မိူဝ်ႈၼႆႉ ဝၼ်းတိႈ 20/2/2026 သိုၵ်းၵဝ်ႈၵၢင်ႉ တင်း သိုၵ်းတဢၢင်း ၸိူဝ်းတူင်ႉၼိုင်ယူႇသဝ်း ပၼ်ႇၵၢၼ်ၽွင်းငမ်း ၼႂ်းၸႄႈဝဵင်းသႅၼ်ဝီ လႄႈ ၸႄႈဝဵင်းၵူတ်ႉၶၢႆ ၶဵင်ႇႁၢမ်ႈရူတ်ႉၵႃး သိုၵ်း လတ်းၶၢမ်ႈၵဵတ်ႉလၢၼ်ႇၵၼ် ၼိူဝ်သဵၼ်ႈတၢင်းလူင် ၵႂႃႇမႃးဝဵင်းသႅၼ်ဝီ လႄႈ ဝဵင်းၵူတ်ႉၶၢႆ မိူင်းတႆးပွတ်းႁွင်ႇ ၼႆယဝ်ႉ။

ၼိူဝ်သဵၼ်ႈတၢင်းလူင် ၵႂႃႇမႃးဝူင်ႈၵၢင်ဝဵင်းသႅၼ်ဝီ လႄႈ ဝဵင်းၵူတ်ႉၶၢႆၼႆႉ ၵဵတ်ႉလၢၼ်ႇ သိုၵ်းတဢၢင်း တင်း သိုၵ်းၵဝ်ႈၵၢင်ႉ ႁူမ်ႈသဵၼ်ႈမီးယူႇ 7 တီႈသေ သိုၵ်းတင်းသွင်ၾၢႆႇ ၶဵင်ႇႁၢမ်ႈ ၵၼ် ဢမ်ႇပၼ်ရူတ်ႉၵႃး ၵူၼ်းသိုၵ်း ၵႂႃႇမႃးၵူၺ်းၼႆသေတႃႉ ယၢမ်းၸဝ်ႉတေႃႇယၢမ်းၵၢင်ဝၼ်း သိုၵ်းၵဝ်ႈၵၢင်ႉႁၢမ်ႈပႃးရူတ်ႉၵႃးတၢင်ႇၶဝ်ႈသၢၼ် ၸိူဝ်းတေလုၵ်ႉတၢင်းဝဵင်းသႅၼ်ဝီ ၵႂႃႇတၢင်းဝဵင်းၵူတ်ႉၶၢႆၼၼ်ႉပႃး ဝႃႈၼႆ။

ၵူၼ်းမိူင်းၵေႃႉယူႇၼႂ်းပိုၼ်ႉတီႈ ဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈၼႆႉသိုၵ်းၶႄႇၵဝ်ႈၵၢင်ႉၶဝ် ၸႂ်ႉၵူၼ်းဝၢၼ်ႈၼမ်ႉၵိၼ်လီၶဝ်ၶၢႆႉဢွၵ်ႇဝၢၼ်ႈဝႆႉ။ ၵႃးတၢင်ႇၶဝ်ႈသၢၼ်ၸိူဝ်း ဢၢင်ႈၵႂႃႇတၢင်းၵူတ်ႉၶၢႆၼၼ်ႉ ၵေႃႈ ဢမ်ႇပၼ်လတ်း။ ၵႃးသိုၵ်းလွႆၵေႃႈၶဝ်ဢမ်ႇပၼ်လတ်း။ သိုၵ်းလွႆၸိူဝ်းၼၼ်ႉၵေႃႈ ဢမ်ႇပၼ်ၵႃးသိုၵ်းၵဝ်ႈၵၢင်ႉ လတ်းၵဵတ်ႉၶဝ်။ လႅပ်ႈတေၶဝ်ပႆႇဢုပ်ႇၵၼ်လႆႈယူဝ်ႉ။ တီႈႁဝ်းၵေႃႈ သိုၵ်းၶႄႇၵဝ်ႈၵၢင်ႉၸိူဝ်းၼႆႉ တိုၵ်ႉထတ်းၵျၢမ်းႁႅင်းယူႇ။ မိူဝ်ႈလဵဝ် ၶဝ်ထၢမ်ပႃးဝႃႈ ပဵၼ်တႆးႁႃႉ၊ ပဵၼ်လွႆ ၼႆပႃးဢိူဝ်ႈ။ ပေႃးပဵၼ်လွႆၼႆ ၶဝ်ၸႅတ်ႈ ႁႅင်းၼႃႇ။ ဝၢႆးဝၼ်းၼႆႉတႄႉ ၶဝ်ပၼ်ၵႂႃႇမႃးၶိုၼ်းယဝ်ႉ ဢမ်ႇထတ်းႁႅင်းၸိူင်ႉၼႂ်ၵႆႈယဝ်ႉ ” ဝႃႈၼႆ။

ဝၢႆးလင်သိုၵ်းတဢၢင်း ႁွင်ႉဢဝ်ႁႅင်းၵူၼ်းသိုၵ်းသေ ၵႂႃႇလိုပ်ႈလမ်းၵူၼ်းသိုၵ်းၵဝ်ႈၵၢင်ႉ ၸွမ်းလုမ်းၽွင်းငမ်း ၼႂ်းဝဵင်းၵူတ်ႉၶၢႆၼၼ်ႉသေ တင်းသွင်ၾၢႆႇမီးပၼ်ႁႃၵၼ်မႃး။ ၾၢႆႇသိုၵ်း ၵဝ်ႈၵၢင်ႉၸိူဝ်းၽွင်းငမ်းယူႇ ၼႂ်းဝဵင်းသႅၼ်ဝီၵေႃႈ သိုပ်ႇလိုပ်ႈလမ်းသိုၵ်းတဢၢင်းၸွမ်းၵဵတ်ႉလၢၼ်ႇ တီႈဢိူင်ႇမိူင်းပႃးၼၼ်ႉ ဢွၵ်ႇၵႂႃႇတၢင်း ဝၢၼ်ႈဢီႇၼၢႆး လႄႈ ဢိူင်ႇမိူင်းယဵၼ်ယဝ်ႉ သိုၵ်းတဢၢင်းၶိုၼ်းႁွမ်ႁႅင်းၶိုၼ်ႈမႃး ပေႃႉထုပ်ႉမင်ၵၼ်တင်း သိုၵ်းၵဝ်ႈၵၢင်ႉထႅင်ႈ တီႈႁိမ်းၸဝ်ႈမိူင်းႁူဝ်ဝၢၼ်ႈၵွင်းဢၢႆႇ ဢိူင်ႇမိူင်းပႃးၼၼ်ႉ ဝႃႈၼႆ။

ၵူၼ်းမိူင်းပိုၼ်ႉတီႈၵေႃႉယူႇဝႆႉ ၼႂ်းၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈဝႃး (19/2/2026) ယၢမ်းတၢမ်းၶမ်ႈၼႆႉ သိုၵ်းလွႆ တင်း သိုၵ်းၶႄႇၵဝ်ႈၵၢင်ႉ မင်ႁူဝ်ၵၼ် ပေႃႉထုပ်ႉ ႁႅမ်ၵၼ်ထႅင်ႈတီႈမၢၼ်ႈပဵင်း ၵႄႈၵၢင်ႈသဵၼ်ႈဝီ လႄႈ ၵူတ်ႉၶၢႆ။ ၶဝ်ဢမ်ႇလႆႈၶႂၢင်ႉယိုဝ်းၵွင်ႈလႆႈၼႃႇ ပႃးၶွၼ်ႉပႃးမႆႉပႃးၽႃႉလႅဝ်း ႁႄ မင်ၵၼ်ၽၼ်းၵၼ်ဢိူဝ်ႈ။ ၶဝ်ၸဵပ်းတင်းသွင်ၸုမ်းယဝ်ႉ။ ဢၼ်မၢတ်ႇၼမ်ၸဵပ်းၼမ်ၼႆႉ ပဵၼ်သိုၵ်းလွႆၵႂႃႈ။ ႁႅင်းၵူၼ်းသိုၵ်းလွႆ မီးဢႄႇလိူဝ်ၶႄႇၵဝ်ႈၵၢင်ႉ ။ ၸွမ်းၼၼ်ႉသမ်ႉမီးဝၢၼ်ႈလွႆႁိုဝ်လႃႇ ပေႃးသိုၵ်းၶဝ်ၼင်ႇၵၼ်မင်ၵၼ်ဢမ်ႇပေႉၼႆ သမ်ႉၵႂႃႇႁွင်ႉဢဝ်ၵူၼ်းဝၢၼ်ႈလွႆၶဝ်ပႃးၶွၼ်ႉပႃးမႆႉႁႄ မႃးႁႅမ်ၸွႆႈ ၶဝ် ၼႆထႅင်ႈၼၼ်ႉၼႃႇ” ဝႃႈၼႆ။

ပၼ်ႁႃသိုၵ်းတဢၢင်း တင်း သိုၵ်းၵဝ်ႈၵၢင်ႉ ဢၼ်တႄႇၽိတ်းမေႃးပိူင်ႈၸႂ်ၵၼ်မႃး တီႈဝဵင်းၵူတ်ႉၶၢႆၼႆႉ ၽူႈၶၢၼ်ပၢၵ်ႇ ၾၢႆႇသိုၵ်းတဢၢင်းတႄႉ ဢွၵ်ႇမႃးတွပ်ႇလၢတ်ႈတီႈသိုဝ်ႇၶၢဝ်ႇ ဢၼ်ၸမ်ၸႂ်ၵၼ်တင်းၸုမ်းၶဝ် ၼၼ်ႉဝႃႈ – လွင်ႈၼႆႉၵူၼ်းလူင်ၾၢႆႇၼိူဝ်ၵႄႈလိတ်ႈၵၼ်ယဝ်ႉတူဝ်ႈၵႂႃႇသေ ငဝ်းလၢႆးၶႅမ်ႉလႅပ်ႈယူႇ- ဝႃႈၼႆသေတႃႉ ၼႂ်းပိုၼ်ႉတီႈတေႉတေႉၼႆႉ ၵူၼ်းသိုၵ်းတင်းသွင်ၸုမ်း ယင်းတိုၵ်ႉသိုပ်ႇၶဵင်ႈၶႅင်တေႃႇၵၼ်ဝႆႉ ယူႇ – ဝႃႈၼႆ။

မိူဝ်ႈဝၼ်းတီႈ 13/2/2026 ယၢမ်းၵၢင်ၶမ်ႈ မွၵ်ႈ 9 မူင်းပၢႆ သိုၵ်းတဢၢင်း (TNLA) လႄႈ သိုၵ်းၵဝ်ႈၵၢင်ႉ (MNDAA) ပဵၼ်ပၼ်ႁႃ လွင်ႈၼႃႈတီႈၽွင်းငမ်းသေ ၽိတ်းၵၼ်ထုပ်ႉၵၼ် ထိုင်တီႈပူၼ်ႉၶၵ်ႉမိုဝ်းပဝ်ႇ လၼ်ႇၵွင်ႈတေႃႇၵၼ်သေ ၵူၼ်းသိုၵ်းတင်းသွင်ၾၢႆႇ လႆႈဢွၵ်ႇလိူတ်ႈပဵၼ်ယၢင် တီႈဝဵင်းၵူတ်ႉၶၢႆ မိူင်းတႆးပွတ်းႁွင်ႇ။

လႆႈႁူႉဝႃႈ ယၢမ်းလဵဝ် သိုၵ်းတဢၢင်း ဢၼ်ပၼ်ႇၵၢၼ်ၽွင်းငမ်းတင်းဝဵင်းၼမ်ႉၶမ်းဝႆႉယူႇၼၼ်ႉၵေႃႈ ၸတ်းဢဝ်ႁႅင်းသိုၵ်းမွၵ်ႈ 150 ၵေႃႉ သူင်ႇမႃးမီးဝႆႉၸွမ်းမိူင်းဝီး ဢိူမ်ႈၸမ်ဝဵင်း ၵူတ်ႉၶၢႆဝႆႉၵူၺ်းဢမ်ႇၵႃး ၾၢႆႇသိုၵ်းၵဝ်ႈၵၢင်ႉၵေႃႈ ၸတ်းဢဝ်ႁႅင်းသိုၵ်း တၢင်းဢိူင်ႇမိူင်းၸီး မွၵ်ႈ 400 ၵေႃႉမႃးဢိူမ်ႈၸမ် ဢဝ်တီႈ ယူႇဝႆႉၸွမ်းႁိမ်းဝဵင်းၵူတ်ႉၶၢႆလႄႈ ၵူၼ်းမိူင်းပိုၼ်ႉတီႈ မႆႈၸႂ်ၵူဝ်သဵင်ၵွင်ႈတႅၵ်ႇထႅင်ႈၵမ်းၼိုင်ႈ ၼႆယဝ်ႉ။

ၵူၼ်းမိူင်းၵေႃႉယူႇဝႆႉတီႈဝဵင်းၵူတ်ႉၶၢႆၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ယၢမ်းလဵဝ် ၼႂ်းဝဵင်းတႄႉယဵၼ်ဝႆႉ ယူႇသေတႃႉ ၸွမ်းၼွၵ်ႈဝဵင်းတႄႉ ၵမ်ႉၵဝ်လမ်းမႂ်း၊ မႂ်းလိုပ်ႈၵဝ် ႁဵတ်းၼႆယူႇ။ ၵွပ်ႈၼၼ် ႁဝ်းလႆႈၾၢင်ႉယူႇ ၾၢင်ႉၵိၼ်ႁႄ လႆႈသတိထွမ်ႇၶၢဝ်ႇငၢဝ်းဝႆႉယူႇဢိူဝ်ႈ” ဝႃႈၼႆ။

ဝၢႆးလင်ၽႅၼ်ၵၢၼ်ယၼ်ႇသိုၵ်း 1027 မႃးၼႆႉ သိုၵ်းၵဝ်ႈၵၢင်ႉ တင်း သိုၵ်းတဢၢင်း ႁူမ်ႈၵၼ်ၽွင်းငမ်း ၸႄႈဝဵင်းသႅၼ်ဝီ တင်း ၸႄႈဝဵင်းၵူတ်ႉၶၢႆမႃး ႁိုင်ၶၢဝ်းတၢင်း 2 ပီပၢႆ။ ‘

လွင်ႈသိုၵ်း 2 ၸုမ်းလိုပ်ႈလမ်းၵၼ် ပဵၼ်ပၼ်ႁႃၵၼ်ယူႇယၢမ်းလဵဝ်ၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸူး သိုၵ်း 2 ၸုမ်းယူႇၵေႃႈ ၵပ်းသိုပ်ႇဢမ်ႇလႆႈ။