1. ႁဵတ်းၵၢၼ်ၵႃႉသႅင် ဢမ်ႇပေႉၼမ်ႉသႅင်
2. ႁဵတ်းၵၢၼ်ၵႃႉၶမ်း ဢမ်ႇပေႉၼမ်ႉၶမ်း
3. ႁဵတ်းၵၢၼ်ၵႃႉငိုၼ်း ဢမ်ႇပေႉၼမ်ႉငိုၼ်း
4. ႁဵတ်းၵၢၼ်သႃႇသၼႃႇ ဢမ်ႇပေႉၼမ်ႉၵၢၼ်သႃႇသၼႃႇ ( ဢမ်ႇလႆႈႁဵၼ်းဢဝ် ႁူႉပွင်ႇ ပိတၵၢတ်ႈ 3 ၵွင် )
5. ႁဵတ်းၵၢၼ်မိူင်း ဢမ်ႇပေႉၼမ်ႉၵၢၼ်မိူင်း
6. ႁဵတ်းၵၢၼ်သိုၵ်း ဢမ်ႇပေႉၼမ်ႉၵၢၼ်သိုၵ်း
7. ႁဵတ်းၵၢၼ်ၽုၵ်ႇသွမ်ႈ ဢမ်ႇပေႉၼမ်ႉၵၢၼ်ၽုၵ်ႇသွမ်ႈ
8. ႁဵတ်းၵၢၼ်လဵင်ႉလူ ဢမ်ႇပေႉၼမ်ႉၵၢၼ်လဵင်ႉလူ
9. ႁဵတ်းၵၢၼ်ယူႇလီ ဢမ်ႇပေႉၼမ်ႉၵၢၼ်ယူႇလီ
10. ႁဵတ်းၵၢၼ်ၶူးသွၼ်ဢမ်ႇပေႉၼမ်ႉၵၢၼ်ၶူးသွၼ်
11. ႁဵတ်းၵၢၼ်ၵႃႉၶၢႆ ဢမ်ႇပေႉၼမ်ႉၵၢၼ်ၵႃႉၶၢႆ
12. ႁဵတ်းၵၢၼ်ၸၢၵ်ႈ ဢမ်ႇပေႉၼမ်ႉၸၢၵ်ႈ
13. ႁဵတ်းၵၢၼ်လိၵ်ႈလၢႆး ဢမ်ႇပေႉၼမ်ႉလိၵ်ႈလၢႆး

ဢဝ်ၸဵမ်ၸိူဝ်းၼႆႉ ႁူဝ်ႁုပ်ႈတီႈၵႅပ်ႈမၼ်း ပဵၼ်ၵၢၼ်သႃႇသၼႃႇလႄႈ ၵၢၼ်မိူင်း2 ပိူင်ၵူၺ်း ၵၢၼ်သႃႇသၼႃႇၼႆႉ မၼ်းႁဵတ်းသၢင်ႈႁႂ်ႈလႆႈ ႁပ်ႉတုင်းၵိၼ်ၽွၼ်းလီ ၼႂ်းၸၢတ်ႈပၢၼ်ၶၢဝ်းၼႃႈၼၼ်ႉယဝ်ႉ ။ ၵၢၼ်မိူင်းသမ်ႉမၼ်းႁဵတ်းသၢင်ႈ ႁႂ်ႈလႆႈႁပ်ႉတုင်းၵိၼ်ၽွၼ်းလီမၼ်း ၼႂ်းၸၢတ်ႈပၢၼ် ယၢမ်းလဵဝ်ယဝ်ႉ ။ ၵၢၼ်2 ပိူင်ၼႆႉ တႃႇတေလႆႈႁပ်ႉတုင်းၵိၼ်ၽွၼ်းလီမၼ်းၼၼ်ႉတေလႆႈမီးဝႆႉတင်းႁူႉ –

1 . တၢင်းႁူႉၸိုဝ်ႈၸႂ်ႈထုၵ်ႇမႅၼ်ႈ ဢၼ်ၸဝ်ႈပုတ်ႉထဝႃႈ သၸ်တႃႇၺၢၼ်ႇၼၼ်ႉယဝ်ႉ ။ ပေႃးမီးတၢင်းႁူႉဢၼ်ထုၵ်ႇမႅၼ်ႈၸိုဝ်ႈတႂ်ႈယဝ်ႉ –

2 . တေလႆႈႁဵတ်းသၢင်ႈၶိုင်ပွင်ႁူပ်ႉၺႃးၵၢၼ်ထုၵ်ႇမႅၼ်ႈၸိုဝ်ႈၸႂ်ႈ ဢၼ်ၸဝ်ႈပုတ်ႉထဝႃႈ ၵိၸ်တၺၢၼ်ႇၼၼ်ႉယဝ်ႉ ။ ပေႃးႁဵတ်းၺႃးၵၢၼ် ဢၼ်ထုၵ်ႇမႅၼ်ႈၸိုဝ်ႈၸႂ်ႈယဝ်ႉ

3 .  တေလႆႈႁပ်ႉတုင်းၵိၼ်ၽွၼ်းလီ ဢၼ်ထုၵ်ႇမႅၼ်ႈၸိုဝ်ႈၸႂ်ႈ ဢၼ်ၸဝ်ႈပုတ်ႉထဝႃႈ ၵတ်ႉတၺၢၼ်ႇၼၼ်ႉယဝ်ႉ ။ ၼႂ်းတၢင်းႁူႉ သၢမ်ပိူင်ၼႆႉ ၸဝ်ႈပုတ်ႉထ ႁဝ်းလႆႈႁပ်ႉႁွင်းဢဝ် တၢင်းတိုဝ်းၵမ်ယၢပ်ႇၽိုတ်ႇသေ တိုဝ်းၵမ်ႁဵတ်းဢဝ်ႁူၵ်းပီႊတဵမ်တဵမ်ၸင်ႇလႆႈယဝ်ႉ ၊ ဢွၼ်တၢင်းႁူၵ်းပီႊ ၼၼ်ႉ လႆႈဢဝ်ၶူဝ်းၶွင်သူပ်းတူဝ်ႁူဝ်ၸႂ်သေလႄႈ ႁဵတ်းမႃး ထႅမ်မႃး သီႇသင်ႇၶေႇပၢႆသႅၼ်ၵမ်ႇၽႃႇၵွၼ်ႇယဝ်ႉ ။ ၼႂ်းၵၢၼ်သႃႇသၼႃႇလႄႈ ၵၢၼ်မိူင်းၼႆႉ မၼ်းလႆႈဢိင်ပိုင်ႈလိၵ်ႈလၢႆး ။ ၵၢၼ်သႃႇသၼႃႇ ပိတၵၢတ်ႈဢၼ်ဝႃႈၼၼ်ႉၸမ်ႉ သုတ်ႉတမ် ၊ ဝိၼႆး ၊ ဢၽိထမ်း ပေႉၼမ်ႉတြႃး သၢမ်ပိူင်ၼႆႉၵွၼ်ႇယဝ်ႉ ။ ၵၢၼ်မိူင်းၼႆႉ ဢိင်ပိုင်ႈလိၵ်ႈလၢႆး ၊ လေႃးၵီႇ ထမ်းတြႃးၼၼ်ႉသမ်ႉပဵၼ်လိၵ်ႈလၢႆးၵၢၼ်ပၢႆးဝူၼ်ႉလိုၵ်ႉလမ်ႇၶိုၵ်ႉၶမ်ႇလူးၵွၼ်ႇယဝ်ႉ ။

ၵူၼ်းဢၼ်ႁဵတ်းၵၢၼ်သွင်ပိူင်-

1 .  ၵေႃႉ ၼိုင်ႈ  ၼႆႉပႃးၸႂ်ၸေႇတၼႃႇ ဢဝ်တင်းသူပ်းတူဝ်ႁူဝ်ၸႂ် ႁမ်ႉႁွင်း တၢင်းယၢပ်ႇသေ လုၵ်ႉႁဵတ်းၼႄ

2 .  ၵေႃႉ ၼိုင်ႈ ၼႆႉ တူဝ်ၸႂ်ဢမ်ႇပႃး ဢဝ်သူပ်းသေဢုပ်ႇႁေႃးယူႇလူမ်းတေႃႇပိူၼ်ႈသေႁဵတ်းယဝ်ႉ

3 .  ၵေႃႉ ၼိုင်ႈ သမ်ႉ တင်းဢုပ်ႇႁေႃး ၊ တၢင်းတူဝ်ၸႂ်ၵေႃႈ လုၵ်ႉႁဵတ်းၼႄ မီးသၢမ်ၵေႃႉၼႆႉယဝ်ႉ  ဢၼ်ၶိုၵ်ႉသေ ပိူၼ်ႈၼႆႉ ႁဵတ်းၵေႃႈႁဵတ်း ႁေႃႈၵေႃႈႁေႃးၼႆယဝ်ႉ ။

ၵၢၼ်လၢတ်ႈမႃးၼႆႉ ပေႃးပေႉၼမ်ႉမၼ်း ( ဢမ်ႇၼၼ် ) ႁူႉၼမ်ႉမၼ်း ၊ ထုၵ်ႇမႅၼ်ႈၸိုဝ်ႈၸႂ်ႈလီလီသေႁဵတ်းၼၼ်ႉ ၸဝ်ႈပုတ်ႉထဝႃႈ သၸ်ႉတၺၢၼ်ႇ ၵိၸ်ႉတၺၢၼ်ႇ ။ တႆးဝႃႈ ႁူႉၸိုဝ်ႈၸႂ်ႈၵေႃႈ လႆႈႁဵတ်းႁႃး ဢၼ်ၸိုဝ်ႈၸႂ်ႈ ပေႃးႁဵတ်းၺႃး ၵၢၼ်ၸိုဝ်ႈၸႂ်ႈယဝ်ႉၵေႃႈ တၵ်းလႆႈႁပ်ႉတုင်းဢဝ်ၼမ်ႉတွၼ်းၽွၼ်းလီဢၼ်ထုၵ်ႇမႅၼ်ႈၸိုဝ်ႈၸႂ်ႈယူႇယဝ်ႉ ။

ၶႂၢၼ်ဝရေႃး

11/3/1994

ပပ်ႉၵွၼ်းၶေႃ

ၼႃႈလိၵ်ႈ 2 မၢႆ 116 ပီတႆး 2088