AA ရၶႅင်ႇ၊ TNLA ပလွင်ႈ လႄႈ MNDAA ၶႄႇၵဝ်ႈၵၢင်ႉ ဢၼ်ႁပ်ႉၸိုဝ်ႈဝႃႈ ဢူၺ်းလီသၢမ်ပီႈၼွင်ႉၼႆႉပဵၼ်တီႈၸိူဝ်းၸုမ်းလုၵ်ႉၽိုၼ်ႉၶၢဝ်းႁွင်မိူင်းမၢၼ်ႊ Myanmar Spring Revolution ၶဝ် ပၵ်းတႃတူၺ်းဝႆႉလူၺ်ႈ ၾႆးတၢင်းၼႂ်းၶဝ်ယူႇယဝ်ႉ။ AA ရၶႅင်ႇ သိုပ်ႇၶဝ်ႈတိုၵ်း ဝဵင်းၵျွၵ်ႉၽိဝ်ႇ ဢၼ်ပဵၼ်တီႈပၵ်းသဝ်းႁူင်းၵၢၼ်​​တေႃႈ လွတ်ႇၵႅတ်ႉသ် လႄႈ ၼမ်ႉမၼ်းမဵၼ် ၶွင်မိူင်းၶႄႇၼၼ်ႉယူႇလႄႈ ယူႇတီႈသိုၵ်းမၢၼ်ႈ ​​တေႁဵတ်းႁိုဝ်ငူပ်ႉငီႉၸွမ်းမိူင်းၶႄႇ​​သေ တုမ်ႉတွပ်ႇၶိုၼ်း၊ ၵဵဝ်ႇလိူင်ႈပၼ်ႁႃ ဢၼ်ရူဝ်ႁိင်ၵျႃၶဝ်မၢပ်ႇ​​ၼေးဝႃႈ AA ပူၼ်ႉပႅၼ်လူလၢႆၽဵဝ်ႈ မူၺ်ႉၵူၼ်းၶဝ်ၼၼ်ႉ ​​တေႁဵတ်းႁိုဝ်​​ၵေႈၶႆ ႁႂ်ႈယဝ်ႉယႃႇ၊ တင်းမိူင်းပင်းၵလႃးတဵတ်ႉသျ် ဢၼ်ပႂ်ႉငွႆးတႃႇၶဝ်ႈၵႅဝ် ၸွမ်းလိူင်ႈရူဝ်ႁိင်ၵျႃယူႇၼၼ်ႉလူး AA ၸွင်ႇ​​တေ ဢဝ်လၢႆးၵၢၼ်မိူင်း​​ၵေႈသၢႆႇလႆႈ ၸဵမ်ၸိူဝ်းၼႆႈ ပဵၼ်ဝႆႉတႃႇၸိူဝ်းၸုမ်းလုၵ်ႉၽိုၼ်ႉမိူင်းမၢၼ်ႊပွတ်းၵၢင်ၶဝ် သူၼ်ၸႂ်ပႂ်ႉတူၺ်းၸွမ်းဝႆႉယဝ်ႉ။ AA ၼႆႉ တိုၵ်းသိုၵ်းမၢၼ်ႈယူႇ​​သေတႃႉ မၼ်းဢမ်ႇလိုၼ်ႈႁွႆႈၵၼ်တင်း NUG လႄႈ ၸိူဝ်းၸုမ်းၸၢဝ်းပွတ်းၵၢင်ၼၼ်ႉလူး။

MNDAA တႄႉ ၸဵမ်မိူဝ်ႈၽႅၼ်ယၼ်ႇသိုၵ်းႁွပ်ႈသွင်ယဝ်ႉၵႂႃႇ ၸွမ်းလူၺ်ႈမိူင်းၶႄႇတုၵ်းယွၼ်း​​သေ ဢဝ်သၢႆယၢတ်ႇၼမ်ႉၶၢတ်ႇပႅတ်ႈတင်း ၸုမ်းပွတ်းၵၢင်ၶဝ်ၼၼ်ႉၼႆ ႁူႉၸႅင်ႈၵၼ်ယူႇ၊ ​​တေဝႃႈ TNLA ပလွင်ႈၼႆ​​ၵေႃႈ ၵဵဝ်ႇလူၺ်ႈလိူင်ႈ​​တေထွႆပၼ် မိူင်းၵုတ်ႈ၊ မိူင်းမိတ်ႈ​​သေ ပဵၼ်တီႈၵူၼ်းဢွၼ်ႇPDF လႄႈ ၸုမ်းၸၢဝ်းၶိူဝ်းၵမ်ႈၽွင်ႈ လႆႈၸၢၼ်ႈၸႂ်မၢင်ၸႂ်မႃး တွၼ်း​​သေဢမ်ႇဢွၵ်ႇပၢၵ်ႇဝႃႈ ပဵၼ်ၸုမ်းႁၵ်းလင်ၵွႆး။ ယွၼ်ႉပိူဝ်ႈ တၢင်းတႅမ်ႈတၢင်းလၢတ်ႈ လႄႈ တၢင်းႁဵတ်းၼႆႉ ပႅၵ်ႇပိူင်ႈႁိူင်ႈႁၢင်ႇၵၼ်ၼႃႇၼၼ်ႉယဝ်ႉ။

တႄႇၼႂ်းၵၢင်လိူၼ် ၾႅပ်ႉပိဝ်ႊရီႊ ၼႆႈမႃး ၸုမ်းပလွင်ႈ လႄႈ ၶႄႇၵဝ်ႈၵၢင်ႉၼႆႉ ၶိုၼ်းၽိတ်း​​မေႃးႁႅမ်ႁူဝ်ၵၼ် ထိုင်တီႈ​​ပေႃးပိၼ်ႇပႆႇၺွပ်းၶင်ၵူၼ်းၵၼ်ယဝ်ႉ၊ ဝၼ်းတီႈ 14 MNDAA ဢွၵ်ႇလိၵ်ႈၸူး TNLA ​​သေ တုၵ်းယွၼ်းဝႃႈ ၵွၼ်ႇ ပႆႇထိုင်တၢမ်းၶမ်ႈ 6 မွင်း ဝၼ်းတီႈ 15 ႁႂ်ႈသိုၵ်း TNLA ထွႆဢွၵ်ႇၼႂ်းႁွင်ႈၵၢၼ်ဢုပ်ႉပိူင်ႇ၊ ပၢင်သဝ်းသိုၵ်းၵူၼ်းမိူင်း၊ တပ်ႉႁၢၼ် လႄႈ လၢၼ်ႇၶဝ်တင်းသဵင်ႈ။ ယဝ်ႉသမ်ႉ ႁႂ်ႈတၢင်ႇပၼ်ၶိုၼ်းၸွမ်ပိဝ် MNDAA၊ ႁႂ်ႈပွႆႇပၼ်ၵူၼ်းသိုၵ်းၶဝ် 10 ​​ၵေႃႉ လႄႈ ယူတ်းယႃ၊ ယွမ်းၼွမ်းတွင်းပၢၼ်​​တေႃႇ ၸိူဝ်းလႆႈမၢတ်ႇၸဵပ်း၊ လိူဝ်ၼၼ်ႉ ႁႂ်ႈလႆႈၵူတ်ႇထတ်းဢဝ်လိူင်ႈၼၵ်းၼႃ​​သေ ႁပ်ႉပၢၵ်ႇဝႃႈ ​​တေဢမ်ႇႁႂ်ႈလႆႈၵိူတ်ႇၶိုၼ်ႈပၼ်ႁႃထႅင်ႈ ၼႆယဝ်ႉ။

ဝၼ်းတီႈ 15 TNLA တိုၵ်ႉၵႂႃႇႁူပ်ႉဢုပ်ႇၸွမ်း ၸုမ်းသိုၵ်းမဢလယူႇ တီႈၶုၼ်းမိင်လႄႈ လႅပ်ႈ​​တေပႆႇတၼ်း တုမ်ႉတွပ်ႇၸူး တီႈ MNDAA။ ၶႅၼ်ႈ​​သေသီႇႁႃႈဝၼ်း ၸင်ႇတွပ်ႇလိၵ်ႈဝႃႈ ဝၼ်းတီႈ 25 မႃး ၵႅမ်ႁူဝ်ပဝ်ႈ တႃႉၵျူ ၵ်ႉၵျႃး ​​တေဢွၼ်ႁူဝ်ႁဝ်းၵူၼ်းလူင် ႁႃႈႁူၵ်း​​ၵေႃႉ​​သေ မႃးဢုပ်ႇတီႈလုမ်းငဝ်ႈငုၼ်းသူ လဝ်ႇၵၢႆးၼႆ။ ၵူၺ်းၵႃႈ ၾၢႆႇၼၼ်ႉ ဢမ်ႇယွမ်းႁပ်ႉ၊ ဝၼ်းတီႈ 21 MNDAA တွပ်ႇဝႃႈ “ ၶယႅင်ႇၵူတ်ႉၶၢႆ ဢၼ်ပဵၼ်တွၼ်ႈလိၼ်ၶိုၵ်ႉတွ ၼ်း မၢႆ 1 ႁဝ်းၼႆႉ သူၶိုၼ်းမႄး​​ၽေႃႇသၢင်ႈ ႁႂ်ႈမိူၼ်ၶိုၼ်း ၵွၼ်ႇပႆႇပဵၼ်လိူင်ႈ မိူဝ်ႈ ၾႅပ်ႉပိဝ်ႊရီႊ 13 ဝၼ်းၼၼ်ႉယဝ်ႉတူဝ်ႈၸင်ႇ ​​တေတႄႇႁပ်ႉဢုပ်ႇ​​ၵေႈသၢႆႇၵၼ်” ၼႆဝႃႇ။

 ၸွမ်းၼင်ႇၶဝ်ပဵၼ်လုၵ်ႈၸုမ်း FPNCC လႄႈ ၸုမ်းၵဝ်ႈ ၵၢင်ႉတႄႉ တႅမ်ႈလိၵ်ႈဢွၵ်ႇၵမ်းလႂ် သူင်ႇၽိုၼ်မိူၼ်ၸူး ပဝ်းယဵဝ်ႇၶျႅင် ႁူဝ်ပဝ်ႈ FPNCC လႄႈ လုၵ်ႈၸုမ်းၵူႈၸုမ်းယဝ်ႉ။ ၼင်ႇႁိုဝ် ပဝ်းယူႈသႅင်ႇ ​​တေၶဝ်ႈၵႄႈ​​ၵေႈၶႆပၼ်ၼႆ​​ၵေႃႈ တႅမ်ႈတိူင်ႇပႃးထႅင်ႈၵွၼ်ႇ။

ၽၢႆႇပလွင်ႈ TNLA ​​ၵေႃႈ လႆႈႁၼ်လွပ်ႇပီႇၶဝ် တႅမ်ႈတၢင်ႇမၢပ်ႇ​​ၼေး တီႈၸုမ်းၵဝ်ႈၵၢင်ႉ ၽိတ်းၽူၼ်ပူၼ်ႉပႅၼ်​​တေႃႇတပ်ႉၶဝ်လႂ်၊ လုၵ်ႉတီႈၸုမ်းတူင်ႇဝူင်းၵူၼ်းမိူင်းၶဝ် တုၵ်းယွၼ်းဝႃႈ ယႃႇႁႂ်ႈပၼ်ႁႃၵၢၼ်သိုၵ်း လၢမ်းႁုပ်ႇ ႁွၼ်ႉထိုင် တီႈၵူၼ်းမိူင်းၽၵ်းၵႃႇၼႆလႂ် ပႃးယဝ်ႉ။ ၵူၺ်းၵႃႈ ပၼ်ႁႃၼႆႉ ယႃႇဝႃႈ​​တေလွႆႈ၊ ၵွႆႈယူႇၵွႆႈလုၵ်ႉႁိုင်းလိူဝ်မႃးၵွၼ်ႇ။ ၼႆလႄႈ ဝၼ်းမိူဝ်ႈဝႃး ​​ၸင်ႇလႆႈငိၼ်းၶၢဝ်ႇဝႃႈ တႃႉၽူင်း​​ၵျေႃႇ ​​ပေႃးလႆႈတႅမ်ႈလိၵ်ႈယွၼ်းထိုင် တီႈလူင်ပွင်ၸိုင်ႈယုၼ်ၼၢၼ်၊ မိူင်းၶႄႇ ႁႂ်ႈလႆႈဢဝ်လိူင်ႈ​​ၵေႈလိတ်ႈပၼ်ၼႆယဝ်ႉ။

​​ပေႃးၸႂ်ႈ​​တေႉ​​ၵေႃႈ ​​တေလႆႈဝႃႈ TNLA ၼႆႉ ဢမ်ႇဢၢၼ်းၸႂ်ယႂ်ႇ UWSA ဢၼ်ပဵၼ်ႁူဝ်ပဝ်ႈ ၸုမ်း FPNCC ၼၼ်ႉယဝ်ႉႁိုဝ်၊ ဝႃႈလႃး ၶဝ်ဢမ်ႇမၼ်ႈၸႂ်ၼိူဝ် ပဝ်းယဵဝ်ႇၶျႅင်​​ၵေႃႉပဵၼ်ႁူဝ်ပဝ်ႈၼၼ်ႉႁႃႉ။ ​​ပေႃးၼၼ် ဢၼ်ၶဝ်ၸႂ်ယႂ်ႇ​​တေႉ​​တေႉ မီးထႅင်ႈၽူႈလႂ်လႃႇၼႆ လီလႆႈၶႆႈၸႂ်လမ်းလူၺ်းၸွမ်းယူႇယဝ်ႉ။

တီႈၼႆႈ လီလႆႈၶႆႈၸႂ်ထႅင်ႈတႄႉ ဝၢႆးၽႅၼ်ယၼ်ႇသိုၵ်း 1027 ယဝ်ႉၵႂႃႇ MNDAA ႁုပ်ႈဢဝ် သႅၼ်ဝီ၊ ၼွၵ်ႈၶွပ်ႇ မီးၸုမ်းတႆး SSPP ​​သေတႃႉ ဢမ်ႇမီးလွင်ႈၶတ်းၶႂၢင်ယႂ်ႇလူင်။ ၵူၺ်းၵႃႈ ၵူတ်ႉၶၢႆသမ်ႉ TNLA ဢဝ်ၽၢၵ်ႇ႞၊ MNDAA ဢုပ်ႉၽၢၵ်ႇ႞။ လိူဝ်ၼၼ်ႉ မီးထႅင်ႈ KIA ဢၼ်ယူႇဝႆႉၸဵမ်ပိုင်းၵွၼ်ႇ။ ပလွင်ႈၼႆႉ လႆႈပွႆႇပႅတ်ႈ ၼွင်ၶဵဝ်၊ ၵျွၵ်ႉမႄး၊ သီႇ​​ပေႃႉယဝ်ႉ​​ၵေႃႈ ၼိူဝ်သဵၼ်ႈတၢင်းၵႃႉၶၢႆ မူႇ​​ၸေႊ-မၢၼ်းတ​​လေး မၼ်းဢမ်ႇမီးတီႈယၼ်ယဝ်ႉလႄႈ ၸင်ႇၵိူတ်ႇလိူင်ႈၶႃၽီၵၼ် ၼႂ်းၵူတ်ႉၶၢႆႁႃႉၼႆ လီငမ်းငဝ်းဝႆႉ​​ယဝ်ႉ။

​​ပေႃးတူၺ်းၸွမ်းမိူင်းတႆးပွတ်းႁွင်ႇ ၼႂ်းငဝ်းလၢႆးယၢမ်းလဵဝ်ၼႆ လွင်ႈၵေႃႇသၢင်ႈပိုၼ်ႉငဝ်ႈ infrastructure ၼႂ်း​​ၸႄႈဝဵင်း 24 ဝဵင်းၼႆႉ ၶူင်းၵၢၼ်ႁူမ်ႈသဵင်ႈ မီးယူႇ 322 ဢၼ်၊ ၼႂ်းၼၼ်ႉ တႃႇ 142 ဢၼ်ၼႆႉ မီးတႂ်ႈမိုဝ်း TNLA ၵုမ်းၵမ်လုမ်းလုမ်း၊ ​​တေႃႈၼင်ႇ ၸုမ်းသိုၵ်းမၢၼ်ႈ ၵူၺ်းလႆႈဝႆႉ 79 ဢၼ်ၵွႆး။ MNDAA သမ်ႉၵုမ်းၵမ်ဝႆႉ 52 ဢၼ်။ ၵူၺ်းၼၼ်​​သေတႃႉ ၵႃႈပဵၼ်ၶူင်းၵၢၼ်ၶိုၵ်ႉၶၢႆးယႂ်ႇလူင်ၼႆႉသမ်ႉ မီးဝႆႉၼႂ်းမိုဝ်း MNDAA တႃႇ 47%၊  ႁူဝ်ၼမ်ၼႆႉ ပလွင်ႈၵုမ်း၊ ပိူင်ၶိုၵ်ႉသမ်ႉ ၵဝ်ႈၵၢင်ႉၸၢၼ်ႇဝႆႉလႄႈ ပွင်ႇဝႃႈၵၢၼ်မၢၵ်ႈမီးၽွၼ်းပၢင်ႈ ၶွင်မိူင်းတႆးပွတ်းႁွင်ႇၼႆႉ မီးဝႆႉၼႂ်းမိုဝ်း ၶွင်သွင်ၸုမ်းၵွႆးၼႆယဝ်ႉ။ ​​တေႃႈၼင်ႇၼႆ ၶႃယင်းၶိုင်ငႃမင်ႁူဝ်ၵၼ်ယူႇ ​​တေႃႇမိူဝ်ႈဝႃး မိူဝ်ႈၼႆႈ။

ၵၢၼ်လုၵ်ႉၽိုၼ်ႉၼႆႉ တႄႇမႃးတီႈဢၼ်ဝႃႈ ၶႂ်ႈမီးဢႃႇၼႃႇပွင်မိူင်း၊ ၶႂ်ႈမီးသုၼ်ႇၸတ်းပွင် ငိူၼ်ႈငဝ်ႈတိုၼ်းလၢင်း တႂ်ႈလိၼ်ၼိူဝ်လိၼ် ၶွင်ၼႂ်းပိုၼ်ႉတီႈတူဝ်ၵဝ်ႇ၊ ထႅင်ႈ​​ၵေႃႈ ၶႂ်ႈၸႂ်ႉတိုဝ်း လိၵ်ႈလၢႆး ၾိင်ႈထုင်းတူဝ်ၵဝ်ႇ​​သေ ပူၵ်းပွင်ၵၢၼ်ႁဵၼ်း ဢိၵ်ႇ ၽႃႇသႃႇၵႂၢမ်းလၢတ်ႈ ၶွင်ၶိူဝ်းတူဝ်ၵဝ်ႇ…ဝႃႈၼႆ​​သေတႃႉ ဢိင်ၼိူဝ်ၸဝ်ႈၵဝ်ႇ ​​မေႃဝၵ်ႉတၢဝ်းဢဝ် ငဝ်းလၢႆးလႅၵ်ႈလၢႆႈပဵၼ်မီးၼၼ်ႉ​​သေ ၽိူဝ်ႇမီးသုၼ်ႇၸတ်းပွင်မႃး သမ်ႉလိုမ်းပႅတ်ႈၵၢၼ်တင်းလုမ်ႈ လၢႆလၢႆၸၢဝ်းၶိူဝ်းၵူၼ်းပိုၼ်ႉတီႈယဝ်ႉ ၵုမ်ႇလမ်ႁူဝ်ၶပ်းပွင်တႃႇၸုမ်းတူဝ်ၵဝ်ႇ ၶိူဝ်းတူဝ်ၵဝ်ႇယူႇမႅၵ်းမႅၵ်းၵွႆးတႄႉ တိုၼ်းၺႃး​​ပေႃႈမႄႈၵူၼ်းမိူင်း ၽိုၼ်ႉဝၢႆႇၶွမ်ႈၶတ်းၶိုၼ်းဢမ်ႇႁၢင်ႉၼႆ ယွၼ်းတူၵ်ႇတၵ်ႉမွၵ်ႈၼႆႈ​​သေ ​​တေၶွတ်ႇယွတ်ႈပွင်ႈၵႂၢမ်းၵွၼ်ႇ​​ဢေႃႈ။