တွၼ်ႈတႃႇလွင်ႈႁူမ်ႇလူမ်ႈလွတ်ႈၽေး ၽွင်းၶၢဝ်းပွႆးသွၼ်းၼမ်ႉၼႆသေ ပီၼႆႉ မိူင်းထႆးပိုၼ်ၽၢဝ်ႇဢွၵ်ႇဝႆႉ ပၵ်းပိူင်မၢႆမီႈ ဢၼ်တေလႆႈငိူင်ႉဝႄႈ လႄႈ တေလႆႈႁဵတ်းသၢင်ႈၸွမ်း (8) ၶေႃႈ။

ၶေႃႈထီႉၼိုင်ႈ – သင်ၵိၼ်မဝ်းသေ ႁေႃႈရူတ်ႉၵႃး၊ ႁဵတ်းၽိတ်းလၢႆလၢႆၵမ်းထပ်းၵၼ်ၸိုင် တေၸၢင်ႈၺႃးတၢမ်ႇ ၼၵ်းၼႃ။ သင် ဢႄႇလ်ၵူဝ်ႇႁေႃး ၼႂ်းလိူတ်ႈၼမ်လိူဝ် 50 မီႇလီႇၵရမ်ႇ (ပေႃးပဵၼ်လုၵ်ႈဢွၼ်ႇ ဢႃယု 20 ပီ လူင်းတႂ်ႈသမ်ႉ ၼမ်လိူဝ် 20 မီႇလီၵရမ်ႇ)ၸိုင် တေၺႃးတၢမ်ႇၶွၵ်ႈ 1 ပီ ဢမ်ႇၼၼ် တၢမ်ႇငိုၼ်း 5000 ထိုင် 2 မိုၼ်ႇဝၢတ်ႇ။ ၼႂ်းၶၢဝ်းတၢင်း 2 ပီ သင်ၶိုၼ်းႁဵတ်းၽိတ်း တၢင်းၽိတ်းၵဝ်ႇၸိုင် တေၺႃးတၢမ်ႇၶွၵ်ႈ 2 ပီ ဢမ်ႇၼၼ် တၢမ်ႇငိုၼ်း 1 သႅၼ်ဝၢတ်ႇ။

မၢႆသွင် – တေဢမ်ႇလႆႈၸႂ်ႉတိုဝ်း မူၵ်ႇသိတ်းၼမ်ႉ ဢၼ်ႁႅင်းယႂ်ႇ၊ သင်ဢဝ်မူၵ်ႇသိတ်းႁူတ်းၼမ်ႉ တိူဝ်ႉသႂ်ႇ ၼႃႈတႃ တူဝ်ၶိင်းၵူၼ်းသေၵေႃႉၵေႃႉ မၢတ်ႇၸဵပ်းၵႂႃႇၸိုင် တေၺႃးတၢမ်ႇ ၶွၵ်ႈ 2 ပီ ဢမ်ႇၼၼ် တၢမ်ႇငိုၼ်း 4000 ဝၢတ်ႇ။

မၢႆသၢမ် – တေဢမ်ႇလႆႈဢဝ် ပွင်ႇတႃႇ/ယႃႈယွမ်ႉ သႂ်ႇၼႂ်းၼမ်ႉသေ ႁူတ်းၵၼ်။ ပိူင်လူင် ၼင်ႇႁိုဝ် ၵူၼ်းႁေႃႈၶပ်းရူတ်ႉၵႃး ၵႂႃႇမႃးၸွမ်းဢွင်ႈတီႈၸိုဝ်ႈသဵင်လိုဝ်းလင် မီးၵူၼ်းလဵၼ်ႈ ၼမ်ႉၼမ် တေလွတ်ႈၽေး၊ တႃႇတေႁႄႉၵင်ႈ လွင်ႈပလၢတ်ႈလူမ်ႉသေ ၺႃးၾႆးၾႃႉသွတ်ႇ ၸဵမ်ၸိူဝ်းၼႆႉ ၼႆယဝ်ႉ။

မၢႆသီႇ – တေဢမ်ႇလႆႈၼုင်ႈသိူဝ်ႈၶူဝ်း ဢၼ်ႁၢင်ႈၸႃႉ တႃ၊ ဢၼ်တေသေႃႇသူၼ်း ႁႂ်ႈပဵၼ်ၸႂ်ၵႃႇမၸွမ်း ဢွင်ႈတီႈၵူၼ်းၵိုၼ်းၶွၼ်ႈ။ သင်ပူၼ်ႉပႅၼ်ၸိုင် တေၺႃးတၢမ်ႇငိုၼ်းထိုင် 5000 ဝၢတ်ႇ။

မၢႆႁႃႈ – ၼႂ်းၶၢဝ်းယၢမ်းမၵ်းမၼ်ႈဝႆႉၼၼ်ႉ တေဢမ်ႇလႆႈၶၢႆလဝ်ႈပၼ် လုၵ်ႈဢွၼ်ႇ ၸိူဝ်းဢႃယုပႆႇတဵမ်၊ တေဢမ်ႇလႆႈၶၢႆလဝ်ႈပၼ် လုၵ်ႈဢွၼ်ႇဢႃယုပႆႇတဵမ် 20 ပီ။ ၶၢႆပၼ် လဝ်ႈ လႄႈ ၶိူင်ႈမဝ်းမိင်း ၼႂ်းၶၢဝ်းယၢမ်း ဢၼ်မၵ်းမၼ်ႈဝႆႉ ၵၢင်ၼႂ် 11 မူင်းထိုင် ဝၢႆးဝၼ်း 2 မူင်း 1ပွၵ်ႈလႄႈ တၢမ်းၶမ်ႈ 5 မူင်းထိုင် ၵၢင်ၶိုၼ်း 12 မူင်းၵူၺ်း။ တေဢမ်ႇလႆႈၶၢႆလဝ်ႈ ၼႂ်းသူၼ်ႇမွၵ်ႇလႄႈ ဢွင်ႈတီႈႁွင်ႈၵၢၼ်ၸိူဝ်းၵဵဝ်ႇၶွင်ႈၸွမ်းလူင်ပွင်ၸိုင်ႈ။

မၢႆႁူၵ်း – သင်ပဵၼ်ရူတ်ႉၵႃး ႁၢႆးလႅတ်ႉၸိုင် ပၼ်ၶႂၢင်ႉတၢင်ႇၼမ်ႉ သႂ်ႇၾၢႆႇလင်ၵႃးသေ လဵၼ်ႈၼမ်ႉလႆႈယူႇ။ ၵူၺ်းၵႃႈ ၼင်ႇႁိုဝ်တေဢမ်ႇပဵၼ်ၽေးၵိုင်ႉၵၢင်ႉ ယၢတ်ႇတူၵ်းရူတ်ႉၵႃးသေ လူႉသုမ်းသၢႆၸႂ်ၵႂႃႇၼၼ်ႉ တေဢမ်ႇလႆႈၶိုၼ်ႈၼင်ႈၼိူဝ် တႅဝ်းႁူဝ် ရူတ်ႉၵႃးလႄႈ ၼင်ႈၼိူဝ် ၽၵ်းတူၾၢႆႇလင်ၵူၼ်ႈၵႃး ၸိူဝ်းၼႆႉ။

မၢႆၸဵတ်း – တေဢမ်ႇလႆႈႁေႃႈၶပ်းရူတ်ႉၵႃး ဝႆးလိူဝ်သေ ဢၼ်မၵ်းမၼ်ႈဝႆႉ၊ ၵွင်ႈထႆႇ ပႂ်ႉတူၺ်းတၢင်းဝႆးရူတ်ႉၵႃးၼၼ်ႉ တေႁဵတ်းၵၢၼ်ဝႆႉ 24 ၸူဝ်ႈမူင်း။ ပိူင်လူင် ရူတ်ႉၵႃး ၸိူဝ်းႁေႃႈလတ်းၵႂႃႇမႃး ၼိူဝ်သဵၼ်ႈတၢင်းဝႆးၼၼ်ႉ သင်ႁေႃႈဝႆးလိူဝ်ဢၼ်မၵ်းမၼ်ႈဝႆႉၸိုင် တေၺႃးတၢမ်ႇငိုၼ်းထိုင် 4000 ဝၢတ်ႇ လႄႈ ၺႃးထွၼ်ၶိုၼ်း မၢႆဝၢၵ်ႈ ၼႂ်းဝႂ်ၶပ်းၶီႇ။

ၶေႃႈလိုၼ်းသုတ်း မၢႆပႅတ်ႇတႄႉ သင်တေၸတ်းႁဵတ်းပွႆးမူၼ်ႈၵျေႃႇသွၼ်းၼမ်ႉ၊ တေၸႂ်ႉၶိူင်ႈၸၢၵ်ႈသဵင်လင် ၼႆၸိုင် တေလႆႈယွၼ်းၶႂၢင်ႉတီႈ လုမ်းၽူႈၵွၼ်းၸႄႈဝဵင်းဢွၼ်တၢင်း။ သင်ဝႃႈ သဵင်လင် ဢူၼ်ဢၢၼ်မေႃး ပၼ်း ပူၼ်ႉလိူဝ်ၶၢဝ်းယၢမ်းမၵ်းတမ်းဝႆႉၸိုင် တေၺႃးဢဝ်လိူင်ႈလူၺ်ႈ ပၵ်းပိူင်ယႃႉၵဝ်း လွင်ႈမၼ်ႈၼိမ်သဝ်း ဝႃႈၼႆ။

ဢိင်ၼိူဝ်ၶေႃႈပၼ်ၾၢင်ႉၸိူဝ်းၼႆႉသေ ၸဝ်ႈၼႃႈတီႈထႆးတိုၵ်းသူၼ်းဝႆႉ ႁႂ်ႈၵူၼ်းမိူင်းၵူႈၵေႃႉ ဢွၼ်ၵၼ်ႁဵတ်းသၢင်ႈၵႂႃႇ ၸွမ်းၼင်ႇပၵ်းပိူင်မၢႆမီႈ တႃႇႁူမ်ႇလူမ်ႈလွတ်ႈၽေး ဝႃႈၼႆ။