မိူဝ်ႈၼႆႉဝၼ်းတီႈ 10/3/2026 ၼႂ်းပၢင်ၵုမ်လုမ်းသၽႃးၸိုင်ႈထႆး ဢုပ်ႇဢူဝ်းတူၵ်းလူင်းလႆႈၸႂ်ၵၼ် တႃႇၵႄႈလိတ်ႈပၼ်ႁႃၵႃႈၶၼ်ၼမ်ႉမၼ်းၸၢၵ်ႈပုင်ႈၶိုၼ်ႈသုင်ႁႅင်း လႄႈ လူတ်းယွမ်းၵၢၼ်ၸႂ်ႉတိုဝ်းၼမ်ႉမၼ်းၸၢၵ်ႈၼႆသေ မၵ်းမၼ်ႈၵႂႃႇဝႃႈ ႁႂ်ႈၽူႈႁၢပ်ႇၵၢၼ် ၸိူဝ်းယူႇတႂ်ႈလုမ်းလူင်ပွင် ၸိုင်ႈမိူင်းထႆးတင်းသဵင်ႈ ယူႇႁိူၼ်းႁဵတ်းၵၢၼ်ၵႂႃႇ ၼႆယဝ်ႉ။
ၼွၵ်ႈလိူဝ်ၼၼ်ႉ ႁႂ်ႈၵိုတ်းဝႆႉပႃးၶၢဝ်းတၢင်း ဢၼ်တေလႆႈၵႂႃႇၾိုၵ်း- ၵႂႃႇလဵပ်ႈႁဵၼ်းၵၢၼ်ၼွၵ်ႈမိူင်း တၢင်ႇဝၢၼ်ႈတၢင်ႇမိူင်းဝႆႉၵမ်းၼိုင်ႈ ၼႆယဝ်ႉ။။
ၼၢင်းသၢဝ်လလိတႃ ၽိူတ်ႉဝိဝတ်ႉထၼႃ ၵႅမ်ၽူႈၶၢၼ်ပၢၵ်ႇတီႈလုမ်းတႅၼ်းၽွင်းမိူင်းထႆး လၢတ်ႈတီႈသိုဝ်ႇၶၢဝ်ႇထႆးဝႃႈ – တီႈမိူင်းထႆးၼႆႉ ၼိုင်ႈဝၼ်းၸႂ်ႉၼမ်ႉမၼ်းၸၢၵ်ႈသဵင်ႈယူႇ 124 လၢၼ်ႉလိတ်ႉ(လီႊတႃႊ)။ တေႃႇထိုင်ဝၼ်းတီႈ 5/3/2026 ၼႆႉ ၼမ်ႉမၼ်းမိူင်းထႆး တိုၵ်ႉမီးယူႇ 8955 လၢၼ်ႉလိတ်ႉ- ဝႃႈၼႆ။
တွၼ်ႈတႃႇတေလူတ်းလွင်ႈၸႂ်ႉၼမ်ႉမၼ်းၸၢၵ်ႈၼႆသေ ႁွင်ႈၵၢၼ်ၾၢႆႇႁႅင်းထၢတ်ႈၾႆးၾႃႉတႄႉ ပၼ်တၢင်းၶႆႈၸႂ်ဝႃႈ – တီႈၼႂ်းႁွင်ႈႁဵတ်းၵၢၼ်ၼၼ်ႉ ႁႂ်ႈယွမ်းၸႂ်ႉဢႄႊၵွၼ်ႊ (Aircon) ဝႆႉႁႅင်းၵတ်းမွၵ်ႈ 26-27။ တႅၼ်းတီႈတေၼုင်ႈသိူဝ်ႈၶူဝ်းသုတ်ႇ(Suit) ဢၼ်တေၸၢင်ႈႁဵတ်းႁႂ်ႈ တူဝ်ၶိင်းၸဝ်ႈၵဝ်ႇမႆႈၼၼ်ႉ ႁႂ်ႈလႅၵ်ႈၼုင်ႈပဵၼ်သိူဝ်ႈၶႅၼ်ပွတ်းတႅၼ်း။ ၵွၼ်ႇတေဢွၵ်ႇႁိူၼ်း ႁႂ်ႈဢိုတ်းၾႆး ဢိုတ်းၽတ်ႉလူမ်း။ ၼႂ်းၶွမ်ႊ (Computer) ၼႂ်းမိုဝ်းထိုဝ် (ၾူၼ်း) ႁႂ်ႈၸႂ်ႉ Energy Saver Mode တႃႇလူတ်းယွၼ်ႇၵၢၼ်ၸႂ်ႉတိုဝ်းႁႅင်းထၢတ်ႈ။ သင်တေၶိုၼ်ႈလူင်းၸၼ်ႉ 2 ၸၼ်ႉ 3 ၵူၺ်းတႄႉႁႂ်ႈပႆၶိုၼ်ႈပႆလူင်း တႅၼ်းၵၢၼ်ၶီႇၶိုၼ်ႈလႆလိူၼ်ႈ လိပ်ႉၾ်။ ႁွင်ႈၵၢၼ်ဢၼ်ၸၢင်ႈယူႇႁိူၼ်းႁဵတ်းၵၢၼ်ၵေႃႈ ႁႂ်ႈဢွၼ်ၵၼ်ယူႇႁိူၼ်း ႁဵတ်းၵၢၼ် ၸဵမ်ၸိူဝ်းၼႆႉ ၼႆယဝ်ႉ။
ပၼ်ႁႃၵပ်ႉၵိၼ်းၼမ်ႉမၼ်းၸၢၵ်ႈၼႆႉ တႄႇၼႂ်းႁူဝ်လိူၼ်မၢတ်ႉၶျ် ၽွင်းသိုၵ်းမိူင်းဢမႄႇရိၵၼ်ႇ တင်း မိူင်းဢီႇရၢၼ်ႇ လႄႈ မိူင်းဢိတ်ႇသရေးၶဝ် ယိုဝ်းၵၼ်ႁၢဝ်ႈႁႅင်းသေ ထိုင်တီႈလႆႈဢိုတ်းသဵၼ်ႈတၢင်းၵၢၼ်ၵႃႉၶၢႆၼမ်ႉမၼ်းမဵၼ်လႄႈ ႁဵတ်းႁႂ်ႈၸိုင်ႈမိူင်းၼႂ်းလုမ်ႈၾႃႉလၢႆလၢႆၸိုင်ႈ မိူင်းႁူပ်ႉ တၢင်းယၢပ်ႇလွင်ႈၵၢၼ်သိုဝ်ႉ လႄႈ ၸႂ်ႉတိုဝ်းၼမ်ႉမၼ်းၸၢၵ်ႈ ထိုင်တီႈၾၢႆႇလူင်ပွင်ၸိုင်ႈ ပေႃးလႆႈ ႁဵတ်းလိၵ်ႈပိုၼ်ဢွၵ်ႇပဵၼ်တၢင်းၵၢၼ် ႁႂ်ႈၵူၼ်းမိူင်းၽႂ်မၼ်းယွမ်းၸႂ်ႉၼမ်ႉမၼ်းၸၢၵ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ