သိုၵ်းမၢၼ်ႈတႄႇႁွင်ႉၼၢင်းယိင်းဢႃယု 18 ပီ ၶိုၼ်ႈၼိူဝ် တႃႇႁၢပ်ႇၵၢၼ်သိုၵ်း တီႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း  ။

တႄႇႁူဝ်လိူၼ် ၵျႅၼ်ႊၼိဝ်ႊရီႊၼႆႉမႃးၼၢင်းယိင်းၵူၼ်းယူႇဝဵင်းသီႇသႅင်ႇ  ဢႃယု မီး18 ပီ ထိုင် 27 ပီ ၵၢင်ႉၵႄႇလူင်းၵဵပ်းသဵၼ်ႈမၢႆ တႃႇ ႁၢပ်ႇၵၢၼ်သိုၵ်း ၊ ၼႂ်းသဵၼ်ႈမၢႆ ၼၼ်ႉ ပႃးသဵၼ်ႈၸိုဝ်ႈ လုၵ်ႈဢွၼ်ႇႁဵၼ်းတိုၵ်ႉၵႂႃႇၶိုၼ်ႈႁဵၼ်းပႃး ၼႆယဝ်ႉ ။

တွၼ်ႈတႃႇ တေၵႂႃႇႁၢပ်ႇၵၢၼ်သိုၵ်းၼႆႉ ယူႇတီႈ ၵၢင်ႉၵႄႇ သူင်ႇလိၵ်ႈၸူး ၵူၼ်းပိုၼ်ႉတီႈ ထိုင်ႁိူၼ်းသေ ၊ သင်ၸိူဝ်ႉဝႃႈ ဢမ်ႇၶႂ်ႈၵႂႃႇၼႆၸိုင် တေလႆႈဢဝ်ငိုၼ်းမႃးငူပ်ႉငီႉ ၵၼ်တင်းၵၢင်ႉၵႄႇ ၼႂ်းပွၵ်ႉၽႂ်ပွၵ်ႉမၼ်း  ဝႃႈၼႆ ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ဢၼ်ႁွင်ႉတႄႉ ပႂ်ႇႁိုင် ၊ ၵူၼ်းဢၼ်ပႃး သဵၼ်ႈ ၸိုဝ်ႈ ၼၼ်ႉ ၵၢင်ႉၵႄႇသူင်ႇလိၵ်ႈၸူးထိုင်ႁိူၼ်း  ၊ ပေႃးဢမ်ႇၶႂ်ႈႁၢပ်ႇၵၢၼ်သိုၵ်းၵေႃႈ တေလႆႈပၼ်ငိုၼ်းၼင်ႇၶဝ်ယွၼ်း ၊ ပေႃးၵၢင်ၶမ်ႈၵေႃႈၵၢင်ႉၵႄႇတင်းပလိၵ်ႈသိုၵ်းမၢၼ်ႈ လႄႇလမ်း တီႉ ၵူၼ်းတႃႇၵႂႃႇၾိုၵ်းၵၢၼ်သိုၵ်း ၊ တလဵဝ်ၼႆႉၽႂ်ၵေႃႈ ဢမ်ႇႁတ်းဢွၵ်ႇတင်းၼွၵ်ႈ ၊ တလဵဝ်ၼႆႉ ႁွင်ႉပႃးၼၢင်းယိင်းမႃးယဝ်ႉ”- ဝႃႈၼႆ ။

တီႈဝဵင်းသီႇသႅင်ႇ ၼႆႉ တွၼ်ႈတႃႇႁၢပ်ၵၢၼ်သိုၵ်းမၢၼ်ႈၼႆႉ ၵူၼ်းၸၢႆး ၸိူဝ်းဢႃယု 18 ထိုင် 35 ၵေႃႈ ႁွင်ႉၵႂႃႇႁၢပ်ႇၵၢၼ်သိုၵ်း မႃးထိုင်မႃးၸုပ်ႈ 20 ယဝ်ႉဝႃႈၼႆ ။ ၵူၼ်းဢၼ် ၵႂႃႇႁၢပ်ႇၵၢၼ် သိုၵ်းမၢၼ်ႈ ၸုပ်ႈ ၼိုင်ႈၼၼ်ႉ ထိုင်ဝၼ်းမိူဝ်ႈၼႆႉ ပႆႇပွၵ်ႈမႃးၶိုၼ်းလႄႈ ႁဵတ်းႁႂ်ႈၵူၼ်းပိုၼ်ႉတီႈ ဢမ်ႇၶႆႈၵႂႃႇၾိုၵ်းၵၢၼ်သိုၵ်း   ။

ထႅင်ႈၾၢႆႇၼိုင်ႈၵေႃႈ တႄႇပီ 2024 ၼႆႉမႃးတေႃႇထိုင် လိူၼ်ဢေႃႊၵတ်ႉသ် ပီ 2025 ၼႆႉ ယူႇတီႈ ပျီႇတူႉၸိတ်ႉပဢူဝ်း လွၵ်ႇငိုတ်ႈ တဵၵ်းႁွင်ႉ ၵူၼ်းၸၢႆးပိုၼ်ႉတီႈ ၵႂႃႇၾိုၵ်းၵၢၼ်သိုၵ်းသေ ၸႂ်ႉပႂ်ႉယၢမ်း ၊ သူင်ႇၼႃႈသိုၵ်းၵမ်းသိုဝ်ႈ လႄႈႁဵတ်းႁႂ်ႈၵူၼ်းပိုၼ်ႉတီႈယၢပ်ႇၸႂ်လၢႆလွင်ႈဝႆႉ ဝႃႈၼႆ ။

ဝၢႆးၼႆႉ ၼႂ်းလိူၼ် သႅပ်ႉထႅမ်ႊပိူဝ်ႊ ပီ 2025 ထိုင် ပီ 2026  လိူၼ် ၾႅပ်ႉပိဝ်ႊရီႊ ၼႆႉမႃးတႄႉ ယူႇတီႈ ပျီႇတူႉၸိတ်ႉပဢူဝ်း PNO ပႆႇႁွင်ႉၵူၼ်းၵႂႃႇႁၢပ်ႇၵၢၼ်သိုၵ်းထႅင်ႈ – ၵူၼ်းပိုၼ်ႉတီႈလၢတ်ႈ ။

ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးၾၢႆႇသိုၵ်းမၢၼ်ႈ ႁွင်ႉတႃႇႁၢပ်ႇၵၢၼ်သိုၵ်းၼႆႉ ပျီႇတူႉၸိတ်ႉ ဢမ်ႇႁဵတ်းပၼ်သင် ၊ မိူဝ်ႈဢွၼ်တၢင်းဝႃႈ ပေႃးၶဝ်ႈၼႂ်းပျီႇတူႉၸိတ်ႉ တေဢမ်ႇလႆႈၵႂႃႇႁၢပ်ႇၵၢၼ်သိုၵ်းမၢၼ်ႈၼႆ ၵမ်းၼႆႉဢမ်ႇႁဵတ်းသင်ပၼ် ၊ ပေႃးႁွင်ႉပႃး လုၵ်ႈဢွၼ်ႇႁဵၼ်းၸိူဝ်းၼၼ်ႉတႄႉယၢပ်ႇၸႂ်ယဝ်ႉ ၊ ငဝ်းလၢႆးတလဵဝ်ၼႆႉ တႃႇႁႃၵိၼ်လဵင်ႉတွင်ႉပေႃးယၢပ်ႇယူႇယဝ်ႉ ၊ တႃႇသႂ်ႇငိုၼ်းတႃႇႁၢပ်ႇၵၢၼ်သိုၵ်းၼႆႉၵေႃႈ ဢမ်ႇမီး ”-ဝႃႈၼႆ ။

ၼႂ်းပၵ်းပိူင်မၢႆမီႈၵူၼ်းမိူင်းႁၢပ်ႇၵၢၼ်သိုၵ်းၼၼ်ႉတႅမ်ႈဝႆႉဝႃႈ ပေႃးပဵၼ်ၵူၼ်းမိူင်း ၽူႈၸၢႆး ဢႃယု တၵ်းတေလႆႈမီး ၼႂ်းၵႄႈ 18 ထိုင် 35။ ၼၢင်းယိင်းသမ်ႉ ဢႃယုတေလႆႈမီး 18 ထိုင် 27 ပီ ။ ပေႃးပဵၼ်ၵူၼ်းမီးတၢင်းႁူႉ ႁဵၼ်းလိၵ်ႈသုင်ၸိုင် ပေႃးပဵၼ်ၵူၼ်းၸၢႆး တေႃႇထိုင်ဢႃယု 45 ပီ ၼၢင်းယိင်း 35 ပီ။ သင်ၸိူဝ်ႉပၢႆႈတႃႇႁၢပ်ႇၵၢၼ်သိုၵ်းၸိုင် သင်တီႉလႆႈ တေလႆႈႁပ်ႉတူတ်ႈၶွၵ်ႈ 3 ပီထိုင် 5 ပီ ပႃးဝႆႉၼင်ႇၼႆ။

ၸွမ်းၼင်ႇၼႂ်းသဵၼ်ႈမၢႆႁူဝ်ႁိူၼ်းၵူၼ်းမိူင်း ဢၼ်ၵဵပ်းဝႆႉၼႂ်းပီ 2019 ၼၼ်ႉတႄႉ သိုၵ်းမၢၼ်ႈပိုၼ်ၽၢဝ်ႇဝႆႉဝႃႈ ၵူၼ်းၸၢႆးဢၼ်ၶဝ်ႈပႃးၼႂ်းသဵၼ်ႈမၢႆႁၢပ်ႇၵၢၼ်သိုၵ်း မီး 6 လၢၼ်ႉပၢႆ (6.3 လၢၼ်ႉ) လႄႈၼၢင်းယိင်းမီး 7 လၢၼ်ႉပၢႆ (7.7 လၢၼ်ႉ) ။ တင်းမူတ်းမီးမွၵ်ႈ 14 လၢၼ်ႉ ၸွမ်သိုၵ်းၸေႃႇမိၼ်းထုၼ်း ပိုၼ်ၽၢဝ်ႇလၢတ်ႈဝႆႉၼင်ႇၼႆ။