ထဝ်ႈၸၢႆးၵေႃႉၼိုင်ႈ ပဵၼ်ၵူၼ်းဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ ၵႂႃႇတၢင်ႇဢွႆႈသေ ယဵပ်ႇၺႃးမၢၵ်ႇ တိၼ်ပုတ်း မၢတ်ႇၸဵပ်းႁၢဝ်ႈႁႅင်း ယၢပ်ႇၽိုတ်ႇတႃႇယူတ်းယႃတူဝ် ။
ထဝ်ႈၸၢႆးၼၼ်ႉပဵၼ် ဢူးတိၼ်ႇလၢႆႇ ဢႃယု 57 ပီ ယူႇဝၢၼ်ႈ ၼွင်တေႃး (နောင်တော ရွာမ) ၸႄႈဝဵင်း ၼွင်ၶဵဝ်။
ပူၼ်ႉမႃးဝၼ်းတီႈ 21/03/2026 မၼ်းၸၢႆးၵႂႃႇတၢင်ႇဢွႆႈၸွမ်း ဢူၺ်းၵေႃႉလၢႆလၢႆၵေႃႉ တၢင်းဝၢၼ်ႈတွင်းၶမ်း ၾၢႆႇၸၢၼ်းဝဵင်းၼွင်ၶဵဝ်၊ မၼ်းၸၢႆးၵႂႃႇယဵပ်ႇၺႃးမၢၵ်ႇမႅင်းၾင်လိၼ်တႅၵ်ႇသႂ်ႇ တိၼ်ၾၢႆႇၶႂႃပုတ်းမၢတ်ႇၸဵပ်း ႁၢဝ်ႈႁႅင်း၊ လႆႈသူင်ႇယူတ်းယႃတူဝ်ဝႆႉ တီႈႁူင်းယႃလူင် ဝဵင်းပၢင်ႇဢူး၊ ယၢပ်ႇၽိုတ်ႇၵႃႈယူတ်းယႃဝႆႉ ဝႃႈၼႆ။
မိူဝ်ႈဝၼ်းတီႈ 9 ပူၼ်ႉမႃးၼၼ်ႉၵေႃႈ ဢူးတႃႇၼီႇ ဢႃယု 55 ပီ ယူႇဝၢၼ်ႈၼွင်လဵတ်း ၽွင်းၵႂႃႇႁႃၽိုၼ်းႁႅင်ႈ ၼႂ်းထိူၼ်ႇ ယၢၼ်ၵႆဝၢၼ်ႈမွၵ်ႈ 3 လၵ်းၼၼ်ႉ ယဵပ်ႇၺႃးမၢၵ်ႇမႅင်းၾင်လိၼ်သေ လႆႈတႅပ်းပႅတ်ႈတိၼ်ၾၢႆႇသၢႆႉ ဝႃႈၼႆ။
တီႈထုင်ႉပွတ်းၸၢၼ်း ဝဵင်းၼွင်ၶဵဝ်ၼၼ်ႉ သိုၵ်းမၢၼ်ႈယိုတ်းမိူင်းတင်း ၸုမ်းႁူမ်ႈႁွမ်းသိုၵ်းတဢၢင်း ယၢမ်ႈပဵၼ်ပၢင်တိုၵ်းၵၼ်မႃးၶၢဝ်းႁိုင်။ ဝၢႆးပၢင်တိုၵ်းယဵၼ် ၵူၼ်းပၢႆႈၽေးသိုၵ်း ပွၵ်ႈမိူဝ်းယူႇႁိူၼ်းၶိုၼ်းသေတႃႉ ၵႆႉမီးလွင်ႈယဵပ်ႇၺႃးမၢၵ်ႇမႅင်းၾင်လိၼ်လႄႈ ႁဵတ်းႁႂ်ႈၵူၼ်းပိုၼ်ႉတီႈ မႆႈၸႂ်လွင်ႈမၢၵ်ႇမႅင်းၾင်လိၼ်ဝႆႉ။
လွင်ႈတုမ်ႉတိူဝ်ႉယွၼ်ႉမၢၵ်ႇမႅင်းၾင်လိၼ်ၶဝ်တႅမ်ႈမၢႆႁၢႆးငၢၼ်းဝႆႉတႄႉ ၼႂ်းပီ 2024 ပူၼ်ႉမႃး ၵူၼ်းမၢတ်ႇၸဵပ်းလႄႈလူႉတၢႆယွၼ်ႉၽေးမၢၵ်ႇမႅင်းၾင်လိၼ်လႄႈ မၢၵ်ႇမိုဝ်ႉၸိုၼ်းယၢမ်းမဵဝ်းၸၢင်ႈတႅၵ်ႇၽူင်ႉ မီး 5757 ၵေႃႉ။ ၼႂ်းၼၼ်ႉပဵၼ်ၵူၼ်းလူင် 84 ပိူဝ်ႊသႅၼ်ႊလႄႈ လုၵ်ႈဢွၼ်ႇ 37 ပိူဝ်ႊသႅၼ်ႊ။ ႁူဝ်ၼပ်ႉဢၼ်ၼႆႉ ၼမ်လိူဝ်ႁူဝ်ၼပ်ႉ လွင်ႈမၢတ်ႇၸဵပ်းလူႉတၢႆမိူဝ်ႈပီ 2023 ၼၼ်ႉ ပဵၼ် 22 ပိူဝ်ႊသႅၼ်ႊ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ