သိုၵ်းၵဝ်ႈၵၢင်ႉၵဵပ်းသိုၵ်းမႂ်ႇၼႂ်းၼႃႈတီႈၶဝ်ၵုမ်းၵမ် ၼႂ်းၸိုင်ႈတႆးပွတ်းႁွင်ႇ ပႃးတင်းၼႂ်းၸႄႈဝဵင်းလႃႈသဵဝ်ႈ ႁၢဝ်ႈႁႅင်းမႃးလိူဝ်ၵဝ်ႇ ထိုင်တီႈဝႃႈၼိုင်ႈႁိူၼ်းၼိုင်ႈၵေႃႉ ဢမ်ႇပၼ်ဢမ်ႇလႆႈ ၼႆလႄႈႁဵတ်းႁႂ်ႈၵူၼ်းမိူင်းယၢပ်ႇၵိၼ်းၶၢၼ်ၸႂ်။

ၼႂ်းပီ 2026 ၼႆႉ ၵူၼ်းမိူင်းတႆးပွတ်းႁွင်ႇ ႁူပ်ႉတၢင်းယၢပ်ႇၵိၼ်း လွင်ႈၽေးသိုၵ်း လွင်ႈၵၢၼ်ၵႃႉၶၢႆ လွင်ႈၵႂႃႇမႃးယၢပ်ႇၽိုတ်ႇ ၵူၺ်းဢမ်ႇၵႃး ယွၼ်ႉၸဝ်ႈၵၢၼ်ပၢႆးမၢၵ်ႈမီးလူင် ၸိူဝ်းပဵၼ် ၸၢဝ်းၶိူဝ်းၶႄႇ လုၵ်ႉတၢင်းမိူင်းၶႄႇ မႃးလူင်းတိုၼ်းလၢင်း ၼႂ်းမိူင်းတႆးသေ ႁဵတ်းႁႂ်ႈၵူၼ်းမိူင်းပိုၼ်ႉတီႈ ၸိူဝ်းပဵၼ်ၸဝ်ႈသူၼ် ၸဝ်ႈၼႃး ၸဝ်ႈၵုၼ်ႇၵႃႉတၢင်းၶၢႆသႅၼ်းလဵၵ်ႉ သႅၼ်းပၢင် ၵၢင် ၸိူဝ်းယူႇဝႆႉ ၼႂ်းၼႃႈတီႈသိုၵ်းၵဝ်ႈၵၢင်ႉ MNDAA ၵုမ်းၵမ် ဢမ်ႇၶဵင်ႇတႃႉလႆႈ ႁႅင်းငိုၼ်းပေႃႈလဵင်ႉၸၢဝ်းၶႄႇ ႁူပ်ႉလွင်ႈၶဵင်ႇတႃႉၼမ်။

ၾၢႆႇၼိုင်ႈၵေႃႈ သိုၵ်းၵဝ်ႈၵၢင်ႉ ဢွၵ်ႇၶေႃႈၸီႉသင်ႇ ပူင်ၶေႃႈၵႂၢမ်းလူင်းထိုင် ၽူႈၵွၼ်းပွၵ်ႉၵွၼ်းဢိူင်ႇ ၸိူဝ်းပဵၼ်ၽူႈယႂ်ႇၵူၼ်းလူင် ၼႂ်းၸႄႈဝဵင်းသႅၼ်ဝီ၊ မူႇဝၢၼ်ႈ ဢိူင်ႇၸိူဝ်းယူႇဝႆႉၾၢႆႇ ၼွၵ်ႈဝဵင်းလႃႈသဵဝ်ႈ ႁႂ်ႈႁႃၵူၼ်းသူင်ႇပၼ်ၼႂ်းၸုမ်း ၵႂႃႇၾိုၵ်းၵၢၼ်သိုၵ်း ၶဝ်ႈႁၢပ်ႇၵၢၼ်သိုၵ်း ၼိုင်ႈႁိူၼ်းလႂ် ဢေႇသုတ်း 1 ၵေႃႉ ၼႆယဝ်ႉ။

ၵူၼ်းမိူင်းပိုၼ်ႉတီႈၵေႃႉယူႇဝႆႉၼႂ်းဢိူင်ႇ ၾၢႆႇၼွၵ်ႈဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ၵူၼ်းလူင် ၼႂ်းတပ်ႉၶဝ်လၢတ်ႈမႃး သင်ႇမႃးဝႃႈ ႁိူၼ်းၼိုင်ႈလင် ပေႃးမီးၸၢႆး သွင် ယိင်းၼိုင်ႈၼႆႉ တေဢဝ်ၸၢႆးၼိုင်ႈ၊ ပေႃးမီးယိင်းသွင်ၸၢႆးၼိုင်ႈၼႆႉ တေဢဝ်ယိင်းၼိုင်ႈၵေႃႉၼႆဢေႃႈ။ မိူဝ်ႈၵူႈပွၵ်ႈဢမ်ႇမီးၽႂ် ၸုမ်းလႂ် မႃးမၵ်းၶၢၼ်းႁဝ်းၸိူင်ႉၼႆ ၵမ်းၼႆႉ သမ်ႉၶဝ်မႃးမၵ်းၶၢၼ်း ႁႂ်ႈႁဝ်းႁႃပၼ်ၵူၼ်း ယိင်းၵေႃႈ တေဢဝ် ၸၢႆးၵေႃႈဢမ်ႇလွတ်ႈၼႆလႄႈ ႁဝ်းၶီၸႂ်ဝႆႉယူႇ တေႁဵတ်းႁိုဝ်လီၼႆ တိုၵ်ႉတိူင်ႇပၢင်ႇၵၼ်ဝႆႉယူႇ” ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉ သိုၵ်းၵဝ်ႈၵၢင်ႉ လႆႈၵုမ်းၵမ် ပၼ်ႇၵၢၼ်ၽွင်းငမ်း ၼႂ်းၸႄႈဝဵင်းသႅၼ်ဝီ၊ ဢိူင်ႇ ဝၢၼ်ႈ ၾၢႆႇၼွၵ်ႈဝဵင်းလႃႈသဵဝ်ႈ တေႃႇထိုင် ၸႄႈ ဝဵင်းၵၢတ်ႇၵဝ်ႇ (လၢဝ်ႇၵၢႆး) ၊ ၸႄႈဝဵင်းၵူတ်ႉၶၢႆ ၸိူဝ်းၼႆႉပဵၼ်တၢင်းၵၢၼ်သေ ၵဵပ်းသိုၵ်းမႂ်ႇ ယွၼ်းၵူၼ်းၸၢႆး ဢႃႇယု 18 ထိုင် 45 ၶဝ်ႈႁၢပ်ႇၵၢၼ်သိုၵ်း ၼိုင်ႈဢိူင်ႇလႂ် ဢေႇသုတ်း 2 ၵေႃႉ။ မၢင်ၸႄႈဝဵင်း ၼိုင်ႈလိူၼ်ယွၼ်းၵူၼ်းၼိုင်ႈပွၵ်ႈ မၢင်ၸႄႈဝဵင်း 3 လိူၼ်ၼိုင်ႈပွၵ်ႈၼႆသေ ၸတ်းၵၢၼ်ၵဵပ်းၵူၼ်းသိုၵ်းမႂ်ႇမႃး ၼိုင်ႈတီႈလႄႈ ၼိုင်ႈတီႈ ဢမ်ႇမိူၼ်ၵၼ်ၼႆ – ၵူၼ်းမိူင်းပိုၼ်ႉတီႈလၢတ်ႈ။

ၵူၼ်းမိူင်းပိုၼ်ႉတီႈ ၵေႃႉယူႇဝႆႉ ၼႂ်းၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ် ဢၼ်ၶဝ်ၵဵပ်း ၵူၼ်းၼႆႉ ႁၢႆႉမႃး ၵျၢမ်းမႃးလိူဝ်ၵဝ်ႇတိၵ်းတိၵ်းယဝ်ႉဢေႃႈ။ မိူဝ်ႈဢွၼ်တၢင်းတႄႉ ပူႇၵႄႇႁႃၵူၼ်းႁႄ ၵႂႃႇသူင်ႇပၼ်ၼႆႉႁပ်ႉယူႇ။ မိူဝ်ႈလဵဝ်ၼႆႉ ၶဝ်ဢမ်ႇၽွမ်ႉၸိူင်ႉၼၼ်ယဝ်ႉ။ ၶဝ်ယွၼ်းဝႂ်မုင်ႉႁေႃႁိူၼ်းပႃး။ ၶဝ်တေတူၺ်းသဵၼ်ႈမၢႆၼႂ်းၼၼ်ႉႁႄ ၵဵပ်းဢဝ်ႁင်း ၵူၺ်းၼႆဢေႃႈ။ ၵိၼ်းၸႂ်ၼႃႇ တေႁဵတ်းႁိုဝ်ၵေႃႈ ဝူၼ်ႉပေႃးဢမ်ႇပွင်ႇယဝ်ႉ” ဝႃႈၼႆ။

လႆႈႁူႉဝႃႈ ယွၼ်ႉသိုၵ်းၵဝ်ႈၵၢင်ႉ မိပ်ႇငႅၼ်းႁႂ်ႈၵူၼ်းဝၢၼ်ႈ ဢဝ်ပႃးဝႂ်မုင်ႉႁေႃႁိူၼ်းၵႂႃႇၼႄၶဝ်လႄႈ ယၢမ်းလဵဝ် ၵူၼ်းမိူင်းၸိူဝ်းယူႇၼႂ်းၸႄႈဝဵင်းသႅၼ်ဝီၵမ်ႈၽွင်ႈ ဢွၼ်ၵၼ်ၵႂႃႇၸတ်း ၽႄယႅၵ်ႈသဵၼ်ႈမၢႆ ၵူၼ်းႁိူၼ်း ယႃႇႁႂ်ႈ ၼႂ်းဝႂ်မုင်ႉႁေႃႁိူၼ်းမီးဝႆႉသဵၼ်ႈမၢႆၵူၼ်းၼမ်ယူႇႁင်းၽႂ်မၼ်း တီႈလုမ်းလဝၵ ဝဵင်းလႃႈသဵဝ်ႈ ၼႆယဝ်ႉ။

သိုၵ်းၵဝ်ႈၵၢင်ႉၼႆႉ ၼႂ်းပီ 2026 သိုၵ်းၵဝ်ႈၵၢင်ႉ ၵဵပ်းၵူၼ်း ၸိူဝ်းယူႇၼႂ်းပိုၼ်ႉတီႈၾၢႆႇၼွၵ်ႈဝဵင်းလႃႈသဵဝ်ႈ သွင်ပွၵ်ႈယဝ်ႉၼႆ ၵူၼ်းမိူင်းပိုၼ်ႉတီႈလၢတ်ႈ။

မိူၼ်ၼင်ႇ ၼႂ်းၸႄႈဝဵင်းသႅၼ်ဝီ ၸိူဝ်းယူႇတႂ်ႈၵၢၼ်ၽွင်းငမ်း သိုၵ်းၵဝ်ႈၵၢင်ႉတင်းသဵင်ႈတႄႉ ၵၢင်ႉၵႄႇၼႂ်းပိုၼ်ႉတီႈ လႆႈႁႃၵူၼ်း သူင်ႇၵႂႃႇႁၢပ်ႇၵၢၼ်သိုၵ်း ဢမ်ႇယွမ်း 6 ပွၵ်ႈယဝ်ႉ ဝႃႈၼႆ။