မိူဝ်ႈဝႃး ဝၼ်းတီႈ 16 လိူၼ်ၾႅပ်ႉပိဝ်ႊရီႇ ယၢမ်းဝၢႆးဝၼ်းမွၵ်ႈ 3 မူင်းၶိုင်ႈ ၾႆးမႆႈႁၢၼ်ႉၶၢႆၵုၼ်ႇ ၼႂ်းၵၢတ်ႇလူင်ဝဵင်းလႃႈသဵဝ်ႈ ၼႂ်းၶၢဝ်းယၢမ်းလဵဝ်ၵၼ် သၢမ်တီႈ ၵူၼ်းမိူင်းတၼ်းၶႄ ၶိုတ်းၶၢဝ်းယၢမ်းလႄႈ ဢမ်ႇတၼ်းလူႉသုမ်းၶူဝ်းၶွင် ၼမ် ဝႃႈၼႆ။

ၵူၼ်းမိူင်းၵေႃႉယူႇဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ပဵၼ်ၽွင်းႁဝ်းတိုၵ်ႉမီးၼႂ်းၵၢတ်ႇ၊ တိုၵ်ႉႁႃသိုဝ်ႉၶူဝ်းယူႇ။ ၵူၼ်းဢွၼ်ၵၼ်သၢၼ်ႈ ၽိူဝ်ႇထၢမ်တူၺ်းပဵၼ်ႁင်လႃႇၼႆ။ ၾႆးမႆႈၼႆၼၼ်ႉၼႃႇ။ မႆႈသၢမ်တီႈၽွမ်ႉၽွမ်ႉၵၼ်ဢေႃႈ။ ၵတ်ႉၵႃႈ တၼ်းၶႄၾႆးၶိုတ်းၵွၼ်ႇဢေႃႈ။ သင်ဢမ်ႇၼၼ်တႄႉ တေသုမ်း ႁူဝ်ပေႃးလၢၼ်ႉပေႃးလွၵ်ႇၵွၼ်ႇၶႃႈ ဢေႃႈ။ ပဵၼ်ၼႂ်းၵၢတ်ႇလူင်ၵမ်းသိုဝ်ႈၶႃႈလူး” ဝႃႈၼႆ။

ယွၼ်ႉၾႆးၵိုင်ႉၵၢင်ႉလုၵ်ႉမႆႈၵႂႃႇၶၢဝ်းလဵဝ်ၵၼ်သၢမ်တီႈ လႄႈ ၵူၼ်းမိူင်းၵမ်ႈၼမ်ဢွၼ်ၵၼ်ႁူင်လိုဝ်းၵၼ်ဝႃႈ ပဵၼ်ႁွႆးမိုဝ်းၸုမ်းၸီႇပိၼ်ႇ တႂ်ႈသိုၵ်းမၢၼ်ႈႁဵတ်း- ၶႂ်ႈၵဝ်းႁႂ်ႈငဝ်းလၢႆးဝၢၼ်ႈမိူင်းသုၵ်ႉ ၵူၺ်းဝႃႈၼႆ။

ၸဝ်ႈႁၢၼ်ႉၶၢႆၵုၼ်ႇၼႂ်းၵၢတ်ႇလူင်ဝဵင်းလႃႈသဵဝ်ႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၾႆးမႆႈသၢမ်ယူင်ႇ။ တႃႇတီႈၼိုင်ႈၼႆႉ မႆႈတီႈဝႆႉၶူဝ်းၶွင် (ၵူဝ်ႇတွင်ႇ) ၵျႅၼ်ႇတၢႆးဢွင်ႇ ဢၼ်ၶၢႆ ၶိူင်ႈပရိၵ်ႉၶရႃႇ သၢင်ႇၵၢၼ်းၸိူဝ်း ၼၼ်ႉၼႃႇ။ တီႈပတွၵ်ႉယူင်ႇ တီႈၼိုင်ႈ၊ 555 မိူင်းဝုၼ်းယူင်ႇ တီႈၼိုင်ႈ၊ မႆႈၵမ်းလဵဝ် သၢမ်တီႈ ၶၢဝ်းလဵဝ်ၵၼ်ၼႆႉ မိူၼ်တင်ႈၸႂ်ၸုတ်ႇၽွမ်ႉၽွမ်ႉ ၵၼ်ဝႆႉ။ ၵူၼ်းၼႂ်းၵၢတ်ႇတႄႉဝႃႈ ၸီႇပိၼ်ႇၸိူဝ်းၼႆႉ လၵ်ႉၵႂႃႇပွႆႇၾႆးသိၵ်ႉလိၵ်ႉဝႆႉႁႂ်ႈမၼ်းမႆႈၵၢင်ၶမ်ႈၵၢင်ၶိုၼ်းၸိူင်ႉၼၼ်ၼႆဝႃႇ။ သမ်ႉဢမ်ႇမႆႈၵၢင်ၶိုၼ်းႁႄ မႃးမႆႈၶၢဝ်း ၵၢင်ဝၼ်းၼႆႉ ၼၼ်ႉၼႃႇ။ တၼ်းႁူႉႁႄ တၼ်းၶႄႇလႄႈ ဢမ်ႇတၼ်းမႆႈၵႂႃႇၼမ်။ တႃႇႁႂ်ႈပိူၼ်ႈၶႄလႆႈၶဝ်ပေႃး ႁၢင်ႈႁႅၼ်းဝႆႉ ၵမ်းလဵဝ်ယဝ်ႉ။ ၶဝ်ၶႂ်ႈႁဵတ်းႁႂ်ႈသုၵ်ႉသၵ်ႉၵူၺ်း” ဝႃႈၼႆ။

ဝၢႆးလင်ပၢင်တိုၵ်းၽႅၼ်ၵၢၼ်ယၼ်ႇသိုၵ်း 1027 ယဝ်ႉၼႆႉ ၼႂ်းဝဵင်းလႃႈသဵဝ်ႈ မီးၽူႈလၵ်ႉၵူၼ်းၸူၼ်လိူင်ႇၼမ် လႄႈ ၵၢၼ်ၶႃႈႁႅမ်ၵၼ်တၢႆ ၸိူဝ်းၼႆႉၵေႃႈ ၼမ်ႁႅင်းမႃးတေႉတေႉ။ ၵွပ်ႈ ၼၼ် ၵူၼ်းမိူင်းလႆႈယူႇသဝ်းၼႂ်းၵႄႈ ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။

ၽွင်းပၢင်တိုၵ်းယဝ်ႉ သိုၵ်းၵဝ်ႈၵၢင်ႉ လႄႈ ၸုမ်းသိုၵ်းၵူၼ်းၼုမ်ႇမၢၼ်ႈ PDF ၶဝ်ႈၵုမ်းၵမ်ဝဵင်းသေ ပၼ်ႇၵၢၼ်ၽွင်းငမ်းဝဵင်းႁိုင် ၶၢဝ်းတၢင်း 9 လိူၼ် ယွၼ်ႉမိူင်းၶႄႇပၼ်ႁႅင်းဢီးမိပ်ႇငႅၼ်းႁႂ်ႈသိုၵ်းၵဝ်ႈၵၢင်ႉထွႆဢွၵ်ႇၶိုၼ်းၼႂ်းဝဵင်းၵႂႃႇ ၵၢင်လိူၼ်ဢေႇပရႄႇ ပီ 2025 ဝၢႆးပွႆးသွၼ်းၼမ်ႉသေ သိုၵ်းမၢၼ်ႈယိုတ်းမိူင်းၸင်ႇၶဝ်ႈမႃးၵုမ်းၵမ်ၶိုၼ်း ၼႆယဝ်ႉ။