ၶူဝ်ၼႂ်းႁူၺ်ႈၵိုတ်ႈ ၼိူဝ်သဵၼ်ႈတၢင်းလူင်ၵၢၼ်ၵႃႉၶၢႆ မိူင်းမၢၼ်ႈ- မိူင်းၶႄႇ ၵႄႈၵၢင် ဝဵင်းၼွင်ၶဵဝ် – ဝဵင်းၵျွၵ်ႉမႄး ဢၼ်လူႉၵွႆၵႂႃႇၽွင်းပၢင်တိုၵ်း သိုၵ်းမၢၼ်ႈ တင်း သိုၵ်းတဢၢင်း (TNLA) ယိုဝ်းၵၼ် ၼႂ်းမိူင်းတႆးပွတ်းႁွင်ႇၼၼ်ႉ ၾၢႆႇသိုၵ်းမၢၼ်ႈမူၼ်ႉမႄး ႁဵတ်းသၢင်ႈမႂ်ႇၶိုၼ်းသေ ယဝ်ႉတူဝ်ႈလီငၢမ်းၵႂႃႇ ၼႂ်းႁူဝ်လိူၼ်ၾႅပ်ႉပိဝ်ႊရီႇၼႆႉ ၼႆယဝ်ႉ။

မိူဝ်ႈၼႆႉဝၼ်းတီႈ 12/2/2026 တႄႇယၢမ်းၵၢင်ၼႂ် 9 မူင်း သိုၵ်းမၢၼ်ႈ ပွႆႇပၼ်ရူတ်ႉၵႃးလတ်းၶၢမ်ႈၵႂႃႇမႃးၶိုၼ်း ပဵၼ်တၢင်းၵၢၼ်ယဝ်ႉ ဝႃႈၼႆ။

လႆႈႁူႉဝႃႈ ၶူဝ်ဢၼ်သိုၵ်းမၢၼ်ႈမူၼ်ႉမႄးသၢင်ႈၶိုၼ်းမႂ်ႇၼႆႉ ႁပ်ႉလႆႈၼမ်ႉၼၵ်းရူတ်ၵႃး ဢၼ်တၢင်ႇၵုၼ်ႇ ထိုင် 50 တၼ်ႊ ၵူၺ်းလႄႈ ၵႃးလူင်ၸိူဝ်းတၢင်ႇၵုၼ်ႇလိူဝ်ၼမ်ႉၼၵ်းဢၼ်မၵ်းမၼ်ႈဝႆႉၼၼ်ႉတႄႉ ယင်းပႆႇလတ်းတႆႇၶၢမ်ႈလႆႈ ဝႃႈၼႆ။

ယွၼ်ႉၸုမ်းသိုၵ်းႁၢင်ႈမၢၵ်ႇသေၶူဝ်ၼႂ်းႁူၺ်ႈၵိုတ်ႈလႆႈ ႁၵ်းတူၵ်းလူႉၵွႆၵႂႃႇ မိူဝ်ႈဝၼ်းတီႈ 10 လိူၼ်ၵျူႊလၢႆႊ ပီ 2025 ပူၼ်ႉမႃးၼၼ်ႉ။ တေႃႇထိုင်ယၢမ်းလဵဝ် ပဵၼ်ၸုမ်းလႂ်ယႃႉၶူဝ်ၵွႆ ဢၼ်ဝႃႈၼၼ်ႉ သိုၵ်းမၢၼ်ႈ တင်း သိုၵ်းတဢၢင်း ဢမ်ႇမီးၽႂ်ယွမ်းႁပ်ႉ ပိုၼ်ၽၢဝ်ႇလိၵ်ႈ ဢွၵ်ႇမႃးယိုၼ်ယၼ်ပဵၼ်တၢင်းၵၢၼ်သေၸုမ်း။