ဢိင်ၼိူဝ်ၶၼ်ၼမ်ႉမၼ်းၸိူဝ်ႉၾႆးၵႃႈၶၼ်သုင် ႁႃသိုဝ်ႉယၢပ်ႇမႃးသေ သၢႆၵၢၼ်မိၼ်လၢႆလၢႆဢၼ်ၼႂ်းမိူင်းမၢၼ်ႈ လႆႈၵိုတ်းလိုဝ်ႈဝႆႉ- ႁၢၼ်ႉၶၢႆဝႂ်ၶိူင်ႈမိၼ်မၢင်ႁၢၼ်ႉၼႆႉ တႄႇပၼ်ၶိုၼ်းငိုၼ်းၵႃႈဝႂ်ၶိူင်ႈမိၼ်ဢၼ်ပိူၼ်ႈမႃးသိုဝ်ႉဝႆႉၸိူဝ်းၼၼ်ႉယူႇယဝ်ႉဝႃႈၼႆ။

သိုဝ်ႇၶၢဝ်ႇမၢၼ်ႈဢီႊရႃႊဝတီႊ တႅမ်ႈတၢင်ႇဝႆႉဝႃႈ – ၵူၼ်းၶၢႆဝႂ်ၶိူင်ႈမိၼ် မိူင်းမၢၼ်ႈလၢတ်ႈဝႃႈ- သၢႆၵၢၼ်မိၼ်တၢင်ႇဢၼ်လၢတ်ႈဝႃႈ တေလူတ်းၼမ်ႉၼၵ်းၶူဝ်း ၵူၼ်းၶီႇၶိူင်ႈမိၼ်ၼႆၵူၺ်း။ သၢႆၵၢၼ်မိၼ် MAI တႄႉပိုၼ်ၽၢဝ်ႇဝႃႈ ၵိုတ်းလိုဝ်ႈဝႆႉသၢႆမိၼ်ပွတ်းၼႂ်ၽွင်ႈယဝ်ႉ” -ဝႃႈၼႆ။

ၼွၵ်ႈလိူဝ်ၼၼ်ႉ ၵူၼ်းၶၢႆဝႂ်ၶိူင်ႈမိၼ်ယင်းလၢတ်ႈဝႃႈ – တၢင်းႁၢၼ်ႉၶၢႆဝႂ်ၶိူင်ႈမိၼ် လႆႈသိုပ်ႇၾူၼ်ႊလၢတ်ႈၵူၼ်းၶီႇၶိူင်ႈမိၼ်ဝႃႈ- သၢႆၵၢၼ်မိၼ်တၢင်ႇဢၼ်ၵိုတ်းလိုဝ်ႈၶၢဝ်းတၢင်းဝႆႉၽွင်ႈယဝ်ႉလႄႈ ႁႂ်ႈဢွၼ်ၵၼ်ထတ်းၶျႅၵ်ႉတူၺ်းဝႂ်ၶိူင်ႈမိၼ်ဢၼ်ၸဝ်ႈၵဝ်ႇသိုဝ်ႉဝႆႉသေ ထွမ်ႇၶၢဝ်ႇတူၺ်းလီလီ- ဝႃႈၼႆ။

သၢႆၵၢၼ်မိၼ်ၸိူဝ်ႉၸၢတ်ႈမၢၼ်ႈ MNA – MAI ၼွၵ်ႈမိူင်းၼႂ်းမိူင်း တႄႉပိုၼ်ၽၢဝ်ႇဝႃႈ – ၶၢဝ်းတၢင်းၼွၵ်ႈမိူင်းၼႂ်းမိူင်း ၵူႈဢၼ်- ၵူၼ်းၼိုင်ႈၵေႃႉၼႆႉတေပၼ်ပႃးၶူဝ်းဢၼ်မီးၼမ်ႉၼၵ်း 10 ၵီႊလူဝ်ႊၵရမ်ႊၵူၺ်းယဝ်ႉ ဝႃႈၼႆ။

ဢိင်ၼိူဝ်ပၼ်ႁႃပၢင်တိုၵ်းဢမေႊရိၵၼ်ႊ – ဢီႊရၼ်ႊ ၼႂ်းဝၼ်းဢွၵ်ႇၵၢင်ၼႆႉသေ ၼမ်ႉမၼ်းၸိူဝ်ႉၾႆး ၼမ်ႉမၼ်းၸၢၵ်ႈ ၵႃႈၶၼ်ပုင်ႈၶိုၼ်ႈသုင်။ မိူင်းမၢၼ်ႈဢၼ်ၶၢႆၼမ်ႉမၼ်းလိပ်းပၼ်ဝၢၼ်ႈတႂ်ႈမိူင်းၼိူဝ်ၼၼ်ႉ ၼမ်ႉမၼ်းၸၢၵ်ႈ ၻီႊၸႄႊလ် ၶၼ်ပုင်ႈၶိုၼ်ႈသုင်ၸဵမ်မိူဝ်ႈဝူင်ႈပူၼ်ႉမႃး ၼိုင်ႈလိတ်ႉ(လီႊတႃႊ)လုၵ်ႉတီႈ 3000 ပျႃးသုင်ၶိုၼ်ႈမႃးထိုင် 6000 ပျႃး။ မၢင်တီႈ ထိုင် 8000 ပျႃး။

မိူင်းထႆးဢၼ်သိုဝ်ႉၼမ်ႉမၼ်းလိပ်းမိူင်းတီႈမိူင်းမၢၼ်ႈသေမႃးႁုင်ဢဝ်ႁင်းၵူၺ်းၼၼ်ႉတႄႉ လူင်ပွင်ၸိုင်ႈထႆးပိုၼ်ၽၢဝ်ႇဝႃႈ တွၼ်ႈတႃႇၵူၼ်းမိူင်းထႆးပေႃးၸႂ်ႉယူႇတႃႇ 2 လိူၼ်ဝႃႈၼႆသေတႃႉ ၼႂ်းဝၼ်းတီႈ 21/03/2026 ဝၼ်းမိူဝ်ႈၼႆႉ ႁၢၼ်ႉၶၢႆၼမ်ႉမၼ်းလၢႆလၢႆတီႈ ၼႂ်းဝဵင်းယႂ်ႇဝဵင်းလူင်ၼႂ်းမိူင်းထႆး ၼမ်ႉမၼ်းၻီႊၸႄႊလ် တႄႇမူတ်းယူႇယဝ်ႉ။