ငဝ်ႈငုၼ်းသိုၵ်း ပႅၼ်ႊတၵုၼ်ႊ (Pentagon) မိူင်းဢမေႊရိၵၼ်ႊ ယိုၼ်ယၼ်လၢတ်ႈၵႂႃႇ ၼႂ်းဝၼ်းတီႈ 10 လိူၼ်မၢတ်ႉၶျ်ၼႆႉဝႃႈ ၼႂ်းပၢင်တိုၵ်း တီႈမိူင်းဢီႊရၼ်ႊၼၼ်ႉ ၵူၼ်းသိုၵ်း ဢမေႊရိၵၼ်ႊ ၸိူဝ်းမၢတ်ႇၸဵပ်း မီးဝႆႉမွၵ်ႈ 140 ၵေႃႉ ဝႃႈၼႆ။

ပၢင်တိုၵ်းၼႆႉ တႄႇမႃးၼႂ်းဝၼ်းတီႈ 28 လိူၼ်ၾႅပ်ႉပိဝ်ႊရီႊသေ ယၢမ်းလဵဝ် ႁိုင်မႃးၶၢဝ်းတၢင်း 3 ဝူင်ႈ ယဝ်ႉ။

ၽူႈၶၢၼ်ပၢၵ်ႇ တီႈငဝ်ႈငုၼ်းသိုၵ်း ပႅၼ်ႊတၵုၼ်ႊ (Pentagon) မိူင်းဢမေႊရိၵၼ်ႊ လၢတ်ႈဝႃႈ – ႁူဝ်ၼပ်ႉၵူၼ်းသိုၵ်း ၸိူဝ်းမၢတ်ႇၸဵပ်းၼႆႉ ၼပ်ႉဢဝ်ၸဵမ်မိူဝ်ႈတႄႇပဵၼ်ပၢင်တိုၵ်းသေ လႆႈတိုၵ်းတေႃးၵၼ်မႃး ၼႂ်းၶၢဝ်းတၢင်း 10 ဝၼ်း ဝႃႈၼႆ။

ၼႂ်းၵူၼ်းသိုၵ်း ၸိူဝ်းမၢတ်ႇၸဵပ်းၼၼ်ႉ တႃႇ 108 ၵေႃႉ သိုပ်ႇႁၢပ်ႇၼႃႈၵၢၼ် ပုၼ်ႈၽွၼ်းၶိုၼ်း။ ဢၼ်မၢတ်ႇၸဵပ်းႁၢဝ်ႈႁႅင်းဝႆႉ 8 ၵေႃႉတႄႉ တိုၵ်ႉသိုပ်ႇယူတ်းယႃတူဝ်ဝႆႉ ဝႃႈၼႆ။

ယွၼ်ႉဢီႊရၼ်ႊ ဢဝ်မၢၵ်ႇၼူၾႆး၊ ၶိူင်ႈတရူၼ်ႊတင်းၼမ်လၢႆသေ တိုၵ်းတေႃးသႂ်ႇတပ်ႉပၢင်သဝ်းသိုၵ်း ဢမေႊရိၵၼ်ႊ ဢၼ်မီးၼႂ်းမိူင်း ပႃႊရိၼ်း၊ ဢီႊရတ်ႉ၊ UAE၊ သေႃႊတီႊ လႄႈ ၵူႊဝိတ်ႉ ၸိူဝ်းၼႆႉသေ ႁဵတ်းႁႂ်ႈၵူၼ်းသိုၵ်းဢမေႊရိၵၼ်ႊ လႆႈမၢတ်ႇၸဵပ်းၵႂႃႇ။ တီႈမိူင်း ၵူႊဝိတ်ႉၼၼ်ႉ သိုၵ်းဢမေႊရိၵၼ်ႊ လူႉတၢႆ 6 ၵေႃႉ၊ တီႈမိူင်း သေႃႊတီႊဢႃႊရေးပျႃႉ သမ်ႉ လူႉတၢႆ 1 ၵေႃႉ။

တႄႇၸဵမ်မိူဝ်ႈပဵၼ်ပၢင်တိုၵ်းၵၼ်မႃး မၢၵ်ႇၼူၾႆး လႄႈ ၶိူင်ႈတရူၼ်ႊ ဢၼ်ၾၢႆႇမိူင်းဢီႊရၢၼ်ႊၶဝ် ပိုတ်းယိုဝ်းၼၼ်ႉ ယွမ်းလူင်းၵႂႃႇတၢင်းၼမ်။ ၵူၺ်းၵႃႈ ယွၼ်ႉဢမ်ႇၶၢတ်ႈလၢမ်းလႆႈဝႃႈ ပၢင်တိုၵ်းတေယဝ်ႉမိူဝ်ႈလႂ် ၼႆလႄႈ ဢမေႊရိၵၼ်ႊ လႆႈသဵင်ႈငိုၼ်းၵႃႈၸႂ်ႉၸၢႆႇၵၢၼ်သိုၵ်းတင်းၼမ် ထိုင်တီႈတေၸၢင်ႈလႆႈသူင်ႇ တပ်ႉလိၼ် ၶဝ်ႈၵႂႃႇတီႈၼႂ်းမိူင်းဢီႊရၼ်ႊၵွၼ်ႇ ဝႃႈၼႆ။

လိူဝ်ၼၼ်ႉ ၸွမ်းၼင်ႇပၢင်တိုၵ်း ႁၢဝ်ႈႁႅင်းၶိုၼ်ႈမႃးသေ ဢမေႊရိၵၼ်ႊ သူင်ႇႁိူဝ်းမိၼ် တင်းၼမ်လၢႆ ၶဝ်ႈၵႂႃႇၼႂ်းပိုၼ်ႉတီႈ တႃဝၼ်းဢွၵ်ႇၵၢင်ဝႆႉ။

ဝၢႆးလင်ပဵၼ်ပၢင်တိုၵ်းၵၼ် ႁိုင်ၶၢဝ်းတၢင်း 4 ဝၼ်း ၼႂ်းဝၼ်းတီႈ 3 လိူၼ်မၢတ်ႉၶျ်ၼႆႉ တပ်ႉလူမ်း မိူင်းၵူႊဝိတ်ႉ ဢၼ်ပဵၼ်ဢူၺ်းလီၵၼ်တင်း ဢမေႊရိၵၼ်ႊ ယိုဝ်းၽိတ်း ႁိူဝ်းမိၼ်တိုၵ်းဢမေႊရိၵၼ်ႊ သႅၼ်း F-15 တူၵ်း 3 လမ်း။ ၼႂ်းဝၼ်းတီႈ 12 လိူၼ်မၢတ်ႉၶျ်ႉၼႆႉသမ်ႉ ႁိူဝ်းမိၼ်ထႅမ်ၼမ်ႉမၼ်းၼိူဝ်ၵၢင်ႁၢဝ် သႅၼ်း KC-135 ၶွင်ဢမေႊရိၵၼ်ႊ ယၢတ်ႇတူၵ်း ၼႂ်းမိူင်းဢီႊရတ်ႉ ပွတ်းတူၵ်းထႅင်ႈ လမ်းၼိုင်ႈ။

မိူၼ်ၼႆ ၶၢဝ်းတၢင်း ဢမေႊရိၵၼ်ႊ တင်း ဢိတ်ႉသ်ရေႊ ၶဝ်ႈတိုၵ်းမိူင်းဢီႊရၼ်ႊ ႁိုင်သွင်ဝူင်ႈၼႆႉ ၵူၼ်းမိူင်းဢီႊရၼ်ႊ 3 လၢၼ်ႉပၢႆ လႆႈပွႆႇၽႃႈႁိူၼ်းယေးတီႈယူႇဝႆႉၼႆ ၸၢတ်ႈၸိုင်ႈလုမ်ႈၾႃႉၵေႃႈ ႁၢႆးငၢၼ်းဝႆႉၼင်ႇၼႆ။