သွင်ၽူဝ်မႄး ယူႇပွၵ်ႉၵၢတ်ႇ (စျေးတန်းရပ်ကွက်) ဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၸိုင်ႈတႆးပွတ်းၸၢၼ်း ထုၵ်ႇၸုမ်းဢမ်ႇႁူႉၾၢႆႇၶႃႈႁႅမ်တၢႆ ဝႃႈၼႆ ။

မိူဝ်ႈဝႃး ဝၼ်းတီႈ 13/5/2026 ယၢမ်းဝၢႆးဝၼ်း 4 မူင်းပၢႆၼၼ်ႉ ၸုမ်းဢမ်ႇႁူႉၾၢႆႇ ၶဝ်ႈမႃးတႅင်းသွင်ၽူဝ်မေးတၢႆ ထိုင်ၼႂ်းႁိူၼ်း။  

ၵူၼ်းၸၢႆးဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ –“မိူဝ်ႈဝႃး ဝၢႆးဝၼ်းၼႆႉ ၶဝ်ၽူဝ်မေးထုၵ်ႇၶႃႈႁႅမ်တၢႆ ၊ ၸုမ်းလုၵ်ႉၽိုၼ်ႉတႄႉ လႅပ်ႈဢမ်ႇၸႂ်ႈ ၊ လႅပ်ႈတေပဵၼ် မီးဢမ်ႇပဵင်းပေႃးၸႂ်ၵၼ်သေ ၶႃႈႁႅမ်ၵႂႃႇ ၊ ၶဝ်ပဵၼ်ၵူၼ်းႁဵတ်းၵၢၼ်ၵႃႉဝူဝ်း ၊ တလဵဝ်ၼႂ်းဝဵင်းသိုၵ်းမၢၼ်ႈထႅမ်ႁႅင်းသိုၵ်းပေႃးတဵမ်ၵႂႃႇသဵင်ႈ ”– ဝႃႈၼႆ ။

သွင်ၽူဝ်မႄးဢၼ်ထုၵ်ႇၸုမ်းဢမ်ႇႁူႉၾၢႆႇ ၶႃႈႁႅမ်ထိုင်ၼႂ်းႁိူၼ်းၼၼ်ႉ ဢႃယု တေမီးမွၵ်ႈ 40 ပီ ။ ၶဝ်ပဵၼ်ၵူၼ်းၵၢၼ်ၵႃႉဝူဝ်း။ ႁဵတ်းၵၢၼ်ၽုၵ်ႇသွမ်ႈ။  ပဵၼ်ၵူၼ်းမိူင်းႁႃၸဝ်ႈၵိၼ်ၶမ်ႈ ဢၼ်ဢမ်ႇၵဵဝ်ၶွင်ႈၵၼ်တင်းၵၢၼ်မိူင်း။   ပဵၼ်ယွၼ်ႉသင် ပဵၼ်ၸုမ်းလႂ် ၶႃႈႁႅမ်ၵႂႃႇဢၼ်ဝႃႈၼၼ်ႉဢမ်ႇမီးၽႂ်ယိုၼ်ယၼ် ။

ဝၢႆးသွင်ၽူဝ်မႄးထုၵ်ႇၶႃႈႁႅမ်ၵႂႃႇယဝ်ႉ ယၢမ်းလဵဝ်  သိုၵ်းမၢၼ်ႈထႅမ်ႁႅင်းသိုၵ်းၵူတ်ႇထတ်း  ၼႂ်းပွၵ်ႉၼႂ်းယွမ်ႇ  ၼႂ်းဝဵင်းယႂႃႇငၢၼ်ႇ ႁၢဝ်ႈႁႅင်းဝႆႉဝႃႈၼႆ ။

ၸွမ်းၼင်ႇသဵၼ်ႈမၢႆ ၸုမ်းၶၢဝ်ၽူႈတွႆႇႁွၵ်ႈ ၵဵပ်းဝႆႉၼၼ်ႉတႄႉ တႄႇဢဝ်ၼႂ်းလိူၼ်မေႊ ဝၼ်းတီႈ 2 ထိုင် ဝၼ်းတီႈ 14 မိူဝ်ႈၼႆႉၵူၺ်း ၵူၼ်းမိူင်းလႄႈ ပိဝ်ႇသေႃးထီး ထုၵ်ႇၸုမ်းဢမ်ႇႁူႉၾၢႆႇ ႁဵတ်းႁၢႆႉၶႃႈႁႅမ်တၢႆ မီးၵႂႃႇ 5 ၵေႃႉယဝ်ႉ၊   ယၢမ်းလဵဝ် ၵူၼ်းမိူင်းဢမ်ႇမီး လွင်ႈႁူမ်ႇလူမ်ႈ ၵႂႃႇမႃး လွတ်ႈလႅဝ်း – ၵူၼ်းပိုၼ်ႉတီႈလၢတ်ႈ ။   

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။

ဝၢႆးလင် တပ်ႉသိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းၼႆႉ ၼႂ်းၸႄႈဝဵင်းယႂႃႇငၢၼ်ႇ ၵူၼ်းမိူင်းထုၵ်ႇႁဵတ်းႁၢႆႉႁႅမ်တၢႆလၢႆလၢႆၵေႃႉ၊ ၸိူဝ်းပဵၼ် ပူႇၵၢင်ႉပူႇၵႄႇၵေႃႈ ထုၵ်ႇၸုမ်းဢမ်ႇႁူႉၾၢႆႇ ႁႅမ်တၢႆ၊ ၵူၼ်းၸိူဝ်း ဢၼ်သိုၵ်းမၢၼ်ႈထၢင်ႇထိူမ်ဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉၼၼ်ႉၵေႃႈ ထုၵ်ႇတီႉၺွပ်းႁဵတ်းႁၢႆႉလၢႆလၢႆၵေႃႉ ။