ၼႂ်းၶၢဝ်းတၢင်းဝူင်ႈဝၢင်ႈၼႆႉ ၶၼ်ၼမ်ႉမၼ်းၸၢၵ်ႈ ထၢတ်ႈသီႇ၊ တီႇၸႄႇ သိုပ်ႇပုင်ႈၶိုၼ်ႈမႃးထႅင်ႈ ၼိုင်ႈလီႇတႃႇလႂ် ပုင်ႈၶိုၼ်ႈၵႂႃႇ 840 ပျႃး ထိုင် 1,260 ပျႃးပၢႆ ပဵၼ်ၵႃႈၶၼ်ဢၼ်ပႆႇယၢမ်ႈထိုင်ၵႂႃႇမွၵ်ႈၼၼ်ႉ သေပွၵ်ႈ။

ၵႃႈၶၼ်ၼမ်ႉမၼ်းၸၢၵ်ႈ ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း မၵ်းမၼ်ႈဝႆႉပၼ်ၵမ်းဢွၼ်ၼၼ်ႉ ထၢတ်ႈသီႇ သႅၼ်း 92 ၼိုင်ႈလီႇတႃႇ ပဵၼ် 3,610 ပျႃး၊ သႅၼ်း 95 ၼိုင်ႈလီႇတႃႇ 3,850 ပျႃး၊ တီႇၸႄႇ ၼိုင်ႈလီႇတႃႇ 4,390 ပျႃး လႄႈ ပရီႇမီႇယႅမ်ႇတီႇၸႄႇ ၼိုင်ႈလီႇတႃႇ 4,820 ပျႃး။

ယၢမ်းလဵဝ်ၼႂ်းဝူင်ႈႁၢင်လိူၼ်မၢတ်ႉၶျ်မႃးၼႆႉတႄႉ ၵႃႈၶၼ်ၼမ်ႉမၼ်းၸၢၵ်ႈ ၵိုင်ႈၵၢင်ႉပုင်ႈၶိုၼ်ႈၵႂႃႇပဵၼ် ထၢတ်ႈသီႇ သႅၼ်း 92 ၼိုင်ႈလီႇတႃႇ ပဵၼ်ၵႂႃႇ 4,450 ပျႃး၊ သႅၼ်း 95 ၼိုင်ႈလီႇတႃႇ 4,975 ပျႃး၊ တီႇၸႄႇ ၼိုင်ႈလီႇတႃႇ 5,450 ပျႃး လႄႈ ပရီႇမီႇယႅမ်ႇတီႇၸႄႇ ၼိုင်ႈလီႇတႃႇလႂ် 6085 ပျႃး ၼႆယဝ်ႉ။

ၵူၼ်းမိူင်းတႆးပွတ်းႁွင်ႇ ဢၼ်ၵႂႃႇယူႇဝႆႉတီႈဝဵင်းတႃႈၵုင်ႈၸူဝ်ႈၶၢဝ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉ ၵႃႈၶၼ်ၼမ်ႉမၼ်း ၼႂ်းဝဵင်းတႃႈၵုင်ႈႁၢၼ်ႉၶၢႆၾၢႆႇၼွၵ်ႈမၼ်း ပေႃးထိုင် ၵႂႃႇ ၼိုင်ႈလီႇတႃႇ 15000 ပျႃးယဝ်ႉ။ ၶၼ်ၼမ်ႉမၼ်းၶိုၼ်ႈႁႅင်းၼႃႇ။ တႃႇတေလႆႈထႅမ်ၼမ်ႉမၼ်းၼႂ်းရူတ်ႉၼၼ်ႉ ၵေႃႈ ယၢပ်ႇၼႃႇ မႆႈၵေႃႈမႆႈႁႄ သမ်ႉလႆႈၵႂႃႇၶဝ်ႈထႅဝ်ယူႇပႂ်ႉဝႆႉႁိုင်မွၵ်ႈ 3-4 ၸူဝ်ႈမူင်း” ၼႆယဝ်ႉ။

ယွၼ်ႉပၼ်ႁႃသိုၵ်းမိူင်းဢမေႊရိၵၼ်ႇ တင်း မိူင်းဢီႊရၼ်ႊ ပႆႇယဝ်ႉတူဝ်ႈသေ ႁိူဝ်းသၢင်းၽေႃး တၢင်ႇၼမ်ႉ မၼ်းၸၢၵ်ႈဢၼ်တေလုၵ်ႉတၢင်းမိူင်းဢီႊရၼ်ႊ ၶၢမ်ႈၼမ်ႉပၢင်ႇလၢႆႇ ႁေႃႊမူတ်ႉသ် မႃးၼၼ်ႉၵေႃႈ မီးပၼ်ႁႃဝႆႉယူႇလႄႈ ႁဵတ်းႁႂ်ႈၵူၼ်းၵူႈၸိုင်ႈမိူင်း လႆႈႁူပ်ႉပၼ်ႁႃ ၼမ်ႉမၼ်းၸၢၵ်ႈၵႃႈ ၶၼ်သုင်၊ ဢမ်ႇမီးၶူဝ်းၵုၼ်ႇပဵင်းပေႃး ႁင်းၽႂ်မၼ်းယူႇ။

ၼႂ်းမိူင်းတႆးပွတ်းႁွင်ႇ တီႈဝဵင်းလႃႈသဵဝ်ႈၵေႃႈ ယွၼ်ႉၼမ်ႉမၼ်းၸၢၵ်ႈဢမ်ႇမီးၵုမ်ႇထူၼ်ႈသေ ႁၢၼ်ႉၶၢႆၼမ်ႉမၼ်းၸၢၵ်ႈဢၼ်ယႂ်ႇဢၼ်လူင် လႆႈၸႅၵ်ႇယႅၵ်ႈၶၢဝ်းယၢမ်းၵၼ်သေ ပိုတ်ႇ ၶၢႆပၼ် ၵူၼ်းမိူင်း ၸိူဝ်းယူႇၼႂ်းပိုၼ်ႉတီႈဝႆႉယူႇ ၸူဝ်ႈၶၢဝ်း ၼႆယဝ်ႉ။

ၵူၼ်းမိူင်းၵေႃႉယူႇဝႆႉ ၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉ တီႈပၢမ်ႉ (ႁၢၼ်ႉၶၢႆ) ၼမ်ႉမၼ်းဢၼ်ယႂ်ႇမၼ်း ၼိုင်ႈလီႇတႃႇၼႆႉ မီး 9,000 ပျႃး။ တၢင်းၼွၵ်ႈမၼ်းတႄႉ ၼိုင်ႈလီႇတႃႇၼႆႉ တႄႇ 13,000 တေႃႇထိုင် 18,000 ၸိူဝ်းၼႆႉယူႇ။ ၼိုင်ႈတီႈလႄႈၼိုင်ႈ တီႈၵေႃႈ မၼ်းဢမ်ႇမိူၼ်ၵၼ်။ တႃႇသိုဝ်ႉလႆႈ ၼမ်ႉမၼ်းတီႈပၢမ်ႉလူင်မၼ်းသမ်ႉ လႆႈဢဝ်ရူတ်ႉဢဝ်ၵႃး ၵႂႃႇၶဝ်ႈထႅဝ်ဝႆႉၸဵမ်မိူဝ်ႈယၢမ်း ၵၢင်ၶမ်ႈ ၵၢင်ၶိုၼ်း။ ထႅဝ်ရူတ်ႉၵႃးဢၼ်ၵႂႃႇၶဝ်ႈထႅဝ်ဝႆႉၼၼ်ႉ ၼိုင်ႈတီႈမီးၵႃး ႁူဝ်ပၢၵ်ႇလမ်းမၼ်း” ဝႃႈၼႆ။

ၵဵဝ်ႇလူၺ်ႈ ၵၢၼ်သိုဝ်ႉၶၢႆ ၼမ်ႉမၼ်းၸၢၵ်ႈ ၼႂ်းမိူင်းႁူမ်ႈတုမ်ပတ်းပိုၼ်ႉၼၼ်ႉသေ လူင်ပွင်ၸိုင်ႈသိုၵ်းမၢၼ်ႈ ယိုတ်းမိူင်းတႄႉ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – တင်ႈတႄႇ မိူဝ်ႈၼႆႉ ဝၼ်းတီႈ 27/3/2026 သေ ၵူၼ်းမိူင်းၸိူဝ်းမီးရူတ်ႉၵႃး ၼႂ်းဝဵင်းတႃႈၵုင်ႈ၊ ဝဵင်းလိူဝ်ႇ (မၢၼ်းတလေး) လႄႈ ဝဵင်းတူၼ်ႈတီးၼၼ်ႉ တေသိုဝ်ႉ လႆႈၸွမ်းၼင်ႇပိူင်ဢၼ်တမ်း ဝၢင်းဝႆႉပၼ်ၼၼ်ႉၵူၺ်း။ ပိူင်ဢၼ်တမ်းဝၢင်းဝႆႉပၼ်တႄႉ တေလႆႈပဵၼ် ရူတ်ႉၵႃးဢၼ်မီးဝႂ်လၢႆႇၸိၼ်ႇ ပဵၼ်တၢင်းၵၢၼ် ၸင်ႇတေပၼ်သိုဝ်ႉၼမ်ႉမၼ်းၸၢၵ်ႈ ၼႆယဝ်ႉ။

မိူဝ်ႈဝၼ်းတီႈ 11/3/2026 သိုၵ်းမၢၼ်ႈယိုတ်းမိူင်း တႄႇပိုၼ်ၽၢဝ်ႇဢွၵ်ႇ လွင်ႈၵၢၼ်သိုဝ်ႉ လႄႈ ၸႂ်ႉတိုဝ်းၼမ်ႉ မၼ်းၸၢၵ်ႈ ၼႂ်းမိူင်းႁူမ်ႈတုမ် ၵူႈၸႄႈမိူင်း၊ ၵူႈၸႄႈဝဵင်း။ ၾၢႆႇသိုၵ်းမၢၼ်ႈ ၸတ်းပိူင်သိုဝ်ႉၼမ်ႉမၼ်းၸၢၵ်ႈ ႁဵတ်း QR code ဢၼ်ပႃးၶေႃႈမုၼ်းသုၼ်ႇတူဝ် ၸဝ်ႈၶွင်ရူတ်ႉၵႃး ၸိူဝ်းတၢင်ႇမၢႆၾၢင်ဝႆႉ (Wheel Tax) ၼၼ်ႉ သႂ်ႇဝႆႉၼႂ်း Application သေ တေၵူတ်ႇထတ်း ၸတ်းပိူင်ၵၢၼ်သိုဝ်ႉၶၢႆ ၼမ်ႉမၼ်းၸၢၵ်ႈၵႂႃႇ ၼႆယဝ်ႉ။

လိူဝ်ၼၼ်ႉ ဢိင်ၼိူဝ်တၢင်ႉႁႅင်း တၢင်းၼမ် ၶိူင်ႈၸၢၵ်ႈရူတ်ႉၵႃးလမ်းလႂ်လမ်းၼၼ်ႉသေ ပေႃးပဵၼ်ရူတ်ႉ ၶိူင်ႈၼႆႉ ၼိုင်ႈလမ်း ထႅမ်လႆႈ 8 လီႇတႃႇ ၼိုင်ႈဝၼ်း 2 ပွၵ်ႈ၊ သၢမ်လေႃႉၼႆႉ ထႅမ်လႆႈတႃႇ 25 လီႇတႃႇ ၼိုင်ႈဝၼ်း 3 ပွၵ်ႈ၊ ထေႃႈလႃႈၵျီႈ ထႅမ်လႆႈ 30 လီႇတႃႇ ၼိုင်ႈသၼ်း 3 ပွၵ်ႈ၊ ရူတ်ႉဢွၼ်ႇၵူၼ်းမိူင်း လႄႈ ဢၼ်ၸႂ်ႉတိုဝ်းၼႂ်းႁွင်ႈၵၢၼ်လူင်ပွင်ၸိုင်ႈ ဢၼ် ႁႅင်းၸၢၵ်ႈမီး 2000 Cc ၼၼ်ႉ သႂ်ႇလႆႈ 35 လီႇတႃႇ ၼိုင်ႈဝၼ်း 2 ပွၵ်ႈ၊ ၾၢႆႇၼိူဝ် 2000 Cc တေႃႇထိုင် 3000 Cc ၼႆႉ သႂ်ႇလႆႈ 40 လီႇတႃႇ ၼိုင်ႈဝၼ်း 2 ပွၵ်ႈ၊ ၾၢႆႇၼိူဝ် 3000 Cc ၼႆႉ သႂ်ႇလႆႈ 45 လီႇတႃႇ ၼိုင်ႈဝၼ်း 2 ပွၵ်ႈ ၼႆယဝ်ႉ။