ၸွမ်ၸိုင်ႈမိူင်းဢမေႊရိၵၼ်ႊ ၻေႃႊၼႄႊလ်ထရမ်ႉ လၢတ်ႈတီႈသိုဝ်ႇၶၢဝ်ႇ New York Post မိူဝ်ႈဝႃးဝၼ်းတီႈ 14/04/2026 ဝႃႈ ဢုပ်ႇလွင်ႈငမ်းယဵၼ်ၵၼ်တင်းဢီႊရၼ်ႊဢွင်ႇမၢၼ်လႄႈ လႆႈသင်ႇပိၵ်ႉသဵၼ်ႈတၢင်းၼမ်ႉ ႁေႃႊမူတ်ႉသ်- ႁဵတ်းႁႂ်ႈဢမ်ႇမီးႁိူဝ်းလတ်းၽၢၼ်ႇလႆႈ ၼႂ်းၶၢဝ်းတၢင်း 2 ဝၼ်းၼႆႉ ၸၢင်ႈမီးလွင်ႈလၢၵ်ႇလၢႆး လွင်ႈလီၵေႃႈၸၢင်ႈပဵၼ်လႆႈ လွင်ႈႁၢႆႉၵေႃႈၸၢင်ႈပဵၼ်လႆႈဝႃႈၼႆ။

ၵူၺ်းၵႃႈ ဝၢႆးလင်ထရမ်ႉ ပိုၼ်ၽၢဝ်ႇႁၢမ်ႈႁိူဝ်းလတ်းသၢႆၼမ်ႉႁေႃႊမူတ်ႉသ်ယဝ်ႉၶၢဝ်းတၢင်း 24 ၸူဝ်ႈမူင်း မိူဝ်ႈဝၼ်းတီႈ 14/04/2026 – မီးႁိူဝ်းတၢင်ႇၼမ်ႉမၼ်းၸိူဝ်ႉၾႆးၶွင်ၶႄႇလႄႈ ႁိူဝ်းသိုၵ်းဢီႊရၼ်ႊ 4 လမ်း လတ်းသၢႆၼမ်ႉႁေႃႊမူတ်ႉသ်။

လွင်ႈၼႆႉထရမ်ႉ ၵႄႈတူဝ်တီႈသိုဝ်ႇၶၢဝ်ႇဝႃႈ ဢမေႊရိၵၼ်ႊ ပၼ်ၶႂၢင်ႉလႄႈႁိူဝ်း 4 လမ်းၼၼ်ႉလတ်းၵႂႃႇမႃးလႆႈ – ဝႃႈၼႆ။

ဢိင်ၼိူဝ်ငဝ်းလၢႆးဢမ်ႇၶႅမ်ႉလႅပ်ႈ သွင်ၾၢႆႇဢမ်ႇႁဵတ်းၸွမ်းၶေႃႈတူၵ်းလူင်းၵိုတ်းတိုၵ်း ၸူဝ်ႈၶၢဝ်းသေ – ဝၢႆးလင်ၵၢၼ်ၵိုတ်းတိုၵ်း 2 ဝူင်ႈၼႆႉယဝ်ႉ ၸၢင်ႈပဵၼ်ပၢင်တိုၵ်းယႂ်ႇလူင်ၶိုၼ်း- ၵူၼ်းတင်းလုမ်ႈၾႃႉတႄႉဢွၼ်ၵၼ်မႆႈၸႂ်ဝႆႉၼင်ႇၼႆ။

ၼႂ်းၶေႃႈတူၵ်းလူင်းၵိုတ်းတိုၵ်းၵၼ် 10 ၶေႃႈၼၼ်ႉ ဢီႊရၼ်ႊ ဢမ်ႇၸွမ်းလႆႈၼႆႉပဵၼ်လွင်ႈ ၼိဝ်ႊၶလီႊယႃႊ။ ထရမ်ႉ တႄႉလၢတ်ႈဝႃႈ ဢီႊရၼ်ႊ ပဵၼ်ၸိုင်ႈမိူင်းဢၼ်ၶႂ်ႈလွၵ်ႇငိုတ်ႈၵူၼ်းတင်းလုမ်ႈၾႃႉလႄႈ ဢမ်ႇယွမ်းၵိုတ်းၶူင်းၵၢၼ်ၼိဝ်ႊၶလီႊယႃႊ – ၵွပ်ႈၼႆလႄႈ သွင်ၾၢႆႇတေၶိုၼ်းလႆႈဢုပ်ႇၵၼ်ထႅင်ႈယူႇ ဝႃႈၼႆ။

လွင်ႈၼႆႉ ၸွမ်ၽူႈၼမ်းၼႂ်းၸၢတ်ႈၸိုင်ႈလုမ်ႈၾႃႉ ဢၼ်ႊထူဝ်ႊၼီႊယူဝ်ႊ ၵူႊၻႃႊရၢတ်ႉသ် ၵေႃႈယိုၼ်ယၼ်လၢတ်ႈဝႃႈပၢင်ဢုပ်ႇၵုမ်သွင်ၾၢႆႇ လႅပ်ႈတေပဵၼ်ၶိုၼ်းတႄႉယူႇ ဝႃႈၼႆဝႆႉ။

ၵူၺ်းၵႃႈယၢမ်းလဵဝ်တႄႉ ႁိူဝ်းသိုၵ်းဢမေႊရိၵၼ်ႊ 10 ပၢႆ ဢဵၼ်ႁႅင်းသိုၵ်းဢမေႊရိၵၼ်ႊ 1000 ပၢႆ မႃးပႂ်ႉဝႆႉတီႈသဵၼ်ႈတၢင်းၼမ်ႉ ႁေႃႊမူတ်ႉသ်သေၶိုင်ၵူတ်ႇထတ်းႁၢမ်ႈႁႅတ်ႉ ႁိူဝ်းၵုၼ်ႇႁိူဝ်းတၢင်ႇၼမ်ႉမၼ်းၸိူဝ်ႉၾႆးဝႆႉယူႇ။လွင်ႈၼႆႉဢမေႊရိၵၼ်ႊ ယိူင်းၵၢၼ်းႁႅတ်ႉသဵၼ်ႈတၢင်းငိုၼ်းၶဝ်ႈၸိုင်ႈမိူင်းဢီႊရၼ်ႊလႄႈ တေႁဵတ်းႁႂ်ႈဢီႊရၼ်ႊၵိၼ်းၸႂ် – ၶၢဝ်ႇ BBC ထတ်းသၢင်ႁၢႆးငၢၼ်းဝႆႉၼင်ႇၼႆ။