွပ်းၵုမ်းၶင်မၼ်းၼၢင်းၸဵမ်မိူဝ်ႈတႄႇယိုတ်းဢႃႇၼႃႇၸိုင်ႈမိူင်း မိူဝ်ႈဝၼ်းတီႈ 1/2/2021 ။ ဢဝ်ၶိုၼ်ႈလုမ်း ဢဝ်လိူင်ႈလွင်ႈၵိၼ်သူးၵိၼ်လၢပ်ႈ၊ လိူင်ႈသူၼ်းသေႃႇႁႂ်ႈဝၢၼ်ႈမိူင်းသုၵ်းယုင်ႈဢိၵ်ႇ လၢႆလၢႆဢၼ်သေပၼ်တူတ်ႈတၢမ်ႇၶွၵ်ႈ 35 ပီ။ ဝၢႆးလင်တႅပ်းတတ်းပၼ်တူတ်ႈတၢမ်ႇယဝ်ႉသိုၵ်းမၢၼ်ႈသူင်ႇၵုမ်းၶင်တူဝ်တီႈၼေႇပျီႇတေႃႇသေဢမ်ႇပၼ်ၽႂ်ၵႂႃႇႁူပ်ႉထူပ်းလႃးလႃး။ တေႃႇထိုင်လူတ်းယွၼ်ႇပၼ်တူတ်ႈတၢမ်ႇၶွၵ်ႈ 6 ပုၼ်ႉၼိုင်ႈပုၼ်ႈ ၼႂ်းဝၼ်းမိူဝ်ႈၼႆႉ။

တူတ်ႈၶွၵ်ႈဢၼ်မၼ်းၼၢင်းၺႃးဝႆႉ 35 ပီၼႆႉ သိုပ်းမၢၼ်ႈလူတ်းယွၼ်ႇပၼ် 6 ပီၵူၺ်းသေ တေဢဝ်မၼ်းၼၢင်းမႃးၵုမ်းၶင်ၵိုၵ်းႁိူၼ်းမၼ်းၼၢင်း တီႈမၢႆႁိူၼ်း 54 သဵၼ်ႈတၢင်းတႅၵ်ႈၵတူဝ်ႇယဵၵ်ႉတႃႇ ဝဵင်းတႃႈၵုင်ႈ ဝႃႈၼႆ။

(ႁိူၼ်းမၼ်းၼၢင်းၼႆႉသမ်ႉ ၵေႃႉပဵၼ်ပီႈဢၢႆႈမၼ်းၼၢင်း ဢွင်ႇသၢၼ်းဢူး ဝႃႈ ပဵၼ်ပႃးပုၼ်ႈသုၼ်ႇမၼ်းၼႆသေ ၶိုၼ်ႈလုမ်းၸွႆးတြႃးဢဝ်လိူင်ႈဢွင်ႇသၢၼ်းၸူႉၵျီႇယဝ်ႉ ပိုၼ်ၽၢဝ်ႇတႅပ်းၶၢႆဝႆႉၶိုင်ႈၼိုင်ႈ။ ၽႄႈဝႆႉပၼ်ဢွင်ႇသၢၼ်းၸူႉၵျီႇၶိုင်ႈၼိုင်ႈ။)

လုၵ်ႈၸုမ်း ပႃႇတီႇ NLD လၢတ်ႈတီႈသိုဝ်ႇၶၢဝ်ႇမၢၼ်ႈဝႆႉဝႃႈ – ၽူႈၵိူဝ်းၵုမ်ၸိုင်ႈမိူင်းၵေႃႉၵဝ်ႇ ႁူဝ်ပဝ်ႈပႃႇတီႇၼူၵ်ႉယုင်း NLD ၼၢင်းဢွင်ႇသၢၼ်းၸူႉၵျီႇၼႆႉ ပေႃးထိုင်ဝဵင်းလူင်တႃႈၵုင်ႈယဝ်ႉတေၵႂႃႇႁိူၼ်း ၼႃယၵလူင် NLD ဢူးတိၼ်ႇဢူး သေ ၵႂႃႇၵၼ်ႇတေႃးဝိၺိၼ်ႇၶႂၼ်ငဝ်း ဢူးတိၼ်ႇဢူး ။ ၵွပ်ႈၼႆလႄႈယၢမ်းလဵဝ် ဢွၼ်ၵၼ်မိူဝ်းၽဵဝ်ႈပတ်းႁိူၼ်းယေး ဢူးတိၼ်ႇဢူးဝႆႉယူႇ။ ၽူႈၸွပ်ႇၶၢဝ်ႇၸုမ်းသိုၵ်းမၢၼ်ႈၵေႃႈႁွတ်ႈဝႆႉတီႈႁိူၼ်း ဢူးတိၼ်ႇဢူးဝႆႉယူႇ- ဝႃႈၼႆ။

ဢၼ်သိုၵ်းမၢၼ်ႈပွႆႇပၼ်ၵူၼ်းတူၵ်းၶွၵ်ႈၼႂ်းဝၼ်းပီမႂ်ႇသၢင်းၵျၢၼ်ႇၼႆႉ ၼႂ်းလုၵ်ႈၸုမ်း NLD ပႃးဢမ်ႇပူၼ်ႉ 10 ၵေႃႉ။ ၼႂ်းၼၼ်ႉ ပႃးၽူႈၼင်ႈၸိုင်ႈ ဢူးဝိၼ်းထဵင်ႇ၊ ၸွမ်ၸိုင်ႈၵဝ်ႇ ဢူးဝိၼ်းမျိၼ်ႉလႄႈ ၸွမ်ၽွင်းလူင် 4 ၵေႃႉဝႃႈၼႆ။

ၸွမ်ၸိုင်ႈၵဝ်ႇဢူးဝိၼ်းမျိၼ်ႉၵေႃႈ သိုၵ်းမၢၼ်ႈဢဝ်လိူင်ႈ 8 လိူင်ႈသေပၼ်တူတ်ႈတၢမ်ႇၶွၵ်ႈ 14 ပီ ဢဝ်ၵႂႃႇၵုမ်းၶင်ဝႆႉတီႈၶွၵ်ႈလူင်တွင်ႇငူႇ။

ဝၼ်းမိူဝ်ႈၼႆႉ လုၵ်ႉတီႈၶွၵ်ႈလူင်တွင်ႇငူႇသေသိုၵ်းမၢၼ်ႈဢဝ်ရူတ်ႉၵႃးပလိၵ်ႈ 2 လမ်းဢဝ်ႁူမ်ႇလူမ်ႈသေသူင်ႇတူဝ်ၸွမ်ၸိုင်ႈၵဝ်ႇ ႁွတ်ႈထိုင်ႁိူၼ်းတီႈဝဵင်းတႃႈၵုင်ႈ ယဝ်ႉၼႆ ၵူၼ်းၼႂ်းၸုမ်း ပႃႇတီႇၼူၵ်ႉလႅင် NLD တႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။

ၵူၼ်းတူၵ်းၶွၵ်ႈၸိူဝ်းၼႆႉ သိုၵ်းမၢၼ်ႈၸႂ်ႉလူင်းလၢႆးမိုဝ်း လူၺ်ႈပၵ်းပိူင် 401 ဝႃႈ -တေဢမ်ႇႁဵတ်းၽိတ်းၼင်ႇၼႆထႅင်ႈ။ သင်ဝႃႈႁဵတ်းၽိတ်းၼင်ႇၼႆၸိုင် တေထုၵ်ႇတီႉၺွပ်းၶင်ၶွၵ်ႈၶိုၼ်းသေ တေၺႃးတူတ်ႈမႂ်ႇမႂ်ႇယဝ်ႉဢမ်ႇၵႃး တူတ်ႈၵဝ်ႇၵဝ်ႇဢၼ်ထုၵ်ႇပူတ်းပွႆႇပၼ်ၼႆႉၵေႃႈ တေလႆႈႁပ်ႉၶိုၼ်း ဝႃႈၼႆ။ ၵူၺ်းၵႃႈၼႂ်းလုၵ်ႈၸုမ်း NLD တႄႉလၢတ်ႈဝႃႈ ၸွမ်ၸိုင်ႈ ဢူးဝိၼ်းမျိၼ်ႉ ဢမ်ႇယွမ်းလူင်းလၢႆးမိုဝ်း သၼ်ယႃးႁပ်ႉပၢၵ်ႇ။ ၵူၺ်းၵႃႈ ၾၢႆႇတၢင်းၶွၵ်ႈလူင်တွင်ႇငူႇ တႄႉပိုၼ်ၽၢဝ်ႇဝႃႈ ဢူးဝိၼ်းမျိၼ်ႉပူၼ်ႉတူတ်ႈၶွၵ်ႈလူၺ်ႈ ပၵ်းပိူင် 401 ဝႃႈၼႆဝႆႉ။

ၼႂ်းၶေႃႈပိုၼ်ၽၢဝ်ႇသိုၵ်းမၢၼ်ႈပူတ်းပွႆႇၵူၼ်းတူၵ်းၶွၵ်ႈဝၼ်းမိူဝ်ႈၼႆႉပႃးဝႆႉဝႃႈ – ၵူၼ်းၸိူဝ်းၺႃးတူတ်ႈတၢမ်ႇတၢႆၸိူဝ်းၼၼ်ႉ လူတ်းယွၼ်ႇပၼ်ႁႂ်ႈပဵၼ်တူတ်ႈၶွၵ်ႈတေႃႇၸူဝ်ႈ၊ ၵူၼ်းၸိူဝ်းတူၵ်းတူတ်ႈၶွၵ်ႈတေႃႇၸူဝ်ႈၼၼ်ႉလူတ်းယွၼ်ႇပၼ်ႁႂ်ႈပဵၼ် တူတ်ႈၶွၵ်ႈ 40 ပီ ၊ ၵူၼ်းၸိူဝ်းထူပ်းတူတ်ႈတၢမ်ႇၶွၵ်ႈ 40 ပီပၢႆၼၼ်ႉသမ်ႉ လူတ်းယွၼ်ႇပၼ်ႁႂ်ႈပဵၼ် တူတ်ႈၶွၵ်ႈ 40 ပီလူင်းတႂ်ႈ။ ၸိူဝ်းမီးတူတ်ႈၶွၵ်ႈ 40 ပီလူင်းတႂ်ႈၼၼ်ႉသမ်ႉ လူတ်းယွၼ်ႇပၼ်တူတ်ႈၶွၵ်ႈ 6 ပုၼ်ႈၼိုင်ႈပုၼ်ႈ ဝႃႈၼႆ။

ယူႇတီႈၸုမ်းၸွႆႈထႅမ်ႈၵူၼ်းတူၵ်းၶွၵ်ႈၵၢၼ်မိူင်းၶဝ်ပိုၼ်ၽၢဝ်ႇဝႆႉတႄႉ သိုၵ်းမၢၼ်ႈၼႆႉ တင်ႈတႄႇယိုတ်းဢႃႇၼႃႇၸိုင်ႈမိူင်းမႃးတေႃႇထိုင်ဝၼ်းမိူဝ်ႈၼႆႉ တီႉၺွပ်းဝႆႉၵူၼ်းၵၢၼ်မိူင်းသေၶင်ၶွၵ်ႈ 2 မိုၼ်ႇၵေႃႉပၢႆ။ ၵူၺ်းၵႃႈၼႂ်းဝၼ်းမိူဝ်ႈၼႆႉ ၵူၼ်းတူၵ်းၶွၵ်ႈၵၢၼ်မိူင်း ၸိူဝ်းပူၼ်ႉတူတ်ႈတၢမ်ႇၶွၵ်ႈ ယင်းပႆႇမီးၼိုင်ႈၶိုင်ႈဝႃႈၼႆဝႆႉ။