ၵူၼ်းမိူင်းဝဵင်းဝၢၼ်ႈငႂ်ႈ (ယႂႃႇငၢၼ်ႇ ) ၸိုင်ႈတႆးပွတ်းၸၢၼ်း 4 ၵေႃႉ ထုၵ်ႇ ၸုမ်းဢမ်ႇႁူႉၾၢႆႇၶဝ်တီႉၺွပ်း ႁိုင်ၶၢဝ်းတၢင်း 2ဝူင်ႈပၢႆ ပႆႇလႆႈတင်းၵပ်းသိုပ်ႇ ၼႆယဝ်ႉ ။

ဝၼ်းတီႈ 27 လိူၼ်ၵျႅၼ်ႊၼိဝ်ႊရီႊ ယၢမ်းၵၢင်ၶမ်ႈ 10 မူင်း မီးၸုမ်းဢမ်ႇႁူႉၾၢႆႇၶဝ် ၼႂ်းဝၢၼ်ႈ လႄႇၵၢႆး ( လယ်ကိုင်း ) ၼႂ်းၸႄႈဝဵင်းယႂႃႇငၢၼ်ႇ ၶဝ်ႈတီႉၺွပ်းၵႂႃႇ ၵူၼ်း 4 ၵေႃႉ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇ ႁဵတ်းႁႂ်ႈၵူၼ်းတီႈႁိူၼ်း မႆႈၸႂ်လွင်ႈႁူမ်ႇလူမ်ႈလွတ်ႈၽေးၸိူဝ်းၶဝ်   ဝႃႈၼႆ ။

ၵူၼ်းၸၢႆး ဝဵင်းဝၢၼ်ႈငႂ်ႈ ဢႃယုမွၵ်ႈ 30  ပီလၢတ်ႈၽူႈတွႆႇႁွၵ်ႈဝႃႈ -“ ထုၵ်ႇတီႉၺွပ်းၵႂႃႇၼၼ်ႉၸႂ်ႈဢေႃႈ ၊ ၵူၺ်း ဢမ်ႇႁူႉဝႃႈ ၸုမ်းလႂ်တီႉၺွပ်းၵႂႃႇ ၊ တၢႆႁႃႉလိပ်းႁႃႉၵေႃႈ ဢမ်ႇလႆႈႁူႉ ထိုင်ဝၼ်းမိူဝ်ႈၼႆႉ ဢမ်ႇလႆႈလွင်ႈၵပ်းသိုပ်ႇသင် ၵူၼ်းတီႈႁိူၼ်းတႄႉ မႆႈၸႂ်ဝႆႉႁႅင်းၼႃႇဢေႃႈ”-ဝႃႈၼႆ ။

ၵူၼ်းၸိူဝ်းထုၵ်ႇတီႉၺွပ်းၵႂႃႇၼၼ်ႉ ပဵၼ်လုင်းၸၢၼ်ႇသူၺ်ႇမိၼ်ႉ ဢႃယု 54 ပီ ၊ လုင်းၵျေႃႇမူဝ်းတူႇ ဢႃယု 44 ပီလႄႈ ၊ မဝေႇသူႉလၢႆ ဢႃယု 44 ပီလႄႈ ၵူၼ်းၸၢႆးဢႃယု 63 ပီ  ႁူမ်ႈသဵင်ႈ 4 ၵေႃႉ  ။  မီးၸုမ်းယိပ်းၵွင်ႈၵၢင် ၼုင်ႈၶူဝ်းၵူၼ်းႁိူၼ်းသေ ၶဝ်ႈတီႉၺွပ်းၵႂႃႇ တီႈႁိူၼ်း – လႆႈႁူႉၼင်ႇၼႆ ။

  ၵူၼ်းဢၼ်ထုၵ်ႇတီႉၺွပ်းၵႂႃႇ4 ၵေႃႉၼၼ်ႉ ပဵၼ်ၵူၼ်းဢမ်ႇၵဵဝ်ၶွင်ႈၵၼ်တင်း ၸုမ်းယိပ်းၵွင်ႈၵၢင်ႇၸုမ်းလႂ်လႄႈ ၊ ဢမ်ႇၸႂ်ႈ ၵူၼ်းတူင်ႉၼိုင် ၵၢၼ်မိူင်း- ၵွပ်ႈၼႆၶႂ်ႈႁႂ်ႈ ပွႆႇပၼ်ၶဝ်ၶိုၼ်းဝႆးဝႆး ၵူၼ်းပိုၼ်ႉတီႈလၢတ်ႈၼင်ႇၼႆ  ။  

တီႈႁိမ်းႁွမ်းဝၢၼ်ႈ လႄႇၵၢႆးၼၼ်ႉ မီးၸုမ်းသိုၵ်းမၢၼ်ႈလႄႈ ၸုမ်းၵႅတ်ႇၶႄၵူၼ်းမိူင်းၼႂ်းပိုၼ်ႉတီႈ (ဒေသခံပြည်သူ့ကာကွယ်ရေးတပ်ဖွဲ့ ) တူင်ႉၼိုင်ၵႂႃႇမႃး ။ ယွၼ်ႉၵူၼ်းမိူင်းလႄႈ ၵၢင်ႉၵႄႇ ၵႆႉထုၵ်ႇၶႃႈႁႅမ် ၊ ၵႆႉထုၵ်ႇတီႉၺွပ်းလႄႈ ႁဵတ်းႁႂ်ႈၵူၼ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈ   ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တလဵဝ် ၼႂ်းပိုၼ်ႉတီႈငဝ်းလၢႆးမၼ်းဢမ်ႇပေႃးလီ ၊ ၸုမ်းယိပ်းၵွင်ႈၵၢင်ႇၵေႃႈၼမ် ၊ ပေႃးပဵၼ်မႃးသေလွင်ႈလွင်ႈၼႆႉ ပဵၼ်ၸုမ်းလႂ်ၵေႃႈဢမ်ႇႁူႉ ၊ ၽႂ်တီႉၺွပ်းၵႂႃႇၵေႃႈဢမ်ႇတၼ်းႁူႉ ၊ ဢမ်ႇမီးလွင်ႈႁူမ်ႇလူမ်ႈသေတီႈ ၊ ယူႇတီႈႁိူၼ်းၸဝ်ႈၵဝ်ႇတင်းဢမ်ႇႁူမ်ႇလူမ်ႈ – လႆႈမႆႈၸႂ်ဢေႃႈ”- ဝႃႈၼႆ ။

မိူၼ်ၼင်ၼႆ မိူဝ်ႈလိူၼ်ၵျုၼ်ႊ ပီ2025 ၼၼ်ႉၵေႃႈ  ၵူၼ်းႁွင်ႈၵၢၼ်ၾၢႆႇၽွင်းငမ်းၵူႈလွင်ႈ 3 ၵေႃႉ ထုၵ်ႇၸုမ်းဢမ်ႇႁူႉၾၢႆႇတီႉၺွပ်းဢဝ်ၵႂႃႇ  တီႈသဵၼ်ႈတၢင်း တူၼ်ႈတီး – ယႂႃႇငၢၼ်ႇ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇ လႄႈ ဢမ်ႇမီးၸုမ်းလႂ် ပိုၼ်ၽၢဝ်ႇ ပဵၼ်တၢင်းၵၢၼ်   ။