ၶၢဝ်းပွႆးသွၼ်းၼမ်ႉလိူၼ်ႁႃႈ ဝၼ်းတီႈ 12 ထိုင် 15/04/2026 ၼႆႉ တၢင်ႉႁႅင်းမႆႈပုင်ႈသုင် ဝႆႉလႄႈ ၵူၼ်းၸိူဝ်းလဵၼ်ႈၼမ်ႉမူၼ်ႈသိူဝ်းယူႇၸိူဝ်းၼႆႉတင်းမူတ်း ႁႂ်ႈၾၢင်ႉပၢႆးယူႇလီၵၼ်ၼႆ ၽူႈလူင်ႉလႅၼ်ႇၾၢႆႇၵုမ်းၵမ်သိင်ႇဝႅတ်ႉလွမ်ႉ လူင်ပွင်ၸိုင်ႈထႆး တိုၵ်းသူၼ်း လၢတ်ႈ ဝႆႉ ၼင်ႇၼႆ။

ႁႅင်းမႆႈၼႂ်းဝူင်ႈၼႆႉ မီးဝႆႉ 36 – 41 တီႊၵရီႊ သႄႊလ်သီႊယႅတ်ႊ။ ယွၼ်ႉၼၼ် သင်တူဝ်ၶိင်းၵူၼ်းႁဝ်း လႆႈယူႇၼႂ်းႁွၼ်ႉမႆႈယဝ်ႉ ၶိုၼ်းယမ်းၼမ်ႉၼႆၸိုင် ၸၢင်ႈပဵၼ် ႁူဝ်ၶႆႈႁူဝ်မဝ်း၊ ၵတ်းသၼ်ႇလႄႈ ဢမ်ႇ ယူႇလီ။

လိူဝ်ၼၼ်ႉ ၽွင်းမိူဝ်ႈယူႇၼႂ်းလႅတ်ႇႁွၼ်ႉမႆႈႁႅင်းၼၼ်ႉ သင်ၺႃးၼမ်ႉၵတ်းႁူတ်းသႂ်ႇ ဢမ်ႇ ၼၼ် လႆႈၼုင်ႈဝႆႉသိူဝ်ႈၶူဝ်းယမ်းၼမ်ႉၼႆ ၸၢင်ႈပဵၼ်သျွတ်ႉ (Heat Stroke)၊ တႃမူဝ်း လႄႈ ထူၺ်ႈ ၸႂ်ၵပ်ႉၸႂ်သၼ်ႇ ၼႆယဝ်ႉ။

ၽွင်းမိူဝ်ႈႁႅင်းမႆႈ သုင်လိူဝ် 40-41 တီႊၵရီႊ သႄႊလ်သီႊယႅတ်ႊၼၼ်ႉ သင်ဝႃႈယူႇ ၼႂ်းလႅတ်ႇမႆႈ ႁိုင်မွၵ်ႈၼိုင်ႈၸူဝ်ႈမူင်းၼႆ ၸၢင်ႈပဵၼ်ၽေးထိုင်သႆၢၸႂ်၊ ႁႅင်းၵမ်ႉတူဝ်တေယူပ်ႈယွမ်းလႄႈ ထၢတ်ႈၼမ်ႉ ၼႂ်း တူဝ်ၵေႃႈ ယွမ်းလူင်းႁႅင်း။ ယွၼ်ႉၼၼ် ၽွင်းၶၢဝ်းလႅတ်ႇႁွၼ်ႉမႆႈႁႅင်း ၼႂ်းၵႄႈ ၵၢင်ၼႂ် 11 မူင်း တေႃႇ ထိုင် ဝၢႆးဝၼ်း 3 မူင်းၼႆႉ ထုၵ်ႇလီၾၢင်ႉလွင်ႈၵႂႃႇမႃးၼႂ်းလႅတ်ႇႁွၼ်ႉမႆႈ ဝႃႈၼႆ။

ၼင်ႇႁိုဝ်တေဢမ်ႇပဵၼ်ၽေး ၽွင်းၶၢဝ်းလႅတ်ႇမႆႈႁႅင်းၼၼ်ႉ ထုၵ်ႇလီယူႇသဝ်း တီႈလႆႈလူမ်းၶဝ်ႈ ဢွၵ်ႇလီ၊ တီႈႁူမ်ႈတီႈယဵၼ်၊ သင်ဝႃႈ လဵၼ်ႈၼမ်ႉယမ်းၼမ်ႉဝႆႉ ထုၵ်ႇလီဢဝ်ၼမ်ႉၸိုၼ်ႈသႂ် သုၵ်ႈ လၢင်ႉပၼ်လႄႈ ထုၵ်ႇလီလၢႆႈၶူဝ်းၼႆ ၽူႈလူင်ႉလႅၼ်ႇၾၢႆႇၵုမ်းၵမ်သိင်ႇဝႅတ်ႉလွမ်ႉ မိူင်းထႆး လၢတ်ႈတိုၵ်း သူၼ်းဝႆႉ ၼင်ႇၼႆ။