ဝဵင်းယႂႃႇငၢၼ်ႇ (ဝၢၼ်ႈငႂ်ႈ) ၸိုင်ႈတႆးပွတ်းၸၢၼ်း ၼႆႉ ပႃးၼႂ်းပၢင်လိူၵ်ႈတင်ႈၵမ်းထီႉသွင် ဢၼ်သိုၵ်းမၢၼ်ႈၸတ်းႁဵတ်း မိူဝ်ႈဝၼ်းတီႈ 11/1/2026 ၼႆႉ ။

 ၽွင်းၵူၼ်းမိူင်းၵႂႃႇပၼ်သဵင်ၵၢင်ၸႂ်ယူႇၼၼ်ႉ  သိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း ထူဝ်းသိုၵ်းၶဝ်ႈၼႂ်းဢိူင်ႇၼႂ်းဝၢၼ်ႈ ဢဝ်ႁူမ်ႇလူမ်ႈ ပိုၼ်ႉတီႈႁၢဝ်ႈႁႅင်းယဝ်ႉ ၶၢၼ်းၵူၼ်းဝၢၼ်ႈသူင်ႇပၼ်ႁေႃႇၶဝ်ႈႁေႃႇၽၵ်းၶဝ်ပႃး ။

ဝၼ်းတွတ်ႈၶႅပ်းၵၢင်ၸႂ်ၼၼ်ႉ ပလိၵ်ႈသိုၵ်းမၢၼ်ႈ လႄႈ ၵူၼ်းၵမ်ႉထႅမ်သိုၵ်းမၢၼ်ႈ ပိဝ်ႇသေႃးထီး ၵႂႃႇပႂ်ႉတီႈပွၵ်ႉ/ဝၢၼ်ႈ ဢၼ်မီးႁူင်းတွတ်ႈၶႅပ်းၵၢင်ၸႂ် ၼိုင်ႈတီႈဢမ်ႇယွမ်း 20 ၵေႃႉ ၶၢၼ်းၵူၼ်းပိုၼ်ႉတီႈသူင်ႇႁေႃႇၶဝ်ႈၽၵ်းပၼ် တႃႇၶၢဝ်းတၢင်း 3 ဝၼ်း ဝႃႈၼႆ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ မိူဝ်ႈၽွင်းမႃးပႂ်ႉႁူင်းတွတ်ႈၶႅပ်းၵၢင်ၸႂ်ၼၼ်ႉ လႆႈ သူင်ႇပၼ်ႁေႃႇၶဝ်ႈပၼ်ၶဝ်(သိုၵ်းမၢၼ်ႈ ) ။  ဢၼ်ၶဝ်ၶၢၼ်းႁေႃႇၶဝ်ႈၸွၵ်းၽၵ်းၼႆႉ ဢမ်ႇၸႂ်ႈ ပွၵ်ႈၼႆႉပွၵ်ႈလဵဝ်  ၶဝ်ထႅမ်ႁႅင်းသိုၵ်းမႃးမိူဝ်ႈလႂ်ၵေႃႈ ၵူၼ်းဝၢၼ်ႈ လႆႈၵႂႃႇသူင်ႇပၼ် ႁေႃႇၶဝ်ႈ ႁေႃႇ ၽၵ်းတႃႇၶဝ် တီႈၵျွင်းမုၼ်ၸဝ်ႈတႃႇသေႇ ၊ တီႈၼႂ်းဝၢၼ်ႈ ၸိူဝ်းၼၼ်ႉ ၵေႃႈယိပ်း ၵွင်ႈၵၢင်ႇသေ ဢႅဝ်ႇႁႃယွၼ်းၵိၼ် မၢၵ်ႇမႆႉ ၊ ၽၵ်း ၊ ၵႆႇလဝ်ႈၶဝ်ႈၼိူဝ်ႉ ၸိူဝ်းၼႆႉ  ၊ ဝၢႆးပၢင်လိူၵ်ႈတင်ႈၼႆႉ မၢင်ဝၢၼ်ႈတႄႉၶဝ်ပွၵ်ႈၶိုၼ်းယဝ်ႉ ၊ မၢင်ဝၢၼ်ႈတႄႉ တိုၵ်ႉပၵ်းတပ်ႉဝႆႉယူႇ ”- ဝႃႈၼႆ ။

ယၢမ်းလဵဝ် ဝၢၼ်ႈဢၼ်သိုၵ်းမၢၼ်ႈပၵ်းတပ်ႉ ဢဝ်ႁူမ်ႇလူမ်ႈ ႁၢဝ်ႈႁႅင်းၼၼ်ႉ ပဵၼ်ဝၢၼ်ႈ ငွၵ်းသွၵ်ႇ (ငှက်သောက်) ၊ ၵျွၵ်ႉငႅၵ်ႉ (ကျောက်ငှက် ) မိၼ်းပလွင်ႈ (မင်းပလောင်) ၊ တိတ်ႉတမိတ်ႉ (သစ်သမြစ် ) ၊ တွင်ႇၽီႇ (တောင်ဖီ) ၸိူဝ်းၼႆႉ ဝႃႈၼႆ ။

ထိုင်ဝၼ်းမိူဝ်ႈၼႆႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉ ပဢူဝ်း ထူဝ်းသိုၵ်း ၶဝ်ႈၼႂ်းဢိူင်ႇၼႂ်းဝၢၼ်ႈမိူဝ်ႈလႂ်ၵေႃႈ ၵူၼ်းဝၢၼ်ႈလႆႈသူင်ႇႁေႃၶဝ်ႈႁေႃၽၵ်းပၼ် ၼႆႉမီးမႃး မွၵ်ႈ 3-4 လိူၼ်ယဝ်ႉ- ၵူၼ်းပိုၼ်ႉတီႈလၢတ်ႈ ။

ၵူၼ်းႁဵတ်းၵၢၼ်သုၼ်ႇလႆႈသုၼ်ႇပဵၼ်ၼႂ်းၸႄႈဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ -“ ၵူၼ်းဝၢၼ်ႈတႄႉလႆႈၵူဝ်တႃႇသေႇယဝ်ႉ ။ ပေႃးၵႂႃႇသူင်ႇပၼ်ႁေႃၶဝ်ႈ ၵေႃႈ ၼႅတ်ႈသူင်ႇၼႅတ်ႈမိူဝ်း ၶဝ်ဢမ်ႇမီးၵွင်ႈၵၢင်ႇသင်တင်းပေႃးလႆႈၵူဝ်ႇယူႇယဝ်ႉ ။ ပေႃးပႃးၵွင်ႈၵၢင်ႇမႃးတႄႉ ၶႅၼ်းၼႃႇ ၊ ၶဝ်ယွၼ်းသင် လႆႈပၼ်ၼၼ်ႉဢေႃႈ”- ဝႃႈၼႆ ။

လိူဝ်သေ သိုၵ်းမၢၼ်ႈထူဝ်းသိုၵ်း ပၵ်းတပ်ႉယူႇၼႂ်းဢိူင်ႇၼႂ်းဝၢၼ်ႈယဝ်ႉ မိူၼ်ၼင်ႇ တၢင်းဝၢၼ်ႈၵျွၵ်ႉတေႃး  ၼႂ်းထိူၼ်ႇၸိူဝ်းၼၼ်ႉၵေႃႈ ၵႆႉလႆႈယိၼ်းသဵင်ၵွင်ႈ သဵင်မၢၵ်ႇလႄႈ ႁဵတ်းႁႂ်ႈၵူၼ်းပိုၼ်ႉတီႈမႆႈၸႂ်လွင်ႈႁူမ်ႇလူမ်ႈ ဝႃႈၼႆ ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၶဝ်ထူဝ်းသိုၵ်းၶဝ်ႈ ၵွၼ်ႇၼႃႈပၢင်လိူၵ်ႈတင်ႈပုၼ်ႉ ၼႂ်းဝၢၼ်ႈၸိူဝ်းၼၼ်ႉ ယွၼ်ႉဝႃႈ မၼ်းၸမ်ၵၼ်တင်း ၸုမ်းလုၵ်ႉၽိုၼ်ႉၼႆလႄႈ ထိုင်မိူဝ်ႈလဵဝ် တိုၵ်ႉပၵ်ႉတပ်ႉဝႆႉယူႇ ၊ ၶဝ် ၶႅၼ်ႈဝၼ်းမၼ်းသေ ထူဝ်းသိုၵ်းၶဝ်ႈၼႂ်းဝၢၼ်ႈ ၊  ၵႆႉလႆႈယိၼ်းသဵင်ႇၵွင်ႈသဵင်မၢၵ်ႇၼႂ်းထိူၼ်ႇ ၵူႈဝၼ်း”- ဝႃႈၼႆ။

လိူဝ်ၼၼ်ႉ မၼ်းၼၢင်းသိုပ်ႇလၢတ်ႈထႅင်ႈဝႃႈ -“ ဢမ်ႇမီးပၢင်တိုၵ်းၵေႃႈ  သိုၵ်းမၢၼ်ႈ ထူဝ်းသိုၵ်းထႅမ်ႁႅင်းမႃးယူႇၵူႈဝၼ်း ၊ သင်ဝႃႈ ၸုမ်းလုၵ်ႉၽိုၼ်ႉၶဝ် ၵၢင်မၢၵ်ႇပွႆႇမၢၵ်ႇတူၺ်းလႄႈ ပၢင်တိုၵ်းၼႆႉ တိုၼ်းတေပဵၼ်ယဝ်ႉ ၶႂ်ႈလၢတ်ႈဝႃႈ ပေႃးဢမ်ႇဢဝ်ႁူမ်ႇလူမ်ႈပၼ်လႆႈ ၊ ဢမ်ႇဢဝ်ပုၼ်ႈၽွၼ်းပၼ်ၵူၼ်းပိုၼ်ႉတီႈလႆႈၼႆႉ ဢမ်ႇၶႂ်ႈႁႂ်ႈ ႁဵတ်းသင် မိူၼ်ၼင်ႇဝၢၼ်ႈမိၼ်းပလွင်ႈၼႆႉထုၵ်ႇၾႆးၽဝ်မူတ်း ပဵၼ်ပၢင်တိုၵ်း ၵူၼ်းမိူင်း လႆႈပၢႆႈၽေးသိုၵ်း ဢမ်ႇမီးတီႈယူႇတီႈၵိၼ် ၊  ၼႂ်းၵႄႈၶဝ်တိုၵ်းၵၼ်ယူႇၼႆႉၵူၼ်းမိူင်း ႁဝ်းၶႃႈၵူၺ်း ဢၼ်လႆႈၶၢမ်ႇယူႇၸိူင်ႉၼႆႉ”- ဝႃႈၼႆ ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီး တပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ၼႆယဝ်ႉ။

ႁၢင်ႈ – ပၢႆႉဝဵင်းယႂႃႇငၢၼ်ႇ ( Crd to owner )