ၶၢဝ်းသွၼ်းၼမ်ႉ လိူၼ်ႁႃႈၼႆႉ ၶႅၵ်ႇၵူၼ်းမိူင်းၼွၵ်ႈ ၸိူဝ်းၶဝ်ႈမႃးဢႅဝ်ႇတွင်ႈထဵဝ်း ၼႂ်းမိူင်းထႆး ၼမ်ႁႅင်းၵူႈပီ လႄႈ လူင်ပွင်ၸိုင်ႈ မိူင်းထႆးၶဝ် မုင်ႈမွင်း ယိူင်းဢၢၼ်း တႃႇလႆႈငိုၼ်းၶဝ်ႈ တီႈၸဝ်ႈၵၢၼ်ပၢႆးမၢၵ်ႈမီး ၸိူဝ်းၵဵဝ်ႇၵွင်ႉတင်း ၵၢၼ်တွင်ႈထဵဝ်း မွၵ်ႈ 1 တေႃႊလႃႊ ပီႊလီႊယႅၼ်ႊ ဝႃႈၼႆ။
ၵူၼ်းတၢင်ႇၸၢဝ်းၶိူဝ်း ၸိူဝ်းလုၵ်ႉတၢင်းမိူင်း ၶဝ်ႈမႃးဢႅဝ်ႇလႄႇ ၼႂ်းမိူင်းထႆး ၵွၼ်ႇၼႃႈပႆႇထိုင် ဝၼ်းသွၼ်းၼမ်ႉ (သၢင်းၵျၢၼ်ႇ) ၼႆႉ ၵိုင်ႉၵၢင်ႉၼမ်ၶိုၼ်ႈမႃးလိူဝ်ၵဝ်ႇ တေႉတေႉဝႃႈဝႃႈ။ ငိုၼ်းၶဝ်ႈ ဢၼ်တေလႆႈမႃး ၶၢဝ်းပွႆးသွၼ်းၼမ်ႉ ပီ 2026 ၼႆႉ တေလႆႈၼမ်လိူဝ် ပီပူၼ်ႉမႃး 2025 ယူႇၼႆ ၸဝ်ႈၼႃႈတီႈ ၽူႈမီးပုၼ်ႈၽွၼ်း ၼႂ်းၸုမ်းလူင်ပွင်ၸိုင်ႈမိူင်းထႆးၶဝ် မုင်ႈမွင်းဝႆႉၼင်ႇၼႆ။
မိူဝ်ႈဝၼ်းတီႈ 12 လိူၼ်ဢေႊပရႄႊလ် တီႈလဵၼ်ႈၼမ်ႉ ၼႂ်းမိူင်းထႆး တႃႇ 6 တီႈၼႆႉ မီးၶႅၵ်ႇမိူင်းၼွၵ်ႈၶဝ်ႈၵႂႃႇ ဢႅဝ်ႇလႄႇ 558000 ၵေႃႉပၢႆ ၶႅၵ်ႇၵူၼ်းၸိူဝ်းၵႂႃႇလဵၼ်ႈၼမ်ႉ တီႈ Siam Square ဝဵင်းလူင်မိူင်းၵွၵ်ႇၼႆႉ မီးမွၵ်ႈ 183500 ၵေႃႉသေ ဢွင်ႈတီႈလဵၼ်ႈၼမ်ႉ ၼႂ်းဝဵင်းလူင်မိူင်းၵွၵ်ႇၵူၺ်း ၸတ်းႁဵတ်းၵႂႃႇ မွၵ်ႈ 90 တီႈ ၼႆယဝ်ႉ။
လူင်ပွင်ၸိုင်ႈထႆး လၢမ်းၶၢတ်ႈဝႆႉဝႃႈ ပွႆးသွၼ်းၼမ်ႉ ပီ 2026 ၼႆႉ တေလႆႈငိုၼ်းၶဝ်ႈတႃႇ 30.4 ပီႊလီႊယႅၼ်ႊၿၢတ်ႇ (မွၵ်ႈ 950 လၢၼ်ႉ တေႃႊလႃႊ) ၼမ်လိူဝ်ၶၢဝ်းသွၼ်းၼမ်ႉ ပီ 2025 ၼႆႉ တႃႇ 6% (ဝၢၵ်ႈ) ဝႃႈၼႆ။
ၶႅၵ်ႇၵူၼ်းၼွၵ်ႈမိူင်းၸိူဝ်းၶဝ်ႈမႃးဢႅဝ်ႇ တွင်ႈထဵဝ်း ၶၢဝ်းပွႆးသွၼ်းၼမ်ႉ ပီ 2026 ၼႆႉၵေႃႈ တေမီးမွၵ်ႈ 5 သႅၼ်ၵေႃႉပၢႆ ၸၢင်ႈၼမ်လိူဝ်ပီပူၼ်ႉမႃး 4 % (ဝၢၵ်ႈ) ၼႆ ၸုမ်းၸတ်းၵၢၼ်ႁပ်ႉပုၼ်ႈၽွၼ်း တူၺ်းလူ ၶႅၵ်ႇမိူင်းၼွၵ်ႈၶဝ် လၢမ်းၶၢတ်ႈဝႆႉၼင်ႇၼႆ။
ၶၢဝ်းပွႆးသွၼ်းၼမ်ႉၼႆႉ ၵူၼ်းထႆးၸိူဝ်းႁၢင်ႈႁႅၼ်းတူဝ် ၵႂႃႇဢႅဝ်ႇလႄႇ တွင်ႈထဵဝ်း တၢင်းၼွၵ်ႈမိူင်းၵေႃႈ မီးယူႇမွၵ်ႈ 6 လၢၼ်ႉၵေႃႉယူႇမိူၼ်ၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ