ဢူးမိၼ်းဢွင်ႇလၢႆႇ ၸွမ်ၸိုင်ႈ ယိုတ်းဢႃႇၼႃႇၸိုင်ႈမိူင်း တေဢွၼ်ႁူဝ်ၼမ်းၼႃႈ ၵေႃႇမတီႇသၢင်ႈလွင်ႈငမ်း ယဵၼ် လႄႈ ၵၢၼ်ၶွတ်ႇလိူတ်ႈၽွမ်ႉႁူမ်ႈၸိူဝ်ႉၸၢတ်ႈ (NSPCC) ၊ ၸွမ်သိုၵ်း ယႃႇပျေႉ ၵေႃႉတေႁပ်ႉပဵၼ်ႁူဝ် ပဝ်ႈ ၶွတ်ႇၽွတ်ႈၶိုၼ်းၵေႃႇမတီႇငူပ်ႉငီႉလွင်ႈငမ်းယဵၼ် (NSPNC) လႄႈ ၵႅမ်ၸွမ်ၸိုင်ႈ ၵေႃႉထီႉ 1 ဢူးၺူဝ်ႇၸေႃး ပဵၼ်ႁူဝ်ပဝ်ႈ ၵေႃႇမတီႇပွင် ၵၢၼ် (NSPWC) ၶဝ်ႁူမ်ႈၵၼ်သေ ဢဝ်ၶေႃႈဢၢင်ႈ ၵၢၼ်ၶွတ်ႇလိူတ်ႈၽွမ်ႉႁူမ်ႈၸိူဝ်ႉၸၢတ်ႈၼႆသေ ၶွတ်ႇၽွတ်ႈၶိုၼ်း ၵေႃႇမတီႇၵၢၼ်ငမ်းယဵၼ် ။
ၼႂ်းၵေႃႇမတီႇသၢင်ႈလွင်ႈငမ်းယဵၼ် လႄႈ ၵၢၼ်ၶွတ်ႇလိူတ်ႈၽွမ်ႉႁူမ်ႈၸိူဝ်ႉၸၢတ်ႈ NSPCC ၼႆႉ ၽူႈၶဝ်ႈႁူမ်ႈ တင်းသဵင်ႈမီးယူႇမွၵ်ႈ 15 ၵေႃႉ ပႃးၸဵမ်ၵႅမ်ၸွမ်ၸိုင်ႈ ဢူးၺူဝ်ႇၸေႃး၊ တေႃႇၼၼ်းၼီႇၼီႇဢေး၊ ၽူႈၵုမ်းၵၢၼ်သိုၵ်း သုင်သုတ်း ၸွမ်ၸိၵ်းသိုၵ်းမၢၼ်ႈၵေႃႉမႂ်ႇ ၸွမ်သိုၵ်းလူင် ယႄးဝိၼ်းဢူး ၸိူဝ်းၼႆႉၵေႃႈ ၶဝ်ႈပႃးဝႆႉ။
ၵၢၼ်ငၢၼ်းဢၼ်ၸိူဝ်းၶဝ်တေလႆႈႁဵတ်းသၢင်ႈၼႆႉ ပဵၼ်ၵၢၼ်တမ်းဝၢင်းမူႇပိူင် လႄႈ ၼမ်းၼႃႈ သိူဝ်ႇပၼ်သဵၼ်ႈတၢင်း တႃႇၽေႃႇၼမ်ႉၼႄတူဝ် ၶၵ်ႉၵၢၼ်လွင်ႈငမ်းယဵၼ် လႄႈ ၵၢၼ် ၶွတ်ႇလိူတ်ႈၽွမ်ႉႁူမ်ႈၸိူဝ်ႉၸၢတ်ႈ ပိူဝ်ႈတႃႇ ပဵၼ်မႃး မိူင်းႁူမ်ႈတုမ် ဢၼ်ၸႂ်ႉတိုဝ်းပိူင် ၾႅတ်ႊတရႄႊ တီႊမူဝ်ႊ ၶရေႊၸီႇ ပဵၼ်ငဝ်ႈၶၢမ်ႇပိုၼ်ႉၼၼ်ႉ တေလႆႈဢိင်ၼိူဝ် ၶေႃႈတူၵ်း လူင်း ၵၢၼ်ၵိုတ်းတိုၵ်းပတ်းပိုၼ်ႉတူဝ်ႈမိူင်း (NCA) သေ ႁဵတ်းသၢင်ႈ တမ်းဝၢင်းမူႇပိူင်ၵႂႃႇ ၸွမ်းၼင်ႇတမ်းဝႆႉၼၼ်ႉ ၼႆယဝ်ႉ။
ၵေႃႇမတီႇပွင်ၵၢၼ် (NSPWC) ဢၼ်ၵႅမ်ၸွမ်ၸိုင်ႈ ၵေႃႉထီႉ 1 ဢူးၺူဝ်ႇၸေႃး တေႁပ်ႉပဵၼ်ႁူဝ်ပဝ်ႈၼၼ်ႉ ဢဝ် ၵႅမ်ၸွမ်ၸိၵ်းသိုၵ်းမၢၼ်ႈ ၸွမ်သိုၵ်းလူင် ၵျေႃႇၸွႃႇလိၼ်း ၊ ၽူႈၵုမ်းတိူင်းသိုၵ်းသုင်သုတ်း ၸွမ်ၽွင်းလူင် ၸႄႈမိူင်း လႄႈ တိူင်း၊ ၽွင်းလူင်မိူင်းႁူမ်ႈတုမ်၊ ၵႅမ်ၽွင်းလူင် ၸိူဝ်းၼၼ်ႉ ႁူမ်ႈသဵၼ်ႈ ၽူႈၶဝ်ႈႁူမ်ႈမီး မွၵ်ႈ 35 ၵေႃႉသေ ၶွတ်ႇၽွတ်ႈဝႆႉ။ တေလႆႈႁဵတ်းသၢင်ႈၼႃႈၵၢၼ် ၽေႃႇၼမ်ႉၼႄတူဝ် ၶၵ်ႉၵၢၼ်ငၢၼ်းဢၼ်တမ်းဝၢင်း ဝႆႉၸိူဝ်းၼၼ်ႉ ႁႂ်ႈဢွင်ႇမၢၼ် ထိုင်တီႈထိုင်တၢင်း ႁႂ်ႈပေႃးလႆႈ ၼႆယဝ်ႉ။
ၵေႃႇမတီႇ ၵၢၼ်ငမ်းယဵၼ် ဢၼ်ဢဝ်ၽူႈၼမ်းသိုၵ်း ပဵၼ်ယႂ်ႇသေ ၶွတ်ႇၽွတ်ႈၶိုၼ်ႈမႃး ၼႂ်းပၢၼ် ၸွမ်ၸိုင်ႈ ဢူးမိၼ်းဢွင်ႇလၢႆႇ ၵေႃႉယိုတ်း ဢႃႇၼႃႇၸိုင်ႈမိူင်းၼႆႉ တေလႆႈတမ်း ဝၢင်း မႁႃႇပိဝ်ႇႁႃႇ မူႇပိူင် ၶၵ်ႉၵၢၼ် ၼႃႈတီႈပုၼ်ႈၽွၼ်း ၸဝ်ႈတႃႇၼႃႉ ၼႂ်းမိူင်းၼွၵ်ႈမိူင်း၊ လူင်ပွင်ၸိုင်ႈ၊ ၸုမ်း ၸိူဝ်းဢမ်ႇၸႂ်ႈလူင်ပွင်ၸိုင်ႈ၊ ၸုမ်းၸၢတ်ႈၸိုင်ႈလုမ်ႈၾႃႉၸိူဝ်းၼႆႉ ႁူမ်ႈ ႁွမ်းငူပ်ႉငီႉၵၼ်လႆႈ။
လိူဝ်ၼၼ်ႉ တေလႆႈတမ်းဝၢင်းပၼ် မူႇပိူင် ဢၼ်ဢိင်ၼိူဝ် ၶေႃႈတူၵ်းလူင်းၵၢၼ်ၵိုတ်းတိုၵ်းပတ်းပိုၼ်ႉတူဝ်ႈ မိူင်း (NCA) ပၼ် တပ်ႉသိုၵ်း၊ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း၊ ၸုမ်းတူင်ႇဝူင်းၵူၼ်း လႄႈ ၸုမ်းၸၢတ်ႈၸိုင်ႈလုမ်ႈၾႃႉ ဢိၵ်ႇပႃး ၽူႈလူင်ႉလႅၼ်ႇပၢႆးႁူႉတၢင်းမေႃၶဝ်ၸိူဝ်းၼႆႉ တေလႆႈ ႁဵတ်းသၢင်ႈ ႁႂ်ႈၶဝ် ပေႃးမႃးၶဝ်ႈႁူမ်ႈၸွမ်းလႆႈ ၼႆယဝ်ႉ။
ၵေႃႇမတီႇတႃႇငူပ်ႉငီႉ (NSPNC) ဢၼ် ၸွမ်သိုၵ်း ယႃႇပျေႉ တေပဵၼ်ႁူဝ်ပဝ်ႈၼၼ်ႉ ၽူႈၼမ်းၼႂ်း တေပဵၼ် ၸွမ်သိုၵ်း မိၼ်းၼၢႆႇ၊ ၵႅမ် ၽူႈၼမ်းၼႂ်း ၸဝ်ႈသိုၵ်းလူင် ဝၼ်ႇၼဢွင်ႇသေ ႁူမ်ႈသဵၼ်ႈ ၽူႈၶဝ်ႈႁူမ်ႈမီး 19 ၵေႃႉ။ ၵေႃႇမတီႇၼႆႉ တေလႆႈႁပ်ႉပုၼ်ႈၽွၼ်း ႁဵတ်းၵၢၼ်ဢုပ်ႇဢူဝ်းလွင်ႈ ငမ်းယဵၼ် လႄႈ ႁဵတ်းၵၢၼ်ၽေႃႇၼမ်ႉၼႄတူဝ်ၵႂႃႇ ၸွမ်းၼင်ႇ ၵေႃႇမတီႇငဝ်ႈငုၼ်း (NSPCC) တမ်းဝၢင်း မူႇဝႃႇတဝႆႉၼၼ်ႉ ႁႂ်ႈလႆႈ။ လိူဝ်ၼၼ်ႉ တေလႆႈႁပ်ႉပုၼ်ႈၽွၼ်း ၸတ်းၵၢၼ်ပၼ် လွင်ႈၸႂ်ႉၸၢႆႇငိုၼ်းတွင်း ၼႂ်းၵေႃႇမတီႇငူပ်ႉငီႉၼၼ်ႉထႅင်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ