ႁၢင်လိူၼ် ၾႅပ်ႉပိဝ်ႊရီႊ ဝၼ်းတီႈ 19 ၼၼ်ႉ ၽွင်းသိုၵ်းမၢၼ်ႈဢဵၼ်ႁႅင်း 30 ၵေႃႉ ထူဝ်းသိုၵ်း ၶဝ်ႈမႃးတၢင်း ဝၢၼ်ႈၵျွၵ်ႉငႅၵ်ႉ(ကျောက်ဌက်) လႄႈ ဢူၵ်ႉတုၼ်း(အုတ်တွင်း) ၼၼ်ႉၵႃးသိုၵ်းမၢၼ်ႈ ထုၵ်ႇႁၢင်ႈၵၢင်မၢၵ်ႇသေ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်း ၵၼ် ၼႂ်းၸႄႈဝဵင်း ယႂႃႇငၢၼ်ႇ ၸိုင်ႈတႆးပွတ်းၸၢၼ်း ။
ဝၢႆးၼႆႉ ၾၢႆႇသိုၵ်းမၢၼ်ႈ ဢွၵ်ႇ Martial Law (ပိူင်ၸႂ့်တိုဝ်းဢႃႇၼႃႇ ၸွမ်းၼင်ႇ ပၵ်းပိူင်မၢႆမီႈသိုၵ်း) ဝၢၼ်ႈ 10 ဝၢၼ်ႈ တေဢမ်ႇလႆႈဢွၵ်ႇၽွင်းၵၢင်ၶမ်ႈၵၢင်ၶိုၼ်း ၊ ၵူၼ်းဢွၵ်ႇၵၢင်ၶမ်ႈ ၵၢင်ၶိုၼ်း တေဢမ်ႇဢဝ်ပုၼ်ႈၽွၼ်းႁူမ်ႇလူမ်ႈပၼ် ၼႆယဝ်ႉ ။
ၼၢင်းယိင်းဢႃယု 28 ပီ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၸုမ်းလုၵ်ႉၽိုၼ်ႉ ႁၢင်ႈမၢၵ်ႇၵႃး သိုၵ်းမၢၼ်ႈလႄႈ ပဵၼ်ပၢင်တိုၵ်းၵၼ် ၵမ်းၼိုင်ႈ ၊ လႆႈငိၼ်းဝႃႈ ၵူၼ်းသိုၵ်းမၢၼ်ႈ မၢတ်ႇၸဵပ်း 10 ၵေႃႉၼႆ ၊ ဝၢႆးၼၼ်ႉ သိုၵ်းမၢၼ်ႈၶဝ် ႁၢမ်ႈၵူၼ်းဝၢၼ်ႈ 10 ဝၢၼ်ႈဢွၵ်ႇ ၵၢင်ၶမ်ႈၵၢင်ၶိုၼ်း ၊ ၽႂ်ၵေႃႈ ဢမ်ႇႁတ်းဢွၵ်ႇဢမ်ႇႁတ်းၵႂႃႇလႂ် ၊ ၵူၼ်းဝၢၼ်ႈ ပူၺ်းၼၽႃး သွင်ၵေႃႉၵေႃႈ ထုၵ်ႇၶႃႈႁႅမ်ဝႃႇ”- ဝႃႈၼႆ ။
ဝၢၼ်ႈဢၼ်သိုၵ်းမၢၼ်ႈဢမ်ႇပၼ်ဢွၵ်ႇၵၢင်ၶမ်ႈၵၢင်ၶိုၼ်းၼၼ်ႉ ပဵၼ်ဝၢၼ်ႈ ဢိၼ်းၵျီး(အင်းကြီး) ၊ ၵုင်းသိမ်ႇ(သိမ်ကုန်း) ၊ ငူၺ်ႇတွင်ႇ(ငွေတောင်) ၊ တၽၢၼ်းပိၼ်ႇ(သဖန်းပင်) ၊ တပိၼ်ႇပျေႃႇ(တပင်ပျော်၊) ၊ ၵျွၵ်ႉငႅၵ်ႉ (ကျောက်ငှက်)၊ ဢူၵ်ႉတွင်း (အုတ်တွင်း) ဝၢၼ်ႈၼူၵ်ႉၸွၵ်ႇ (ငှက်သောက်) လႄႈ ၵျွၵ်ႉတေႃး (ကျောက်တော)ၸိူဝ်းၼႆႉ ဝႃႈၼႆ ။
ယၢမ်းလဵဝ် သိုၵ်းမၢၼ်ႈၵူတ်ႇထတ်းႁိူၼ်းၵူၼ်းပိုၼ်ႉတီႈ တၢင်းဝၢၼ်ႈ ၼပၢၼ်းၵျီးလႄႈ ပူၺ်းၼၽႃးႁၢဝ်ႈႁႅင်းဝႆႉ ၼႆယဝ်ႉ ။
မိူၼ်ၼင်ႇၼႆ ၼႂ်းဝၼ်းတီႈ 21 ၼၼ်ႉ သွင်ၽူဝ်မေး ဝၢၼ်ႈပူၺ်းၼၽႃး ဢိူင်ႇၼပၢၼ်းၵျီး ထုၵ်ႇၸုမ်းဢမ်ႇႁူႉၾၢႆႇ ပိုတ်းယိုဝ်း ႁဵတ်းႁၢႆႉ သေ မေးၼၢင်း လႆႈလူႉတၢႆ ထင်တီႈယဝ်ႉ ၵေႃႉပဵၼ်ၽူဝ် လႆႈသူင်ႇယူတ်းယႃႇဝႆႉ တီႈဝဵင်းတူၼ်ႈတီး ၼႆယဝ်ႉ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ သွင်ၽူဝ်မေးဢၼ်ထုၵ်ႇၶႃႈႁႅမ်ၼၼ်ႉ ပဵၼ်ၵူၼ်းႁဵတ်းၵၢၼ် ပေႃႉမၢၵ်ႇဢုတ်ႇၵူၺ်း ၊ မေးမၼ်းတႄႉတၢႆထင်တီႈ ၽူဝ်မၼ်းတႄႉ တလဵဝ် မီးတီႈ ႁူင်းယႃတူၼ်ႈတီး ၊ ႁဵတ်းသင်လႄႈ မႃးႁႅမ်တႄႉဢမ်ႇႁူႉ ပဵၼ်ၽႂ်မႃးႁဵတ်းႁႂ်ႈၵေႃႈဢမ်ႇႁူႉ ၊ ၵၢၼ်မိူင်းတၢင်း ၵၢၼ်သုၼ်ႇတူဝ် ဢမ်ႇၸႅၵ်ႇၵၼ်ဝႆႉသေ ၶႂ်ႈႁဵတ်းသင်ၵေႃႈႁဵတ်းၵႂႃႇၸိူင်ႉၼႆ ၊ လီသုၵ်ႉသၵ်ႉၸႂ်ၼႃႇ”- ဝႃႈၼႆ ။
ၼႂ်းပိုၼ်ႉတီႈၼၼ်ႉ သိုၵ်းမၢၼ်ႈယိုတ်းမိူင်း ဢိၵ်ႇပႃး ၸုမ်းလုၵ်ႉၽိုၼ်ႉ တူင်ႉၼိုင်ၵႂႃႇမႃးဝႆႉ။ ပဵၼ်ၸုမ်းလႂ်ႁဵတ်းႁၢႆႉႁႅမ်တၢႆၵႂႃႇဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။
မိူဝ်ႈလိူၼ်ပူၼ်ႉမႃးၼၼ်ႉၵေႃႈ ၵူၼ်းဝၢၼ်ႈ လႄႇၵၢႆး ၸႄႈဝဵင်းယႂႃႇငၢၼ်ႇ 4ၵေႃႉ ထုၵ်ႇၸုမ်းယိပ်းၵွင်ႈၵၢင်ႇ ၶဝ်ႈတီႉၺွပ်းၵႂႃႇၼႂ်းဝၢၼ်ႈ၊ ႁိုင်ၶၢဝ်းတၢင်း 2ဝူင်ႈ ၸင်ႇထူပ်းႁၼ်ၶၢပ်ႈတူဝ်ၶဝ် တီႈၾၢႆႇႁွင်ႇဝၢၼ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ