ဝၼ်းတီႈ 28/02/2026 ၼႆႉ ဢမေႊရိၵၼ်ႊလႄႈ ဢိတ်ႉသ်ရေႊလ် ႁူမ်ႈၵၼ်ပိုတ်းယိုဝ်းမိူင်းဢီႊရၼ်ႊ။ ႁဵတ်းႁႂ်ႈ ဢီႊရၼ်ႊ ၶိုၼ်းပိုတ်းယိုဝ်းသႂ်ႇပၢင်သဝ်းသိုၵ်းဢမေႊရိၵၼ်ႊ ဢၼ်မီးတီႈ မိူင်းပႃႊရဵၼ်ႊ ဝၼ်းဢွၵ်ႇၵၢင်။

ဢီႊရၼ်ႊ ပိုၼ်ၽၢဝ်ႇဝႃႈ မၢၵ်ႇတူၵ်းတိူဝ်ႉသႂ်ႇ တပ်ႉပၢင်သဝ်းတပ်ႉၼမ်ႉ မၢႆ 5 ၶွင်ဢမေႊရိၵၼ်ႊ ဢၼ်မီးတီႈဝဵင်းလူင်မႃႊၼႃႊမႃႊ ၼႂ်းမိူင်းပႃႊရဵၼ်ႊ။ ၵဵဝ်ႇလူၺ်ႈလွင်ႈမၢတ်ႇၸဵပ်းလူႉတၢႆလူႉသုမ်းတႄႉ ဢမေႊရိၵၼ်ႊတႄႉ ဢမ်ႇပိုတ်ႇလၢတ်ႈပိုၼ်ၽၢဝ်ႇသင်။

ၼွၵ်ႈလိူဝ်ၼၼ်ႉ ဢိင်ၼိူဝ်ၶေႃႈပိုၼ်ၽၢဝ်ႇ တပ်ႉသိုၵ်းဢၼ်ယႂ်ႇသုတ်းၶွင်ဢီႊရၼ်ႊ IRGC ပိုၼ်ၽၢဝ်ႇဝႆႉၽႅၼ်ယၢၼ်ႇသိုၵ်း (Truthful Promise 4) ၵတိသဵတ်ႈၸႃႇၶေႃႈထိ 4 သေ မိူဝ်ႈၶမ်ႈဝႃးတင်းၶိုၼ်း ဢီႊရၼ်ႊ ယိုဝ်းမၢၵ်ႇလူင် သႂ်ႇတပ်ႉပၢင်သဝ်း သိုၵ်းဢမေႊရိၵၼ်ႊ လႄႈ ဢိတ်ႉသ်ရေႊလ် ။ သိုၵ်းဢမေႊရိၵၼ်ႊလႆႈယိုဝ်းတူၵ်းတင်းၶိုၼ်း ။ ယူႇတီႈမိူင်းယူႊဢေႊဢီႊ၊ ၶူႊဝဵတ်ႉ၊ ၵႃႊတႃ ၸိူဝ်းၼႆႉသေ လႆႈငိၼ်း လႆႈႁၼ်ယူႇၼႆ ၶၢဝ်ႇယႂ်ႇပီႊပီႊသီႊ ၵေႃႈဢွၵ်ႇဝႆႉၼင်ႇၼႆ။

မၢၵ်ႇဢၼ်ဢီႊရၼ်ႊယိုဝ်းမႃးၼၼ်ႉ တပ်ႉပၢင်သဝ်းသိုၵ်းဢမေႊရိၵၼ်ႊ ဢၼ်မီးတီႈဝဵင်းလူင် ၻူဝ်ႊႁႃႊ ၸိုင်ႈမိူင်းၵႃႊတႃႊ ၵေႃႈယင်းလႆႈယိုဝ်းတူၵ်းၸွႆႈလႄႈ ႁဵတ်းႁႂ်ႈၵူၼ်းမိူင်း ယူႊဢေႊဢီႊတူၵ်းၸႂ်၊ ၶူင်ႇႁိူဝ်းမိၼ်ၼႂ်းၸိုင်ႈမိူင်းသင်ႇပိၵ်ႉၵိုတ်း သၢႆၵၢၼ်မိၼ်ၵူၼ်းမိူင်းဝႆႉၵူႈဢၼ်သေ ႁၢင်ႈႁႅၼ်းဝႆႉ တပ်ႉသိုၵ်းတၢင်းၵၢင်ႁၢဝ်လီငၢမ်း။ ၸိုင်ႈမိူင်းဢၼ်သိုၵ်းဢိတ်ႊသရေႊလ်ပၵ်းဝႆႉၼၼ်ႉ လႆႈပိုတ်ႇသဵင်ပၼ်ၾၢင်ႉၵူၼ်းမိူင်းယူႇတင်းၶိုၼ်း ဝႃႈၼႆ။

လွင်ႈၼႆႉ လူင်ပွင်ၸိုင်ႈမိူင်းယူႊဢေႊဢီႊ ၵေႃႈပိုၼ်ၽၢဝ်ႇဝႃႈ သိုၵ်းဢီႊရၼ်ႊ ယိုဝ်းမၢၵ်ႇလူင်ပူၼ်ႉပႅၼ်ၶဝ်ႈၼႂ်းၼႃႈလိၼ်ၸိုင်ႈမိူင်းၶဝ်လႄႈ မိုၼ်ပိုၼ်ၽၢဝ်ႇသိုၵ်းတေႃႇၶဝ်ၵမ်းသိုဝ်ႈ ဝႃႈၼႆ။

လွင်ႈဢၼ်ဢမေႊရိၵၼ်ႊလႄႈ ဢိတ်ႉသ်ရေႊလ် ႁူမ်ႈၵၼ်ပိုတ်းယိုဝ်းဢီႊရၼ်ႊၼႆႉ ၸွမ်ၸိုင်ႈဢမေႊရိၵၼ်ႊ ၻေႃႊၼႄလ်ႊထရမ်ႉတႄႉလၢတ်ႈၼႂ်းထီႊဝီႊၸိုင်ႈမိူင်းၶဝ်ဝႃႈ – တေယိုဝ်းတပ်ႉသိုၵ်းဢီႊရၼ်ႊႁႂ်ႈလႅဝ်ၽႅဝ်ႈသေ တေပူတ်းလူင်ပွင်ၸိုင်ႈမိူင်းဢီႊရၼ်ႊႁႂ်ႈလႆႈဝႃႈၼႆ။ တီႈသိုဝ်ႇၼႅင်ႈသၢၼ်မၼ်းၸၢႆးၼၼ်ႉၵေႃႈတႅမ်ႈဝႆႉပႃးဝႃႈ – ပိုတ်ႇၼႃႈသိုၵ်းၸူးဢၼ်ယႂ်ႇလူင်ၸူး ဢီႊရၼ်ႊယူႇ ဝႃႈၼႆပႃး။ ထရမ်ႉ တိုၵ်းသူၼ်းပႃးႁႂ်ႈ သိုၵ်းဢီႊရၼ်ႊတင်းမူတ်း ဝၢင်းၶိူင်ႈၸဝ်ႉၸဝ်ႉၸဵဝ်းၸဵဝ်းဝႃႈၼႆဝႆႉ။

ဢိင်ၼိူဝ်လွင်ႈၶႂ်ႈႁၢမ်ႈ ၶိူင်ႈမိုဝ်းၼိဝ်းၶလီးယႃးသေ ဢၼ်ဢမေႊရိၵၼ်ႊလႄႈ ဢိတ်ႉသ်ရေႊလ် တႄႇပိုတ်းယိုဝ်းၸူးမိူင်းဢီႊရၼ်ႊၼၼ်ႉ ယၢမ်းလဵဝ် ဢိတ်ႉသ်ရေႊလ်ၵေႃႈ ၶိုၼ်းပိုၼ်ၽၢဝ်ႇငဝ်းလၢႆးၶိုၵ်ႉၶၵ်ႉဝႆႉၼႂ်းၸိုင်ႈမိူင်းမၼ်း။ ၽွင်းလူင်ၾၢႆႇၵႅတ်ႇၶႄ မိူင်းဢိတ်ႉသ်ရေႊလ် လၢတ်ႈဝႃႈ ဢၼ်လႆႈယိုဝ်းဢီႊရၼ်ႊၼႆႉ ပဵၼ်ယွၼ်ႉတႃႇၵႅတ်ႇၶႄၸိုင်ႈမိူင်းၸဝ်ႈၵဝ်ႇ ဝႃႈၼႆ။

ဝၢႆးလင် ဢမေႊရိၵၼ်ႊလႄႈ ဢိတ်ႉသ်ရေႊလ် ပိုတ်းယိုဝ်းဢီႊရၼ်ႊ ဢမ်ႇပေႃးႁိုင် ၵူၼ်းလူင်ၼႂ်းလူင်ပွင်ၸိုင်ႈဢီႊရၼ်ႊ ဢၼ်ပဵၼ် ဢယႃႊၻူဝ်ႊလႃႊ ဢလီႊ ၶႃႊမေႊၼီႊ ဢႃယု 86 ပီလႆႈလူႉတၢႆၵႂႃႇၼႂ်းႁွင်ႈၵၢၼ်ႁဵတ်းၵၢၼ်မၼ်းၸၢႆးၼႆ ၾၢႆႇဢီႊရၼ်ႊ ပိုၼ်ၽၢဝ်ႇဢွၵ်ႇမႃးၼင်ႇၼႆ။ လွင်ႈၼႆႉ ဢီႊရၼ်ႊၶိုၼ်းသိုပ်ႇပိုၼ်ၽၢဝ်ႇထႅင်ႈဝႃႈ တေၼႄၾၢင်ႁၢင်ႈလွင်ႈမွင်ၸႂ်ၵႂႃႇတႃႇ 40 ဝၼ်းဝႃႈၼႆ။လွင်ႈတၢႆၼႆႉ ၵမ်ႈၽွင်ႈၵေႃႈပိုၼ်ၽၢဝ်ႇဝႃႈပဵၼ်ယွၼ်ႉၺႃးယိုဝ်းမၢၵ်ႇလူင်တူၵ်းတိူဝ်ႉသႂ်ႇဝႃႈၼႆသေတႃႉ ၶၢဝ်ႇဢီႊရၼ်ႊၼႂ်ၼႆႉဢွၵ်ႇမႃးဝႃႈ ၶႃႊမေႊၼီႊဢမ်ႇတၢႆ ၊ ပဵၼ်ၶၢဝ်ႇဢၼ်တိုၵ်းတေႃးၸူးပၢႆးၸႂ်ၵူၺ်းဝႃႈၼႆၵေႃႈမီး။

IRGC သိုပ်ႇပိုၼ်ၽၢဝ်ႇၼႂ်ၼႆႉဝႃႈ – ယူႇတီႈဢီႊရၼ်ႊ တေၶိုၼ်းတွပ်ႇတႅၼ်းပိုတ်းယိုဝ်းၵႂႃႇယႂ်ႇၵႂၢင်ႈ ဢၼ်ၼႂ်းပိုၼ်းဢမ်ႇယၢမ်ႈမီးမႃး ဝႃႈၼႆလႄႈ ၵူၼ်းလုမ်ႈၾႃႉဢွၼ်ၵၼ်မႆႈၸႂ်ၵူဝ်ယဵၼ်းပဵၼ်သိုၵ်းလုမ်ႈၾႃႉပွၵ်ႈၵမ်းသၢမ်။

လုမ်းတၢင်လၢႆလၢႆမိူင်းပႃးၸဵမ်မိူင်းမၢၼ်ႈဢၼ်ပၵ်းယူႇၼႂ်းမိူင်းဢီႊရၼ်ႊ ၵူဝ်ယဵၼ်းပဵၼ်သိုၵ်းလုမ်ႈၾႃႉပွၵ်ႈၵမ်းသၢမ်။ ဢွၼ်ၵၼ်ၼႅတ်ႈပိုၼ်ၽၢဝ်ႇပၼ်ၾၢင်ႉၵူၼ်းမိူင်းၽႂ်မၼ်းသေ ပၼ်ဝႆႉပႃးမၢႆၾူၼ်းတီႈတိတ်းတေႃႇၶွင်လုမ်းတၢင်ၽႂ်မၼ်းဝႆႉ သင်ဝႃႈထူပ်းၽေးႁႂ်ႈၸၢင်ႈၵပ်းႁႃၼႆယူႇ။

BBC, Reuters