ႁွင်ႈၵၢၼ်ၾၢႆႇလိူမ်ႈလႆႇႁူမ်ႈတင်း ၶွမ်ႊပၼီႊၸုမ်းၼိုင်ႈ တေဢၢၼ်းသၢင်ႈ ႁိူၼ်းတိုၵ်း ၵိုတ်းရူတ်ႉၵႃး 7 ၸၼ်ႉၼႆလႄႈ ၸဝ်ႈႁၢၼ်ႉၶၢႆတၢင်းၵိၼ် ၵၢတ်ႇၵၢင်ၶမ်ႈ တီႈပွၵ်ႉတပိၼ်ႇသူၺ်ႇထီး ႁိမ်းႁေႃသဝ်ယၢမ်းမူင်း (နာရီစင်) တၢင်းၼႃႈ ဢူဝ်းသျိၼ်း – City Square Shopping Centre ဢၼ်မီးၵၢင်ဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ တေလႆႈၶၢႆႉပၼ် ၼႆယဝ်ႉ ။

မိူဝ်ႈဝၼ်းတီႈ 31/3/2026 ၼႆႉ ယူႇတီႈႁွင်ႈၵၢၼ်ၾၢႆႇလိူမ်ႈလႆႇလႄႈ ၶွမ်ႊပၼီႊ (သီဟဖွံ့ဖြိုးတိုးတက်ရေးကုမ္ပဏီ )ၸတ်းႁဵတ်းပၢင်လူင်းလၢႆးမိုဝ်း တူၵ်းလူင်းၵၼ် တႃႇၵေႃႇသၢင်ႈ ႁိူၼ်းတိုၵ်း လႄႈ ဢွင်ႈတီႈၵိုတ်းရူတ်ႉၵႃး တၢင်းသုင် 7 ၸၼ်ႉ တီႈႁူင်းႁေႃ (မြို့တော်ခန်းမ) ဝဵင်းတူၼ်ႈတီး ၼႆယဝ်ႉ ။

လႆႈႁူႉဝႃႈ ၸဝ်ႈႁၢၼ်ႉၶၢႆတၢင်းၵိၼ် ၼႂ်းၵၢတ်ႇၵၢင်ၶမ်ႈတင်းသဵင်ႈ တေလႆႈၶၢႆႉၵႂႃႇတၢင်းတီႈသဵၼ်ႈတၢင်း ၵူင်ႇတႄႇ (ကုန်သည်လမ်း)သေ ဝၼ်းတီႈ 18/4/2026 ၼႆႉ တေလႆႈၶၢႆႉႁႂ်ႈ ယဝ်ႉတူဝ်ႈပဵၼ်လိုၼ်းသုတ်း ဝႃႈၼႆ ။

ၼၢင်းယိင်းၵေႃႉယူႇဝဵင်းတူၼ်ႈတီႈလၢတ်ႈၽူႈတွႆႇႁွၵ်ႈဝႃႈ -“လၢတ်ႈတႄႉဝႃႈ တွၼ်ႈတႃႇဝဵင်းတေၶိုၼ်ႈယႂ်ႇၶိုတ်းၸၼ်ႉ ၼင်ႇႁိုဝ်တေၵႄႈလိတ်ႈလႆႈပၼ်ႁႃဢွင်ႈတီႈၵိုတ်းရူတ်ႉၵႃးၼႆသေ တေသၢင်ႈႁိူၼ်းတိုၵ်း လႄႈ တီႈၵိုတ်းၵႃး ၼႂ်းၵၢတ်ႇၵၢင်ၶမ်ႈၼၼ်ႉၼႆဢေႃႈ ၊ တေႁဵတ်းပႃးၶူဝ်ဢၼ် ၸၢင်ႈလတ်းၶၢမ်ႈၵႂႃႇမႃးပႃးႁႄ ၵူၼ်းၶၢႆၵၢတ်ႇၵၢင်ၶမ်ႈ ၵၢင်ၼႂ်ၸဝ်ႉ တေလႆႈၶၢႆႉပၼ်တင်းသဵင်ႈၼႆဢေႃႈ ”- ဝႃႈၼႆ ။

ၸွမ်းၼင်ႇလိၵ်ႈၵိၼ်ၵႅၼ်ႇ ဢၼ်လႆႈလူင်းလၢႆးမိုဝ်းဝႆႉၼၼ်ႉ ႁူင်းႁေႃႁိူၼ်းတိုၵ်း ဢၼ်တေၵေႃႇသၢင်ႈၼၼ်ႉ တေမီးၸၼ်ႉတႃႇၵိုတ်းရူတ်ႉၵႃး ၸၼ်ႉသုင် 5 ၸၼ်ႉသေ ႁပ်ႉလႆႈ ရူတ်ႉၵႃး ၼမ် 421 လမ်း ၊ ၵၢတ်ႇတၢင်းၶၢႆ 2 ၸၼ်ႉ လႄႈ တေမီးပႃးႁွင်ႈႁၢၼ်ႉၶၢႆတၢင်းၵိၼ် ၸၼ်ႉတႂ်ႈ လိၼ်ၼၼ်ႉထႅင်ႈ ၼႆယဝ်ႉ။ လိူဝ်ၼၼ်ႉ တေမီးပႃးတၢင်းလတ်းၽၢၼ်ႇ တႃႇ ၵူၼ်းပႆတၢင်း 2 တီႈ ပဵၼ်ႁူးလႅင်းတႂ်ႈလိၼ် ဢၼ်ၵွင်ႉသၢၼ်ၵၼ်တင်း ႁူင်းၵႃႉၶၢႆၵုၼ်ႇၵူႈလွင်ႈလွင်ႈ City Square ၼႆယဝ်ႉ။ ၶွမ်ႊပၼီႊသီႇႁႃႉ တေလူင်းတိုၼ်း 37,319 သႅၼ်ပျႃး လႆႈႁူႉၼင်ႇၼႆ။

ၼႂ်းၵၢတ်ႇၵၢင်ၶမ်ႈၼၼ်ႉ မီးၵူၼ်းၶၢႆတၢင်းၵိၼ်ယႅမ်ႉလႄႈၵုၼ်ႇၵူႈသႅၼ်းသႅၼ်း ႁူမ်ႈသဵၼ်ႈမီးမွၵ်ႈ 100 ႁွင်ႈ ။ ယၢမ်းၵၢင်ၼႂ်ၸဝ်ႈ ၵူၼ်းၵႃႉၵုၼ်ႇလိပ်း ၶၢႆၽၵ်းယိူဝ်ႈၼၢင်းၶဵဝ်ၶဝ် မႃးပၢႆးတမ်းၶၢႆသေ ပေႃးၵၢင်ၶမ်ႈသမ်ႉမီးၵူၼ်းမႃးၶၢႆ တၢင်းၵိၼ်ဢၼ်သုၵ်း။ ပဵၼ်ၵၢတ်ႇၵိုၼ်းၶွၼ်ႈ တီႈဢၼ်ၵူၼ်းမိူင်းဝဵင်းတူၼ်ႈတီး လႄႈ ၶႅၵ်ႇတၢင်ႇဝၢၼ်ႈတၢင်ႇဝဵင်းၸိူဝ်းႁွတ်ႈၽႅဝ် ဝဵင်းတူၼ်ႈတီး ၵႂႃႇလႄႇႁႃသိုဝ်ႉၵိၼ် ယၢမ်းႁူဝ်ၶမ်ႈ ဝႃႈၼႆ ။

ၼၢင်းယိင်းၵေႃႉယူႇၼႂ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ -“လွင်ႈဝႃႈတေႁဵတ်းတိုၵ်းသုင် ၼႂ်းၵၢင်ဝဵင်းၼၼ်ႉ မၢင်ၸိူဝ်းၵေႃႈႁၼ်လီ ၊ မၢင်ၸိူဝ်းၵေႃႈ ဢမ်ႇႁၼ်လီ ၊ ဢၼ်ယၢပ်ႇ ၼႆႉၵေႃႈ တေယၢပ်ႇတႃႇၵူၼ်းၶၢႆၵၢတ်ႇၵၢင်ၶမ်ႈ တေလႆႈၶၢႆႉဢွင်ႈတီႈတိၵ်းတိၵ်းလႄႈ ၸၢင်ႈတုမ်ႉတိူဝ်ႉ တွၼ်ႈတႃႇ ၵၢၼ်ႁႃၵိၼ်လဵင်ႉတွင်ႉၶဝ်”- ဝႃႈၼႆ ။

ၵဵဝ်ၵပ်းလွင်ႈၼႆႉ ယူႇတီႈႁွင်ႈၵၢၼ်ၾၢႆႇလိူမ်ႈလႆႇငူပ်ႉငီႉၵၼ်တၢင်း ၸဝ်ႈႁၢၼ်ႉၶၢႆႉယဝ်ႉသေ တေတႄႇႁဵတ်းသၢင်ႈၵႂႃႇ ၼႂ်းပီ 2026 ၼႆႉ -ဝႃႈၼႆ။

တီႈဝဵင်းတူၼ်ႈတီးၼႆႉ ယၢမ်းလဵဝ် မီးၵၢတ်ႇၵၢင်ၶမ်ႈဝႆႉ 3 တီႈ ။ ပဵၼ်တီႈၵၢတ်ႇမဵဝ်ႉမ( ႁိမ်းႁေႃသဝ်ယၢမ်းမူင်း ) ၊ ၵၢတ်ႇၵၢင်ၶမ်ႈ တၢင်းၼႃႈ ႁူင်းႁဵၼ်းၸၼ်ႉသုင်မၢႆ 3 လႄႈ ၵၢတ်ႇမႂ်ႇဢၼ်တိုၵ်ႉပိုတ်ႇဝႆႉတင်းၼႃႈ ယေးငိုၼ်းၵမ်ႇပေႃးၸ ၼႆယဝ်ႉ ။