ၾႆးမႆႈ တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း ပလိၵ်ႈမၢၼ်ႈ သိုၵ်းမၢၼ်ႈ တီႉၺွပ်းၵူၼ်းၸၢႆး ၵေႃႉၼိုင်ႈ ဢႃယု 40 ပီ ဢၼ်မီးၾၢင်ႁၢင်ႈတၢင်းႁဵတ်းသၢင်ႈဢၼ်လီထၢင်ႇထိူမ်ဝႃႈ ပဵၼ်ၵူၼ်း ၸုတ်ႇၽဝ်  ဝႃႈၼႆ ။

မိူဝ်ႈဝႃး ဝၼ်းတီႈ 8/4/2026 ယၢမ်းၵၢင်ၶမ်ႈ 9 မူင်းၶိုင်ႈ ၾႆးတႄႇမႆႈႁိူၼ်းလင်ၼိုင်ႈ တီႈၼႂ်းပွၵ်ႉသူၺ်ႇတွင်ႇ ၼိူဝ်သဵၼ်ႈတၢင်း ၵူင်ႇတႄႇ(ၵူၼ်းၵႃႉ) ၊  ၾႆးလၢမ်းႁိူၼ်းၸပ်းၵၼ်  3 လင်လႄႈ မႆႈပႃးႁၢၼ်ႉၶၢႆၾူၼ်ႊ My Dream – မီးလွင်ႈလူႉသုမ်းၵႂႃႇတင်းၼမ် ဝႃႈၼႆ ။

ၸဝ်ႈႁၢၼ်ႉၾူၼ်ႊ My Dream လၢတ်ႈၽူႈတွႆႇႁွၵ်ႈဝႃႈ -“ တီႈႁိူၼ်းၼၼ်ႉ မီးၵူၼ်းပႂ်ႉႁိူၼ်း ၵေႃႉၼိုင်ႈ ဢၼ်ၸဝ်ႈႁိူၼ်းၸၢင်ႈဝႆႉ ၊ မၼ်းၼႆႉ လဝ်ႈၵေႃႈၵိၼ် ၊  ယႃႈၵေႃႈၵိၼ်။ မိူဝ်ႈၶႃႈတေလုၵ်ႉတီႈႁၢၼ်ႉသေ ဢၢၼ်းပွၵ်ႈမိူဝ်းႁိူၼ်းၼၼ်ႉ  မၼ်းပေႃးမဝ်းလဝ်ႈသေ ဢူၼ်မေႃးသဵင်လင်ယူႇႁင်းၵူၺ်းမၼ်းယဝ်ႉ ၊ ၽိူဝ်ႇၶႃႈထိုင်ႁိူၼ်းယဝ်ႉ မွၵ်ႈၶိုင်ႈၸူဝ်ႈမူင်းၵူၺ်း ၾႆးတႄႇမႆႈၼႂ်းႁွင်ႈဢၼ်မၼ်းယူႇၼၼ်ႉဢေႃႈ ၊ ၵွပ်ႈၼႆ ပလိၵ်ႈသိုၵ်းမၢၼ်ႈမႃးၵူတ်ႇထတ်း ထၢင်ႇထိူမ်ဝႃႈပဵၼ်ၼမ်ႉမိုဝ်းမၼ်းၼႆသေ တီႉၺွပ်းမၼ်းၵႂႃႇ ”- ဝႃႈၼႆ ။

ၵေႃႉထုၵ်ႇထၢင်ႇထိူမ်သေၺႃးၺွပ်းၵႂႃႇၼႆႉပဵၼ် ဝေႇယၢၼ်ႇသူဝ်း (ဝေယံစိုး) ဢႃယု   40 ပီ၊ ယၢမ်းလဵဝ် ပလိၵ်ႈသိုၵ်းမၢၼ်ႈတီႉၺွပ်းတူဝ်မၼ်းၸၢႆးဝႆႉ တီႈႁူင်းပလိၵ်ႈ ယဝ်ႉဝႃႈၼႆ ။

ၾၢႆႇလၢမ်းမႆႈပႃးႁၢၼ်ႉၶၢႆၾူၼ်ႊလႄႈ သုမ်းၾူၼ်ႊဢိၵ်ႈၶူဝ်းၶွင်ၸႂ်ႉၸွမ်းၾူၼ်ႊ  ၵိုင်ႇငိုၼ်း ၸမ် 200 သႅၼ်ပျႃး ဝႃႈၼႆ ။

ၵူၼ်းဢၼ်မႃးၸွႆႈၶႄၾႆး ပဵၼ်ၵူၼ်းၼႂ်းပွၵ်ႉလႄႈ ၊ ပလိၵ်ႈ ၊ ၽူႈမီးပုၼ်ႈၽွၼ်း ၾၢႆႇၶႄၾႆး ၊ ပျီႇတူႉၸိတ်ႉ ဢဝ်ႁူမ်ႇလူမ်ႈ ၼႂ်းပိုၼ်ႉတီႈ ၊ မိူဝ်ႈၽွင်းၶႄၾႆးၼၼ်ႉ မီးၵူၼ်း မၢတ်ႇၸဵပ်းၵႂႃႇ 2 ၵေႃႉ လႆႈႁူႉၼင်ႇၼႆ။

ၸဝ်ႈႁၢၼ်ႉၶၢႆၾူၼ်ႊသိုပ်ႇလၢတ်ႈထႅင်ႈဝႃႈ -“ ၵႃႈၶၼ်ဢၼ်လႆႈလူႉသုမ်းၵႂႃႇ တႄႉ ဢမ်ႇပႆႇလႆႈၼပ်ႉတူၺ်းလီလီ ၊ ႁၢၼ်ႉၾူၼ်ႊၶႃႈၼႆႉ တၢင်းမူတ်း တေမီးမွၵ်ႈ ႁိမ်းၸမ် 200 သႅၼ်ပျႃး ၊ ၼႂ်းၼႆႉတေပႃး ၶိူင်ႈၸႂ်ႉၾူၼ်ႊ ၊ ၾူၼ်ႊဢၼ်ပိူၼ်ႈမႃးပၼ်ဝႆႉတႃႇမႄး ၸိူဝ်းၼၼ်ႉ။ ၼႅတ်ႈၸွႆႈၵၼ်ဢဝ်ၶူဝ်းၶွင်ဢွၵ်ႇႁၢၼ်ႉ  ။ ဢၼ်ပႃးၵႂႃႇၸွမ်းၾႆးၵေႃႈမီး ဢၼ်ႁၢႆၵႂႃႇၽွင်းတေႃႉၶူဝ်းပၢႆႈၵေႃႈမီး။  ”- ဝႃႈၼႆ ။

မိူၼ်ၼင်ႇၼႆ ၼႂ်းဝၼ်းတီႈ 26/3/ 2026 ယၢမ်းၵၢင်ၶမ်ႈ ၾႆးၾႃႉသျွတ်ႉ သေ ႁဵတ်းႁႂ်ႈၾႆးမႆႈႁိူၼ်း 3 လင် လႄႈ ရူတ်ႉၶိူင်ႈ 5 လမ်း တီႈဝၢၼ်ႈလိၼ်ပူၵ်ႇတႅၵ်ႇ(တွင်ႇပူဝ်ႉၵျီး) ၼႂ်းၼွင်ႁၢႆးယႃႈ ၸႄႈဝဵင်းယွင်ႁူၺ်ႈ ။

မိူၼ်ၼင်ႇၼၼ် ၼင်ႇၵဝ်ႇ ၼႂ်းဝၼ်းတီႈ 27/3/2026 ယၢမ်းၵၢင်ၼႂ် 10 မူင်းၶိုင်ႈ တဝ်ႈၵႅတ်ႉသ် တႅၵ်ႇ ႁဵတ်းႁႂ်ႈ ၾႆးမႆႈႁိူၼ်းလင်ၼိုင်ႈ ဢၼ်မီးၼိူဝ်သဵၼ်ႈတၢင်း ၼိၼ်းသီႇ ပွၵ်ႉပျီႇတေႃႇသႃႇ (ပြည်တော်သာ) ဝဵင်းတူၼ်ႈတီးထႅင်ႈ ။

ယၢမ်းလဵဝ် ၾိင်ႈၾႃႉၵိုင်ႉၵၢင်ႉႁွၼ်ႉမႆႈႁႅင်းမႃးတိၵ်းတိၵ်းလႄႈ ထုၵ်ႇလီဢွၼ်ၵၼ် ၾၢင်ႉ ၽေးၽိုၼ်း ၽေးၾႆး။

တႃႇႁႂ်ႈၾႆးယႃႇမႆႈငၢႆႈၼၼ်ႉ ႁႂ်ႈၽဵဝ်ႈယုမ်းယွမ်ႇလႄႈယုၵ်းယၢၵ်း ၼႂ်းႁိူၼ်းလႄႈၸွမ်းႁိမ်းႁွမ်းႁိူၼ်းၸဝ်ႈၵဝ်ႇ မူတ်းမူတ်းသႂ်သႂ် ၊ ႁႂ်ႈဝႆႉပုင်းၶႄၾႆး လႄႈ ၶိူင်ႈယိပ်းတႃႇၶႄၾႆး တီႈဢၼ်ဢဝ်လႆႈငၢႆႈငၢႆႈမၼ်း။ ယႃႇၵဵပ်းဝႆႉ ၼမ်ႉမၼ်းၸၢၵ်ႈ ဢၼ်တေၸၢင်ႈပဵၼ်ၸိူဝ်ႉၾႆးလႆႈငၢႆႈ။ ပေႃးမီးၼမ်ႉမၼ်း လႄႈမေႃႈၵႅတ်ႉသ်ၸိုင်ယႃႇလႃႈလီတႆႈၾႆးတဵၼ်းဝႆႉႁိမ်းၸမ်။ ယႃႇၵႂႃႇလုတ်ႇလႅၼ်းယႃႈႁိမ်းၸမ်။

ၼင်ႇႁိုဝ်တေလွတ်ႈၽေးၼၼ်ႉ သင်တေဢွၵ်ႇႁိူၼ်းၵႂႃႇတၢင်းၼွၵ်ႈၼႆၸိုင် ထုၵ်ႇလီမွတ်ႇ မုၵ်ႉၾႆး၊ ၾႆးတဵၼ်း ပိၵ်ႉဝႆႉ ၾႆးၾႃႉတင်း ၾႆးသႅင်လႅတ်ႇ ၵူႈဢၼ်ဢၼ်၊ ထွၼ်သၢႆထႅမ်ႁႅင်းၾူၼ်ႊ ထႅမ်ႁႅင်းပႅတ်ႊထရီႊၵူႈဢၼ်ဢၼ်၊ မေႃႈၾႆးၷႅတ်ႉသ် ၸိူဝ်းၼႆႉၸႂ်ႉယဝ်ႉႁႂ်ႈၶိုၼ်းပိၵ်ႉဝႆႉ လီလီငၢမ်းငၢမ်းယဝ်ႉၸင်ႇဢွၵ်ႇႁိူၼ်း ၼႆၸဝ်ႈႁၢၼ်ႉ ၶၢႆၵုၼ်ႇ တိုၵ်းသူၼ်း လၢတ်ႈပႃးၼင်ႇၼႆ ။