သိုၵ်းမၢၼ်ႈယိုတ်းမိူင်း ၼႄၶေႃႈဢၢင်ႈ လွင်ႈႁူမ်ႇလူမ်ႈပိုၼ်ႉတီႈၼႆသေ ထူဝ်းသိုၵ်းၶဝ်ႈၼႂ်း ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း၊ တီႉၺွပ်းၵူၼ်းမိူင်း ဢၼ်ၶဝ်ထၢင်ႇထိူမ်သေ တဵၵ်းယွၼ်းငိုၼ်းၵႃႈဢမ်ႇလႆႈဢမ်ႇၸူး ႁဵတ်းႁႂ်ႈၵူၼ်းမိူင်းမႆႈၸႂ် ယၢပ်ႇၽိုတ်ႇၶၢၼ်ၸႂ်။

တႄႇႁူဝ်ပီ 2026 ၼႆႉမႃး သၢႆသိုၵ်းမၢၼ်ႈ ထူဝ်းသိုၵ်းၶဝ်ႈၵူတ်ႇထတ်း ၼႂ်းဝၢၼ်ႈ ၼပၢၼ်းၵျီး၊ ဢိၼ်ႇတေႃး(ပႃႇတိုင်း) လႄႈ ယေႇၶျၢၼ်း ဢိၵ်ႇထႅင်ႈလၢႆလၢႆဝၢၼ်ႈ ၼႂ်းၸႄႈဝဵင်းယႂႃႇငၢၼ်ႇ။

ၼႄၶေႃႈဢၢင်ႈဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉၼႆသေ တီႉၺွပ်းၵူၼ်းမိူင်း 10 ပၢႆ ၵႂႃႇၵုမ်းၶင် ဝႆႉတီႈ ႁူင်းပလိၵ်ႈ။ တဵၵ်းယွၼ်းငိုၼ်းတီႈ ပီႈၼွင်ႉၵူၼ်းႁိူၼ်း ၼိုင်ႈၵေႃႉလႂ် 10 သႅၼ်၊ ပေႃးပၼ် ငိုၼ်း ၸင်ႇပွႆႇတူဝ်ပၼ်ၼႆ ၵူၼ်းပိုၼ်ႉတီႈၵေႃႉၼိုင်ႈ လၢတ်ႈ။

ၽူႈၶၢၼ်ပၢၵ်ႇ ၸုမ်းသိုၵ်းထၼူႉ DSNDA လၢတ်ႈတီႈၽူႈတွႆႇႁွၵ်ႈဝႃႈ-“ ဢမ်ႇမီးလွင်ႈတၢင်းသင် သေတီႉၺွပ်းၵႂႃႇ ၊ မၢင်ၸိူဝ်းပေႃးပၼ်ငိုၼ်း ၸင်ႇလႆႈတူဝ်ၶိုၼ်း ၊ မၢင်ၸိူဝ်း ၶဝ်တီႉၺွပ်းၵုမ်းၶင်ဝႆႉ မီးတီႈ ႁူင်းပလိၵ်ႈဝဵင်းယႂႃႇငၢၼ်ႇ ၊ လၢႆးသိုၵ်းမၢၼ်ႈ  ႁဵတ်းၼႆႉ တီႉၺွပ်းၵႂႃႇၵူၼ်းဝၢၼ်ႈ ပေႃး ယွၼ်း ငိုၼ်းလႆႈ ပွႆႇတူဝ်မႃးၶိုၼ်းသေ  ပေႃးဢမ်ႇလႆႈငိုၼ်းမၢပ်ႇၼႄးဝႃႈ ၵဵဝ်ႇၵွင်ႉၵၼ်တင်းၸုမ်း လုၵ်ႉၽိုၼ်ႉသေ ယဵတ်ႈၶွၵ်ႈ ၸိူင်ႉၼၼ် ပဵၼ်လၢႆးႁဵတ်းၵိၼ်ၶဝ်ၵူၺ်း”- ဝႃႈၼႆ ။ 

လိူဝ်ၼၼ်ႉယၢမ်းလဵဝ် ၾၢႆႇတင်းသိုၵ်းမၢၼ်ႈၵႆႉထူဝ်းသိုၵ်း ၶဝ်ႈတၢင်း ၾၢႆႇတူၵ်းဝဵင်းယႂႃႇငၢၼ်ႇ လႄႈ ၸဵင်ႇၸၢၼ်းဝၼ်းတူၵ်း ဝဵင်းယႂႃႇငၢၼ်ႇ ၼႆလႄႈ ယူႇတီႈၵူၼ်းပိုၼ်ႉတီႈၾၢင်ႉၵၼ်ၵႂႃႇမႃး   ။

မၼ်းၸၢႆးသိုပ်ႇလၢတ်ႈထႅင်ႈဝႃႈ -“တီႈတၢင်းယႂႃႇငၢၼ်ႇၼႆႉ ငဝ်းလၢႆးၵတ်းယဵၼ်ဢၼ်ဝႃႈၼၼ်ႉ ပႆႇမီးၶႃႈ ၊ ယွၼ်ႉၼၼ် ယၢမ်းလဵဝ်ယူႇတီႈၸုမ်းႁဝ်းၶႃႈၵေႃႈ ၶတ်းၸႂ်ဢဝ်လွင်ႈႁူမ်ႇလူမ်ႈပၼ် ၵူၼ်းပိုၼ်ႉတီႈယူႇၶႃႈ ၊ ယူႇတီႈၵူၼ်းမိူင်းၵေႃႈ ထုၵ်ႇလီၾၢင်ႉၵႂႃႇမႃးၶႃႈဢေႃႈ ၊ ဢၼ်လွင်ႈယႂ်ႇၼႆႉ ယႃႇပေႇၵႂႃႇၵဵဝ်ၶွင်ႈၵၼ်တင်း ပလိၵ်ႈ ၊ သိုၵ်းမၢၼ်ႈ လႄႈ ပိဝ်ႇသေႃးထီးၶဝ်လႃးလႃး ”- ဝႃႈၼႆ ။

လိူဝ်ၼၼ်ႉ ၽွင်းမိူဝ်ႈသိုၵ်းမၢၼ်ႈ ထူဝ်းသိုၵ်းၶဝ်ႈၼႂ်းပိုၼ်ႉတီႈၼၼ်ႉ ႁဵတ်းႁၢႆႉထုပ်ႉပေႃႉၵူၼ်းဝၢၼ်ႈထႅင်ႈလႄႈ ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇႁတ်းယူႇသဝ်း ထၢင်ႇႁၢင်ႈလွတ်ႈလႅဝ်း ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈဝႆႉ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ၵူၼ်းမိူင်းပိုၼ်ႉတီႈႁဝ်းၶႃႈ ယၢပ်ႇၸႂ်ၼႃႇ မိူဝ်ႈလဵဝ်ၼႆႉယၢပ်ႇၸႂ်ၼႂ်းၵၢၼ်ႁႃၵိၼ်လဵင်ႉတွင်ႉ ဢမ်ႇမီးလွင်ႈႁူမ်ႇလူမ်ႈ ၶဝ်ႁဵတ်းသင်ၵေႃႈ ဢမ်ႇႁတ်းတွပ်ႇထဵင်သင်ၶႃႈ ၊ ယွၼ်ႉဢမ်ႇမီးလွင်ႈႁူမ်ႇလူမ်ႈလႄႈ ၵူၼ်းၼုမ်ႇၼႂ်းပိုၼ်ႉတီႈဢွၼ်ၵၼ်ပၢႆႈဢွၵ်ႇႁိူၼ်းယေးၸဝ်ႈၵဝ်ႇၵေႃႈ မီးတင်းၼမ်”- ဝႃႈၼႆ  ။

လိူဝ်ၼၼ်ႉ တႄႇၵၢင်လိူၼ် ၾႅပ်ႉပိဝ်ႊရီႊၼႆႉမႃး တီႈၾၢႆႇဢွၵ်ႇဝဵင်းယႂႃႇငၢၼ်ႇၼႆႉသိုၵ်းမၢၼ်ႈ ဢဝ်ဢဵၼ်ႁႅင်း 50 ထူဝ်းသိုၵ်း ၶဝ်ႈၼႂ်းဝၢၼ်ႈ လွၵ်ႇငိုတ်ႈတဵၵ်းဢဝ် ၵႃးၵူၼ်းဝၢၼ်ႈသေ ၸႂ်ႉၵူၼ်းဝၢၼ်ႈသႂ်ႇၼမ်ႉမၼ်းၵႃး ပႃးဝႃႈၼႆ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။