ၼမ်ႉမၼ်းၸၢၵ်ႈၼႂ်းမိူင်းတႆး ႁႃသိုဝ်ႉယၢပ်ႇၵိၼ်းမႃးၵူႈမိုဝ်ႉၵူႈဝၼ်း လူင်ပွင်ၸိုင်ႈတႂ်ႈသိုၵ်းမၢၼ်ႈယိုတ်းမိူင်း ၵေႃႈ ပိုၼ်ၽၢဝ်ႇပိူင်ၸႂ်ႉတိုဝ်း လႄႈ မၵ်းတတ်းလၢႆးသိုဝ်ႉၼမ်ႉမၼ်းၸၢၵ်ႈလၢႆသႅၼ်းလႄႈ ႁဵတ်းႁႂ်ႈၵႃႈၶၼ်ၼမ်ႉမၼ်းၸၢၵ်ႈ ပုင်ႈၶိုၼ်ႈၵႂႃႇၼမ်လိူဝ်ၵဝ်ႇ 2 ထိုင် 3 ပုၼ်ႈ ။

ၵႃႈၶၼ်ၼမ်ႉမၼ်းၸၢၵ်ႈ ဢၼ်လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း မၵ်းမၼ်ႈပဵၼ်တၢင်းၵၢၼ်ၼၼ်ႉ ၼႂ်းၶၢဝ်းတၢင်း သွင်ဝူင်ႈၼႆႉ ထၢတ်ႈသီႇ ၼိုင်ႈလီႇတႃႇလႂ် ပုင်ႈၶိုၼ်ႈၵႂႃႇမွၵ်ႈ 1,500 ပျႃးပၢႆ၊ တီႇၸႄႇ ၼိုင်ႈလီႇတႃႇလႂ် ပုင်ႈၶိုၼ်ႈၵႂႃႇမွၵ်ႈ 2,000 ပျႃးလႄႈ ႁဵတ်းႁႂ်ႈၵႃႈၶၼ်ၼမ်ႉမၼ်းၸၢၵ်ႈ ၼႂ်းမိူင်းတႆးပွတ်းႁွင်ႇ ဝဵင်းၸိူဝ်းထူပ်းၽေးတုမ်ႉယွၼ်ႈယွၼ်ႉပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼၼ်ႉ ၵိုင်ႉၵၢင်ႉပုင်ႈၶိုၼ်ႈၵႂႃႇ ႁႅင်းတေႉတေႉ ။

ၵူၼ်းၸၢႆး ၵေႃႉယူႇၼႂ်းပိုၼ်ႉတီႈဝဵင်းဢၼ်တိတ်းၸပ်းလႅၼ်လိၼ်မိူင်းတႆး-မိူင်းၶႄႇၵေႃႉၼိုင်ႈ လၢတ်ႈတီႈ ၽူႈတွႆႇႁွၵ်ႈဝႃႈ “မိူဝ်ႈၼႆႉ (25/3/2026) ႁဝ်းၵႂႃႇသိုဝ်ႉၼမ်ႉမၼ်းၸၢၵ်ႈမႃး လႆႈပၼ်ၼိုင်ႈလီႇတႃႇၼႆႉ 18,000 ပျႃးယဝ်ႉ။ ပၢမ်ႉၼမ်ႉမၼ်းၵမ်ႈၼမ်ၵေႃႈ ဢမ်ႇၽုၺ်ႇၶၢႆပၼ်ႁဝ်း။ ၵႃႈၶၼ် တီႈပၢမ်ႉမၼ်းတႄႉ ထိုင် 8,500-9,000 ပျႃးၵူၺ်းသေတႃႉ ၶဝ်ဢမ်ႇ ပိုတ်ႇၶၢႆပၼ်ၵူႈသႅင်ႇ။ သႅင်ႇၸိူဝ်းဢၼ်ပိုတ်ႇၶၢႆပၼ်ၼၼ်ႉၵေႃႈ ၵႃးၼိုင်ႈလမ်းၼႆႉ သႂ်ႇပၼ်တႃႇငိုၼ်း 2 သႅၼ်ပျႃးၵူၺ်း။ မၢင်လမ်းတမ်ႉဢမ်ႇလႆႈ။ ၼိုင်ႈတီႈလႄႈၼိုင်ႈတီႈၵေႃႈ ၵႃႈ ၶၼ်မၼ်းဢမ်ႇမိူၼ်ၵၼ်ၼင်ႇၵဝ်ႇ။ မၢင်တီႈ တဝ်ႈၼမ်ႉဢၼ်မီး 1 လီႇတႃႇၶိုင်ႈၼၼ်ႉၶဝ်ၶၢႆ 3 မိုၼ်ႇ ထိုင် 3 မိုၼ်ႇႁႃႈႁဵင်ယဝ်ႉ။ ပေႃးၼၼ်ၼႆ ၼိုင်ႈလီႇတႃႇၼႆႉ တူၵ်းၵႂႃႇ 2 မိုၼ်ႇပၢႆယဝ်ႉ” ဝႃႈၼႆ။

ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ပီ 2021 မႃးၼႆႉ ၶၼ်ငိုၼ်းမိူင်းမၢၼ်ႈတူၵ်း ၶၼ်ၵုၼ်ႇၼႂ်းမိူင်းႁူမ်ႈတုမ်ၶိုၼ်ႈၵူၺ်း ဢမ်ႇၵႃး လင်ပၢင်တိုၵ်းၽႅၼ် ယၼ်ႇသိုၵ်း 1027 ၵူၼ်း မိူင်းတႆးပွတ်းႁွင်ႇ တေႃႉသူင်ႇၶူဝ်းၵုၼ်ႇယၢပ်ႇ ၶၢမ်ႈၵဵတ်ႉလၢၼ်ႇ ယၢပ်ႇၽိုတ်ႇႁႅင်း လႆႈပၼ်ၸႂ်ႉၸၢႆႇၸွမ်းသဵၼ်ႈတၢင်းၼမ်သေ ႁဵတ်းႁႂ်ႈၶၼ်ၵုၼ်ႇ ၵိုင်ႉၵၢင်ႉပုင်ႈၶိုၼ်ႈၵႂႃႇ ၸွမ်းတေႉတေႉ ဝႃႈဝႃႈ ၼႆယဝ်ႉ။

တႄႇလိူၼ်မၢတ်ႉၶျ်မႃး ဢိင်ၼိူဝ်ငဝ်းလၢႆးၵၢၼ်သိုၵ်း မိူင်းဢမေႊရိၵၼ်ႊ တင်း မိူင်းဢီႊရၼ်ႊယိုဝ်းၵၼ်ႁၢဝ်ႈ ႁႅင်းလႄႈ ထိုင်တီႈလၢႆလၢႆၸိုင်ႈမိူင်းလႆႈႁူပ်ႉပၼ်ႁႃ ၼမ်ႉမၼ်းၸၢၵ်ႈ တႃႇၸႂ်ႉတိုဝ်းၵူႈဝၼ်းဝၼ်းႁင်းၽႂ်မၼ်းယူႇ။ ၼင်ႇႁိုဝ် တေၶိုတ်းတၼ်းၶၢဝ်းယၢမ်းသေ သိုဝ်ႉလႆႈၼမ်ႉမၼ်းၸၢၵ်ႈ ဢၼ်ၵႃႈၶၼ်ထုၵ်ႇလိူဝ် ႁၢၼ်ႉၶၢႆၼမ်ႉမၼ်းၸၢၵ်ႈတၢင်းၼွၵ်ႈ ၼၼ်ႉ ၵူၼ်းမိူင်းဝဵင်းလႃႈသဵဝ်ႈ လႆႈဢဝ်ရူတ်ႉၵႃးၵႂႃႇၶဝ်ႈထႅဝ် ၶပ်ႉယႆၵၼ်ပႂ်ႉဝႆႉ ၸဵမ်မိူဝ်ႈတဵင်ႈၶိုၼ်း လိုၵ်းၼၼ်ႉၵေႃႈမီးၼႆ -ၵူၼ်းမိူင်းပိုၼ်ႉတီႈလၢတ်ႈၼႄၼင်ႇၼႆ။

ၼုမ်ႇၸၢႆး ဢႃႇယု 30 ပီပၢႆ ၵေႃႉယူႇဝႆႉၼႂ်းဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “တႃႇသႂ်ႇၼမ်ႉမၼ်းၼႂ်းၵႃးၼႆႉ ႁဝ်းလုၵ်ႉၵႂႃႇၵၢင်ၼႂ်ၸဝ်ႉ 3 မူင်းႁႄ ၵႂႃႇပႂ်ႉၶဝ်ႈထႅဝ် ၽိူဝ်ႇၵႂႃႇထိုင် ၸွမ်းသွင်ၾၢၵ်ႇၶၢင်ႈတၢင်း ၵႃး တင်း သင်ႇၵႄႇ (ရူတ်ႉၶိူင်ႈ) သမ်ႉပေႃးၶပ်ႉယႆၵၼ်ဝႆႉ ထႅဝ်မၼ်းယၢဝ်းႁႅင်းၼႃႇယဝ်ႉ။ ပေႃးသိုဝ်ႉတၢင်းၼွၵ်ႈမၼ်းသမ်ႉၵႃႈႁႅင်းၼႃႇ။ ၼိုင်ႈလီႇတႃႇ ၸမ် 2 မိုၼ်ႇၸိူဝ်းၼႆႉ မၢင်တီႈယင်းဢမ်ႇမီးၶၢႆ။ ၸွင်ႇဝႃႈလႆႈဢွၼ်ၵၼ်ၵႂႃႇၶဝ်ႈထႅဝ်ပႂ်ႉသိုဝ်ႉ ၼမ်ႉမၼ်းတီႈပၢမ်ႉလူင်မၼ်းၼၼ်ႉၼႃႇ။ ပၼ်ႁႃၼမ်ႉမၼ်းၸၢၵ်ႈၼႆႉ ၼိုင်ႈဝၼ်းၼိုင်ႈဝၼ်း ယၢပ်ႇႁႅင်းမႃးလိူဝ်ၵဝ်ႇတိၵ်းတိၵ်းယဝ်ႉ” ဝႃႈၼႆ။

လႆႈႁူႉဝႃႈ ႁၢၼ်ႉၶၢႆၼမ်ႉမၼ်းၸၢၵ်ႈ ဢၼ်ယႂ်ႇဢၼ်လူင် ၼႂ်းမိူင်းတႆးပွတ်းႁွင်ႇ ၸွမ်းဝဵင်းလႃႈသဵဝ်ႈ၊ သႅၼ်ဝီ၊ ၵူတ်ႉၶၢႆ၊ မူႇၸေႊ၊ ၼမ်ႉၶမ်းၸိူဝ်းၼႆႉ ပိုတ်ႇၶၢႆပၼ်ၵူၼ်းမိူင်းၸိူဝ်းယူႇၼႂ်းပိုၼ်ႉတီႈ ၼိုင်ႈဝၼ်း ၼပ်ႉဢၢၼ်ႇၸူဝ်ႈမူင်း 3-4 ၸူဝ်ႈမူင်းၵူၺ်း။ ႁၢၼ်ႉမၢင်တီႈ ပိုတ်ႇပၼ်ယၢမ်းၵၢင်ၼႂ်ၸဝ်ႉ၊ မၢင်တီႈပိုတ်ႇၵၢင်ဝၼ်း ၸူဝ်ႈၵႅပ်ႉၵမ်းၵူၺ်း ၼႆယဝ်ႉ။

လိူဝ်ၼၼ်ႉ ၶၼ်ၼမ်ႉမၼ်းၸၢၵ်ႈ တၢင်းမိူင်းတႆးပွတ်းႁွင်ႇၼႆႉ ၶၢဝ်းတၢင်းသွင်ဝၼ်းၵူၺ်း ၵိုင်ႉၵၢင်ႉပုင်ႈၶိုၼ်ႈ ၵႂႃႇၸူဝ်ႈၽႅပ်ႉတႃသေ တီႉႁၢၼ်ႉၶၢႆၼမ်ႉမၼ်းၸၢၵ်ႈဢၼ်ယႂ်ႇမၼ်း ၵႃႈၶၼ်ၼမ်ႉမၼ်းၸၢၵ်ႈ ၼိုင်ႈလီႇတႃႇလႂ် ဢမ်ႇထိုင် 1 မိုၼ်ႇပျႃးသေတႃႉ သင်သိုဝ်ႉႁၢၼ်ႉၶၢႆၾၢႆႇၼွၵ်ႈမၼ်းၸိုင် ၵႃႈၶၼ်ၼမ်ႉမၼ်းၸၢၵ်ႈ ၼိုင်ႈလီႇတႃႇ ယူႇၵႄႈၵၢင် 15,000 ထိုင် 30,000 ပျႃး ။

ၵူၺ်းၵႃႈၶိူင်ႈမိၼ်သိုၵ်းမၢၼ်ႈတႄႉ ၵႂႃႇပွႆႇမၢၵ်ႇသႂ်ႇႁိူၼ်းယေးၵူၼ်းမိူင်းယူႇတၢင်းတိူင်းၸႄႈၵႅင်းၼႆႉ ၵူႈဝၼ်း။