သိုၵ်းဝႃႉ UWSA ပၼ်တူတ်ႈတၢမ်ႇတၢႆ ၵူၼ်းၼုမ်ႇၸၢႆး ၼိုင်ႈၵေႃႉ တီႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ ဝႃႈၼႆ ။

သိုၵ်းဝႃႉ UWSA ပိုၼ်ၽၢဝ်ႇလၢတ်ႈဝႃႈ မိူဝ်ႈဝႃးဝၼ်းတီႈ 26/12/2025 ယၢမ်းၵၢင်ၼႂ် သိုၵ်းဝႃႉ UWSA ပၼ်တူတ်ႈ တၢမ်ႇတၢႆၵူၼ်းၼုမ်ႇၵေႃႉၼိုင်ႈ တီႈဝဵင်းႁူဝ်ပၢင်ႇ လူၺ်ႈတၢင်းၽိတ်း ၶႃႈႁႅမ်ၵူၼ်းတၢႆ ၼႆယဝ်ႉ ။

ၵူၼ်းဢၼ်ထုၵ်ႇၶႃႈႁႅမ်တၢႆၼၼ်ႉ ၸိုဝ်ႈၸၢႆးဢွင်ႇလႅင်းဢူး ဢႃယု 24 ပီ ပဵၼ်ၵူၼ်းမိူင်းဝဵင်းၼွင်ၶဵဝ် ဢၼ်မႃး ႁဵတ်းၵၢၼ်ယူႇတီႈ ဝဵင်းႁူဝ်ပၢင်ႇၼႆႉ ဝႃႈၼႆ ။

သိုၵ်းဝႃႉပိုၼ်ၽၢဝ်ႇဝႆႉဝႃႈ ၸၢႆးဢွင်ႇလႅင်းဢူး ၶႃႈႁႅမ် မွင်ႇၵျေႃႇလူၼ်ႇ(ၶ) ၵူဝ်ႇလႃႉ ယူႇဝၢၼ်ႈပၢင်ၵႂၢႆး ၼႂ်းၸႄႈဝဵင်းမိူင်းမႂ်ႇ ဢၼ်ၶဝ်ႁဵတ်းၵၢၼ်ၸွမ်းၵၼ် တီႈလဵဝ်ၵၼ်ဝႃႈၼႆဝႆႉ။

ဝၢႆးမၼ်းၸၢႆးၶႃႈႁႅမ်ဢူၺ်းၵေႃႉမၼ်းယဝ်ႉ မၼ်းၸၢႆးဢဝ်ၾူၼ်ႊ မိုဝ်းထိုဝ်လႄႈငိုၼ်း ဢူၺ်းၵေႃႉမၼ်း 150 ယႂၼ်ႊ သေ ၵႂႃႇပၢင်တေႃႇလွင်း ၼႆမၼ်းၸၢႆးလၢတ်ႈတီႈပလိၵ်ႈဝႃႉ ၽွင်းၺႃးတီႉၺွပ်းၼၼ်ႉၼင်ႇၼႆ။

တီႈပၢင်ပၼ်တူတ်ႈတၢမ်ႇတၢႆၸူး ၸၢႆးဢွင်ႇလႅင်းဢူး တီႈပၢင်ၾိင်ႈငႄႈ(ယဉ်ကျေးမှုကွင်း) ဝဵင်းႁူဝ်ပၢင်ႇ ၼၼ်ႉ – သိုၵ်းဝႃႉ ၶၢၼ်းၵူၼ်းဝၢၼ်ႈလႄႈ ၽူႈႁၢပ်ႇၵၢၼ်ၵူႈႁွင်ႈၵၢၼ်မႃးပႂ်ႉတူၺ်းတင်းၼမ်ဝႃႈၼႆ။

ၼႃႈလိၼ်ၶိုၵ်ႉတွၼ်းမၢႆ 2 ဢၼ်သိုၵ်းဝႃႉ UWSA ၵုမ်းၵမ်လႄႈ ၼႃႈလိၼ်ၶိုၵ်ႉတွၼ်း မၢႆ 4 တပ်ႉသိုၵ်းမိူင်းလႃး MNDAA ၵုမ်းၵမ်ဝႆႉၼႆႉ ပေႃးမီးၵူၼ်းမီးတၢင်းၽိတ်းၼၵ်းၼႃႁၢဝ်ႈႁႅင်းၼႆ ၵႆႉပူင်တူတ်ႈတၢမ်ႇ၊ ပၼ်တၢင်းၽိတ်း တေႃႇၼႃႈတေႃႇတႃ ၵူၼ်းမိူင်း ၸိူင်ႉၼႆမႃးတႃႇသေႇ။ တူတ်ႈတၢမ်ႇယႂ်ႇထိုင်ယိုဝ်းတၢႆၵေႃႈ ႁဵတ်းၼေတေႃႇၼႃႈ တေႃႇတႃၵူၼ်းမိူင်း ။