ၾူၼ်လူင်လူမ်းလႅင်ႉလႄႈမၢၵ်ႇႁဵပ်းတူၵ်း ဝဵင်းဝၢၼ်ႈငႂ်ႈ ယႂႃႇငၢၼ်ႇ ႁိူၼ်းယေး သူၼ်ႁႆႈ ၵူၼ်းဝၢၼ်ႈၵူၼ်းမိူင်းလူႉၵွႆၼမ် ။
ၼႂ်းဝၼ်းတီႈ 6-7 /4/2026 ၼႂ်းၶၢဝ်းတၢင်း သွင်ဝၼ်း ၾူၼ်လူင်ႁႃႇယႂ်ႇတူၵ်းတၢင်းဝၢၼ်ႈ ၼပၢၼ်းၵျီး ၸႄႈဝဵင်းဝၢၼ်ႈငႂ်ႈ၊ ႁဵတ်းႁႂ်ႈၵူၼ်းယေးလူႈၵွႆလႅဝ်ၽႅဝ်ႉ 5 လင်၊ သၢႆၾူၼ်ႊသၢႆၾႆးၶၢတ်ႇ ၵူၼ်းမိူင်းဢမ်ႇမီးၾႆးၾႃႉၸႂ်ႉ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၾူၼ်လူမ်းႁႅင်းၼႃႇ ၊ တီႈဝၢၼ်ႈၼႆႉ လင်ၶႃးပိဝ် ႁိူၼ်းၵူၼ်ႇၵွႆၵႂႃႇ 5 လင် ၊ ၾႆးၵေႃႈဢမ်ႇမႃးမီး 3 ဝၼ်းယဝ်ႉ ၊ ဢမ်ႇမီးၽႂ်မႃးၸွႆႈၶႃႈ တလဵဝ်ၵူၼ်းပိုၼ်ႉတီႈ လႆႈႁူမ်ႈၵၼ် ဢဝ်မႆႉပူၵ်ႇမႃးၵေႃႇၵၢႆႇသေ ယူႇသဝ်းဝႆႉ ၊ မၢၵ်ႇၶဝ်ႈတဝ်ႈၼမ်ႉ ၶူဝ်းသူၼ်ၶူဝ်းႁိူၵ်ႈၵေႃႈ မၢၵ်ႇႁဵပ်းတူၵ်းၽတ်ႉလႅဝ်ၵွႆၵႂႃႇတင်းၼမ် ”- ဝႃႈၼႆ ။
သူၼ်ႁႆႈၼႂ်းဝၢၼ်ႈၼပၢၼ်းၵျီး ဢၼ်လူႉသုမ်းယွၼ်ႉမၢၵ်ႇႁဵပ်းၼႆႉပဵၼ် သူၼ်ၽၵ်းမီႇ ၊ သူၼ်မၢၵ်ႇၶိူဝ်သူမ်ႈ ၊သူၼ်ၽၵ်းၵၢတ်ႇၸိူဝ်းၼႆႉ ။ ယၢမ်းလဵဝ် လူဝ်ႇတၢင်းၸွႆႈထႅမ် ၽႃႈယင် တႃႇၵင်ႈတႃႇမုင်း လႄႈ ၶိူဝ်းၶွင်ၸႂ်ႉတိုဝ်းၼႂ်းႁိူၼ်းယေး ဝႃႈၼႆ။
ၼၢင်းယိင်းၼႂ်းပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ ႁိူၼ်းၵူၼ်ႇလူႉၵွႆၵေႃႈ ၶိူဝ်းႁိူၼ်းၶိူဝ်းယေးၸိူဝ်းၼႆႉၵေႃႈ ၵွႆပႃး ၊ ၸဵမ်ဢဝ် ထူင်ၶဝ်ႈသၢၼ် ၊ ၶူဝ်းၼုင်ႈၸိူဝ်းၼႆႉ ယမ်းမူတ်း ၊ လူဝ်ႇတၢင်းၸွႆႈထႅမ်ဝႆႉဢေႃႈ မိူဝ်ႈလဵဝ်”- ဝႃႈၼႆ ။
ႁွင်ႈၵၢၼ်ၾၢႆႇလၢမ်းၶၢတ်ႈၾိင်ႈၾႃႉၾူၼ်လူမ်းတႄႉ ၼပ်ႉသွၼ်ႇသေပိုၼ်ၽၢဝ်ႇလၢတ်ႈဝႆႉၼႂ်းဝၼ်းတီႈ 6/4/2026 ၼၼ်ႉဝႃႈ ၼႂ်းၶၢဝ်းတၢင်းၼိုင်ႈဝူင်ႈထိ 2 လိူၼ်မၢတ်ႉၶျ်ၼႆႉ ၾူၼ်လူမ်းၸၢင်ႈတူၵ်းႁႅင်း။ တၢင်ႉႁႅင်းလူမ်းမႆႈၵေႃႈတေသုင်ႁႅင်း ၸၢင်ႈထိုင် 50 ၸိူဝ်းၼႆႉ။ၼႂ်းမိူင်းမၢၼ်ႈပတ်းပိုၼ်ႉပႃးၸဵမ်မိူင်းတႆး ႁႂ်ႈဢွၼ်ၵၼ်ပႂ်ႉထွမ်ႇၶၢဝ်ႇငၢဝ်းၾူၼ်လူမ်းသေ ႁႂ်ႈလႆႈၾၢင်ႉ တႃႇလွတ်ႈၽေးသၽႃႇဝသေၵမ်း – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ