ၸွမ်ၸိုင်ႈမိူင်းဢမေႊရိၵၼ်ႊ တေႃႊၼႄႊလ်ထရမ်ႉလၢတ်ႈဝႃႈ – တႃႇတေၵိုတ်းပၢင်တိုၵ်းၼၼ်ႉ လႆႈဢုပ်ႇ ၵၼ်တင်း မိူင်းဢီႊရၼ်ႊယဝ်ႉသေ ပဵၼ်ပၢင်ဢုပ်ႇၵုမ်ဢၼ်မီးလွင်ႈၶႅမ်ႉလႅပ်ႈတေႉတေႉ ဝႃႈၼႆ။

ၵူၺ်းၵႃႈ ဝၢႆးလင်ၼၼ်ႉဢမ်ႇႁိုင် ႁူဝ်ပဝ်ႈသၽႃး မိူင်းဢီႊရၼ်ႊ Mohammad Bagher Ghalibaf တႅမ်ႈတၢင်ႇဝႆႉတီႈၼိူဝ်သိုဝ်ႇတူင်ႇဝူင်းမၼ်းဝႃႈ – ဢမ်ႇလႆႈမီးလွင်ႈႁူပ်ႉဢုပ်ႇၵုမ်သင်ၵၼ် တင်း ဢမေႊ ရိၵၼ်ႊ။ ဢမေႊရိၵၼ်ႊၶႂ်ႈၸႂ်ႉတိုဝ်းၶၢဝ်ႇပွမ်သေ ၶတ်းၸႂ်ၵုမ်းထိင်းလွၵ်းၵၢတ်ႇ ၼမ်ႉမၼ်းမဵၼ်ၵူၺ်း ဝႃႈၼႆ။

မိူၼ်ၼႆ ၽူႈၶၢၼ်ပၢၵ်ႇ တီႈႁွင်ႈၵၢၼ်ၽွင်းလူင်ၾၢႆႇၼွၵ်ႈမိူင်း မိူင်းဢီႊရၼ်ႊၵေႃႈ လၢတ်ႈဝႃႈ – ဢမ်ႇလႆႈမီး လွင်ႈႁူပ်ႉထူပ်းဢုပ်ႇၵုမ်ၵၼ်တင်း ဢမေႊရိၵၼ်ႊ။

ၾၢႆႇၼိုင်ႈၵေႃႈ မိူဝ်ႈဝၼ်းတီႈ 21 လိူၼ်မၢတ်ႉၶျ်ၼႆႉ ၸွမ်ၸိုင်ႈထရမ်ႉ လၢတ်ႈဝႆႉဝႃႈ – ၼႂ်းၶၢဝ်းတၢင်း 48 ၸူဝ်ႈမူင်းၼၼ်ႉ သင်ဢီႊရၼ်ႊ ဢမ်ႇပိုတ်ႇပၼ် ႁိူဝ်းတင်းသဵင်ႈ ၵႂႃႇမႃးၼႂ်းၵိဝ်ႇၼမ်ႉ ႁေႃႊမူတ်ႉသ်ၸိုင် တေတိုၵ်းတေႃးသႂ်ႇ ႁူင်းၸၢၵ်ႈၾႆးၾႃႉၼႂ်းမိူင်းဢီႊရၼ်ႊ ၼႆယဝ်ႉ။

ၵူၺ်းၵႃႈ ထိုင်မႃးၼႂ်းဝၼ်းတီႈ 23 လိူၼ်မၢတ်ႉၶျ် မိူဝ်ႈဝႃးၼႆႉ ၸွမ်ၸိုင်ႈထရမ်ႉ ၶိုၼ်းတႅမ်ႈတၢင်ႇဝႆႉ တီႈ ၼိူဝ်သိုဝ်ႇတူင်ႇဝူင်း Truth မၼ်းၸၢႆးဝႃႈ – ယွၼ်ႉလႆႈဢုပ်ႇၵုမ်ၵၼ်တင်း ဢီႊရၼ်ႊယဝ်ႉလႄႈ ၽႅၼ်ၵၢၼ်တႃႇတိုၵ်းတေႃး ႁူင်းၸၢၵ်ႈၾႆးၾႃႉၼႂ်းမိူင်းဢီႊရၼ်ႊၼၼ်ႉ တေၵိုတ်းယင်ႉဝႆႉ တႃႇၶၢဝ်းတၢင်း 5 ဝၼ်း၊ ဝၢႆးလင်ၼၼ်ႉယဝ်ႉ တေဢိင်ၼိူဝ် ၶေႃႈဢၼ်လႆႈႁူပ်ႉထူပ်းဢုပ်ႇၵုမ်ၵၼ်သေ သိုပ်ႇႁဵတ်းသၢင်ႈၵႂႃႇ ဝႃႈၼႆ။

ၽွင်းၼၼ်ႉ ၵႃႈၶၼ်ၼမ်ႉမၼ်းမဵၼ် ၼႂ်းလွၵ်းၵၢတ်ႇလုမ်ႈၾႃႉ တူၵ်းလူင်းၵႂႃႇ 1 ပုင်းလႂ် 96 ၻေႃႊလႃႊ။

ၾၢႆႇသိုၵ်းဢိတ်ႉသ်ရေႊတႄႉ လၢတ်ႈဝႃႈ ၼႂ်းဝၼ်းတီႈ 23 လိူၼ်မတ်ႉၶျ် မိူဝ်ႈဝႃးၼႆႉ လႆႈတိုၵ်းတေႃးသႂ်ႇ တီႈၼႂ်းဝဵင်း တီႊႁီႊရၼ်ႊ၊ မိူင်းဢီႊရၼ်ႊထႅင်ႈ ၼႆယဝ်ႉ။ တေႃႇထိုင်ယၢမ်းလဵဝ် ဢီႊရၼ်ႊၵေႃႈ တိုၵ်ႉသိုပ်ႇ ပိၵ်ႉဢိုတ်း သဵၼ်ႈတၢင်းၼမ်ႉ ၼႂ်းၵိဝ်ႇၼမ်ႉႁေႃႊမူတ်ႉသ်ဝႆႉ။