ဝၢႆးသေ ပၢင်တိုၵ်းၽႅၼ်ယၢၼ်ႇသိုၵ်း 1027 ဢၼ်ၸုမ်းဢူၺ်းလီပွတ်းႁွင်ႇ သၢမ်ပီႈၼွင်ႉၼမ်းတိုၵ်းၼၼ်ႉ ယဝ်ႉတူဝ်ႈ ၵူၼ်းႁဵတ်းၵၢၼ်ၵျႃႊၽျႅၼ်ႉ ၸိူဝ်းဢၼ်မူၵ်းယူႇၸွမ်းၼႃႈလိၼ်သိုၵ်းၸၢဝ်းၶိူဝ်းၵုမ်း မိူၼ်ၼင်ႇ ၼႃႈလိၼ် သိုၵ်းၵဝ်ႈၵၢင်ႉ လႄႈ သိုၵ်းဝႃႉၵုမ်းၸိူဝ်းၼၼ်ႉ ၽူင်ႉပၢႆႈၽႅဝ်ၸွတ်ႇတူဝ်ႈၵႂႃႇၸွမ်းၼႂ်းမိူင်းတႆးလႄႈ လၢႆမိူင်း ။

သိုၵ်းမၢၼ်ႈသမ်ႉ လိုပ်ႈလမ်းတီႉၺွပ်းၸွမ်း ဢွင်ႈတီႈဢၼ်ၵျႃႊၽျႅၼ်ႉပၢႆႈမူၵ်းသွၼ်ႈဝႆႉၸိူဝ်းၼၼ်ႉ ။ လွင်ႈၼႆႉ ၵူၼ်းၸိူဝ်းလဵပ်ႈႁဵၼ်းၵၢၼ်မိူင်းတႄႉ တိုၵ်ႉဢွၼ်ၵၼ်ငမ်းငဝ်းဝႃႈ သိုၵ်းမၢၼ်ႈၶႂ်ႈလႆႈၸိုဝ်ႈလီ တႃႇပၢင်လိူၵ်ႈတင်ႈႁႃႉ ဢမ်ႇၼၼ် ဢမ်ႇလႆႈၽွၼ်းပၢင်ႈသင်တီႈၵျႃႊၽျႅၼ်ႉယဝ်ႉလႄႈ လိုပ်ႈလမ်း ဝႃႈၼႆ ။

ၼႃႈသိုၵ်းမၢၼ်ႈ ပႆႇလိူၵ်ႈတင်ႈၼၼ်ႉ ၸဵမ်ဢဝ်မိူင်းၶႄႇ မိူင်းဢမေႊရိၵၼ်ႊ ၸိူဝ်းၼႆႉ သႂ်ႇၸႂ်ၼိူဝ်ၵၢၼ် ၽဵဝ်ႈမူၺ်ႉၸုမ်းၵျႃႊၽျႅၼ်ႉမႃးတႄႉတႄႉ။ ၾၢႆႇၼိုင်ႈၵေႃႈ သိုၵ်းမၢၼ်ႈ ၶႂ်ႈႁႃႁူးဢွၵ်ႇၵၢၼ်မိူင်းမိူင်းမၢၼ်ႈလႄႈ ၸင်ႇဢဝ်တိုဝ်ႉတၢင်းၼႆႉသေ တဵၵ်းလိုပ်ႇလမ်းတီႉၺွပ်းဢဝ်လိူင်ႈ ၸုမ်းၵျႃႊၽျႅၼ်ႉမႃးၶိူဝ်းယႂ်း။

ၸဵမ်မိူဝ်ႈ ပၢင်တိုၵ်းယၼ်ႇသိုၵ်း 1027 ႁၢဝ်ႈႁႅင်းၼၼ်ႉသေ ၸုမ်းၵျႃႊၽျႅၼ်ႉၸိူဝ်းဢၼ်ယၢမ်ႈယူႇၸွမ်းၼႂ်းပိုၼ်ႉတီႈ ၸုမ်းယိပ်းၵွင်ႈၵၢင်ႇၸိူဝ်းၼႆႉ ၶၢႆႉပၢႆႈလတ်းၸူးဢွင်ႈတီႈဢၼ်တေၸၢင်ႈယူႇလွတ်ႈ ။ မိူဝ်ႈၽွင်း ၸုမ်းၵျႃႊၽျႅၼ်ႉ ၶၢႆႉလၢႆႈတီႈယူႇၼၼ်ႉ သမ်ႉမီးၸုမ်းယိပ်းၵွင်ႈၵၢင်ႇၵဵဝ်ႇၶွင်ႈၸွမ်း ၸဵမ်ဢဝ် ပၼ်ဢွင်ႈတီႈလႄႈသင် ဢဝ်ႁူမ်ႇလူမ်ႈပၼ် ၸိူဝ်းၼႆႉလႄႈသင် ၸိူဝ်းၼႆႉ။

ၾၢႆႇၼိုင်ႈၵေႃႈ ပေႃးသေၸုမ်းၸုမ်း ဢဝ်လွင်ႈႁူမ်ႇလူမ်ႈပၼ် ႁိုဝ်ဢမ်ႇၼၼ် ပၼ်တီႈယူႇၵျႃႊၽျႅၼ်ႉၼႆၸိုင် ၸၢင်ႈမီးငိုၼ်းၶဝ်ႈထိုင် ၼိုင်ႈလိူၼ်လႂ် ၼပ်ႉႁူဝ်မိုၼ်ႇသႅၼ်ပျႃး မၼ်း ။ ၸင်ႇၼၼ်လႄႈ ၸုမ်းယိပ်းၵွင်ႈၵၢင်ႇ ၸိူဝ်းၼၼ်ႉ ၸင်ႇႁပ်ႉႁွင်းပၼ်တီႈယူႇ ၼႆ ၶၢဝ်ႇလိုဝ်းႁူင်ဝႆႉၼင်ႇၼႆ ။

ဢိင်ၼိူဝ် လၢႆပႃႈၾၢႆႇပၼ်ႁႅင်းဢီး တႃႇၽဵဝ်ႈမူၺ်ႉၵၢၼ်ၵျႃႊၽျႅၼ်ႉၼႆႉသေ သိုၵ်းမၢၼ်ႈလႄႈ တၢင်ႇမူႇတၢင်ႇၸုမ်း ဢွၼ်ၵၼ် လူင်းမိုဝ်းၵႂၢတ်ႇလၢင်ႉယူႇသေတႃႉ ဢမ်ႇမူတ်းၸၢင်ႇလႆႈ ။ ယွၼ်ႉဝႃႈ ၼႃႈလိၼ်ဢၼ်ၸုမ်းၵျႃႊၽျႅၼ်ႉသွၼ်ႈယူႇဝႆႉၸိူဝ်းၼၼ်ႉ မၢင်တီႈ ပဵၼ်ၼႃႈတီႈၸုမ်းယိပ်းၵွင်ႈၵၢင်ႇလၢႆၸုမ်း ၵုမ်းဝႆႉသွၼ်ႉၵၼ် ။

မိူဝ်ႈၸုမ်းၼိုင်ႈၶႂ်ႈလိုပ်ႈလမ်းတီႉၺွပ်းၵေႃႈ ပေႃးထႅင်ႈၸုမ်းၼိုင်ႈ ဢမ်ႇႁၼ်လီၸွမ်းၼႆ ဢမ်ႇၸၢင်ႈၵႂၢတ်ႇလၢင်ႉၽဵဝ်ႉမူၺ်ႉထိုင်တီႈ ။ ဝၢၼ်ႈမိူင်းၵေႃႈ သမ်ႉဢမ်ႇမီးပၵ်းပိူင်ဢၼ်ၵႅၼ်ႇၶႅင်ၼႅၼ်ႈၼႃႁူမ်ႇငမ်းဝႆႉလႄႈ တႃႇတေထိုင်တီႈ မၼ်းဢမ်ႇငၢႆႈၼႆ – ၼၢင်းၶႂၢၼ်လဵၵ်း ၽူႈလဵပ်ႈႁဵၼ်းၵၢၼ်မိူင်းၵေႃႉၼိုင်ႈလၢတ်ႈၼႄဝႆႉၼင်ႇၼႆ –

ပေႃးဢဝ်ၵၢၼ်မိူင်းဝႃႈၼႆ တွၼ်ႈတႃႇသိုၵ်းမၢၼ်ႈၵေႃႈ မိူဝ်ႈလဵဝ်ၶဝ်ၽဵဝ်ႈမူၺ်ႉၼႄယူႇသေတႃႉ ဢမ်ႇၼၼ်ၵေႃႈ ၸုမ်းလႂ်ၵေႃႈယဝ်ႉ SSPP ၵေႃႈယဝ်ႉ ၸုမ်းလုၵ်ႉၽိုၼ်ႉၵေႃႈယဝ်ႉ ၶဝ်ႁဵတ်းယူႇၼႆသေတႃႉၵေႃႈ ၶဝ်ၵုမ်းထိင်းၼႆႉ မၼ်းဢမ်ႇၸႂ်ႈၸုမ်းလဵဝ်ၼၼ်ႉၼႃႇၼေႃႈ။ မၢင်တီႈၵေႃႈ မၼ်းသမ်ႉထၢပ်ႈၵၼ်သေဝႃႇ လႅၼ်လိၼ်ၸိူဝ်းၼႆႉ တွၼ်ႈတႃႇၵျႃႊၽျႅၼ်ႉၸိူဝ်းၼႆႉ မၼ်းတိုၼ်းတေမီးယူႇဢွင်ႈတီႈသေတီႈတီႈၼၼ်ႉၼႃႇၼေႃႈ။ ပေႃးငဝ်းလၢႆးမၼ်း သုၵ်ႉသၵ်ႉယူႇ ၸိူင်ႉၼႆတႄႉ ၸုမ်းလႂ်ၵေႃႈယဝ်ႉ မၼ်းတေဢမ်ႇၽဵဝ်ႈမူၺ်ႉႁၢႆလႆႈၼၼ်ႉၼႃႇၼေႃႈ ။ မၼ်းတိုၼ်း တေမီးယူႇ။ လွင်ႈမုင်ႈမွင်းတႄႉၵေႃႈ ပေႃးၵၢၼ်ဝၢၼ်ႈၵၢၼ်မိူင်းလီဝႃႇ ပေႃးမီးၵၢၼ်ဢုပ်ႉပိူင်ၸိူဝ်းၼႆႉၼၼ်ႉ ပေႃးဝႃႈ ပၵ်းပိူင်ၸိူဝ်းၼႆႉ ၶႅင်ႁႅင်းလီ ။ ပေႃးၼႂ်းၸုမ်း မိူၼ်ၼင်ႇ လူင်ပွင်ၸိုင်ႈၵေႃႈယဝ်ႉ ၸိူဝ်းဢၼ်တေမႃးဢုပ်ႉယူႇ ၸိူဝ်းၼႆႉ ၵေႃႈယဝ်ႉ ႁူမ်ႈမိုဝ်းၵၼ်သေ ႁဵတ်းၵၢၼ်ၸွမ်းၵၼ် ၸင်ႇၵႆႈတေၸၢင်ႈၽဵဝ်ႈမူၺ်ႉၵျႃႊၽျႅၼ်ႉၼႆႉၼၼ်ႉၼႃႇၼေႃႈ ဢၼ်ၶႃႈႁၼ်ထိုင်တႄႉ

မိူၼ်ၼင်ႇ ၼႂ်းမိူင်းတႆးၼႆႉ ယွၼ်ႉပိူဝ်ႈ ၵၢၼ်မိူင်းယုင်ႈႁႅင်း ၸုမ်းယိပ်းၵွင်ႈၵၢင်ႇၵေႃႈလိူင်ႇၼမ်လႄႈ ပၵ်းပိူင် ဢမ်ႇႁူမ်ႇငမ်းလႆႈလီ ။ ၸုမ်းၵျႃႊၽျႅၼ်ႉ ၵမ်ႈပႃႈၼမ်သမ်ႉ ႁႃလၢႆးယူႇလွတ်ႈၸွမ်းပိုၼ်ႉတီႈဢၼ်ဢမ်ႇ ၼိမ် သဝ်းၵမ်ႈၼမ် ။ ပေႃးၶဝ်ႁၼ် ငဝ်းလၢႆး ဢၼ်တေ ၸၢင်ႈပိုင်ႈမူႇလႂ် ၸုမ်းလႂ်ၼႆၸိုင် တေဢဝ်ငိုၼ်းမွၼ်သေ ၵွပ်ႈယူႇဝႆႉ ဢွင်ႈတီႈၸိူဝ်းၼၼ်ႉ။
ၶၢဝ်းတၢင်းသိုၵ်းမၢၼ်ႈၼမ်းၸတ်းပၢင်လိူၵ်ႈတင်ႈ 2025 ၼႆႉၵေႃႈ ဢိင်ၼိူဝ်ဢၢမ်းၼၢတ်ႈၶႄႇသေ သိုၵ်းမၢၼ်ႈလႆႈလူင်းမိုဝ်း ၽဵဝ်ႈဢွင်ႈတီႈၸုမ်းႁဵတ်းၵၢၼ်ၵျႃႊၽျႅၼ်ႉ ၼႂ်းၸႄႈဝဵင်းသီႇပေႃႉ တင်း ၸႄႈဝဵင်းၵျွၵ်ႉမႄးသိပ်ႉထီႇမႃးႁႅင်း။ ၵျႃႊၽျႅၼ်ႉၵေႃႈ ၸင်ႇသိုပ်ႇလၢမ်းၽႄႈၵႂႃႇတၢင်း မိူင်းတႆးပွတ်းၸၢၼ်း ပွတ်းဢွၵ်ႇထႅင်ႈ ။ ၸိူဝ်းပဵၼ်ႁူဝ်ပဵၼ်တီးမၼ်း ၶၢမ်ႈၼမ်ႉၶွင်သေ ၶၢႆႉၸူးမိူင်းလၢဝ်းၵေႃႈ မီးၼႆ ၵူၼ်းတႃႈၶီႈလဵၵ်းလၢတ်ႈ။

ၵူၼ်းမိူင်းထုင်ႉၼမ်ႉလၼ်ႈၵေႃႉၼိုင်ႈၵေႃႈ လၢတ်ႈဝႃႈ “ ၸုမ်းၵျႃႊၽျႅၼ်ႉၸိူဝ်းၼႆႉ လုၵ်ႉတၢင်းပွတ်းႁွင်ႇႁႄ ၶၢႆႉၵႂႃႇတၢင်းၼႄႇၸၢပ်ႈပွတ်းၸၢၼ်းၼၼ်ႉၵမ်ႈၼမ်ယဝ်ႉ။ ၸုမ်းၸိူဝ်းဢၼ်ႁဵတ်း တၢင်းၵျွၵ်ႉမႄးဝၼ်းပုၼ်ႉၼၼ်ႉ မိူဝ်ႈလဵဝ်ၶဝ်ၶၢႆႉမႃးတၢင်းၼႂ်းထုင်ႉၼမ်ႉလၼ်ႈ၊ မိူင်းၵိုင် ၸိူဝ်းၼႆႉယဝ်ႉ” ဝႃႈၼႆ။

ၽူႈလူင်ႉလႅၼ်ႇၵၢၼ်မိူင်း လႄႈ မီးလွင်ႈၸမ်ၸႂ်ၵၼ်တင်း ၸုမ်းယိပ်းၵွင်ႈၵၢင်ႇ ၸိူဝ်းတူင်ႉၼိုင်ယူႇၼႂ်းပိုၼ်ႉ တီႈ မိူင်းတႆးပွတ်းႁွင်ႇ လႄႈ မိူင်းတႆးပွတ်းၸၢၼ်း ထတ်းသၢင်လၢတ်ႈ လွင်ႈၵၢၼ်တီႉၺွပ်းၵျႃႊၽျႅၼ်ႉ လႄႈ ယႃႈမဝ်းၵမ် ၼႂ်းမိူင်းတႆးၼၼ်ႉ ၼႆႉပဵၼ်လွၵ်းၽႅၼ်မိူင်းၶႄႇလဵၼ်ႈတေႃႇ ၸုမ်းယိပ်း ၵွင်ႈၵၢင်ႇၸၢဝ်းၶိူဝ်း တင်းသိုၵ်းမၢၼ်ႈ ၵူၺ်းဢမ်ႇၵႃး ၵဵဝ်ႇၵွင်ႉတင်း လၢႆးလဵၼ်ႈၵၢၼ်မိူင်း ၶွင်မိူင်းၶႄႇလွၼ်ႉလွၼ်ႉ” ဝႃႈၼႆ။

သိုၵ်းမၢၼ်ႈ လူင်းမိုဝ်းတီႉၺွပ်းၼႄယူႇသေတႃႉ ၵူၼ်းၸိူဝ်းႁဵတ်းၵၢၼ်ၵျႃႊၽျႅၼ်ႉတိုၵ်ႉၵိုတ်းၶင်ႉဝႆႉ ၸွမ်းၼႂ်းမိူင်းတႆးပွတ်းႁွင်ႇ ၼပ်ႉႁူဝ်ႁဵင် ။ ပေႃးဝႃႈ ပဵၼ်ၵူၼ်းမိူင်းၶႄႇ ႁိုဝ် ၵူၼ်းတၢင်ႇၸိုင်ႈမိူင်းတႄႉ ၸိူဝ်းၺႃးတီႉၺွပ်း သူင်ႇၶိုၼ်းမိူင်းၽႂ်မၼ်းမီးယူႇသေတႃႉ ၸိူဝ်းဢၼ်ပဵၼ်ၵူၼ်းမိူင်းႁူမ်ႈတုမ်မၢၼ်ႈ ဢမ်ႇဢွၵ်ႇၼႃႈဢွၵ်ႇတႃသေ ႁပ်ႉႁဵတ်းၵၢၼ်ၵျႃႊၽျႅၼ်ႉယူႇၸိူဝ်းၼၼ်ႉၵေႃႈ တိုၵ်ႉမီးၼမ်ၼႆ – ၵူၼ်းၸိူဝ်းယၢမ်ႈမီးတူဝ်ထူပ်းၸွမ်းၵၢၼ်ၵျႃႊၽျႅၼ်ႉလၢတ်ႈၼႄၼင်ႇၼႆ။

သင်ၶႂ်ႈပဵၼ်မိူင်းဢၼ်မီးပၵ်းပိူင်လီတႄႉ သိုၵ်းၸုမ်းလႂ်ၵေႃႈယဝ်ႉ တၵ်းတေဢမ်ႇလႆႈ ပၼ်ႁႅင်းၵၢၼ်လွၵ်ႇလႅၼ်ၵိၼ်ငိုၼ်း ၵၢၼ်ၵျႃႊၽျႅၼ်ႉၸိူဝ်းၼႆႉ ။ ဢၼ်ၵျႃႊၽျႅၼ်ႉလိူင်ႇၼမ် ယူႇၼႆႉၵေႃႈ မိူဝ်ႈလဵဝ် ယူႇၼႂ်းမိုဝ်း သိုၵ်းၵူႈၸုမ်းၸုမ်းၵူၺ်း။ ၶဝ်ၵိုင်ႇလီ ပၢၵ်ႈပႅတ်ႈၸွမ်းလူၺ်ႈၸႂ်သိုဝ်ႈယူဝ်း ၼႆ ၵူၼ်းၼုမ်ႇတႆးပွတ်းႁွင်ႇၵေႃႉၼိုင်ႈ လၢတ်ႈဝႆႉၼင်ႇၼႆ –
ဢမ်ႇဝႃႈၸုမ်းလုၵ်ႉၽိုၼ်ႉ ဢမ်ႇဝႃႈ သိုၵ်းမၢၼ်ႈဢၼ် ဢၼ်ဢုပ်ႉမိူင်းယူႇၼႆႉၵေႃႈယဝ်ႉ။ မၼ်းမိူၼ်ၵၼ် ၵူၺ်း ယဝ်ႉဝႃႈ။ ပေႃးၵဵဝ်ႇၵပ်းဝႃႈ ၵျႃႊၽျႅၼ်ႉၼႆ ႁူႉဝႃႈ မီးတီႈၶဝ်ၼၼ်ႉၵူၺ်းယဝ်ႉဝႃႈ ။ ဢမ်ႇဝႃႈ ၵျႃႊၽျႅၼ်ႉလႄႈ ဢမ်ႇဝႃႈ ယႃႈမဝ်းၵမ်ၵေႃႈယဝ်ႉ မၼ်းၵေႃႈ မီးၼႂ်းမိုဝ်းၶဝ်ၵူၺ်း။မၼ်းဢမ်ႇၸႂ်ႈဝႃႈ ပဵၼ်ၵူၼ်းမိူင်း ႁႂ်ႈၵႂႃႇႁဵတ်းၼႆ မၼ်းဢမ်ႇႁဵတ်း လႆႈၶႃႈၵႂႃႈ။

ဢိင်ၼိူဝ် ၵၢၼ်ၵျႃႊၽျႅၼ်ႉၸိူဝ်းၼႆႉ လိူင်ႇၼမ်သေ ၼႂ်းမိူင်းတႆး ႁိုဝ် မိူင်းမၢၼ်ႈပတ်းပိုၼ်ႉ ၵၢၼ်ဢၼ်ဢမ်ႇထုၵ်ႇ ၸွမ်းပၵ်းပိူင်ၵေႃႈ ၼမ်မႃးၸွမ်း ။ ၸဵမ်ဢဝ် ၵၢၼ်ၵႃႉၶၢႆ ယႃႈမဝ်းၵမ် ၼႂ်းႁၢၼ်ႉၵိၼ်ၵျေႃႇၵူႈသႅၼ်းသႅၼ်း ၊ ၵၢၼ်တေႃႇလွင်းၸိူဝ်းၼႆႉ လိူင်ႇၼမ်မႃးၸွမ်း။

တႃႇႁွင်ႉႁူၺ်းၵၼ် ႁဵတ်းၵၢၼ်ၵျႃႊၽျႅၼ်ႉၵေႃႈငၢႆႈလိူဝ် ဝၢၼ်ႈမိူင်းၼိမ် ၊ ယွၼ်ႉဝႃႈ ပဵၼ်ၵၢပ်ႈႁႃငိုၼ်းယၢပ်ႇ ၵူၼ်းၸိူဝ်းၶႂ်ႈႁႃငိုၼ်းတၢင်းလတ်းသမ်ႉၼမ်လႄႈ ၵၢၼ်ၵျႃႊၽျႅၼ်ႉ ၵၢၼ်ၵႃႉယႃႈ ၵၢၼ်တေႃႇလွင်းၸိူဝ်းၼႆႉ ၸင်ႇပဵၼ်ၵၢၼ်လဵင်ႉတွင်ႉ ၵူၼ်းမိူင်းမႃး ။ တႃႇတေမီးၵူၼ်းၶႂ်ႈၶဝ်ႈႁဵတ်းၵၢၼ်ၸိူဝ်းၼႆႉၵေႃႈ ပေႃႈလဵင်ႉမႄႈလဵင်ႉ ၸိူဝ်းၼမ်းၵၢၼ်ၸိူဝ်းၼႆႉ ပိုၼ်ၽၢဝ်ႇႁွင်ႉႁူၺ်းဝႃႈ ၸၢင်ႈငိုၼ်းၼမ်လၢႆလၢႆပုၼ်ႈ ဝႃႈၼႆ။

ဢမ်ႇၵွမ်ႉၵူၼ်းမိူင်းၵူၺ်း ၸိူဝ်းပဵၼ်ၽူႈမီးဢႃႇၼႃႇ ၼႂ်းပိုၼ်ႉတီႈလႂ်တီႈၼၼ်ႈၵေႃႈ မၢင်ႇၵိူဝ်းလႆႈၵဵပ်းၵိၼ်ၶွၼ်ႇ ၸုမ်းၵျႃႊၽျႅၼ်ႉသေ ၵိုင်ႇလီၵႂၢတ်ႇလၢင်ႉပၢၵ်ႈပႅတ်ႈယူႇသေႃႉ တင်ႈၸႂ်ဝႆႉၵိုၵ်းၼႂ်းဢွင်ႈတီႈၽႂ်မၼ်း ။ သိုၵ်းမၢၼ်ႈ ၼႆၵေႃႈ ၼင်ႇႁိုဝ် လုမ်ႈၾႃႉ တေႁပ်ႉႁၼ်ဝႃႈ ၶဝ်ပဵၼ်ၸုမ်းဢၼ်တူၺ်းထိုင်ဝၢၼ်ႈမိူင်းတႄႉၼႆၼၼ်ႉ ၸင်ႇတီႉၺွပ်း ဢဝ်လိူင်းၵူၼ်းၵၢၼ်ၵျႃႊၽျႅၼ်ႉ။ တႃႇလႆႈၸိုဝ်ႈလီ ၽွင်းၸတ်းပၢင်လိူၵ်ႈတင်ႈၵူၺ်းႁိုဝ် ၼႆ ၵူၼ်းၸိူဝ်းပၵ်းတႃ ပႂ်ႉတူၺ်းၵၢၼ်မိူင်းမိူင်းႁူမ်ႈတုမ်မၢၼ်ႈ ဢွၼ်ၵၼ် ထတ်းသၢင်ၼင်ႇၼႆ။