မိူဝ်ႈၼႆႉ ဝၼ်းတီႈ 3 လိူၼ်ဢေႊပရႄႇ တႄႇယၢမ်းၵၢင်ၼႂ် 10 မူင်း လုမ်းသၽႃးမိူင်းႁူမ်ႈတုမ် ဢၼ်မီးတူဝ်တႅၼ်းတပ်ႉသိုၵ်းမၢၼ်ႈ လႄႈ ၵူၼ်းၼႂ်းပႃႇတီႇသၢင်ႇသီႈ ၼမ်လိူဝ်ပိူၼ်ႈ သုတ်းၼၼ်ႉ ၸတ်းႁဵတ်းပၢင်ၶတ်းလိူၵ်ႈ ၸွမ်ၸိုင်ႈၵေႃႉမႂ်ႇ မိူင်းႁူမ်ႈတုမ်ၵႂႃႇ တီႈဝဵင်းလူင်ၼေႇပျီႇတေႃႇ။
ၼႂ်းဝၼ်းပၢင်ၶတ်းလိူၵ်ႈၸွမ်ၸိုင်ႈၵေႃႉမႂ်ႇၼၼ်ႉ တူဝ်တႅၼ်းတပ်ႉသိုၵ်းလႄႈ တႅၼ်းၽွင်းၸိူဝ်းယူႇၼႂ်းပႃႇတီႇ ဢၼ်ႁၼ်လီၵမ်ႉထႅမ်ၸွမ်းၸုမ်းသိုၵ်းမၢၼ်ႈယိုတ်းမိူင်းၼၼ်ႉ ႁူမ်ႈသဵၼ်ႈမီးဝႆႉၼႂ်းလုမ်းသၽႃးမိူင်းႁူမ်ႈတုမ် 586 ၵေႃႉသေတႃႉ မီးၵူၼ်းဢဝ်ၶႂၢင်ႉ ဢမ်ႇၵႂႃႇၶိုၼ်ႈလုမ်းသၽႃးၼႆႉ မီး 2 ၵေႃႉလႄႈ ႁူမ်ႈသဵၼ်ႈ ၵူၼ်းၸိူဝ်းပၼ်သဵင် ၵၢင်ၸႂ် မီးယူႇ 584 ၵေႃႉ ၼႆယဝ်ႉ။
ၼႂ်းလုမ်းသၽႃး တႅၼ်းၽွင်းၸိူဝ်းၵႂႃႇၶဝ်ႈႁူမ်ႈတင်းသဵင်ႈ မီး 584 ၵေႃႉ မိၼ်းဢွင်ႇလၢႆႇ လႆႈၶႅပ်းမႄး 429 ၶႅပ်း၊ ဢူးၺူဝ်ႇၸေႃး လႆႈ 126 ၶႅပ်း လႄႈ တေႃႇၼၼ်းၼီႇၼီႇဢေး လႆႈ 29 ၶႅပ်း ၼႆယဝ်ႉ။
ဝၢႆးလင် မိူင်းႁူမ်ႈတုမ် လႆႈလွတ်ႈလႅဝ်းသဝ်းၶေႃ တႂ်ႈသိုၵ်းမိူင်းဢိင်းၵလဵတ်ႈ မိူဝ်ႈလိူၼ်ၵျႅၼ်ႊဝႃႇရီႇ ဝၼ်းတီႈ 4 ပီ 1948 ယဝ်ႉၼၼ်ႉ ၸဝ်ႈသူၺ်ႇတႅၵ်ႇ ၸဝ်ႈၾႃႉလူင်ယွင်ႁူၺ်ႈ လႆႈ ႁပ်ႉပဵၼ် ၸွမ်ၸိုင်ႈမိူင်းႁူမ်ႈတုမ် ၵေႃႉဢွၼ်တၢင်းသုတ်း။
တင်ႈတႄႇၼၼ်ႉမႃး ႁၢၼ်ႉတေႃႇထိုင် ပီ 2026 ၼႆႉ မိူင်းႁူမ်ႈတုမ် မီးၸွမ်ၸိုင်ႈမႃး 11 ၵေႃႉ ပႃးၵေႃႉမႂ်ႇယၢမ်းလဵဝ်။ 1 ၸဝ်ႈၾႃႉလူင်ယွင်ႁူၺ်ႈ ၸဝ်ႈသူၺ်ႇတႅၵ်ႈ 2 ဢူးပႃႉဢူး 3 မၢၼ်းဝိၼ်းမွင်ႇ 4 ဢူးၼေႇဝိၼ်း 5 ဢူးသၢၼ်းယူႉ 6 ဢူးၸဵင်ႇလုၼ်ႇ 7 တွၵ်ႊတိူဝ်ႊမွင်ႇမွင်ႇ 8 ဢူးတဵင်းၸဵင်ႇ 9 ဢူးထိၼ်ႇၵျေႃႇ 10 ဢူးဝိၼ်းမျိၼ်ႉ ။
ၵေႃႉထူၼ်ႈ 11 တႄႉ ပဵၼ် ၸွမ်ၸိၵ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ၵေႃႉၵဝ်ႇ မိၼ်းဢွင်ႇလၢႆႇ ထုၵ်ႇလိူၵ်ႈပဵၼ်ၸွမ်ၸိုင်ႈၵႂႃႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ