သိုၵ်းမၢၼ်ႈလၢမ်းယိုဝ်းၵွင်ႈလူင် ၼႂ်းၸႄႈဝဵင်းၾၢႆၶုၼ် ၸၢၵ်ႇမၢၵ်ႇ တိူဝ်ႉသႂ်ႇၵူၼ်းမိူၼ်းလူႉတၢႆ မၢတ်ႇၸဵပ်း 2 ၵေႃႉဝႃႈၼႆ ။
မိူဝ်ႈၼႆႉ ဝၼ်းတီႈ 6/2/2026 ယၢမ်းၵၢင်ၼႂ် 10 မူင်း ဢမ်ႇပဵၼ်ပၢင်တိုၵ်းသင်သေ သိုၵ်းမၢၼ်ႈလၢမ်းပွႆႇမၢၵ်ႇၵွင်ႈလူင် ႁဵတ်းႁႂ်ႈ တူၵ်းတိုဝ်ႉ ၵူၼ်းဝၢၼ်ႈလႃႉတဵင်း ၾၢႆႇတူၵ်းဝဵင်းၾၢႆၶုၼ် 2 ၵေႃႉ လူႉတၢႆမၢတ်ႇၸဵပ်းၼႆယဝ်ႉ ။
ၵူၼ်းၸၢႆးဢၼ်လႆႈ လူႉတၢႆၵႂႃႇၼၼ်ႉ ၸိုဝ်ႈႁွင်ႉလုင်းသေႃးၼ ဢႃယု 56 ပီ ၺႃးမၢၵ်ႇ လူႉတၢႆ ထင်တီႈ ။ ထႅင်ႈၵေႃႉၼိုင်ႈတႄႉ မၢတ်ႇၸဵပ်း ႁၢဝ်ႈႁႅင်း လႆႈႁၢမ်သူင်ႇယူတ်းယႃတူဝ် ဝႆႉ ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ-“လုၵ်ႉတီႈၾၢႆၶုၼ်ပွႆႇမႃး ၊ ၵႂႃႇတူၵ်းတၢင်း ဝၢၼ်ႈလႃႉတဵင်း ႁဵတ်းႁႂ်ႈ ၵူၼ်းၸၢႆး ၼိုင်ႈၵေႃႉ လူႉတၢႆ ၼိုင်ႈၵေႃႉမၢတ်ႇၸဵပ်း ။ ၵေႃႉဢၼ်လူႉတၢႆၵႂႃႇၼၼ်ႉ ပဵၼ်ၵူၼ်းႁဵတ်းၵိၼ်ႁႃၸဝ်ႉၵိၼ်ၶမ်ႈ တႃႇတေႁႅၼ်းသွမ်းၼႆႉၵေႃႈငိုၼ်းဢမ်ႇမီးၼႆဢေႃႈ”-ဝႃႈၼႆ။
ၼႂ်းႁၢင်လိူၼ် ၵျႅၼ်ႊၼိဝ်ႊရီႊ ၼၼ်ႉ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ်တီႈတၢင်း ႁိမ်းႁွမ်း ဝဵင်းမိူင်းပၢႆးသေတႃႉ ယၢမ်းလဵဝ် တီႈၼႂ်းၸႄႈဝဵင်းၾၢႆၶုၼ် ပၢင်တိုၵ်းယဵၼ်ဝႆႉ သိုၵ်းမၢၼ်ႈလုၵ်ႉတီႈၼႂ်းဝဵင်းၾၢႆၶုၼ် ပိုတ်းယိုဝ်းႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ ။
တႄႇႁူဝ်လိူၼ် ဢွၵ်ႉထူဝ်ႊပိူဝ်ႊ ပီ2025 ၼႆႉမႃး သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ထူဝ်းသိုၵ်းၶဝ်ႈၼႂ်းဝၢၼ်ႈၵေႃမႆႉသၢင်း ဝၢၼ်ႈဝေႃႉယၢၼ် သေ ပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉမႃးၶိုၼ်း ။ လိူဝ်ၼၼ်ႉ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း PNO ၵႆႉၶဝ်ႈတဝ်ၼႂ်းဝၢၼ်ႈၼႂ်းႁိူၼ်းၵူၼ်းမိူင်းသေ ၽဝ်ႁိူၼ်းယေးၵူၼ်းမိူင်းလူႉၵွႆပႃး – ၵူၼ်းပိုၼ်ႉတီႈလၢတ်ႈ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ