ႁွင်ႈၵၢၼ်ၾၢႆႇၵုမ်းထိင်းတၢင်းပဵၼ် (DDC) မိူင်းထႆး ပိုၼ်ၽၢဝ်ႇဢွၵ်ႇမႃးဝႃႈ – မီးႁႅင်းၵၢၼ်ၸၢႆး ၵူၼ်းမိူင်းမၢၼ်ႈၵေႃႉၼိုင်ႈ ယူႇၼႂ်းၸႄႈတွၼ်ႈရယွင်း၊ မိူင်းထႆး တၢႆယွၼ်ႉတၢင်းပဵၼ်မႃမႃႈၼႂ်းပီ 2026 ၼႆႉဝႃႈၼႆ။
ၵေႃႉတၢႆယွၼ်ႉတၢင်းပဵၼ်မႃမႃႈ မိူဝ်ႈဝၼ်းတီႈ 13/02/2026 ၼႆႉ ဢႃယုမၼ်းၸၢႆးတိုၵ်ႉမီး 36 ပီ ၊ မိူဝ်ႈလိူၼ်တီႊသႅမ်ႊပိူဝ်ႊ 2025 ပူၼ်ႉမႃးၼႆႉ မၼ်းၸၢႆးႁႃး မႃၶၢင်ႈတၢင်း ၶူပ်းတီႈမိုဝ်း။ မိူဝ်ႈၼၼ်ႉ မၼ်းၸၢႆး ဢမ်ႇလႆႈၵႂႃႇသမ်းၶဵမ်ယႃႈႁႄႉၵင်ႈတၢင်းပဵၼ်။ ထိုင်မႃးၼႂ်းဝၼ်းတီႈ 23 လိူၼ်ၵျႅၼ်ႊၼိဝ်ႊရီႊၼႆႉ မၼ်းၸၢႆးပဵၼ် ထူၺ်ႈၸႂ်ၵပ်ႉ၊ ႁူဝ်ၶႆႈ၊ မဝ်း။ ဝၢႆးၼၼ်ႉ လၢႆဝၼ်းၵေႃႈ လႆႈလူႉတၢႆၵႂႃႇ။
ယၢမ်းလဵဝ် မႃတူဝ်ၼၼ်ႉ ၽူႈမီးပုၼ်ႈၽွၼ်း ၵႂႃႇႁႃၶိုၼ်းၵေႃႈဢမ်ႇႁၼ်လႄႈ တၢႆႁိုဝ်တိုၵ်ႉမီးယူႇႁိုဝ်ၵေႃႈဢမ်ႇႁူႉ။ ဢွၼ်ၵၼ်မႆႈၸႂ်ယူႇဝႃႈ ၵူဝ်မၼ်းၵႂႃႇၶူပ်းထႅင်ႈတၢင်ႇၵေႃႉသေ ၵူဝ်မီးၵူၼ်းတၢႆယွၼ်ႉတၢင်းပဵၼ်မႃမႃႈၼမ်မႃးတိၵ်းတိၵ်း ဝႃႈၼႆ။
ၸွမ်းၼင်ႇ ၶေႃႈပိုၼ်ၽၢဝ်ႇ DDC သေ မိူဝ်ႈပီၵၢႆၵေႃႈ ၼႂ်းလၢႆၸႄႈတွၼ်ႈမိူင်းထႆး မီးၵူၼ်းလူႉတၢႆယွၼ်ႉတၢင်းပဵၼ်မႃမႃႈ မွၵ်ႈ 7 ၵေႃႉ။ ၵူၼ်းလူႉတၢႆၵႂႃႇၸိူဝ်းၼၼ်ႉ ပဵၼ်ၵူၼ်း ဢမ်ႇလႆႈသမ်းၶဵမ် ယႃႈႁႄႉၵင်ႈ ဝၢႆးမႃၶူပ်း ဝႃႈၼႆ။
ၽူႈမီးပုၼ်ႈၽွၼ်းၾၢႆႇပၢႆးယူႇလီၶဝ်ပၼ်ၾၢင်ႉဝႆႉဝႃႈ – သင်ၺႃးတူဝ်သတ်းၶူပ်းၸိုင် ႁႂ်ဢဝ်ၼမ်ႉ သုၵ်ႈလၢင်ႉပၼ်ၸွမ်းၵမ်းလဵဝ်ယဝ်ႉ ၵႂႃႇယူတ်းယႃတူဝ်။ တၢင်းပဵၼ်မႃမႃႈၼႆႉ သင် ၼႄၾၢင်ႁၢင်ႈမႃးယဝ်ႉၸိုင် ၵမ်ႈၼမ် ၸၢင်ႈလူႉတၢႆ ဝႃႈၼႆ။
တၢင်းပဵၼ်မႃမႃႈၼႆႉ ၸၢင်ႈၸပ်းမႃးတီႈ တူဝ်သွမ်ၼူမ်း ၸိူဝ်းမီးၸိူဝ်ႉမႅင်းတၢင်းပဵၼ်ၶဝ် ၶူပ်း၊ ယၢႆးသႂ်ႇ။ မႃ လႄႈ မႅဝ်းၼႆႉ ပဵၼ်ဢၼ်မီးၽေးလိူဝ်ပိူၼ်ႈ။
တႃႇတၢင်းပဵၼ် တေၼႄၾၢင်ႁၢင်ႈဢွၵ်ႇမႃးၼၼ်ႉ တေၸႂ်ႉၶၢဝ်းယၢဝ်းႁိုင် 2 ဝူင်ႈထိုင် 2 လိူၼ်၊ မၢင်ၸိူဝ်း ႁိုင်ထိုင် 1 ပီ။ ၵွပ်ႈၼၼ်လႄႈ သင်ၺႃးတူဝ်သတ်းဢၼ်လဵင်ႉဝႆႉၸွမ်း ႁိူၼ်း၊ မႃ/မႅဝ်း ၶၢင်ႈတၢင်း ၶူပ်း/ယၢႆးၸိုင် ႁႂ်ႈၵႂႃႇယူတ်းယႃတူဝ်တီႈ ႁွင်ႈယႃ၊ ႁူင်းယႃ ၶၢၼ်ၶၢၼ်ဝႆးဝႆးၼႆ ၽူႈမီးပုၼ်ႈၽွၼ်းၾၢႆႇပၢႆးယူႇလီၶဝ် တိုၵ်းသူၼ်းဝႆႉ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ