ၵူၼ်းမိူင်းဝဵင်းဝၢၼ်ႈငႂ်ႈ(ယႂႃႇငၢၼ်ႇ ) 4 ၵေႃႉ ထုၵ်ႇၸုမ်းဢမ်ႇႁူႉၾၢႆႇတီႉၺွပ်းၵႂႃႇ ႁိုင်ၶၢဝ်းတၢင်း 2 ဝူင်ႈပၢႆ ၸင်ႇထူပ်းႁၼ်တူဝ်တၢႆၶိုၼ်း ။
လွင်ႈၼႆႉ ပဵၼ်ၵႂႃႇ မိူဝ်ႈဝၼ်းတီႈ 27 လိူၼ်ၵျႅၼ်ႊၼိဝ်ႊရီႊ ယၢမ်းၵၢင်ၶမ်ႈ 10 မူင်း မီးၸုမ်းဢမ်ႇႁူႉၾၢႆႇ ၶဝ်ႈၼႂ်းဝၢၼ်ႈ လႄႇၵၢႆး ( လယ်ကိုင်း ) ၼႂ်းၸႄႈဝဵင်းယႂႃႇငၢၼ်ႇ ၶဝ်ႈတီႉၺွပ်းဢဝ်ၵူၼ်းဝၢၼ်ႈၵႂႃႇ 4 ၵေႃႉ ။
ထိုင်မႃးလိူၼ် ၾႅပ်ႊပိဝ်ႊရီႊ ဝၼ်းတီႈ 9 ႁိုင်ၶၢဝ်းတၢင်း 2 ဝူင်ႈပၢႆယဝ်ႉၸင်ႇထူပ်းႁၼ်တူဝ်တၢႆ ၵူၼ်း4 ၵေႃႉၼႂ်းထိူၼ်ႇ ႁိမ်းတီႈၾၢႆႇႁွင်ႇဝၢၼ်ႈလႄႇၵၢႆး ။
ၵူၼ်းၸၢႆးဢႃယု 30 ပီလၢတ်ႈၽူႈတွႆႇႁွၵ်ႈဝႃႈ -“ ႁၼ်တီႈတၢင်းၾၢႆႇႁွင်ႇဝၢၼ်ႈ ၊ ဢၼ်ထုၵ်ႇ တီႉၺွပ်း ၵႂႃႇၼၼ်ႉၵေႃႈ ဢမ်ႇႁူႉဝႃႈပဵၼ်သင်လႄႈ ထုၵ်ႇတီႉၺွပ်း သမ်ႉၶႃႈႁႅမ်ၸိူင်ႉၼႆပႃး ၊ တီႈတူဝ်တၢႆၼၼ်ႉ ႁၼ်ႁွႆးမိတ်ႈပဵၼ်လၢႆႁွႆး ၊ ယွၼ်ႉႁဵတ်းၵၢၼ်မိူင်းလႄႈ တီႉၺွပ်းဢမ်ႇၸႂ်ႈ ၊ မီးလွင်ႈတၢင်းသင်လႄႈ ၶႃႈႁႅမ်ၵေႃႈၽႂ်ဢမ်ႇႁူႉ ၊ ယိပ်းၵွင်ႈၵၢင်ႇသေ ပေႉၵိၼ်ၵူၼ်းမိူင်း ၶႂ်ႈႁဵတ်းသင်ၵေႃႈႁဵတ်းၵႂႃႇၸိူင်ႉၼႆ ”- ဝႃႈၼႆ ။
ၵူၼ်းၸိူဝ်းထုၵ်ႇတီႉၺွပ်းၵႂႃႇၼၼ်ႉ ပဵၼ်လုင်းၸၢၼ်ႇသူၺ်ႇမိၼ်ႉ ဢႃယု 54 ပီ ၊ လုင်းၵျေႃႇမူဝ်းတူႇ ဢႃယု 44 ပီ ၊ မဝေႇသူႉလၢႆ ဢႃယု 44 ပီလႄႈ ၵူၼ်းၸၢႆးဢႃယု 63 ပီ – ႁူမ်ႈသဵင်ႈ 4 ၵေႃႉ ။
ၵူၼ်းဢၼ်ထုၵ်ႇတီႉၺွပ်းၵႂႃႇ4 ၵေႃႉၼၼ်ႉ ပဵၼ်ၵူၼ်းဢမ်ႇၵဵဝ်ၶွင်ႈၵၼ်တင်း ၸုမ်းယိပ်းၵွင်ႈၵၢင်ႇၸုမ်းလႂ်လႄႈ ၊ ဢမ်ႇၸႂ်ႈ ၵူၼ်းတူင်ႉၼိုင် ၵၢၼ်မိူင်း ။ ၸုမ်းဢၼ်မႃးတီႉၺွပ်း ၸုမ်းဢၼ်ၶႃႈႁႅမ်ၸိူဝ်းၶဝ်ၼၼ်ႉပဵၼ်ၽႂ် ၸုမ်းလႂ်တႄႉတႄႉၼႆ ဢမ်ႇမီးၽႂ်ယိုၼ်ယၼ် ၊ ၵူၼ်းပိုၼ်ႉတီႈတႄႉလၢတ်ႈဝႃႈ ၸၢင်ႈပဵၼ်လႆႈ ၸုမ်းလုၵ်ႉၽိုၼ်ႉ PDF ၼႂ်းပိုၼ်ႉတီႈလႄႈ ၸုမ်းပိဝ်ႇသေႃးထီး တႂ်ႈသိုၵ်းမၢၼ်ႈၼႂ်းပိုၼ်ႉတီႈၼႆယဝ်ႉ ။
တီႈႁိမ်းႁွမ်းဝၢၼ်ႈ လႄႇၵၢႆးၼၼ်ႉ မီးၸုမ်းသိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်းမိူင်းၼႂ်းပိုၼ်ႉတီႈ (ဒေသခံပြည်သူ့ကာကွယ်ရေးတပ်ဖွဲ့ ) တူင်ႉၼိုင်ၵႂႃႇမႃး ။ယွၼ်ႉၵူၼ်းမိူင်းလႄႈ ၵၢင်ႉၵႄႇ ၵႆႉထုၵ်ႇၶႃႈႁႅမ် ၊ ၵႆႉထုၵ်ႇတီႉၺွပ်းလႄႈ ႁဵတ်းႁႂ်ႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈၼႆယဝ်ႉ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ပေႃးယိပ်းၵွင်ႈၵၢင်ႇၼႆႉ လႆႈၵူဝ်ၵူႈၸုမ်းယဝ်ႉ ၊ ပေႃးဢမ်ႇပဵင်းပေႃးၸႂ်သင်ၵေႃႈ ၶဝ်တီႉၺွပ်း ႁႅမ် ၵမ်းလဵဝ် ၊ ၵူၼ်းမိူင်းႁဝ်းၶႃႈၵူၺ်း လႆႈၵူဝ်ယူႇတႃႇသေ ၊ ဢမ်ႇႁဵတ်းသင်ၵေႃႈ လႆႈၵူဝ်”-ဝႃႈၼႆ ။
လိူဝ်ၼၼ်ႉယၢမ်းလဵဝ်တီႈၾၢႆႇဢွၵ်ႇဝဵင်းယႂႃႇငၢၼ်ႇၼႆႉသိုၵ်းမၢၼ်ႈ ဢဝ်ဢဵၼ်ႁႅင်း 50 ထူဝ်းသိုၵ်း ၶဝ်ႈၼႂ်းဝၢၼ်ႈ လွၵ်ႇငိုတ်ႈတဵၵ်းဢဝ် ၵႃးၵူၼ်းဝၢၼ်ႈသေ ၸႂ်ႉၵူၼ်းဝၢၼ်ႈသႂ်ႇၼမ်ႉမၼ်းၵႃး ပႃးဝႃႈၼႆ ။
ၼၢင်းယိင်းၼႂ်းပိုၼ်ႉတီႈဝႃႈ – “ ပေႃးၵူၼ်းထုၵ်ႇၶႃႈႁႅမ်ၼိုင်ႈပွၵ်ႈၵေႃႈ ၶဝ်(သိုၵ်းမၢၼ်ႈ ) တေထူဝ်းသိုၵ်းၶဝ်ႈၼႂ်းဝၢၼ်ႈၼိုင်ႈပွၵ်ႈ ၊ ယဝ်ႉၵေႃႈဢဝ်ၵႃးၵူၼ်းဝၢၼ်ႈ ၸႂ်ႉၵူၼ်းဝၢၼ်ႈသႂ်ႇပၼ်ၼမ်ႉမၼ်းၵႃးသေ ၶိုၼ်းၸႂ်ႉၵူၼ်းဝၢၼ်ႈၵႂႃႇႁေႃႈၵႃးပၼ်ထႅင်ႈလူးၵွၼ်ႇ”- ဝႃႈၼႆ ။
တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ