ၸၢႆးမွင်ႇတဵင်းလၢႆႇ ဢႃယု 29 ပီ ၵူၼ်းဝၢၼ်ႈသူပ်းသၢႆမႂ်ႇ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ႁၢႆၵႂႃႇၽွင်းသိုၵ်းမၢၼ်ႈတင်ႈလၢၼ်ႇၵူတ်ႇထတ်းၼႂ်းဝဵင်းတႃႈၶီႈလဵၵ်း – ႁၢႆလႆႈ 2 ဝူင်ႈပၢႆ  ၵူၼ်းဢၢၼ်ႇၶၢဝ်ႇၽူႈတွႆႇႁွၵ်ႈ ထူပ်းႁၼ်တူဝ်မၼ်းၸၢႆးသေ ၶိုၼ်းၵပ်းသိုပ်ႇႁႃၵူၼ်းတၢင်းႁိူၼ်းလႄႈ ယၢမ်းလဵဝ်လႆႈပွၵ်ႈၶိုၼ်းႁိူၼ်းယေးယဝ်ႉဝႃႈၼႆ။

ၸၢႆးမွင်ႇတဵင်းလၢႆႇ ၼႆႉ  ဢွၵ်ႇႁိူၼ်းၵႂႃႇ မိူဝ်ႈဝၼ်းတီႈ 24/1/2026 ။  ထိုင်မႃးဝၼ်းတီႈ 6/2/2026 ၸင်ႇမီးၵူၼ်းထူပ်းႁၼ်မၼ်းၸၢႆးတီႈဝဵင်းမိူင်းၽျၢၵ်ႈ ။    

ၸၢႆးမွင်ႇတဵင်းလၢႆႇၼႆႉ မီးတၢင်းပဵၼ်ရူၵ်ႈသိုမ်းသဝ်ႉ (တၢင်းပဵၼ်သဝ်ႈမွင် / တၢင်းပဵၼ်ပၢႆးၸႂ် ) မႃးၶၢဝ်းတၢင်း 7 – 8 ပီယဝ်ႉ။ လႆႈၵိၼ်ယႃႈယႃ ပၢႆးၸႂ်ၼၼ်ႉၵူႈဝၼ်း။  မၼ်းၸၢႆးဢွၵ်ႇႁိူၼ်းၵႂႃႇသေႁၢႆၵႂႃႇၼၼ်ႉ ပဵၼ်ယွၼ်ႉၺႃးသိုၵ်းမၢၼ်ႈတီႉဢဝ်ၵႂႃႇဝႆႉတီႈမိူင်းၽျၢၵ်ႈ ။ ၵူၼ်းမိူင်းၽျၢၵ်ႈ တူၺ်းႁၼ်ၶၢဝ်ႇၽူႈတွႆႇႁွၵ်ႈတၢင်ႇလွင်ႈၵူၼ်းႁၢႆၼၼ်ႉသေ ၵပ်းၾူင်းၸူးၵူၼ်းႁိူၼ်း ၸၢႆးမွင်ႇတဵင်းလၢႆႇ လႄႈ ၸင်ႇႁိပ်ႈၼႅတ်ႈၵႂႃႇဢဝ်တူဝ်မၼ်းၸၢႆးပွၵ်ႈမႃးၶိုၼ်း – ပီႈၼွင်ႉၸမ်ၸႂ်မၼ်းၸၢႆးလၢတ်ႈၼင်ႇၼႆ။

ပီႈၼွင်ႉၸမ်ၸႂ် ၸၢႆးမွင်ႇတဵင်းလၢႆႇ  လၢတ်ႈၽူႈတွႆႇႁွၵ်ႈဝႃႈ – “ မိူဝ်ႈႁၢႆၵႂႃႇၼၼ်ႉ သိုၵ်းမၢၼ်ႈၶဝ်ၺွပ်းၵႂႃႇသွၼ်ၵၢၼ်သိုၵ်းၼႆဢေႃႈ ။ မိူဝ်ႈၼၼ်ႉ ၶဝ်ထၢင်ႇဝႃႈ  မၼ်းၸပ်းယိၼ်ႉယႃႈၼႆသေ လဵင်ႉယႃႈယႃ တိုတ်းယိၼ်ႉယႃႈမၼ်းၼႆဢေႃႈ ၊ တၢင်းပဵၼ်လႄႈယႃႈယႃဢမ်ႇၸႂ်ႈဢၼ်လဵဝ်ၵၼ်သေႁဵတ်းႁႂ်ႈ ၸၢႆးမွင်ႇတဵင်းလၢႆႇ ပဵၼ်ၵိၼ်းမႃးလိူဝ်ၵဝ်ႇ  ။ ၼွၼ်းလၢတ်ႈၵႂၢမ်း ၼွၼ်းၵႂင်တင်းၶိုၼ်း ၊  ၵၢင်ၼႂ်မႃးဢမ်ႇၸိုၼ်ႈဢမ်ႇသႂ်။ ၶဝ်တူၺ်းၾၢင်ႁၢင်ႈမၼ်းၸၢႆး ဢမ်ႇလႅပ်ႈၸႂ်တိတ်းယႃႈ။ မိူၼ်ပဵၼ်တၢင်းပဵၼ်ပၢႆးၸႂ်လႄႈၶဝ်ၸင်ႇပွႆႇမၼ်းၶိုၼ်းဢေႃႈ။ၶွပ်ႈၸႂ်ယႂ်ႇၼမ်ထိုင်ၽူႈတွႆႇႁွၵ်ႈယူႇဢေႃႈ။ ၵတ်ႉၵႃႈလႃႈ ၶဝ်ပေႃးႁဵတ်းပၼ် မၢႆၾၢင် ၵူၼ်းသိုၵ်းမႂ်ႇ(မိူင်းၽျၢၵ်ႈ)မၼ်းသေ ဢၢင်ႈဢဝ်မၼ်းသူင်ႇၵႂႃႇၾိုၵ်းၵၢၼ်သိုၵ်းယူႇယဝ်ႉၶႃႈဢေႃႈၼၼ်ႉ ”- ဝႃႈၼႆ  ။  

ငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆႉ လုၵ်ႈဢွၼ်ႇၸၢႆး လုၵ်ႈဢွၼ်ႇယိင်းၵေႃႈ မီးၽေးၼမ်၊ ၵႆႉႁၢႆ ၼႃႇ၊ ၽေးလၵ်ႉၵူၼ်း ၵႃႉၶၢႆၵူၼ်း ႁူၺ်းႁွင်ႉၵႂႃႇႁဵတ်းၵၢၼ်ၵျႃႊၽျႅၼ်ႉ၊ တီႉၺွပ်း ၵႂႃႇၾိုၵ်း ၵၢၼ်သိုၵ်း ၸဵမ် ၸိူဝ်းၼႆႉ။ ၵွပ်ႈၼႆ  ယူႇတီႈပေႃႈမႄႈၽူႈၵုမ်းတူၺ်းသေ ႁႂ်ႈၾၢင်ႉ လုၵ်ႈၽႂ်လၢင်းမၼ်းလီလီ ။ သင်ဝႃႈ ၵူၼ်းႁၢႆၵႂႃႇၼႆၵေႃႈ ႁႂ်ႈဢွၼ်ၵၼ်ၾၢင်ႉ ယွၼ်ႉၸၢင်ႈမီးၵူၼ်း လႅၼ်ယွၼ်းၵႃႈထုတ်ႇတူဝ်ၶိုၼ်း ၊ ၵိုင်ႇလီ ၾၢင်ႉၶေႃႈမုလ်းတူဝ်ၸဝ်ႈၵဝ် လီလီ – ၵူၼ်းပိုၼ်ႉတီႈလၢတ်ႈၼင်ႇၼႆ ။