မိူဝ်ႈဝႃးဝၼ်းတီႈ 26 ယၢမ်းၵၢင်ဝၼ်း 12 မူင်း ၸဝ်ႈသၢင်ႇဢွၼ်ႇပႃးၼိုင်ႈ တီႈဢိူင်ႇၼမ်ႉၽၵ်းၵႃ ၸႄႈဝဵင်းၵူတ်ႉၶၢႆ ၵႂႃႇၵဵပ်း ဢဝ်မၢၵ်ႇ ဢၼ်ပႆႇတႅၵ်ႇ ၵိုတ်းၶင်ႉဝႆႉၽွင်းပၢင်တိုၵ်း ၼၼ်ႉ မႃးလဵၼ်ႈသေ တႅၵ်ႇတိူဝ်ႉသႂ်ႇတူဝ်ၶိင်းမၼ်းၸဝ်ႈ ၶႃၶၢတ်ႇပုတ်းတေလႆႈတႅပ်းပႅတ်ႈၾၢႆႇၼိုင်ႈ။

မၢၵ်ႇတႅၵ်ႇၵႂႃႇ ၼႂ်းဝၢင်းၵျွင်း သၼ်ႇတိသုၶ သန္တိသုခ ဢၼ်မီးတီႈၼမ်ႉၽၵ်းၵႃ ၵႄႈၵၢင် ဝဵင်းၵူတ်ႉၶၢႆ တင်း ဝဵင်းၼမ်ႉၶမ်းသေ ၸဝ်ႈသၢင်ႇဢွၼ်ႇဢၼ်တိူဝ်ႉၺႃးမၢၵ်ႇတႅၵ်ႇသႂ်ႇၼၼ်ႉ မၢတ်ႇၸဵပ်းႁၢဝ်ႈႁႅင်းလႄႈ ၸုမ်းၸွႆႈထႅမ်ၶဝ် လႆႈႁွင်ႉၵႂႃႇယူတ်းယႃတူဝ်ထိုင်တီႈ ႁူင်းယႃလူင်ဝဵင်းၼမ်ႉၶမ်းဝႆႉ ၼႆယဝ်ႉ။

ၽူႈမီးပုၼ်ႈၽွၼ်း ၼႂ်းၸုမ်းၸွႆႈထႅမ် ဢဝ်တူဝ်ၸဝ်ႈသၢင်ႇဢွၼ်ႇၵႂႃႇယႃတူဝ်ၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “လုၵ်ႈဢွၼ်ႇၼႆၼႃႇ ၵႂႃႇၵဵပ်းဢဝ်မၢၵ်ႇဢၼ်ပႆႇတႅၵ်ႇၼၼ်ႉမႃးႁႄ မႃးလဵၼ်ႈၼႂ်းဝၢင်းၵျွင်း။ လႅပ်ႈမၼ်းတေၵႂႃႇ တွႆႇလဵၼ်ႈၵႂႃႇ။ တိၼ်မၼ်းၸဝ်ႈ သမ်ႉပေႃးယွၵ်းယွႆ ၵႂႃႇသဵင်ႈ။ တႃႇၾၢႆႇၼိုင်ႈတႄႉ တေလႆႈ တႅပ်းပႅတ်ႈဢေႃႈ” ဝႃႈၼႆ။

ၸဝ်ႈသၢင်ႇဢွၼ်ႇၼႆႉ ဢႃႇယုတိုၵ်ႉမီးမွၵ်ႈ 11 ၶူပ်ႇ ၸိုဝ်ႈႁွင်ႉ ၸဝ်ႈၸၼ်ႇတေႃးၽႃႇသ (စန္တောဘာသ) (ႁိုဝ်) ဢၢႆႈသၢမ် ၊ မၢၵ်ႇတႅၵ်ႇသႂ်ႇႁႅင်းလႄႈ လႆႈတႅပ်းတိၼ်ပႅတ်ႈၼိုင်ႈၶွၼ် ၵူၺ်းဢမ်ႇၵႃး ၸွမ်းမိုဝ်း၊ ၸွမ်းၼႃႈမၼ်းၸဝ်ႈၵေႃႈ မၢတ်ႇၸဵပ်းၵႂႃႇ ႁၢဝ်ႈႁႅင်း ။

ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 မႃး ၼႂ်းမိူင်းတႆးပွတ်းႁွင်ႇ ၸွမ်းပိုၼ်ႉတီႈပဵၼ်ပၢင်တိုၵ်းယဝ်ႉ ၼၼ်ႉ မၢၵ်ႇၵူႈသႅၼ်းသႅၼ်း ဢၼ်ပႆႇတႅၵ်ႇသေ ၵိုတ်းၶင်ႉၶမ်ဝႆႉ ၼမ်လူၼ်ႉလိူဝ်တေႉတေႉလႄႈ သင်ဢမ်ႇႁူႉဝႃႈ ပဵၼ်သင် ဢမ်ႇၼၼ် ထူပ်းႁၼ်မၢၵ်ႇဢၼ်တူၵ်းဝႆႉ၊ ၵိုတ်းၶင်ႉဝႆႉၸိုင် ဢမ်ႇထုၵ်ႇလီၵဵပ်းမႃးလဵၼ်ႈ၊ ထုၵ်ႇလီပွင်ႇၶၢဝ်ႇတီႈ ၽူႈမီးပုၼ်ႈၽွၼ်းၶဝ် ၵႂႃႇၸွႆႈဢဝ်ပႅတ်ႈပၼ်ၵမ်းသိုဝ်ႈၼႆ ၽူႈမီးပုၼ်ႈၽွၼ်း ၾၢႆႇၸွႆႈထႅမ်ၵူၼ်း ၼႂ်းပိုၼ်ႉတီႈၼမ်ႉၽၵ်းၵႃ သိုပ်ႇလၢတ်ႈပၼ်ၾၢင်ႉဝႆႉ။

မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 3 လိူၼ်ၾႅပ်ႉပိဝ်ႊရီႇၼႆႉၵေႃႈ လုၵ်ႈဢွၼ်ႇ 4 ၵေႃႉ ၸိူဝ်းယူႇၼႂ်းပိုၼ်ႉတီႈသိုၵ်းၶၢင်ၵုမ်းၵမ်ဝႆႉ တီႈၼမ်ႉၽၵ်းၵႃ ၵႂႃႇၵဵပ်းဢဝ်မၢၵ်ႇပွမ်း (မၢၵ်ႇဝိုတ်ႉ) မႃးလဵၼ်ႈလႄႈ တၢႆၵႂႃႇၵေႃႉၼိုင်ႈသေ မၢတ်ႇၸဵပ်းၵႂႃႇႁၢဝ်ႈႁႅင်း 3 ၵေႃႉ ၼႆယဝ်ႉ။