ၼုမ်ႇယိင်းဢွၼ်ႇ ဢႃယု 13 ၶူပ်ႇ ယူႇဝဵင်းၸေႈလၢၼ်ႉ ၸႄႈဝဵင်းမူႊၸေႊ ပဵၼ်တၢင်းပဵၼ် ၶႅၼ်ႊသိူဝ်ႊ တီႈႁူဝ်ၶဝ်ႇ ယၢမ်းလဵဝ် လူဝ်ႇတၢင်းၸွႆႈထႅမ်ၵႃႈယူတ်းယႃ ဝႃႈၼႆ ။

လုၵ်ႈဢွၼ်ႇယိင်းၼၼ်ႉၸိုဝ်ႈ ၼၢင်းၵဵင်ၽူၺ်းၼုမ်ႇ ဢႃယု 13 ၶူပ်ႇ ၊ ပဵၼ်လုၵ်ႈယိင်း လုင်းယီႈ လႄႈ ပႃႈၼၢင်းၼူၼ်းမၢႆ  ။

ပႃႈၼၢင်းၼူၼ်းမၢႆ လၢတ်ႈၽူႈတွႆႇႁွၵ်ႈဝႃႈ -“ ပဵၼ်မႃး 4- 5လိူၼ်ယဝ်ႉၶႃႈ ၊ မိူဝ်ႈတႄႇမၼ်း လူမ်ႉသေၶၢင်း ႁူဝ်ၶဝ်ႇၶတ်းၼႆဢေႃႈ  ၊ ၵႂႃႇပေႃႉထၢတ်ႈမၢၼ်ႈတူၺ်း မေႃယႃဝႃႈ မၼ်းပဵၼ်ၶႅၼ်ႊသိူဝ်ႊ လုပ်ႇၼႆဢေႃႈ ၊ ပီႈၼွင်ႉၸိူဝ်ႉၶိူဝ်းႁဝ်းၶႃႈ ဢမ်ႇမီးၵူၼ်းပဵၼ်ၶႅၼ်ႊသိူဝ်ႊသေၵေႃႉ လုၵ်ႈၶႃႈၵေႃႈ မၼ်းဢမ်ႇပဵၼ်ၶႆႈၼၢဝ် ႁႅင်းသေပွၵ်ႈ  ၊ ႁဝ်းၶႃႈၵေႃႈ ဢမ်ႇမီးငိုၼ်းၶႃႈလႄႇၼေႃႈ ၊ ယွၼ်ႉၼၼ်ႉ ပေႃးမၼ်းၶၢင်းၼႆႉ လဵင်ႉယႃၶူပ်း ၶိုၼ်ႈ သေ ၵႂႃႇႁႃမေႃယႃတႆး ၊ ၵႂႃႇပတ်းပတ်းပဝ်ႇပဝ်ႇသေ ယႃမႃးၸိူင်ႉၼၼ်ဢေႃႈ ၊ ၵွၼ်ႇၼႃႇၼႆႉ မၼ်းပႆ လႆႈယူႇၶႃႈ ၊ ပႆတၢင်းၵႂႃႇႁူင်းႁဵၼ်းႁင်းၵူၺ်းမၼ်းဢေႃႈ။  ၸင်ႇႁႃၵိုင်ႉၵၢင်ႉ ၵႂ်ႈမႃး ၼႂ်းဝူင်ႈၼႆႉၵူၺ်းဢေႃႈ”- ဝႃႈၼႆ ။

ယၢမ်းလဵဝ် ၼၢင်းၵဵင်ၽူၺ်းၼုမ်ႇၼႆႉ ယူတ်းယႃတူဝ်ဝႆႉတီႈႁူင်းယႃလူင် ဝဵင်းလိူဝ်ႇသေ လုၵ်ႉတီႈ ႁူင်းယႃလူင် တေလႆႈၶၢႆႉၵႂႃႇယူတ်းယႃတူဝ်တီႈႁူင်းယႃၾၢႆႇလုပ်ႇၵမ်းသိုဝ်ႈ ၼႆလႄႈ  လူဝ်ႇတၢင်းၸွႆႈထႅမ်  ဝႆႉ ဝႃႈၼႆ ။

မႄႈၼုမ်ႇယိင်းသိုပ်ႇလၢတ်ႈထႅင်ႈဝႃႈ -“ ဝူင်ႈပူၼ်ႉမႃးၼႆႉ မၼ်းၵႂ်ႈႁႅင်းလႄႈ ၵႂႃႇၼႄႁူင်းယႃ တီႈမူႊၸေႊ ၽွင်းၼၼ်ႉ လိူတ်ႈၵေႃႈလႆႈထႅမ် ႁႅင်းလိူတ်ႈမၼ်းမီး 5 ၵူၺ်းဢေႃႈ ၊  မေႃယႃၶဝ် ၵပ်းသိုပ်ႇပၼ် ၸုမ်းၸွႆႈထႅမ် ပရႁိတ ၼႂ်းပိုၼ်ႉတီႈသေ သူင်ႇပၼ်ႁူင်းယႃ ဝဵင်းလိူဝ်ၼႆႉၶႃႈ”- ဝႃႈၼႆ ။

သင်ဝႃႈၽူႈမီးၸေႇတၼႃႇသႂ် ၼမ်ႉၸႂ်လီ ၶႂ်ႈၵမ်ႉၸွႆႈငိုၼ်းတွင်းတႃႇယူတ်းယႃ ၼၢင်းၵဵင်ၽူၺ်းၼုမ်ႇၸိုင် ၵပ်းသိုပ်ႇလႆႈတွင်ႈထၢမ်လႆႈတီႈ မၢႆၾူင်း – 09-652104858 သေ ဢုပ်ႇၵုမ်လၢတ်ႈတေႃႇၵမ်ႉၸွႆႈလႆႈၵမ်းသိုဝ်ႈ  ဝႃႈၼႆၶႃႈဢေႃႈ ။