သိုၵ်းမၢၼ်ႈယိုတ်းမိူင်း ၶွတ်ႇၽွတ်ႈ ၵေႃႇမတီႇ(ၶွမ်ႊမတီႊ) ဢၼ်လမ်ႇလွင်ႈတႃႇ သၽႃးၸိူဝ်ႉၸၢတ်ႈ လႄႈ သၽႃးၵူၼ်းမိူင်းသေ လိူၵ်ႈဢဝ်ၽူႈမီးၸၼ်ႉၵဝ်ႇ သိုၵ်းမၢၼ်ႈထၢၵ်ႈ မႃးႁပ်ႉပုၼ်ႈၽွၼ်းပဵၼ် ႁူဝ်ပဝ်ႈ၊ ၵႅမ်ႁူဝ်ပဝ်ႈ လႄႈ ၽူႈၼမ်းၼႂ်းၸိူဝ်းၼၼ်ႉဝႆႉ။

တႄႇၼႂ်းၵၢင်လိူၼ်မၢတ်ႉၶျ်မႃး သိုၵ်းမၢၼ်ႈယိုတ်းမိူင်း ပိုတ်ႇလုမ်းသၽႃးၸိူဝ်ႉၸၢတ်ႈ၊ သၽႃးၵူၼ်းမိူင်း၊ သၽႃးၸႄႈမိူင်း လႄႈ တိူင်း တင်း သၽႃးမိူင်းႁူမ်ႈတုမ် ။

ဢွင်ႈတီႈၼင်ႈ ၸၼ်ႉၾၢႆႇယိပ်းလႄႈမၵ်းမၼ်ႈပၼ်ၵၢၼ်ငိုၼ်း၊ ၵေႃႇမတီႇၾၢႆႇမၵ်းမၼ်ႈ ပၵ်းပိူင်ၾိင်ႈမိူင်း ၸိူဝ်းၼႆႉ ပဵၼ်ၽူႈၼမ်းၸၼ်ႉသုင်ၵဝ်ႇ ၶွင်ၸုမ်းသိုၵ်းမၢၼ်ႈယိုတ်းမိူင်း တင်း ၽူႈၼမ်း လႄႈ ၽူႈမီးၸၼ်ႉ ၼႂ်းၸုမ်းပႃႇတီႇသၢင်ႇသီႈ USDP လႆႈၶိုၼ်းႁပ်ႉဢဝ်ပုၼ်ႈၽွၼ်းဝႆႉတင်းသဵင်ႈ။

မိူဝ်ႈဝၼ်းတီႈ 23-24 လိူၼ်မၢတ်ႉၶျ် ဝၢႆးလင်ၸတ်းပၢင်ၵုမ်လုမ်းသၽႃးၵူၼ်းမိူင်း လႄႈ သၽႃးၸိူဝ်ႉၸၢတ်ႈယဝ်ႉ ၶိုၼ်းၶွတ်ႇၽွတ်ႈၵေႃႇမတီႇဢၼ်လမ်ႇလွင်ႈ တႃႇႁဵတ်းသၢင်ႈၵၢၼ်ငၢၼ်း လႄႈ မၵ်းမၼ်ႈ ၶေႃႈတႅပ်းတတ်း ၼႂ်းလုမ်းသၽႃးမိူင်းႁူမ်ႈတုမ်ၵႂႃႇ ၼႆယဝ်ႉ။

ၼႂ်းၵေႃႇမတီႇၾၢႆႇၸတ်းၵၢၼ်ငိုၼ်းတွင်းၵူၼ်းမိူင်း တီႈသၽႃးၵူၼ်းမိူင်းၼၼ်ႉ ပၼ်ပုၼ်ႈၽွၼ်း ၸွမ်သိုၵ်းလူင်သိုၵ်းမၢၼ်ႈၵေႃႉၵဝ်ႇ ဢူးတေႇၸႃႇၵျေႃႇ ပဵၼ်ႁူဝ်ပဝ်ႈဝႆႉသေ ၸၼ်ႉ ၽူႈၼမ်းၼႂ်းသမ်ႉ ဢဝ်ဢူးတိၼ်ႇဢွင်ႇၶျိတ်ႉ ၵေႃႉပဵၼ်ၵႅမ်ၽူႈၼမ်းၼႂ်း ပႃႇတီႇသၢင်ႇသီႈ ႁပ်ႉပုၼ်ႈၽွၼ်းႁဵတ်းဝႆႉ။

ၼႂ်းၵေႃႇမတီႇၾၢႆႇၸတ်းၵၢၼ်ငိုၼ်းတွင်းၵူၼ်းမိူင်း တီႈသၽႃးၸိူဝ်ႉၸၢတ်ႈၼၼ်ႉသမ်ႉ ႁူဝ်ပဝ်ႈၵေႃႇမတီႇၼႆႉ ပဵၼ် ဢူးၶျိတ်ႉသူၺ်ႇ ၽွင်းလူင်ၾၢႆႇၵၢၼ်မၢၵ်ႈမီး လႄႈ ၵၢၼ်ၵႃႉၶၢႆ တႂ်ႈဢႃႇၼႃႇသိုၵ်းမၢၼ်ႈ လႄႈ ၽူႈၶဝ်ႈၸုမ်း ၼႂ်းၸုမ်းၽူႈၵုမ်းၵၢၼ် (ဗဟိုအလုပ်အမှုဆောင်) ပႃႇတီႇသၢင်ႇသီႈ USDP ဢူးတၢၼ်းဢွင်ႇ သမ်ႉ လႆႈမႃးပဵၼ် ၸၼ်ႉၽူႈၼမ်းၼႂ်းဝႆႉ။

ၵေႃႇမတီႇၾၢႆႇၸတ်းၵၢၼ်ငိုၼ်းတွင်းၵူၼ်းမိူင်းၼႆႉ မီးၼႃႈတီႈပုၼ်ႈၽွၼ်း ၵူတ်ႇထတ်း ၸတ်းၵၢၼ် လွင်ႈၸႂ်ႉငိုၼ်းတွင်း လူင်ပွင်ၸိုင်ႈတင်းသဵင်ႈ ဢၼ်ႁွင်ႈၵၢၼ်ၽွင်းလူင်ၶဝ် တၢင်ႇယိုၼ်ႈယွၼ်းမႃး ၸိူဝ်းၼၼ်ႉၵေႃႈ မီးသုၼ်ႇမၵ်းမၼ်ႈပၼ် ႁႂ်ႈၸႂ်ႉတိုဝ်းၵႂႃႇ ၼႆယဝ်ႉ။

လိူဝ်ၼၼ်ႉ ၼႂ်းၵေႃႇမတီႇပိူင်ယုၵ်းယၢင်ႇၾိင်ႈမိူင်း တီႈသၽႃးၵူၼ်းမိူင်းၼၼ်ႉၵေႃႈ ၶိုၼ်းႁပ်ႉဢဝ်ဢူးၼၼ်ႇတၵျေႃႇၸွႃႇ ၵေႃႉယၢမ်ႈပဵၼ် ၵႅမ်ႁူဝ်ပဝ်ႈ သၽႃးၵူၼ်းမိူင်း ၽွင်းပၢၼ်လူင်ပွင်ၸိုင်ႈ ဢူးတဵင်းသဵင်ႇၼၼ်ႉ ၶိုၼ်ႈမႃးပဵၼ်ႁူဝ်ပဝ်ႈၶိုၼ်းသေ မွပ်ႈပၼ်ပုၼ်ႈၽွၼ်း ဢူးတဵင်းထုၼ်းဢူး ၵေႃႉယၢမ်ႈပဵၼ် ၽူႈၶၢၼ်ပၢၵ်ႇ ပႃႇတီႇသၢင်ႇသီႈ USDP မႃးႁပ်ႉၸၼ်ႉပဵၼ် ၽူႈၼမ်းၼႂ်းဝႆႉ။

ၼင်ႇၼၼ်ယဝ်ႉ တီႈၼႂ်းၵေႃႇမတီႇပိူင်ယုၵ်းယၢင်ႇၾိင်ႈမိူင်း တီႈသၽႃးၸိူဝ်ႉၸၢတ်ႈၼၼ်ႉၵေႃႈ ႁူဝ်ပဝ်ႈပဵၼ်တေႃႇၼွႆႇၼွႆႇဢူး ၵေႃႉၶဝ်ႈပႃးဝႆႉၼႂ်းၸုမ်းၽူႈၵုမ်းၵၢၼ် (ဗဟိုအလုပ် အမှုဆောင်) ပႃႇတီႇသၢင်ႇသီႈ USDP ၶိုၼ်းမႃးႁပ်ႉၸၼ်ႉဝႆႉသေ ၽူႈၼမ်းၼႂ်းၵေႃႈ ၶိုၼ်းပဵၼ် ၸဝ်ႈသိုၵ်းၵဝ်ႇ သိုၵ်းမၢၼ်ႈ ဢူးၸိၼ်ႇမိၼ်းထၵ်ႉ ၵူၺ်း။

ၵေႃႇမတီႇပိူင်ယုၵ်းယၢင်ႇၾိင်ႈမိူင်းၼႆႉ ပဵၼ်ၵေႃႇမတီႇ ဢၼ်ႁၢင်ႈႁႅၼ်း တိုတ်ႉၸၼ် မၵ်းမၼ်ႈ ပၵ်းပိူင်ၾိင်ႈမိူင်းၵူၺ်းဢမ်ႇၵႃး ပၵ်းပိူင်ၾိင်ႈမိူင်း ဢၼ်ႁွင်ႈၵၢၼ်ၽွင်းလူင်ၶဝ် ၶပ်းၶိုင် ၸတ်းယိုၼ်ႈတၢင်ႇမႃးၼၼ်ႉၵေႃႈ မီးပုၼ်ႈၽွၼ်းၵူတ်ႇထတ်းလႆႈသေ ပၵ်းပိူင်ၾိင်ႈမိူင်းၶေႃႈလႂ် ထုၵ်ႇလီ ဢဝ်ၵႂႃႇဢုပ်ႇဢူဝ်းၼႂ်းသၽႃး ဢမ်ႇၼၼ် ထုၵ်ႇလီပၢၵ်ႈပႅတ်ႈၼႆ ၼၼ်ႉၵေႃႈ မီးသုၼ်ႇလႆႈ ၸတ်းၵၢၼ်ၵႂႃႇ တင်းသဵင်ႈ ၼၼ်ႉယဝ်ႉ။

ယွၼ်ႉၼၼ် ဢွင်ႈတီႈၸၼ်ႉလမ်ႇလွင်ႈတႃႇၸိုင်ႈမိူင်းတေႉတေႉၼၼ်ႉ သိုၵ်းမၢၼ်ႈယိုတ်းမိူင်း ႁၢင်ႈႁႅၼ်းၶိုင်ပွင် ၸတ်းဢဝ် ၵူၼ်းဢၼ်မၼ်းယုမ်ႇယမ်တမ်းၸႂ်လႆႈ မႃးႁပ်ႉၸၼ်ႉ ဢဝ်တီႈယူႇဝႆႉလူင်ႈၼႃႈ ပိူဝ်ႈတႃႇႁႂ်ႈဢွၵ်ႇသဵင်လဵဝ်ၵၼ် ၼႂ်းၸုမ်းလူင်ပွင်ၸိုင်ႈ လႄႈ လုမ်းသၽႃးၵူႈတီႈၼႆ ၽူႈလဵပ်ႈႁဵၼ်း လွင်ႈၵၢၼ်မိူင်း မိူင်းႁူမ်ႈတုမ်ၵေႃႉၼိုင်ႈ ထတ်းသၢင် လၢတ်ႈၼႄဝႆႉၼင်ႇၼႆ။

“ယိူင်းဢၢၼ်းလူင်မၼ်းသုင်သုတ်းတႄႉ ပိူဝ်ႈတႃႇ ႁႂ်ႈတပ်ႉသိုၵ်း လူင်ပွင်ၸိုင်ႈ လႄႈ သၽႃး ဢွၵ်ႇပဵၼ်သဵင်လဵဝ်ၵၼ်။ ၾၢႆႇတပ်ႉသိုၵ်းၶဝ် ၶႂ်ႈၵုမ်းၵမ် ၵူႈၸၼ်ႉထၢၼ်ႈ ၵူႈတီႈတင်း သဵင်ႈလႄႈ ၸွင်ႇႁႅၼ်းဢဝ် ၵူၼ်းၶဝ်သႂ်ႇဝႆႉတင်းသဵင်ႈ။ ဢမ်ႇၶႂ်ႈႁႂ်ႈၽႂ်မႃးၶတ်းၶၢၼ်ႉ ၼႂ်းလုမ်းသၽႃး၊ လုမ်းလူင်ပွင်ၸိုင်ႈ၊ လုမ်းတတ်းသိၼ်တြႃးၼၼ်ႉၼႃႇ။ ပေႃးၼၼ်ၸင်ႇ ၶဝ်တေ ၵုမ်းထိင်းလႆႈ လွင်ႈမၵ်းမၼ်ႈၾိင်ႈမိူင်း၊ ၵၢၼ်ၸႂ်ႉငိုၼ်းတွင်း ၼႂ်းႁွင်ႈၵၢၼ်လူင်ပွင်ၸိုင်ႈ ၸိူဝ်းၼႆႉ ၸွမ်းၼင်ႇၵၢင်ၸႂ်ၶဝ်ၶႂ်ႈပဵၼ်ၼၼ်ႉ” ဝႃႈၼႆ။

လႆႈႁူႉဝႃႈ ပေႃးထိုင်မႃး လိူၼ်မၢတ်ႉၶျ် 30 ဝၼ်း သိုၵ်းမၢၼ်ႈယိုတ်းမိူင်းႁၢင်ႈႁႅၼ်း တေႃႇတေလိူၵ်ႈ ၸွမ်ၸိုင်ႈ တင်း ၵႅမ်ၸွမ်ၸိုင်ႈ ပဵၼ်တၢင်းၵၢၼ်ၵႂႃႇ ၼႂ်းလုမ်းသၽႃးမိူင်းႁူမ်ႈတုမ် ၼႆယဝ်ႉ။

ဝၢႆးလင်သိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းႁူမ်ႈတုမ် လိပ်းလိပ်းလႅင်လႅင်ယဝ်ႉ ၼႂ်းမိူင်းႁူမ်ႈတုမ် ၵိူတ်ႇပဵၼ်ပၼ်ႁႃ ၾႆးပၢင်တိုၵ်းလုၵ်ႉႁိုၼ်ႇၶိုၼ်ႈမႃး ၵူႈၸႄႈတိူင်း လႄႈ ၸႄႈမိူင်း ႁိုင်ၶၢဝ်းတၢင်း 5 ပီ သိုၵ်းမၢၼ်ႈယိုတ်းမိူင်း ၸႂ်ႉႁိူဝ်းမိၼ်တိုၵ်းသေပွႆႇမၢၵ်ႇသႂ်ႇႁၢဝ်ႈႁႅင်း ၸွမ်းဢွင်ႈတီႈမီးၵူၼ်းမိူင်းယူႇသဝ်းၼၼ်ႉ သေႁဵတ်းႁႂ်ႈၵူၼ်းမိူင်းလူႉတၢႆပဵၼ်ၵေႃႇပဵၼ် ၵွင် ႁၢမ်းသုၼ်ႇလႆႈတိုဝ်ႉတၢင်း ႁူပ်ႉတၢင်းယၢပ်ႇႁၢဝ်ႈႁႅင်း။

ထိုင်ၶၢဝ်းယၢမ်း မိၼ်းဢွင်ႇလၢႆႇ တေလႆႈဢဝ်ဢႃႇၼႃႇ ဢၼ်ယိုတ်းဢဝ်မႃးလူၺ်ႈၵူၼ်းမိူင်းဢမ်ႇပဵင်းပေႃးၸႂ် ၼၼ်ႉ မွပ်ႈပၼ်ၶိုၼ်းတီႈ လူင်ပွင်ၸိုင်ႈ ႁႂ်ႈပဵၼ်တၢင်းၵၢၼ်ၼၼ်ႉ သိုၵ်းမၢၼ်ႈယိုတ်းမိူင်း ၸင်ႇၶိုင်ပွင်ၼမ်း ၸတ်းႁဵတ်းပၢင်လိူၵ်ႈတင်ႈ ၼႂ်းၵႄႈငဝ်းလၢႆးဝၢၼ်ႈမိူင်းဢမ်ႇမီးလွင်ႈၼိမ်တဵင်ႈယူႇၼၼ်ႉလႄႈ ၸုမ်းၶတ်းၶၢၼ်ႉသိုၵ်းမၢၼ်ႈ၊ ၸုမ်းတူင်ႇဝူင်း ၵူၼ်း လႄႈ ၸိုင်ႈမိူင်းၼွၵ်ႈ ၸိူဝ်းႁူႉႁၼ်ၸွမ်းပိူင်ပဵၼ် တေႉၼႂ်းမိူင်းႁူမ်ႈတုမ်ၼၼ်ႉ ဢမ်ႇယွမ်းႁပ်ႉ လူင်ပွင်ၸိုင်ႈ ဢၼ်ၵိူတ်ႇဢွၵ်ႇမႃး ယွၼ်ႉပၢင်လိူၵ်ႈတင်ႈပွမ် ဢမ်ႇမီးလွင်ႈၽဵင်ႇပဵင်းၼၼ်ႉ ၼႆယဝ်ႉ။