မိူဝ်ႈၼႆႉ ဝၼ်းတီႈ 12 လိူၼ်ၾႅပ်ႉပိဝ်ႊရီႇ ယၢမ်းၵၢင်ၼႂ် သိုၵ်းမၢၼ်ႈ တင်း သိုၵ်းၶၢင် ပဵၼ်ပၢင်တိုၵ်းၵၼ်ႁၢဝ်ႈ ႁႅင်း ႁိမ်းတပ်ႉပႂ်ႉဝဵင်းမႂ်ႇ (ဝိုင်းမော်မြို့) ခလရ – 58 ၼႂ်းၸႄႈမိူင်းၶၢင် ၼႆယဝ်ႉ။
တႄႇၶၢဝ်းယၢမ်းၵၢင်ၼႂ်ၸဝ်ႉ သဵင်ၵွင်ႈသဵင်မၢၵ်ႇလူင်ပၼ်းႁႅင်း ၸွမ်းႁိမ်းတပ်ႉသိုၵ်းမၢၼ်ႈ ၶလယ (58) ၵူၺ်းဢမ်ႇၵႃး ၸွမ်းတပ်ႉပၢင်သဝ်းသိုၵ်းမၢၼ်ႈၸွမ်းသၼ်လွႆ ႁိမ်းၶူဝ်လူင်ပလမိၼ်းထိၼ်ႇ ၼၼ်ႉၵေႃႈ သိုၵ်းတင်းသွင်ၸုမ်း ယိုဝ်းၵၼ်ဝႆႉႁၢဝ်ႈႁႅင်းၼႆ ၵူၼ်းမိူင်းၼႂ်းပိုၼ်ႉတီႈ ဝဵင်းမႂ်ႇ ၸႄႈမိူင်းၶၢင် လၢတ်ႈၼင်ႇၼႆ။
“သဵင်ၵွင်ႈသဵင်မၢၵ်ႇတႄႇပၼ်းမႃး မိူဝ်ႈၶၢဝ်းၵၢင်ၼႂ် 6 မူင်းၼၼ်ႉ။ ၶဝ်တႄႇၶဝ်ႈလူမ်ႇ တပ်ႉၵႃႇၵိၼ်းသိုၵ်းမၢၼ်ႈ 58 ။ ယဝ်ႉၵေႃႈ ၶဝ်ႈလူမ်ႇတိုၵ်းတပ်ႉမၢၼ်ႈၸွမ်းသၼ်လွႆ ဢၼ်မၢၼ်ႈၶဝ်ဢဝ်ႁူမ်ႇလူမ်ႈႁေႉဝႆႉတၢင်းၶဝ်ႈၵႂႃႇ ၼႂ်းဝဵင်းၸေႈၼႃး (မျိတ်ႉၵျီးၼႃး) ၼၼ်ႉ။ မိူဝ်ႈလဵဝ် သိုၵ်းမၢၼ်ႈဢဝ်ပႃးႁိူဝ်းမိၼ်ႁႄတိုၵ်းယူႇဢေႃႈ” ဝႃႈၼႆ။
တပ်ႉသိုၵ်းမၢၼ်ႈ ၶလယ 58 ဢၼ်မီးၼႂ်းၸႄႈဝဵင်း ဝဵင်းမႂ်ႇၼၼ်ႉ ႁၢင်ႇၵႆၵၼ်တင်း ၼႂ်းဝဵင်းမွၵ်ႈ 4 လၵ်းၵူၺ်းသေ မီးၼိူဝ်သဵၼ်ႈတၢင်းၵႂႃႇ လႅၼ်လိၼ်ၵၢၼ်ႇပၢႆႇတီႇဝႆႉ ၼႆယဝ်ႉ။
မိူဝ်ႈႁၢင်လိူၼ်ထူၼ်ႈၼိုင်ႈ ၵျႅၼ်ႊၼိဝ်ႊရီႇ လႄႈ ႁူဝ်လိူၼ်ထူၼ်ႈသွင် ၾႅပ်ႉပိဝ်ႊရီႇၼၼ်ႉ သိုၵ်းၶၢင် KIA တင်း ၸုမ်းသိုၵ်းဢူၺ်းလီ KPDF ၶဝ်ႁူမ်ႈၵၼ် ယိုတ်းဢဝ် တပ်ႉပၢင်သဝ်းသိုၵ်းမၢၼ်ႈ ဢၼ်တင်ႈဝႆႉၸွမ်းသဵၼ်ႈတၢင်း ဝဵင်းမႂ်ႇ – ၵၼ်ႇပၢႆႇတီႇၼၼ်ႉ။
သိုၵ်းၶၢင် တင်း ၸုမ်းဢူၺ်းလီၶဝ်ၼႆႉ ပဵၼ်ပၢင်တိုၵ်းၵၼ်တင်းသိုၵ်းမၢၼ်ႈ ၼႂ်းၸႄႈဝဵင်းၽႃၵၢၼ်ႉ၊ ဝဵင်းမႂ်ႇ၊ တၼၢႆး၊ ဢိၼ်းတေႃႇၵျီး (ၼွင်မႄႈမၢႆႈ) ၸိူဝ်းၼႆႉၵူၺ်းဢမ်ႇၵႃး ၼႂ်းဝဵင်းမၢၼ်ႈမေႃႇၵေႃႈ ယင်းတိုၵ်ႉပဵၼ်ပၢင်တိုၵ်းၵၼ်ႁၢဝ်ႈႁႅင်းယူႇ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ