သိုၵ်းမၢၼ်ႈတီႉၺွပ်းၵႂႃႇ ၵူၼ်းဝၢၼ်ႈၵုင်းသိမ်ႇ(သိမ်ကုန်း) ၼႂ်းၸႄႈဝဵင်းယႂႃႇငၢၼ်ႇ 3 ၵေႃႉ ယင်းပႆႇပွႆႇပၼ်ၶိုၼ်း တီႉၵႂႃႇထႅင်ႈၵူၼ်းၸၢႆး 2 ၵေႃႉလႄႈ ႁဵတ်းႁႂ်ႈၵူၼ်းဝၢၼ်ႈမႆႈၸႂ် လွင်ႈႁူမ်ႇလူမ်ႈဝႆႉ ဝႃႈၼႆ ။

ၵၢင်လိူၼ် မၢတ်ႉၶျ် ၼႆႉၵူၺ်း သိုၵ်းမၢၼ်ႈ တီႉၵူၼ်းဝၢၼ်ႈၵုင်းသိမ်ႇ (သိမ်ကုန်း) 3 ၵေႃႉ ၼၢင်းယိင်း 2 ၵေႃႉလႄႈ ၵူၼ်းၸၢႆး ၵေႃႉၼိုင်ႈ၊ ထိုင်မႃး   ဝၼ်းတီႈ 22/3/2026  သိုၵ်းမၢၼ်ႈၶဝ်ႈ  တီႉၺွပ်း ၵူၼ်းၸၢႆးယူႇဝၢၼ်ႈၵုင်းသိမ်ႇၵႂႃႇထႅင်ႈ   2 ၵေႃႉ တင်းမူတ်းပဵၼ်ၵႂႃႇ 5 ၵေႃႉ ထိုင်ဝၼ်းမိူဝ်ႈၼႆႉ ပႆႇပွႆႇပၼ်ၶိုၼ်း – ၵူၼ်းတၢင်းႁိူၼ်း ပႆႇလႆႈတၢင်းၵပ်းသိုပ်ႇသင် ဝႃႈၼႆ ။  

ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၶဝ်ဢဝ်ဢဵၼ်ႁႅင်းသေ မႃးၶဝ်ႈတီႉၵႂႃႇ တီႈႁိူၼ်း ပူၼ်ႉမႃး 2 ဝူင်ႈၼႆႉ ၶဝ်တီႉၵႂႃႇ ၵူၼ်း 3 ၵေႃႉတင်း ပႆႇလႆႈတင်းၵပ်းသိုပ်ႇသင် ၊ ၵမ်းၼႆႉ မႃးတီႉ ၵႂႃႇထႅင်ႈၵူၼ်းၸၢႆးသွင်ၵေႃႉ ၊ ပဵၼ်ယွၼ်ႉသင်တႄႉ ဢမ်ႇႁူႉ ၊ ၵူၼ်းဢၼ်ထုၵ်ႇတီႉ ၵႂႃႇၼၼ်ႉ ပဵၼ်ၵူၼ်းၵမ်ႉထႅမ်ၶဝ်ၵူၺ်းၼင်ႇၵဝ်ႇ တေတီႉၵႂႃႇၾိုၵ်းၵၢၼ်သိုၵ်းၵေႃႈဢမ်ႇၸႂ်ႈ ပဵၼ်ၵူၼ်းသႅၼ်းဢႃယုယႂ်ႇယဝ်ႉ”- ဝႃႈၼႆ ။

ၵူၼ်းၸၢႆးသွင်ၵေႃႉဢၼ်ထုၵ်ႇသိုၵ်းမၢၼ်ႈတီႉၺွပ်းၵႂႃႇၼၼ်ႉ ၸိုဝ်ႈႁွင်ႉ လုင်းမဵဝ်းဝုၼ်း ဢႃယု 40 ပၢႆ လႄႈ  လုင်းၵျေႃႇထူး ဢႃယု 40 ပၢႆ ဝႃႈၼႆ ။

ယၢမ်းလဵဝ် တီႈၼႂ်းဝၢၼ်ႈၵုင်းသိမ်ႇ သိုၵ်းမၢၼ်ႈ ဢမ်ႇပၵ်းတပ်ႉဝႆႉယဝ်ႉ ဝႃႈၼႆသေတႃႉ ယွၼ်ႉ ဢမ်ႇမီးႁူႉလွင်ႈတၢင်းသင်သေ သိုၵ်းမၢၼ်ႈၶဝ်ႈတီႉၺွပ်းၵႂႃႇၸိူင်ႉၼၼ်လႄႈ ႁဵတ်းႁႂ်ႈ ၵူၼ်း ပိုၼ်ႉတီႈ ဢမ်ႇႁတ်းၵႂႃႇသူၼ်ႁႆႈ ထၢင်ႇႁၢင်ႈ မႆႈၸႂ်လွင်ႈႁူမ်ႇလူမ်ႈဝႆႉ ၼႆယဝ်ႉ ။

ၼၢင်းယိင်းပိုၼ်ႉတီႈသိုပ်ႇလၢတ်ႈထႅင်ႈဝႃႈ -“ သင်ဝႃႈႁူႉလွင်ႈတၢင်းမၼ်းယွၼ်ႉသင်ၼႆတႄႉ တေ ၸၢင်ႈ ၾၢင်ႉယူႇၾၢင်ႉၵိၼ်လႆႈ ၼႆႉသမ်ႉဢမ်ႇႁူႉလွင်ႈတၢင်းသင် ယူႇယူႇမႃးတီႉၵႂႃႇၸိူင်ႉၼႆ ၵူၼ်း မိူင်းၵေႃႈ ယူႇဢမ်ႇမီးလွင်ႈႁူမ်ႇလူမ်ႈသင်ၶႃႈ” – ဝႃႈၼႆ ။

မိူၼ်ၼင်ႇၼႆ ၼႂ်းလိူၼ်မတ်ႉၶျ် ဝၼ်းတီႈ 8 ၵူၼ်းဝၢၼ်ႈၵျွၵ်ႉငႅၵ်ႉ(ကျောက်ငှက်) 5 ၵေႃႉ ၽွင်းၵႂႃႇလႄႇႁိူၼ်းပီႈၼွင်ႉ ၺႃးသိုၵ်းမၢၼ်ႈတီႉၺွပ်းၵႂႃႇ ၼိူဝ်သဵၼ်ႈတၢင်း ဝၢၼ်ႈဢူၵ်ႉတုၼ်း (အုတ်တွင်း) လႄႈ ဝၢၼ်ႈၵျွၵ်ႉငႅၵ်ႉ(ကျောက်ငှက်) ၵူၼ်းႁိူၼ်းလႆႈပၼ်ငိုၼ်း 50သႅၼ်ပျႃး ၵႂႃႇထုတ်ႇတူဝ်ၶိုၼ်းၼႆယဝ်ႉ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။