တူဝ်တႅၼ်းလူင်ပွင်ၸိုင်ႈမိူင်းၶႄႇ တင်း လူင်ပွင်ၸိုင်ႈမိူင်းမၢၼ်ႈ (သိုၵ်းမၢၼ်ႈ) ႁၢင်ႈႁႅၼ်းၶိုင်ပွင် တႃႇတေႃႉဢဝ် ၼမ်ႉမၼ်းၸိူဝ်ႉၾႆး လုၵ်ႉမိူင်းၶႄႇ သူင်ႇၶဝ်ႈ မိူင်းမၢၼ်ႈ တႃႇၵူၼ်း မိူင်းလႆႈၸႂ်ႉ ဝႃႈၼႆ။

ဢူးၵူဝ်ႇၵူဝ်ႇလုၼ်ႇ ၽွင်းလူင်ႁႅင်းထၢတ်ႈ တူဝ်တႅၼ်းၸုမ်းလူင်ပွင်ၸိုင်ႈ (သိုၵ်းမၢၼ်ႈ) ၼေႇပျီႇတေႃႇ ၵေႃႉလုၵ်ႉတၢင်းမိူင်းၶႄႇ ၵႂႃႇမိူင်းရတ်ႉသျႃႊ ၼႂ်းၶၢဝ်းတၢင်း လိူၼ်ဢေႊပရႄႊလ် ဝၼ်းတီႈ 12 ထိုင် 18 လၢတ်ႈဝႆႉၼႂ်း လိၵ်ႈၽိုၼ်ၶၢဝ်ႇ တႂ်ႈလူင်ပွင်ၸိုင်ႈသိုၵ်းလႅၵ်ႈၶူဝ်းၵူၼ်းႁိူၼ်း မိၼ်းဢွင်ႇလၢႆႇ ဢၼ်ႁဵတ်းဢွၵ်ႇၵူႈဝၼ်းၼၼ်ႉဝႃႈ “ပိူဝ်ႈတႃႇတေသိုဝ်ႉၸႂ်ႉ တိုဝ်းၼမ်ႉမၼ်းၸိူဝ်ႉၾႆးလႆႈၵႃႈၶၼ်ထုၵ်ႇလႄႈ ႁႂ်ႈပေႃးသိုဝ်ႉၶၢႆၵၼ်ၵႂႃႇလႆႈၶၢဝ်းႁိုင်ၼၼ်ႉ လႆႈႁူပ်ႉဢုပ်ႇၵၼ်တင်း ၶွမ်ႊပၼီႊ Yunnan Xianshang Export and Import ဝႆႉ” ၼႆယဝ်ႉ။

ၵဵဝ်ႇလူၺ်ႈလွင်ႈလူင်ပွင်ၸိုင်ႈမိူင်းၶႄႇ တေႁႂ်ႈၶွမ်ႊပၼီႊမၼ်ႉမၼ်းၸၢၵ်ႈ ၼႂ်းမိူင်းၶဝ် သူင်ႇၼမ်ႉမၼ်းၶဝ်ႈမႃး တႃႇၼႂ်းမိူင်းမၢၼ်ႈ (မိူင်းႁူမ်ႈတုမ်) ၼၼ်ႉတႄႉ ဢမ်ႇပႆႇႁၼ်ပိုၼ် ၽၢဝ်ႇဝႆႉ ၶေႃႈမုၼ်းႁူဝ်ယွႆႈတႅတ်ႈတေႃးသင်။

ၽွင်းလူင်ႁွင်ႈၵၢၼ်ၾၢႆႇႁႅင်းထၢတ်ႈ ဢူးၵူဝ်ႇၵူဝ်ႇလုၼ်ႇၼႆႉ ႁူပ်ႉထူပ်းဢုပ်ႇဢူဝ်းၸွမ်း ၶွမ်ႊပၼီႊ ၼမ်ႉမၼ်းၸၢၵ်ႈ ၼႂ်းမိူင်းၶႄႇလူင် ဝဵင်းယူႊၼၢၼ်ႊ ၵူၺ်းဢမ်ႇၵႃး ယင်းႁူပ်ႉပႃး ၸုမ်းႁႅင်းထၢတ်ႈယူႊၼၢၼ်ႊ Yunnan Energy Group ၊ Union Resources & Engineering ၸဵမ်ၸိူဝ်းၼႆႉထႅင်ႈသေ ဢုပ်ႇဢူဝ်းမႃးလွင်ႈတႃႇၵေႃႇသၢင်ႈ ႁူင်းၸၢၵ်ႈသၢင်ႈ ႁႅင်း ထၢတ်ႈၸွမ်းထၢတ်ႈလူမ်း လႄႈ ႁႅင်းလႅတ်ႇ ၸဵမ်ၸိူဝ်းၼႆႉ ဝႃႈၼႆ။

Yunnan Energy Group ၼႆႉ ပဵၼ်ၸုမ်းဢၼ်ၶဝ်ႈမႃးၼႂ်းမိူင်းမၢၼ်ႈ (မိူင်းႁူမ်ႈတုမ်) သေ ႁဵတ်းၵၢၼ်ငၢၼ်း ၵဵဝ်ႇလူၺ်ႈ ၸႂ်ႉတိုဝ်းႁႅင်းၼမ်ႉ၊ ႁႅင်းသူဝ်ႇလႃႇ၊ ႁႅင်းလူမ်း လႄႈ ႁဵတ်းၶူင်း ၵၢၼ်ႁူင်းၸၢၵ်ႈလူင် ႁႅင်းထၢတ်ႈ LNG ဝႆႉ။

ယၢမ်းလဵဝ် မိူင်းမၢၼ်ႈ (မိူင်းႁူမ်ႈတုမ်) ၼႆႉ သိုဝ်ႉ လႄႈ တေႃႉဢဝ်ၼမ်ႉမၼ်းၸၢၵ်ႈ တၢင်းမိူင်းသိင်ႇၵပူဝ်ႊ မလေးသျီႊယိူဝ်ႊ မိူင်းထႆး ၸိူဝ်းၼႆႉသေ ၼိုင်ႈပီႊလႂ် လႆႈၼမ်းဢဝ် ၼမ်ႉမၼ်းၸၢၵ်ႈ ၶဝ်ႈမိူဝ်းၸႂ်ႉတိုဝ်းၼႂ်းမိူင်း 5 လၢၼ်ႉတၼ်ႊ။

ဝၢႆးလင် သိုၵ်းမၢၼ်ႈ ၸွမ်ၸိၵ်းသိုၵ်း မိၼ်းဢွင်ႇလၢႆႇ ယိုတ်းဢဝ်ဢႃႇၼႃႇၸိုင်ႈမိူင်းယဝ်ႉ ၼႂ်းၶၢဝ်းတၢင်း 5 ပီ ၽွင်းၵမ်ႉၵိၼ်းလွင်ႈၼမ်ႉမၼ်းမဵၼ် (ရေနံ) ယူႇၼႆႉ လူင်ပွင်ၸိုင်ႈသိုၵ်းယင်းသင်ႇသိုဝ်ႉဢဝ် ၼမ်ႉမၼ်းၸၢၵ်ႈ တၢင်းမိူင်းရတ်ႉသျႃးၼမ်းၶဝ်ႈမႃးထႅင်ႈလူးၵွၼ်ႇ။

လိူဝ်ၼၼ်ႉ သိုၵ်းမၢၼ်ႈယိုတ်းမိူင်းၼႆႉ ယင်းၸမ်ၸႂ်ၵၼ်တင်း မိူင်းၶႄႇ မိူင်းရတ်ႉသျႃးမႃးလိူဝ်ၵဝ်ႇတေႉတေႉ ဝႃႈဝႃႈ။ ၽွင်းမိၼ်းဢွင်ႇလၢႆႇ ၶိုင်ပွင်ၸတ်းပၢင်လိူၵ်ႈတင်ႈပွမ် ႁႂ်ႈပေႃးလႆႈသေ လႅၵ်ႈလၢႆႈႁဵတ်းပဵၼ် လူင်ပွင်ၸိုင်ႈသိုၵ်းၼၼ်ႉၵေႃႈ လူင်ပွင်ၸိုင်ႈ တင်းသွင်မိူင်းၼႆႉ ယိုင်ႈၶႅၼ်းၶဝ်ႈႁႃမႃးလႄႈ ၵမ်ႉထႅမ်ပၼ်ထႅင်ႈလိူဝ်ၵဝ်ႇတေႉတေႉ။

လင်မိၼ်းဢွင်ႇလၢႆႇ လႆႈၸၼ်ႉၸွမ်ၸိုင်ႈ ၶိုၼ်ႈပဵၼ်တၢင်းၵၢၼ်လၢႆဝၼ်းၵူၺ်း လူင်ပွင်ၸိုင်ႈမိူင်းၶႄႇ မႃးႁူပ်ႉတင်း လူင်ပွင်ၸိုင်ႈသိုၵ်းမၢၼ်ႈ တီႈဝဵင်းလူင်ၼေႇပျီႇတေႃႇသေ လူင်းလၢႆးမိုဝ်း ႁဵတ်းလိၵ်ႈၵိၼ်ၵႅၼ်ႇၵၼ် တႃႇၶုတ်းဢွၵ်ႇၼမ်ႉမၼ်းမဵၼ် တီႈၸႄႈဝဵင်းပွၵ်ႉ တိူင်းမၵူၺ်းၼၼ်ႉ ဢွၵ်ႇၼမ်လိူဝ်ၵဝ်ႇထႅင်ႈ ၼႆယဝ်ႉ။