ၽွင်း ဢမေႊရိၵၼ်ႊ သူင်ႇႁႅင်းသိုၵ်းၵႂႃႇ ၼႂ်းပိုၼ်ႉတီႈတႃဝၼ်းဢွၵ်ႇၵၢင်ထႅင်ႈ 3500 ၼၼ်ႉ ႁူဝ်ပဝ်ႈသၽႃးမိူင်းဢီႊရၼ်ႊ လၢတ်ႈဝႃႈ – သင်တပ်ႉသိုၵ်းမိူင်းဢမေႊရိၵၼ်ႊ ၶဝ်ႈၵႂႃႇၼႂ်းပိုၼ်ႉတီႈ ၼႃႈလိၼ်မိူင်းဢီႊရၼ်ႊၸိုင် တူဝ်ႈတၼ်းတႃႇတေတိုၵ်းတေႃးၶိုၼ်းယဝ်ႉ ဝႃႈၼႆ။

Mohammad-Bagher Ghalibaf ႁူဝ်ပဝ်ႈသၽႃးမိူင်းဢီႊရၼ်ႊ မၢပ်ႇမႂ်ဝႃႈ – ဢမေႊရိၵၼ်ႊ ၼႄၾၢင်ႁၢင်ႈ ယိုၼ်ႈမိုဝ်းတႃႇဢုပ်ႇၵုမ်သေတႃႉ ၾၢႆႇလင်သမ်ႉ လၵ်ႉႁၢင်ႈႁႅၼ်းတႃႇတေတိုၵ်းတေႃးဝႆႉယူႇ ဝႃႈၼႆ။

ငဝ်ႈငုၼ်းတိူင်းသိုၵ်းပွတ်းၵၢင် မိူင်းဢမေႊရိၵၢၼ်ႊ တႅမ်ႈတၢင်ႇဝႆႉတီႈၼိူဝ်သိုဝ်ႇတူင်ႇဝူင်း X ၶဝ်ဝႃႈ – ၽူႈၶဝ်ႈၸုမ်း တပ်ႉၼမ်ႉ လႄႈ ႁိူဝ်းသိုၵ်း USS Tripoli ႁွတ်ႈၽႅဝ်မႃးၼႂ်းပိုၼ်ႉတီႈယဝ်ႉ ဝႃႈၼႆ။

ဢမေႊရိၵၼ်ႊ မီးဝႆႉတိူင်းသိုၵ်းၾၢႆႇတိုၵ်းတေႃး 11 ဢၼ်သေ ၸႅၵ်ႇၽႄဝႆႉၸွမ်းၼင်ႇ ပၢႆးမိူင်း ၼမ်ႉလိၼ် ႁိၼ်ၽႃ။ တိူင်းသိုၵ်းပွတ်းၵၢင်ၼႆႉ လႆႈဢဝ်ပုၼ်ႈၽွၼ်းဝႆႉ ၼႂ်းတႃဝၼ်းဢွၵ်ႇၵၢင်၊ ၵုၼ်ဢေႊသျႃႊ လႄႈ ဢေႊသျႃႊၸဵင်ႇၸၢၼ်းဝၼ်းဢွၵ်ႇ ၸိူဝ်းၼႆႉ။

ၶၢဝ်ႇ ဝႃႊသျိၼ်ႊတၼ်ႊၾူတ်ႉသ်ၵေႃႈ ႁၢႆးငၢၼ်းဝႆႉဝႃႈ ငဝ်ႈငုၼ်းသိုၵ်းဢမေႊရိၵၼ်ႊ ႁၢင်ႈႁႅၼ်း တႃႇတေႁဵတ်း ၽႅၼ်ၵၢၼ်တိုၵ်း ၼိူဝ်လိၼ် ၼႂ်းမိူင်းဢီႊရၼ်ႊ ၼႆယဝ်ႉ။

ၵူၺ်းၵႃႈ ၵဵဝ်ႇလူၺ်ႈလွင်ႈၼႆႉသေ ၽူႈမီးပုၼ်ႈၽွၼ်းၾၢႆႇလူင်ပွင်ၸိုင်ႈမိူင်းဢမေႊရိၵၼ်ႊတႄႉ ပႆႇလၢတ်ႈသင်ဝႆႉ ပဵၼ်တၢင်းၵၢၼ်။
ၽွင်းလူင်ၾၢႆႇၼွၵ်ႈမိူင်း မိူင်းဢမေႊရိၵၼ်ႊလၢတ်ႈဝႃႈ – ဢမ်ႇပႃးဢဵၼ်ႁႅင်းၾၢႆႇတပ်ႉလိၼ်ၵေႃႈ ၶေႃႈယိူင်းဢၢၼ်းၵၢၼ်သိုၵ်း တဵမ်ထူၼ်ႈလႆႈယူႇ။ ၵူၺ်းၵႃႈ လူဝ်ႇလႆႈႁၢင်ႈႁႅၼ်းဝႆႉ တႃႇငဝ်းလၢႆး ဢၼ်ဢမ်ႇမုင်ႈမွင်းၼၼ်ႉ ဝႃႈၼႆ။

ၸုမ်းပၵ်းတႃပႂ်ႉတူၺ်း သုၼ်ႇလႆႈၵူၼ်း (HRANA) ပိုၼ်ၽၢဝ်ႇဝႆႉဝႃႈ – ပၢင်တိုၵ်းဢမေႊရိၵၼ်ႊ ဢိတ်ႉသ်ရေႊ တင်း ဢီႊရၼ်ႊ ဢၼ်တႄႇမႃးၼႂ်းဝၼ်းတီႈ 28 လိူၼ်ၾႅပ်ႉပိဝ်ႊရီႊ တေႃႇထိုင် ယၢမ်းလဵဝ်ၼႆႉ ၵူၼ်းမိူင်းဢီႊရၼ်ႊလူႉတၢႆၵႂႃႇ 1551 ၵေႃႉယဝ်ႉ ဝႃႈၼႆ။