ၼႂ်းဝူင်ႈဝၢင်ႈၼႆႉ သိုၵ်းမိူင်းဢမေႊရိၵၼ်ႊ တင်း မိူင်းဢီႊရၼ်ႊ ပိုၼ်ၽၢဝ်ႇၵိုတ်းတိုၵ်းၵၼ်သေတႃႉ ယွၼ်ႉသိုၵ်းမိူင်းဢိတ်ႊသရေႊ ဢမ်ႇၵိုတ်းၵၢၼ်ယိုဝ်းတိုၵ်းမိူင်းလပ်ႊပၼုၼ်ႊလႄႈ ႁဵတ်းႁႂ်ႈ ၶေႃႈတူၵ်းလူင်း ၵိုတ်းတိုၵ်း ၸွမ်ၸိုင်ႈတေႃႊၼႄႊထရမ်ႉ တင်း လူင်ပွင်ၸိုင်ႈမိူင်းဢီႊရၼ်ႊ ဢမ်ႇဢွင်ႇ မၢၼ်တေႉတေႉ။ မိူင်းဢီႊရၼ်ႊ သိုပ်ႇဢိုတ်းပႅတ်ႈသဵၼ်ႈ တၢင်းၼမ်ႉႁေႃႊမုၵ်ႉသ် ဢၼ်ႁိူဝ်းသၢင်းၽေႃး တေႃႉၼမ်ႉမၼ်းမဵၼ် လတ်းၽၢၼ်ႇဢွၵ်ႇမႃးၼၼ်ႉ။

ယွၼ်ႉပၼ်ႁႃပၢင်တိုၵ်းသိုၵ်းသိူဝ် တၢင်းမိူင်းဝၼ်းဢွၵ်ႇၵၢင်သေ ၵႃႈၶၼ်ၼမ်ႉမၼ်းၸၢၵ်ႈၵူႈသႅၼ်းသႅၼ်း ၼႂ်းမိူင်းႁူမ်ႈတုမ် ၊ မိူင်းထႆးၵေႃႈ ဢမ်ႇမီးငဝ်းလၢႆးတႃႇလူင်းငၢႆႈငၢႆႈ တိုၵ်ႉသိုပ်ႇပုင်ႈၶိုၼ်ႈထႅင်ႈယူႇ။

ၵႃႈၶၼ်ၼမ်ႉမၼ်းၸၢၵ်ႈ ၼႂ်းမိူင်းႁူမ်ႈတုမ် (မိူင်းမၢၼ်ႈ) ၼႂ်းဝူင်ႈၼႆႉ ထၢတ်ႈသီႇ တင်း တီႊၸႄႇ ၼိုင်ႈလီႇတႃႇလႂ် သိုပ်ႇပုင်ႈၶိုၼ်ႈၵႂႃႇထႅင်ႈ 110 ထိုင် 900 ပျႃးပၢႆ။ မိူဝ်ႈဝူင်ႈပူၼ်ႉမႃး ထၢတ်ႈသီႇ သႅၼ်း 92 ၼိုင်ႈလီႇတႃႇလႂ် 4,625 ပျႃး၊ သႅၼ်း 95 ၼိုင်ႈလီႇတႃႇလႂ် 4,780 ပျႃး၊ တီႇၸႄႇ ၼိုင်ႈလီႇတႃႇ 5,680 ပျႃး လႄႈ ပရီႇမီႇယႅမ်ႇတီႇၸႄႇသမ်ႉ ၼိုင်ႈလီႇတႃႇ 6,805 ပျႃး။

ၼႂ်းဝူင်ႈၼႆႉ ၵႃႈၶၼ်ၼမ်ႉမၼ်းထၢတ်ႈသီႇ သႅၼ်း 92 ၼိုင်ႈလီႇတႃႇ ပဵၼ်ၵႂႃႇ 4,735 ပျႃး၊ သႅၼ်း 95 ၼိုင်ႈလီႇတႃႇ 4,945 ပျႃး၊ ၼမ်ႉမၼ်းၸၢၵ်ႈတီႇၸႄႇ ၼိုင်ႈလီႇတႃႇ 6,485 ပျႃး လႄႈ ပရီႇမီႇယႅမ်ႇတီႇၸႄႇ ၼိုင်ႈလီႇတႃႇထိုင်ၵႂႃႇ 7,755 ပျႃးၼႆ ၵေႃႇမတီႇၾၢႆႇၸတ်းၵၢၼ် လႄႈ ထိင်းသိမ်းၵဵပ်းႁွမ်ၼမ်ႉမၼ်းၸၢၵ်ႈၵူႈသႅၼ်း တႂ်ႈလူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇၼင်ႇၼႆ။

ယွၼ်ႉၼၼ်လႄႈၵႃႈၶၼ်ၼမ်ႉမၼ်းၸၢၵ်ႈထၢတ်ႈသီႇ သႅၼ်း 92 ၼိုင်ႈလီႇတႃႇၼႆႉ ပုင်ႈၶိုၼ်ႈၵႂႃႇ 110 ပျႃး၊ သႅၼ်း 95 ၼိုင်ႈလီႇတႃႇ ၶိုၼ်ႈၵႂႃႇ 165 ပျႃး၊ တီႇၸႄႇ ၼိုင်ႈလီႇတႃႇ ပုင်ႈ ၶိုၼ်ႈၵႂႃႇ 850 ပျႃး လႄႈ ပရီႇမီႇယႅမ်ႇ တီႇၸႄႇၵေႃႈ ပုင်ႈၶိုၼ်ႈၵႂႃႇၼမ်လိူဝ်ပိူၼ်ႈသုတ်း ၼိုင်ႈလီႇတႃႇၼႆႉ 950 ပျႃး ၼႆယဝ်ႉ။

ယၢမ်းလဵဝ် ၵူၼ်းႁဵတ်းၵၢၼ်ၽုၵ်ႇသွမ်ႈ လႄႈ ၵူၼ်းမိူင်းၵူႈၸၼ်ႉထၢၼ်ႈ ၸိူဝ်းလူဝ်ႇၸႂ်ႉတိုဝ်းၼမ်ႉမၼ်းၸၢၵ်ႈ ၵူႈသႅၼ်းသႅၼ်း လႆႈၵႂႃႇၶဝ်ႈထႅဝ်ပႂ်ႉသိုဝ်ႉၼမ်ႉမၼ်းၸၢၵ်ႈၵူၺ်းဢမ်ႇ ၵႃး ရူတ်ႉၵႃးၸိူဝ်းဢမ်ႇမီးဝႂ်လၢႆႇၸိၼ်ႇ ပဵၼ်တၢင်းၵၢၼ်ၼၼ်ႉၵေႃႈ ၸွမ်းၼႂ်းဝဵင်းယႂ်ႇဝဵင်းလူင်ၼႆႉ သိုၵ်းမၢၼ်ႈယိုတ်းမိူင်းဢွၵ်ႇပိူင် ဢမ်ႇပၼ်ၸဝ်ႈႁၢၼ်ႉၼမ်ႉမၼ်းၶၢႆပၼ်လႄႈ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇႁၢဝ်ႈႁႅင်း။